Rayog ni Ngan Tabab i Fil e Bible ku Be’ u Daken e Magazine Route
1. Mang fan ni ma pi’ e ulung rok Jehovah e athamgil nga laniyan’ e pi walag ni ngar fal’eged e magazine route rorad?
1 Boor e girdi’ ndubrad ni ngar uned ngodad ko fol Bible, machane yad baadag ni ngaur beeged e pi magazine rodad. Aram fan ni ma pi’ e ulung rok Jehovah e athamgil nga laniyan’ e pi walag ni ngar fal’eged e magazine route rorad ara girdi’ ni yad ma sul ngaur pied e tin nib beech e magazine ngorad. Faanra i beeg e girdi’ e pi babyor rodad ni gubin ngiyal’, ma yad ra adag ni ngar filed e Thin rok Got. (1 Pet. 2:2) Ra munmun mi yad beeg ban’en riy ni yad baadag me k’aringrad ni ngar adaged ni ngan fil e Bible ngorad.
2. Uw rogon ni ngad ayuweged e magazine route rodad ni nge adag e tin riyul’?
2 ‘Ngan Rannag Awochngin e Tin Riyul’: Mu guy rogon ni ngam weliyew facha’ boch ban’en, mag fal’eg e tha’ u thilmew ko bin ni kemus ni ngam pi’ e magazine ngak mag chuw nib papey. Re n’ey e ra ayuwegem ni nge tamilangan’um u rarogon facha’, nge pi n’en ni baadag, nge pi n’en ni ke mich u wan’. (Prov. 16:23) Ere, mu fal’eg rogom u m’on ni ngam man mu guy. Ma nap’an ni kam man mu guy, mag guy rogon ni ngam weliy reb e thin nu Bible ni bay ko fare magazine ni ngam pi’ ngak, ya faan ga ra rin’ ni aram rogon ma aram e gowa ga be rannag awochngin e tin riyul’ ni kam yung nga laniyan’. (1 Kor. 3:6) Mu yoloy nga but’ e rofen ni kam man mu guy, nge babyor ni kam pi’ ngak, nge n’en ni kam weliyew riy nge thin nu Bible ni kam beegew.
3. Susun ni uw urngin yay ni ngad sulod ko magazine route rodad?
3 Susun ni Uw Urngin Yay ni Ngad Sulod Ngak Facha’? Susun ni gubin e pul ni ngam sul ko magazine route rom ni ngam pi’ e tin ni kab beech e magazine ngak. Machane, rayog ni nge yoor yay ni ngam sul u lan reb e pul ni be yan u rogon nrayog rom ara faen ni ga be sul ngak. Bod ni faanra kam pi’ reb e magazine ngak facha’, ma rayog ni nge reb ara l’agruw e wik nga tomuren mag sul ngak me lungum, “Kug tal u roy ni nggu dag ban’en ngom ko fare magazine ni faan kug pi’ ngom.” Re n’ey e ra k’aring ni nge adag ni nge beeg reb e article ko fare magazine. Faanra ke mu’ i beeg, ma rayog ni ngad fithed ngak ko uw rogon u wan’ e re article nem, ngemu’ ma gad weliy buchuuw e thin ni bay riy. Ma reb e faanra baadag facha’ ni ma beeg e babyor rodad, ma nap’an ni ga ra sul ngak ma rayog ni ngam weliyew murung’agen e tract, ara brochure, ara ba ken e babyor ni gad be wereg ko re pul nem.
4. Mang e rayog ni ngad rin’ed ma gad nang ko baadag e magazine route rodad ni ngan fil e Bible ngak fa danga’?
4 Dab mu sonnag ni nge fith ko rayog ni ngan fil e Bible ngak fa. Ya gur e ngam fith. Mus ni faanra ke siyeg ni ngam fil e Bible ngak kafram, maku rayog ni ngam dag ngak fare thin ni bay ko Fare Wulyang ko Damit ni kenggin e, “Pi Deer ni Bay e Fulweg Riy u Bible” mag guy ko baadag ni ngam weliyew murung’agen fa danga’. Sana rayog ni ngam tababgow i fil e Bible riy. Machane, faanra de yag ni ngam tabab i fil e Bible ngak, ma rayog ni ngkum ulul ngaum pi’ e tin nib beech e magazine ngak.