Gab Pasig ko Thin Rok Got?
1 Re fayleng ney e ma dariy fannag e Bible ma tin riyul’ e Kristiano e ba pasig ko Thin Rok Got. Mmich u wan’dad ni “urngin e thin ni bay u lan e babyor nib thothup e Got e yib e pi’ nga laniyan’ e girdi’,” ma gad be un ku Jesus Kristus ni ke meybil ku Jehovah ni gaar: “tin nib riyul’ ni ir e thin rom.” (2 Tim. 3:16; John 17:17) Uw rogon nrayog ni ngad pasiggad i tamilangnag e Thin Rok Got?
2 Ngan Fil e Thin Rok Got: Dabisiy ni i fil Jesus e Thin Rok Got. Aram e ke yog rok ni nge tamilangnag e Thin Rok Got ko machib ni tay. (Luke 4:16-21; 24:44-46) Uw rogon nrayog ni nge mit ngodad e thin ko Bible ni boor? Ngad bieged e Bible u gubin e rran ma ngad fl’eged i lemnag reb e verse ni ke pi’ e athamgil nga lanin’dad fa ba puluw ko machib. Nap’an ni gad be fl’eg rogon ko pi muulung ma susun ni ngad pithiged e Bible ngad bieged e thin ni ka nog ma sana ngad fl’eged rogon e fulweg u murung’agen. Nap’an ni gad be un ko pi muulung ma susun ni ngad bieged e thin ko Bible ni be yog fa en ni be welthin. Ngad filed e thin ko Bible ma rayog ni ngad ‘machibnaged e thin rok Got nrogon.’—2 Tim. 2:15.
3 Mu Pag e Bible nge Tamilangnag Ban’en: Nap’an ni gad be un ko machib ma susun ni ngad paged ni Bible e ra tamilangnag e machib. Susun, faanra rayog ma susun ni ngad bieged e thin ko Bible ngak e girdi’. Faanra fith e deer fa ra togopuluw ma fel’ ni ngan pithig e Bible me pi’ e fulweg. Faanra boor pa’ u puluwon facha’ ma rayog ni ngad tamilangnaged e thin ko Bible ngad gaargad: “U m’on ni nggu chuw, ma amu motoyil ko reb e thin ko Bible.” Faanra rayog ma ngam pithig e Bible ngam bieg e thin riy, ma ngam dag ku facha’ u nap’an ni ga be bieg.
4 Kan dag ngak be’ e thin ko Bible ni be tamilangnag ni de puluw e machib ko Trinitas ma ke gaar, “Kug un ko galesiya u polo’ e yafos rog, ma dagu nang ni aram e n’en ni be yog e Bible!” Ke un ko fol Bible. I yog Jesus ni saf rok e ra metel nga lungun. (John 10:16, 27) Bin th’abi fel’ e kanawo’ ni nge guy e piin nib yul’yul’ e thin nriyul’ e ngan bieg e thin ko Bible. Ere ngad pasiggad i tamilangnag e Thin Rok Got!