Ngad Salapgad I Fanay e Bible
1. Mang ni ba ga’ fan e Bible?
1 Faan gad ra fanay e Thin Rok Got nib fel’ rogon ma rayog ni ngad wereged e machib nriyul’ nra tamilangnag e machib ni googsur nge boch e yalen ko girdi’ nib kireb.—2 Timothy 2:15; 1 Peter 3:15.
2. Uw rogon ni gad ra salapgad i pithig e Bible?
2 Ngam Nang Boor e Thin ko Bible: Faanra um maruwel ko talin e maruwel ma ga ra salap i maruwel ngay. Maku aram rogon e Bible. Faan ga ra beeg e Bible u tobolngin nge mada’ ko tungun ma ga ra nang kenggin e thin ko Bible. Maku ra ayuwegem ni nge mom mag salap i pirieg e thin nu Bible. Faanra yoor e thin nu Bible ni ga ra nang ma rayog ni ngam pasig i machibnag e girdi’ ni demtrug e ngiyal’ fa u mit e tabinaw.—1 Thessalonika 1:5.
3, 4. (a) Mang boch e kanawo’ nrayog ni ngad mechamgad i pithig e Bible? (b) Me gur, bay yugu boch e kanawo’ ni kam fanay ni ngam mecham ko Bible, fa?
3 Mu pithig e Bible rom u nap’an ni yira beeg e Bible u nap’an e muulung. Ku mu pithig e Bible u nap’an ni ga be fil e machib ni goo gur ara ga be fal’eg rogom ko muulung ma ga fal’eg i lemnag rogon ni ngam fol riy. Ke pirieg boor e girdi’ ni ke mom rorad ni ngar nanged e gini bay e thin ko Bible riy ni faan yad ra pithig e Bible rorad ko bin ni ngar beeged e thin ko Bible ni bay ko computer ara kan yoloy nga yugu reb e babyor.—John 14:26.
4 Boch e tabinaw e kar ted ba ngiyal’ ni ngar filed e thin ko Bible nge mit ngorad. Reb e kanawo’ ni rayog ni ngan rin’ e re n’ey e ngan yoloy reb e thin ko Bible nga bochi yang e babyor ma ngan yoloy e gini bay e re thin nem riy u Bible nga keru’ e chigi babyor nem. Ma aram e ra fek be’ bang fa nochi babyor me beeg e thin ko Bible ni bay riy ma yugu be’ e nge yog ko uw u Bible e ra ni pirieg riy. Ku gad ra salap ko Bible ni faanra ni yan u yaan e machib u mit e tabinaw ni yibe pithig e Bible ara ngan fanay e Bible nge pi’ e fulweg ko deer ni ke fith be’. Ngad rin’ed e re n’en ney u tabinaw ma ra ayuwegdad ni ngad nanged boor e thin nu Bible.
5. Mang fan ni gad baadag ni nguuda salapgad i pithig e Bible?
5 Dariy reb e babyor ni taareb rogon ko Bible. Ya ke mus ni goo Bible e bay e thin riy ni “rayog ni nge tamilangnigem u rogon ni yima thap ngak Got.” (2 Timothy 3:15) Ba ga’ ni gathi ri manang e girdi’ u lan binaw e thin nib manigil ni bay u lan e Bible ere ba ga’ fan ni ngad salapgad i pithig e Bible ngad daged ngorad e pi n’en ni bay riy.—Proverbs 2:1-5.