Ra Diin Mi Yad Rung’ag?
1. (a) Mang fan nib mo’maw e machib ni gad ma tay yu ngiyal’? (b) Mang fan ni gad ma athamgil?
1 Bochan ni kari chugur fare rran rok Jehovah, ma ri ka boor e girdi’ nib t’uf ni ngan ayuwegrad ngar nanged e tin riyul’ u murung’agen Got nge n’en nib m’agan’ ngay ni fan ko girdi’. (John 17:3; 2 Pet. 3:9, 10) Yu ngiyal’ e ba mo’maw e re n’ey ni bochan e boor e girdi’ ndubrad ni ngar motoyilgad ngodad fa yad ma moningnag e machib ni gad ma tay. (2 Pet. 3:3, 4) Machane, ka bay e girdi’ ko yungi n’en ni gad ma machib riy ni yad ra rung’ag fare thin nib fel’ ma yad ra adag. Machane, ra diin mi yad rung’ag ni faanra dariy be’ ni nge machibnagrad?—Rom. 10:14, 15.
2. Uw rogon nra pi’ e n’en ni rin’ apostal Paul e athamgil nga lanin’dad?
2 Ngan Par nib Mudugil u Fithik’ e Togopuluw: Dabi mulan’dad ya ka bay boch e girdi’ ni yad baadag ni ngar nanged fare thin nib fel’ ni murung’agen Gil’ilungun Got. Filippi e bin som’on e mach nu Europe ni wereg apostal Paul fare thin nib fel’ riy. Nap’an ni yog boch e girdi’ e thin ni googsur u murung’agrow Silas, ma aram min toyrow mi nin’row nga kalbus. (Acts 16:16-24) Machane de rus Paul. Ma nap’an ni yan ko bin migid e mach ni aram yu Thessalonika, me ‘pi’ Got e athamgil nga laniyan’ ni nge weliy fare Thin nib Fel’.’ (1 Thess. 2:2) N’en ni rin’ Paul e be tamilangnag fan ni nge ‘dabi chalbadad i ngongliy e ngongol ni bfel’.’—Gal. 6:9.
3. Mang e ma k’aring boch e girdi’ ni immoy ndubrad e machib ngar adaged ni ngar motoyilgad?
3 Boor e girdi’ ndaur motoyilgad ngodad kafram ni kar adaged e machib e chiney. Rayog ni bochan e gafgow ko salpiy, fa kar m’argad, fa kem’ reb i chon e tabinaw rorad, fa bochan rarogon e fayleng ni be thil i yan. (1 Kor. 7:31) Ma boch i gadad ni i togopuluw e gallabthir rorad ngorad kafram e kar adaged e machib e chiney. Gad ra ulul ko machib ma rayog ko pi girdi’ ney ni ngar ‘pininged fithingan Jehovah’ u m’on ni nge taw ko tomur.—Rom. 10:13.
4. Mang e ma k’aringdad ni ngad “ululgad” ko machib ndab da talgad?
4 Ngan ‘Ulul’ ko Machib Ndabin Tal: T’ufeg rodad ngak Got nge girdi’ e ir e ra k’aringdad ngad “ululgad” ko machib ni bod ni i rin’ e pi apostal ko bin som’on e chibog. (Acts 5:42) Boor e girdi’ e ngiyal’ ney ni “ke kireban’rad ma ke gafgow lanin’rad” ni bochan e pi n’en nib kireb ni be buch. (Ezek. 9:4) Pi girdi’ ney e ri yad ra felfelan’ u nap’an ni yad ra rung’ag fare thin nib fel’! Ma ku yugu ra bay boch e girdi’ ndubrad ni ngar motoyilgad, ma dabi mulan’dad ya be yog e Bible nib felfelan’ Jehovah ko maruwel ni gad be tay.—Heb. 13:15, 16.