Ngad Mon’oggad ko Machib—Rogon ni Ngan Ayuweg e Magazine Route Rodad

Fan nib Ga’ Fan: Boor e girdi’ ni yad baadag ni yad ma beeg e pi babyor rodad, machane dubrad ni ngar uned ko fol Bible. Dabisiy ni yad ba felfelan’ ko birorad e teliw ara yad ma lemnag ni dariy e tayim rorad ni ngar uned ko fol Bible. Machane, faan yad ra beeg e pi babyor rodad ni gubin ngiyal’ ma rayog ni ngar adaged ni ngkur nanged boch murung’agen e Thin rok Got. (1 Pet. 2:2) Sana bay be’ ni kaam mada’gow ni bay reb e babyor ni ke beeg ni baadag ara ke thil boch ban’en u rarogon e yafos rok ma ke adag ni nge un ko fol Bible. Ra ud sulod ko pi girdi’ ney ni gubin ngiyal’ ma rayog ni ngar pufpufgad ngodad, ma re n’ey e ra ayuwegdad ni ngad nanged e pi n’en ni yad baadag, nge pi’ n’en ni ma magafan’rad ngay. Ma dabisiy nra munmun ma rayog ni ngam tababnag e fol Bible ngak faen ni ga ma yan ni ngam guy.

Rogon ni Ngan Rin’:

Mu dugliy ni gubin e pul ni ngam pi’ e bin nib beech e Wulyang ko Damit ngak. Sana rayog ni ngkum man u ba ngiyal’ u lan fare pul ya nge yag ni nge adag ngki nang murung’agen fare babyor nim pi’ ngak ko yay ni som’on ara ngam pi’ fare babyor ni ir e yibe wereg ko re pul nem. Nap’an e magazine route rom mag guy rogon ni ngam yoloy e pi n’en nib t’uf u murung’agen e piin ni gimed ma mada’.—Mu guy fare Machib Ko Gil’ilungun ko January 2014 ko p. 3.
Mu fal’eg rogom u m’on ni ngam guy facha’. De fel’ ni kemus ni ngam pi’ reb e magazine ngak, ya kub t’uf ni ngam nonow mag fith salpen ya nge yag ni nge fel’ e tha’ u thilmew. Faan ga ra rin’ ni aray rogon, ma aram e ga be ayuweg ni nge adag ngki fil boch.
Mu tiyan’um ya nge yag ni ga ra nang ko wuin e ba fel’ ni ngam ognag e fol Bible ngak. Faanra bay be’ ni ir reb e magazine route rom ni ke fith murung’agen ban’en ni bay ko Bible, mag gay rogon ni ngam pi’ reb e babyor ngak ni be weliy murung’agen e re n’em mi gimew weliy u taabang. U m’on ni ngam chuw mag fith reb e deer nib l’ag rogon ko n’en ni kam weliyew ni aram e n’en ni gimew ra weliy ko yay ni migid ni gimew ra mada’. Ma faanra ke yag ni ngam man ngam guy ni gubin ngiyal’ mi gimew weliy boch ban’en u murung’agen e Bible ara gimew ma fanay reb ko pi babyor ni gad ma fanay ko fol Bible, ma aram e ke mang be’ ni ga ma fil e Bible ngak. Ere gur, ka yag ni ngam ognag e fol Bible ngak be’ ni ga be fanay fare brochure ni kenggin e Thin nib Fel’? Kaam gay rogon ni ngam dag fa gal video rodad ngak ni kenggin e Mang Fan ni Ngam Fil e Bible? nge Mang e Yima Rin’ u Nap’an e Fol Bible? Yugu aram rogon ni sana som’on ma dabun ni nge motoyil ngom, machane rayog ni nge boch nga m’on me thil rarogon me adag ni nge motoyil. Ere gur, gathi ba fel’ ni ga ra sul ngam guy bayay?

Mu Gay Rogon ni Ngam Rin’ e Re N’ey u Lan e Re Pul Ney:

Mu yoloy fithingan e girdi’ nrayog ni ngam guyrad ni aram e ngar manged e magazine route rom nga but’. Mman mu guyrad mag pi’ e bin nib beech e magazine rodad ma gog ngorad ni ka ga ra sul ni ngam pi’ e bin nib migid e magazine nib beech ngorad.