Rib T’uf Ni Ngan Toy Boch E Kingdom Hall
1, 2. Mang program e ra weliy ere insert ney murung’agen?
1 Boor e nam ndabiyog ni ngan toy e Kingdom Hall riy ya dariy e salpiy maku dariy e girdi’ riy nib salap ko dimow naun. Ere nap’an e November 1999 me tababnag fare Governing Body ba program ni ngan toy e Kingdom Hall ko pi binaw nde gaman e salpiy nge girdien e maruwel riy. Re insert ney e ra weliy rogon nra ayuweg e re program ney e pi ulung ko pi donguch ni bay u tan pa’ fare Guam branch.
2 Chiney e be ayuweg ere program ney e pi walag u lan 115 e nam. Ke dugliy e Governing Body ni fare Design/Build Department u Brooklyn nge lal e ofis ko Regional Kingdom Hall e yad ra yarmiy e re maruwel ney ya nge yog nni pi’ e tin nib t’uf ko maruwel mu kun maruwel ko salpiy nib fel’ rogon. Bin ni bay ko Australia branch e Regional Office e ir e ra ayuweg e pi ulung u Micronesia nge Guam nge CNMI.
3. (a) Mang e be nameg fare Kingdom Hall construction program? (b) Uw rogon e mon’og ni be tay fare Kingdom Hall construction u Micronesia?
3 N’en ni be nameg ere program ney e ngan toy boch e Kingdom Hall ndabi yoor e salpiy ni ngan fanay ngay mab mom i ayuweg u daken e pi binaw nib fel’ babyoren e urngin riy. Ere, rayog ni ngan rin’ ere n’em u roy u Micronesia, fa? Ba t’uf ere program ney u Micronesia, fa? Ri arrogon! Yibe fl’eg rogon ni ngan toy 26 e Kingdom Hall nge naun ko missionary nge naun ko translation. Uw rogon ni yira rin’ ere n’ey?
Fan fare Kindgom Hall Construction Desk
4, 5. Mang boch ban’en nib milfan ko fare Kingdom Hall Construction Desk?
4 Bay reb e Kingdom Hall Construction Desk u Guam branch ni kan tay ni ir e ra yarmiy ere maruwel ney. Re desk ney e yad be maruwel fare Service Department u taabang u tan pa’ fare Branch Committee. Ra aram rogon ma rayog ni ngan turguy boch ban’en nib fel’ rogon nge yog nni pi’ e ayuw ko pi ulung nib t’uf e ayuw riy. Maku yibe fol ko fapi thin u 1 Korinth 9:26 yibe pi’ e ayuw ko pi binaw nrayog ni nge yib angin riy nib papey. Kan yarmiy e pi naun ni ngan toy nib mom mab m’ag ko pi binaw iyan. Tin ni ka rayog ni ngan fanay ko pi naun ni bay e goo yira ni fanay ni fan e nge dabi yoor e salpiy ni ngan fanay ngay. Ga’ngin nge yaan e Kingdom Hall e be yan u rogon urngin e publisher nge rogon urngin e salpiy nrayog ni nge fanay e ulung ko tin nib t’uf u rogon ni ngan ayuweg fare naun.
5 Bmil fan ko fare Kingdom Hall Construction Desk ni ngar yarmiyed urngin e maruwel ni yira tay ni fan pi Kingdom Hall. Ba muun ngay e gin ni ngan mel’eg ni ngan toy e Kingdom Hall riy, nge rogon yaan, nge babyoren, nge rogon ni ngan toy. Maku yira fil rogon ni ngan ayuweg fare Kingdom Hall nge yog ni par nib n’uw nap’an ndabi kireb. Gubin e la l’agruw e duw nra yib be’ ko fare Kingdom Hall Construction Desk ni nge yaliy fare naun me yog ngak e piin ni kan dugliyrad ni ngar yarmiyed rogon ni yibe ayuweg fare Kingdom Hall boch ban’en ni ngan mon’ognag riy.
Kingdom Hall Construction Group
6. Mini’ girdien fare Kingdom Hall Construction Group, ma mang fan ere ulung nem?
6 Ke dugliy e Governing Body reb e ulung ni ka nog e Kingdom Hall Construction Group ngay ni ngar ayuweged e maruwel ko dimow Kingdom Hall ni nge papey. Pi cha’ney e yad ma ayuweg e ulung ko dimow Kingdom Hall ni yibe tay nge salpiy ni yibe fanay ngay. Ra reb e pi ulung ney ma nel’ i yan ko meruk e girdi’ riy ni kar ognaged yad ni ngar uned ko re maruwel ney. Uw rogon nrayog ni ngar ayuweged nge fel’ rogon e pi maruwel ney?
7. Uw rogon nrayog ni nge mang be’ reb i gothon e Kingdom Hall construction servants? (Ngan weliy e thin ni bay ko kahol.)
7 Kingdom Hall construction servants: Pi walag ney ni pumoon nge ppin ni yad ma pigpig u polo’ e tayim rorad e yad manang e maruwel ko dimow naun. Yu ngiyal’ e yima dugliy ba wu’ e mabgol ni ngar mangew e Kingdom Hall construction servants. Piin nrayog ni ngar uned ko re maruwel ney e piin ni ke pag reb e duw ni kar uned ko taufe, ma rayog ni ngar uned ko re maruwel ney nib n’uw nap’an, ma bay e duw rorad u thilin 19 nge 55, mab fel’ fel’ fithik’ i dowrad, ma rayog ni ngar maruwelgad nib elmirin, ma yad be pigpig ni yad e regular pioneer. U m’on ni ngan dugliy be’ ni nge rin’ ere maruwel ney ma som’on e thingari dag nrayog ni nge ognag ir ko maruwel ko Kingdom Hall.
8. Uw rogon nib thil e piin ni kar ognaged yad ni ngar uned ko maruwel ko dimow Kingdom Hall ngak e piin ni ka nog e construction servant ngorad?
8 Piin ni kar ognaged yad ni ngar uned ko maruwel ko dimow Kingdom Hall: Taab n’en e kub t’uf ni nge yog ngak e piin ni kar ognaged yad ni ngar uned ko maruwel ko dimow Kingdom Hall. Pi cha’ney e yad ma maruwel u lan l’agruw e wik i yan ko dalip e pul. Yu ngiyal’ ma pi walag nib cheg ko dimow naun e rayog ni ngar fanayed buchuuw ko tayim rorad u gubin e rran ni ngar pied e ayuw. Faanra boor ban’en ni nge rin’ reb e Kingdom Hall Construction Group u reb e binaw, ma rayog ni ngan pi’ e application form (A-25) ko pi ulung nib chugur e ngaram nge yog ni piin ni yad baadag ni ngar uned ko re maruwel nem mi yad ngongliy bang e babyor ngorad.
Kingdom Hall Construction—Ba Maruwel ni Fan ko Ulung
9, 10. Uw rogon nrayog ni nge dag reb e ulung ni yad be tay fan e maruwel ni yibe tay ko Kingdom Hall?
9 Maruwel ni ngan tay nga reb e Kingdom Hall e susun ni ngan sap ngay nib maruwel ko ulung. Bmil fan ngak girdien e ulung ni ngar rin’ed urngin ban’en nrayog rorad nge yog nra uned ko re maruwel ney mi yad ayuweg i pi’ puluwon e tin nib t’uf ni ngan fanay u rogon ni ngan ayuweg e Kingdom Hall u nap’an ni ke m’ay i toy. Nap’an ni yira tabab ko maruwel ma piin piilal e bmil fan ngorad ni ngar pied e athamgil nga laniyan’ e girdi’ ni ngar uned ko re maruwel nem. Pi ulung ni kan pi’ e ayuw ngorad ko salpiy e rayog ni ngar daged ni yad ba felfelan’ ko re n’em mar turguyed ni ngar fulweged lon fare salpiy nga branch u gubin e pul ni fan ko fare Kingdom Hall rorad. Ba puluw ere n’em ko fare thin ni bay u Proverbs 3:9 ni be gaar: “Tin ni be yib ko woldug rom e ngam fek e tin nib th’abi fel’ riy ngam pi’ ngak Somol.”
10 Nap’an ni yira dugliy ni ngan toy reb e Kingdom Hall ma yira yog e rorran ni nge tabab e maruwel nge urngin girdien e maruwel nib t’uf. De t’uf ni nge ngongliy girdien reb e ulung e babyor rorad ni ngar uned ko maruwel ko Kingdom Hall rorad, machane susun ni yad e publisher nib fel’ rogorad ko tirok Got, ma 17 i yan nga lang e duw rorad, ma ke yog fare Congregation Service Committee e ke fel’ ngay ni ngar uned ko maruwel. Pi walag ni pumoon nge ppin e rayog ni ngar uned ko re maruwel ney. Gathi kemus nrayog ni ngar uned ko maruwel ko dimow naun, ya ku rayog ni ngar pied e ayuw ko mangongol ggan nge maluk mad ko pi Kingdom Hall Construction Group.
11. Uw rogon ni be dag fapi thin ko 1 Korinth 14:40 nge Hebrew 13:17 feni t’uf e ayuw ko ulung?
11 Rayog ni ngam guy nib t’uf e ayuw ko ulung nge piin ni kan dugliyrad ni ngar yarmiyed gubin ban’en ko maruwel. Re n’ey e be puguran ngodad boch e thin ko Bible. Bod ni 1 Korinth 14:40 e be gaar: “Urngin ban’en ma thingar nrin’ nib fel’ rogon ma ba yaram.” Kan pi’ boch e kanawo’ ni fan e nge yog ni rin’ urngin ban’en u rogon nib puluw ko yaram rok Got. Ma gad ba felfelan’ ko yaram ni be pi’ e Governing Body u rogon e maruwel ko Kingdom Hall construction program. I yog apostal Paul u Hebrew 13:17 ni gaar: “Mu folgad ko thin rok e piin ni yad be yog e thin romed. Ya yad be matanagiy lanin’med ndarir talgad, ni bochan e thingar rogned ngak Got rogon e maruwel rok ni ur ngongliyed. Ya faan gimed ra fol rorad ma ra ur ngongliyed e maruwel rorad nib felan’rad ngay; ya faanra danga’ ma bay ur ngongliyed nib taganan’rad, ma aram e dabi fel’ rogomed riy.” Faan gad ra fol ko pi motochiyel nu Bible ney ma rayog ni nge pagan’dad nra flaabnag Jehovah e athamgil ni gad ra tay ni ngad ayuweged e liyor ni yibe tay ngak.
Boch Kanawoen e Dimow Kingdom Hall
12. Faanra baadag reb e ulung ni ngar toyed reb e Kingdom Hall nib beech ma mang boch ban’en nib t’uf ni ngar pied nga branch ofis?
12 Ra ke lemnag reb e ulung nib t’uf rorad reb e Kingdom Hall nib beech ma yad ra yoloy e babyor nge yan ko branch ofis. Susun ni yira tay ko gi babyor nem rarogon ere naun nem ni yima muulung riy, nib fel’ nfaanra kun pi’ yaan ko fare Kingdom Hall Construction Desk. Kub t’uf ni ngan uneg ngay urngin e publisher ko ulung nge urngin e girdi’ ni ma yib u bayay e muulung, nge rogon e salpiy ni ayuw ni ku un pi’ u lan fa nel’ i pul ni ke yan (nib muun ngay e ayuw ni kan pi’ ko machib u ga’ngin e fayleng, nge Society Kingdom Hall Fund, nge congregation fund).
13, 14. (a) Mang boch ban’en ni kan skulnag girdien fare Kingdom Hall Construction Desk riy? (b) Mang fan ni nga nog ngak boch e ulung ni ngar fanayed taareb e Kingdom Hall nib beech?
13 Nap’an ra thap fagi babyor nga branch, ma fare Kingdom Hall Construction Desk e yad ra yarmiy boch e girdi’ ni nga ranod ni owcherad ngar mada’gad e piin piilal ko fare ulung, nge en ni ir e circuit overseer nfaanra rayog, nge piilal ko tin nib chugur e ulung nfaanra bay rogon ngorad. Pi girdi’ ney ni ngar mada’gad e girdi’ ko ulung e kan skulnagrad ni ngar ayuweged e piin piilal nge yog nra nanged e tin nib t’uf u reb e Kingdom Hall nib beech, nge gi binaw nrayog ni ngan dimow ngay, nge gubin babyoren e binaw nge tin nib t’uf ni yira fek ko am, mu kun weliy nib fel’ rogon ngar nanged fan e pi motochiyel nu Bible nra pow’iy fare maruwel.
14 Faanra rayog, ma aram e yira yog ngak boch e ulung ni ngar fanayed taareb e Kingdom Hall nib beech. Ra aram rogon ma aram e rayog ni ngan fanay e salpiy nib fel’ rogon, ma ku rayog ni nga i t’ar e ulung puluwon e ayuw ni ngan tay ko Kingdom Hall u dakenrad nib fel’ rogon. Tin baaray e ulung nib gagang’ e ir e yibe sap ngay nsom’on.
15, 16. (a) Ra ke m’agan’ boor e ulung ngay ni ngar fanayed taareb e Kingdom Hall, ma mang e susun ni ngar weliyed e circuit overseer u taabang? Ba muun e kahol ngay ko page 6. (b) Mang boch kenggin e motochiyel ko Bible nib t’uf ni ngan lemnag u nap’an ni yibe tafinaynag rogon puluwon e maruwel nge urngin e salpiy nrayog ni nge pi’ e ulung, ma mang fan?
15 Faanra ke m’agan’ boor e ulung ngay ni ngar maruweliy taareb e maruwel u taabang, ma aram e ra puruy’nag e piin piilal ko pi ulung nem ko rayog ni ngan taarebnag e ulung u tomren ni ke m’ay i toy fare Kingdom Hall fa. Re muulung ney e ku ra un e circuit overseer ngay, machane Guam branch Service Department e ra turguy ko bfel’ ni ngan rin’ ere n’em fa. Maku ba ga’ fan ni ngan nang rogon e salpiy ni ba’ ni fan ko maruwel. Fare Kingdom Hall Construction Desk e ma fol ko thin ni yog Jesus u Luke 14:28 ni gaar: “Faanra ba’ bigimed ni be finey ni nge ngongliy ba wulyang ntafen e damit, ma som’on e ra par nga but’ nge tafinaynag rogon puluwon, nge guy ko ba gaman e salpiy rok nra mu’nag fare maruwel ngay fa danga’.” Tomren ni ke mada’ e piin piilal nge girdien fare Kingdom Hall Construction Desk, ma aram e ra sul fapi piilal ko ulung rorad ngar guyed rogon e ayuw nrayog ni nge pi’ e ulung rorad ko fare maruwel nge rogon nrayog ni ngar fulweged puluwon e tin ni yira ayuwegrad riy ko maruwel.
16 Uw rogon ere ayuw ney nra pi’ e ulung? Gathi ngan kunuy e salpiy ko girdi’. Ya girdien fare ulung e rayog ni ngar ted e birorad e salpiy nga lan e kahol ni fan ko donation ni bay u Kingdom Hall. Pi tabinaw nge girdi’ e susun ni ngar lemnaged urngin e salpiy ni yad ma maruwel ngay u lan reb e pul ma aram mfin ra dugliyed urngin nrayog ni ngar pied.—1 Kor. 16:1, 2.
17. Mang boch ban’en nib t’uf ni nge rin’ e ulung u m’on ni ngan toy reb e Kingdom Hall?
17 Ku ban’en ni yira rin’ u nap’an ni ngan toy reb e Kingdom Hall nib beech e aram e yira pi’ reb e resolution ni bay riy e tin nsusuna nge m’agan’uy ngay ni bod (1) yaan e Kingdom Hall ni ngan toy, (2) gin ni ngan toy ngay, (3) rogon e ayuw ko naun nge ggan ni yira pi’ ko Kingdom Hall Construction Group, (4) babyoren e binaw ni ngan dimow nga daken, (5) urngin e salpiy nrayog ni ngan fulweg u reb e pul ni puluwon e Kingdom Hall, (6) tin nra yog fare Kingdom Hall Construction Desk u rogon e maruwel ni ngan rin’ nge yaram ni yad ra pi’, (7) nge rogon ni yira ayuweg e Kingdom Hall u tomren ni ke m’ay i toy. Bin tomur e aram e susun ni ngan chuw’iy fagi binaw min fal’eg babyoren nib puluw ko motochiyel ko am. Re n’ey e be dag ni tin ni be yog e am nib t’uf ni ngan rin’ nge tax ni yibe pi’ e ba puluw ko motochiyel ko nam.
18. Mang nib ga’ fan ni ngan fol ko yaram ko ulung min taga’ nga daken Jehovah u fithik’ e meybil?
18 Ra nge yog reb e Kingdom Hall nib beech ma boor ban’en nib t’uf ni ngan rin’ nra fek e tayim. Yab mo’maw’ ni ngan chuw’iy e binaw fa reb e naun nib fel’ nrayog ni ngan fanay nge mang tagil’ e liyor. Machane, faan gad ra fol ko yaram ko ulung ma gad taga’ nga daken e tow’ath rok Jehovah, ma rayog ni nge mudugilan’dad ni yira toy boor e Kingdom Hall.
Angin Fare Program nib Beech
19. Gur, be tow’athnag Jehovah e maruwel ko fare Kingdom Hall construction program, ma uw rogon nrayog ni ngad pied e ayuw ngay?
19 Bochan e kan tababnag fare program ni ka nap’an e November 1999, ma arfan ni ke pag 16,300 e Kingdom Hall ni kan toy u lan 115 e binaw. Pi walag u ga’ngin e fayleng e yad be ayuweg ere maruwel ney be yan nib ‘taareb’ ya nge dabi aw ‘nre ulung nib pire’ ban’en ni ke kunuy e ke pag rogon e tin ni ke yog ngorad, ma re ulung ni buchuuw ban’en ni ke kunuy e ba pag feni lich e tin ni ba’ rorad.’ (2 Kor. 8:14, 15) Ka boor e maruwel ni bay ni ngan rin’. Rogon fene fel’ rogon e maruwel ni be tay ere program ney e be yan u rogon e ayuw ni gad be pi’ ngay. Gad be sap nga m’on nga rogon nra tow’athnag Jehovah e maruwel ni yira tay ko pi Kingdom Hall u roy u Micronesia.
[Kahol ko page 4]
Ma fl’eg thin e pi construction volunteers
Tomren ni ke m’ay i toy e Kingdom Hall ko ulung nu Niebla u Chile, ma aram mar yoloyed bangi babyor ko branch ofis ni yad be pining e magar ko fare Kingdom Hall construction program.
Baaray e n’en rogned: “Fapi walag ni kar bad ni ngar ayuweged gamad e ba tow’ath ko ulung romad. Dab gu paged tilrad ni bochan e yad ba sobut’an’, mab fel’ lanin’rad, ma yad ba gol.”
Kub gel e pasig ni i tay e pi girdi’ nem ko machib nge tin ni ur uned ngay u lan e ulung. Mu kur ululgad nra gaargad: “Bochan e ngongol nib fel’ ni kar daged, ma pi fel’ yangaren u lan e ulung romad e yad be nameg ni ngar manged boch e piin ni yad ma ognaged yad ko maruwel ko dimow Kingdom Hall boch nga m’on.”
[Kahol ko page 6]
Salpiy, nge Binaw, nge Pi N’en ni Yima Fanay ko Dimow Naun ni Yima Pi’ Ni Ayuw
◼ Piin ni yad baadag ni ngar pied e salpiy nib ga’ ni ayuw ni fan ko dimow Kingdom Hall e rayog ni ngar ted nga account ko branch ofis. Pi ayuw ni kan pi’ nem e rayog ni ngan fanay nga reb e Kingdom Hall nib t’uf ni ngan ngongliy. Faen ni ke pi’ fare ayuw e susun ni nge yoloy e babyor nga branch ofis nge weliy rogon fare salpiy.
◼ Piin ni yad ba adag ni ngar pied e binaw ni ayuw e susun ni ngar yoloyed e babyor nga branch ofis ni be weliy murung’agen e gin ni bay fagi binaw riy, nge ga’ngin fare binaw, nge legal title status riy, nge tin nib l’ag rogon ko fare binaw nib t’uf ni ngan nang. Gathi gubin e binaw ni yira pi’ mab fel’ rogon gubin ban’en riy nrayog ni ngan toy e Kingdom Hall ngay.
◼ Piin ni yad baadag ni ngar pied e pi n’en ni yima fanay ko dimow naun ni ayuw e susun ni ngar nonad ngak e Kingdom Hall Construction Desk ara en ni ir e construction overseer ko Kingdom Hall.