Dabni Tal ko Machib
1 Bayi n’en ma gad lemnag ni ke yoor i yoor yay ni kad wereged e machib u lan e binaw ni gad ma machib riy kemus rogon ma ri buchuuw e girdi’ ni be motoyil ngay. Machane, boor fan ni nguud machibgad.—Matt. 28:19, 20.
2 Fan e Ngan Nang: I yiiynag Jesus ni fare maruwel ni machib e aram bang ko fare pow ko ‘tin tomren e rran ko re m’ag ney” ma yira rin’ ere n’em ni fan e “nge urngin e girdi’ u gubin yang u fayleng me nang.” (Matt. 24:3, 14) Nap’an nra guydad e girdi’ ni gad be machibnag fare thin nib fel’ ko Gil’ilungun ma aram e gad be ginangrad. Tomren ni kad chuwgad u reb e binaw ma sana bay boch e girdi’ ni yad ra weliy murung’agdad ni mus nfaanra dar motoyilgad ngodad. Ra ga’ fan e machib u wan’dad ma ra ayuwegdad ni nguud athamgilgad. Ma faanra da uned i lebuguy e pi yiiy ko Bible u daken e machib ni gad be tay gad be ginang e girdi’ ma aram e gad be felan’nag Jehovah.—2 Thess. 1:6-9.
3 Ba T’uf e Athamgil: Ba t’uf e athamgil ni bochan e boor ban’en ni bay ni be mitan’ e girdi’ riy maku boor ban’en ni yad be rin’ ni be yoornag pa’ nga puluwrad. Immoy reb e ppin ni gaman reb e duw ni yan e Pi Mich ngar guyed mfini pagrad nga naun rok ni ngar weliyed murung’agen e Bible. Kari adag e n’en ni ke rung’ag, ere m’agan’ ngay ni nge un ko fol Bible, ma aram me tabab i un ko muulung, ma de n’uw nap’an me adag ni nge un ko taufe.
4 Rib pay ni be thil rarogon e fayleng iyan maku arrogon e girdi’. Boor e girdi’ ndubrad e machib kafram machane chiney e kar adaged. Yugura kemus ni taabe’ e ke motoyil ko fare thin nib fel’ ni murung’agen Gil’ilungun Got ni gad be wereg, ma dabi aw nib m’ay fan e athamgil ni kad ted.
5 Be yoor iyan e girdi’ ni be ‘kireban’rad ma yad be gel’gel’ ni bochan e pi n’en nib kireb ni yibe rin’’ u fayleng. (Ezek. 9:4) Angin e maruwel rodad ni machib e be dag ni piin ni bay rogorad ni nge yog e yafas ngorad e yad e yad be motoyil ko fare thin ko Gil’ilungun. (Isa. 2:2, 3) Ere ngad ululgad ndab da talgad i “fek e thin nib fel’” ngak e girdi’.—Isa. 52:7; Acts 5:42.