Ngad Fanayed e Pi Magazine Rodad nib Fel’ Rogon

Gur, rayog ni ngad ayuweged e girdi’ nib yul’yul’ ngar beeged Fare Wulyang ko Damit? Rayog ni faanra ngad fanayed e pi magazine rodad nib fel’ rogon. Mang e rayog ni nge ayuwegdad? Mu lemnag e pi n’en ni baaray:

◼ Mu Beeg e Pi Magazine: Mu beeg Fare Wulyang ko Damit ni kefin ni taw. Nap’an ni ga ra beeg reb e article riy, mag fithem ni nge lungum, ‘Ra adag e en matin, ara reb e pumoon, ara be’ nib fel’ yangaren e re article ney?’ Birom e magazine e ngam yoloy boch ban’en ngay nrayog ni ngam fanay u nap’an ni ngam pi’ ba ken ngak be’. Mu lemnag ko u rogon ni ngam pug e tafinay rok be’ ni kemus ni ga be fanay taareb ara l’agruw e sentence.

◼ Rayog ni Ngad Yoornaged e Magazine ni Gad Ma Pi’ Ngak e Girdi’?: Ra reb e ulung e chiney ma yima pi’ Fare Wulyang ko Damit ngorad ni ke yoor boch ko kafram. Ere rayog ni ngam yoornag boch e babyor ni ngam pi’ ngak e girdi’?

◼ Mu Tay Reb e Rran ni Ngam Pi’ e Magazine Ngak e Girdi’: Boor e ulung ni bay reb e rran ni kar ted ni ngar pied e magazine ngak e girdi’ riy. Gur, rayog ni ngam un ngay? Faanra danga’, ma ngam guy rogon yu ngiyal’ ni ngam pi’ e magazine ngak e girdi’ u nap’an ga be un ko machib u mit e tabinaw i yan ara nap’an ni ga ra sul ngam guy e girdi’ ni kam machibnag kafram boch.

◼ Ngam Fek Fare Wulyang ko Damit ni Demtrug e Gin ni Ga Ra Yan Ngay: Mu fek boch e babyor u nap’an ni ngam milekag ara ngam man nga kantin. Nap’an ni ga be non ngak e piin ni gimed nga maruwel, ara buguli yoror rom, ara piin ni gimed nga skul, ara pi sensey ma ga pi’ e magazine ngorad. Boch e piin fel’ yangaren ni yad ma un ko skul e yad ma fek boch e magazine ni bay e article riy ni yad be lemnag ni baadag e sensey rorad ara piin ni yad nga skul. Mu fek boch e magazine u nap’an ni ngam rin’ ban’en ara ngam chuw’iy ban’en ni fan ngak boch e girdi’, ma rayog ni ngam pi’ boch ngak girdien e siyobay. Boor i gadad e ma chuw’iy e pensin; ere mang fan ni dab mu pi’ ngak girdien e maruwel u tafen e pensin? Mu tay e magazine nga bang nib mom ni ngam fek u nap’an nra yib e girdi’ rom nge guyem, ara nap’an ni ga be sonnag e taxi, ara nap’an ni ga be sonnag be’. Gur, ka bay boch e kanawo’ ni rayog ni ngam pi’ e magazine ngak e girdi’ riy?

Dabi thil e thin ni bay ko Fare Wulyang ko Damit ni faanra tomuren ni ke yan taareb ara l’agruw e pul ma ka bay boch ni dawor ni wereg. Ka be par nib ga’ fan e thin ni bay riy ndemtrug ko uw n’umngin nap’an ni ke yan. Ere gathi kab fel’ ni ngad athamgilgad ni ngad pied e pi babyor ney ni ke kakrom ngak e girdi’? Reb e kanawo’ nrayog ni ngad rin’ed e re n’ey e ngad ted reb e magazine ni ke kakrom ko naun ni dariy e girdi’ riy u nap’an ni gad be yan ko machib.