Rogon ni Ngan Fl’eg Rogon i Wereg e Magazine
1. Mang fan ni kab fel’ ni ngad fl’eged rogon i wereg e magazine ko thin rodad ko bin ni ngad dogned e thin ni bay u lan e Machib Rodad ni Fan ko Gil’ilungun Got ni ke mit ngodad?
1 Sana ga be lemnag ko ‘mang fan e ngad fl’eged rogon i wereg e magazine,’ ‘ya yima tay e machib u lan ra reb e babyor ni Machib Rodad Ni Fan Ko Gil’ilungun Got?’ Yugu aram rogon ni ke yib angin ngak boch e girdi’ ko pi machib nem, machane ka ba t’uf ni ngad fl’eged rogodad. Machib nib puluw u reb e territory e sana dabi puluw u yugu reb. Ere, susun ndabda lemnaged nthingar da wereged e pi magazine ni nga dogned e thin ni ri aram rogon ni kan yoloy. Yugu aram rogon ni gad ra mel’eg reb e machib u lan e babyor, machane kab fel’ ni nga dogned ko thin rodad.
2. Uw rogon ni ngam turguy ko mang thin ni ngam tamilangnag ku be’?
2 Mu Mel’eg e Thin Riy: Tomren ni kam bieg e magazine, mu mel’eg reb e thin riy ni ba puluw ma ba m’ag ko territory rom. Faan ga ra par nib pasig mab mudugil lanin’um ko ngiyal’ ni ngam weliy e thin ma sana ra pug e tafinay rok e girdi’ ngar adaged ni ngar bieged e babyor. Yugu aram rogon ni ga ra mel’eg reb e thin nra pug e tafinay rok boor e girdi’ u lan e territory, machane nga mu par ni ga manang yugu boch e thin u lan e magazine. Ya faan ga ra mada’nag be’ ni baadag yugu ban’en ma rayog ni ngam thiliyeg e machib nge m’ag ngak.
3. Baga’ ni ma yib angin ko miti mang e tin som’on e thin ni ga ra yog?
3 Mu Fith e Deer: Bin migid, mu fl’eg rogom ko tin som’on e thin ni ngam mog ngak e girdi’. Ya baga’ fan e tin som’on e thin ni ngam mog. Ra yib angin riy ni ngam mel’eg e thin nra pug e tafinay rok e girdi’. Baga’ ni ma yib angin ko pi deer nra tamilangnag e tafinay rorad. Dab mu fith e deer nra k’aring e damumuw ara togopuluw rok e girdi’.
4. Mang angin nrayog riy ni ngan bieg e thin nu Bible ngak e girdi’?
4 Mu Bieg e Thin nu Bible: Ngam mu mel’eg e thin nu Bible ni ga ra bieg ngak e girdi’ nfaan rayog rom, ni aram e thin nu Bible ni bay u lan e magazine. Ra ngam bieg e thin nu Bible ma ra tamilang u wan’ e girdi’ ni ga be wereg e Thin Rok Got. Maku kam machibnag facha’ ni mus ni dabun ni nge fek e magazine. (1 Thess. 2:13) Kan pug e tafinay rok boch e girdi’ ya kan bieg e thin nu Bible u m’on ni ngan fith e deer. Rayog ni ngam weliy u murung’agen e thin nu Bible ni ngam gaar: “Gu baadag ni nge tamilang u wan’ug e tafinay rom ko pi thin nu Bible ney.” Ma aram ma ga dag e thin u lan e magazine ni ba m’ag ngay ma ngam mog e thin nra pug e tafinay rok u m’on ni ngam fith nfaanra baadag ni nge bieg e magazine.
5. Mang boch ban’en ni ngam lemnag ko ngiyal’ ni ngam fl’eg rogom ngam wereg e magazine?
5 Dariy e motochiyel u murung’agen e thin ni ngam mog ko ngiyal’ ni ngam wereg e pi magazine. Machane ffel’ ni ngam rin’ u rogon ni ba mom mab ngoch nap’an. Mog e thin nra yog angin riy ma gog ko thin rom. Mu tamilangnag ko uw fene ga’ fan e pi magazine, ma ga rin’ ni gab pasig. Faanra ga ra fl’eg rogom, ma ra yib angin ni ngam wereg e Wulyang Ntagil’e Damit nge Awake! ngak e “piin ni ke mel’egrad Got ni nge yog e yafos ndariy n’umngin nap’an ngorad.”—Acts 13:48.