Deer

◼ Bmiti mang mad e ba puluw ni ngan chuw ngay u nap’an ni kan yan ko pi naun ni yima fanay ko liyor ngak Jehovah?

Ba gagiyel ni pi Kingdom Hall, Assembly Hall, Bethel home, nge branch ofis u fayleng i yan e aram e yungi n’en ni kan tay ni fan ko liyor ngak Jehovah. Yungi ney e ba yaram mab klin, ma yaan e be dag ni yibe ta’ fan. Rib thil ko n’en ni yima guy u lan e m’ag rok Satan. Piin ni ka ranod ni ngar guyed e yungi n’en ni yima fanay ni fan ko liyor ngak Jehovah e susun ni ngki m’ug nib milfarad ngak Jehovah, ma yad e piin ni yad be rin’ e tin nib m’agan’ Got ngay.

Gad e Kristiano, e ‘gubin ban’en ni gad be rin’ ma gad be dag riy ni gadad bogi tapigpig rok Got’ nib muun ngay e munmad rodad nge rogon yaan piyan’ lolugdad. (2 Kor. 6:3, 4) Maku susun ni ngad daged e ngongol nib fel’. Susun ni gubin ngiyal’ ma rogon e munmad rodad nge piyan’ lolugdad e nge dag e tay fan ni ba’ ko pi tapigpig rok Jehovah Got. Rriyul’ ere n’ey u nap’an ni kan yan ko pi tochuch u New York ara pi branch ofis u fayleng i yan.

Fare babyor ni Organized to Do Jehovah’s Will e be weliy murung’agen e munmad nge rogon yaan piyan’ lolugey nib puluw, maku be dag nib t’uf ni nge par e dowef nib klin, mab puluw e munmad, mab yalen yaan piyan’ lolugey u nap’an ni yibe un ko machib u mit e tabinaw nge pi muulung ko Kristiano. Ma paragraph 3 ko page 138 e be gaar: “Dab mu pagtalin ni fare ngochol ni Bethel e be yip’ fan e ‘Naun rok Got.’ Ere, rogon e munmad rodad, nge piyan’ lolugdad, nge ngongol rodad e susun ni nge taareb rogon ko ngiyal’ ni gad be un ko muulung u Kingdom Hall.” Pi publisher ni yad ma par nib chugur ko yungi n’em nge piin nu bang e susun ni ngar folgad ko re n’ey. Ra aram rogon ma piin ni ka ranod ko yungi n’em e yad be dag nib fel’ u wan’rad gubin ban’en riy ma yad be tay fan.​—Ps. 29:2.

Susun ni ngan poydad ni gadad “girdien Got” u rogon e munmad rodad. (1 Tim. 2:10) Munmad nge piyan’ lolugey nib puluw e ra thiliyeg rogon ni ma sap e girdi’ ko bin riyul’ e liyor rok Jehovah. Machane bay boch e walag ni yad ma yan ni ngar guyed e pi naun ni yima fanay ko liyor ngak Jehovah ni kan guy nde puluw e munmad rorad, ma de yaram, maku de yalen. Mit nem e munmad e de m’ag ngak e Kristiano ndemtrug e gin ni yad bay riy. Gad baadag ni ngad folgad ko pi motochiyel ko Kristiano u murung’agen ere n’ey nge urngin ban’en ko par rodad, ma gad par ni gad ba lingagil u fithik’ e girdi’ nu fayleng, ma gad rin’ urngin ban’en ni fan e nga nog e sorok riy ngak Got.​—Rom. 12:2; 1 Kor. 10:31.

Demtrug ko kam yarmiy ni ngan man ngaram ara yig gabe yan ni fafel ma nap’an ni gara yan ni ngam guy e pi tochuch u New York ara yugu reb e branch ofis, ma ngam fithem ni nge lungum: ‘Gur, munmad rog nge piyan’ lolugeg e ba puluw nga rogon feni yaram nge feni klin e gin nggu wan ngay? Re n’ey e be pining e sorok ngak fare Got ni gu be liyor ngak, fa? Gur ra magawonnag yaag boch e girdi’? Manga yugu da “girngiyed fel’ ko machib ni murung’agen Got ni ir e ma thapegdad ngak” u rogon e munmad ni gad ma tay nge rogon yaan piyan lolugdad!​—Titus 2:10.