Ngan Fl’eg Laniyan’ e Piin ni Ke Kireban’rad

¹ Dariy ba ngiyal’ ni ka nap’an kakrom ni ri ba t’uf ni ngan fl’eg laniyan’ e girdi’. Faan gad ra folwok rok e Pilung rodad, ni Kristus Jesus, ma gad ra “fl’eg laniyan’ e piin ni ke kireban’rad.”​—Isa. 61:1.

² Rogon ni Ngan Rin’: Ra ngad fl’eged laniyan’ e girdi’, ma ba t’uf ni ngad machibgad u rogon nib thabthabal mab puluw. Faan gad ra guy rogon ndab da pag rogon ni ngad weliyed u murung’agen e ngongol nib kireb nge machib ni googsur u gubin ngiyal’, ma thin riyul’ nu Bible nge athap ko pi n’en ni i micheg Got ni bayi yib e ra par ni aram e bin ni baga’ fan ko machib ni gad be tay. Gathi be yip’ fan ndab da weliyed u murung’agen Armageddon. Ya kan tay chilen ngodad ni nga dogned ni “ke taw nga nap’an ni nge chuweg Somol e girdi’ rok u pa’ e toogor rorad me war e pi toogor rorad,” ma ngad ginanged e piin nib kireb ngar pied keru’rad ko kireb. Machane, susun ni nge dabi ga’ fan e ginang ko Armageddon nge wenegan nra yib riy ko fare thin nib fel’ u murung’agen e Gagiyeg rok Got.​—Isa. 61:2; Ezek. 3:18; Matt. 24:14.

³ U Mit e Tabinaw: Ba ga’ ni gad ma mada’nag e girdi’ ni ke kireban’rad nbochan e magawon ko m’ar, yam’, ngongol nde mat’aw, ara de gaman e salpiy. Bochan gad e piin ni ma folwok rok Kristus, me ere gad ma “taganan’dad ngorad” ma gad ma runguy e girdi’ ni gad ma mada’ u mit e tabinaw. (Luke 7:13; Rom. 12:15) Yugu aram rogon ni gad ra bieg reb ara l’agruw e thin nu Bible u murung’agen e magawon, machane thingar da “gurgad ko motoyil,” ya ra yog rok e girdi’ ni ngar weliyed salperad. (Jas. 1:19) Tomren ni kad motoyilgad ngorad, ma aram e rayog ni ngad fl’eged lanin’rad.

⁴ Nap’an e ngiyal’ nib puluw ma rayog ni nga dogned, “Gu ba adag ni nggu beeg e thin nu Bible nra pi’ e athamgil nga lanin’um.” Susun ni ngad tedan’dad ngay ni dab da togopuluwgad ko urngin e lem nde puluw rorad. Ya, susun ni ngad pied e athamgil nga lanin’rad ma ngad fl’eged lanin’rad ko thin nu Bible nra gelnag gum’ircharad. Rayog ni ngam guy e thin u lan e babyor ni Reasoning From the Scriptures ko page 117-121 u tan e heading ni “Encouragement.” Ara rayog ni ngam pi’ e tract ni Ran Fl’eg Laniyan’ e Ani Ke Kireban’ ngorad ma ga bieg e thin riy nra pi’ e athamgil nga lanin’rad.

⁵ Mu Tiyan’um ko Ngiyal’ Nrayog ni Ngam Fl’eg Laniyan’ Yugu Girdi’: Ga manang be’ ko binaw rom, u tabon e maruwel, u skul, ara tabinaw rom ni ba t’uf ni ngan fl’eg laniyan’? Mang ni dab man mu guyrad u tabinaw rorad, ngam nameg ni ngam fl’eg lanin’rad ko thin nu Bible? Bochan ga manang e magawon rorad, ma rayog ni ngam fl’eg rogom ngam fl’eg lanin’rad. Me ere, boch e girdi’ e kar yoloyed e babyor min pi’ nga post ara kar dengwanaged e girdi’. Bin riyul’ e t’ufeg ko girdi’ e ra k’aringdad ngad runguyed yad ma ngad fl’eged lanin’rad ko thin nu Bible.​—Luke 10:25-37.

⁶ Arrogon, kan tay chilen ngodad ni ngad fl’eged laniyan’ e girdi’ ni yad be yor, ngad ubunged gum’ircharad, ma ngad pied e athap ngorad ko par ni kab fel’ nga m’on. Ereram e thin nib t’uf rok e girdi’ u fayleng iyan. Faan gad ra non u fithik’ e felfelan’ u murung’agen e tin nib fel’ ni i micheg Got ma ra fl’eg laniyan’ e girdi’ nib yul’yul’ gum’ircharad ma ra pi’ e athap ngorad. Ere u gubin ngiyal’ ma dab da paged talin ni ba t’uf ni ngad fl’eged laniyan’ e piin ni ke kireban’rad.​—Isaiah 61:1.