Nap’an ni Ga Be Fil e Bible ku Be’ Ma Ga Pi’ e Athamgil nga Laniyan’ Nge Adag e Machib
1. Mang e ba muun ngay ni ngan machibnag e Thin Rok Got nrogon?
1 Pi tamachib ni bod apostal Paul e goo yad manang ni gathi ke mus ni ngan weliy e thin ko Bible ya ngan “machibnag e thin rok Got nrogon.” (2 Tim. 2:15) Nap’an ni gad be machibnag e Thin Rok Got ngak e girdi’, ma uw rogon ni ngad guyed rogon ni ngari “mich” e thin rok Got u wan’rad?—Acts 28:23.
2. Uw rogon nrayog ni ngad ayuweged e girdi’ ni ngar ted fan e Thin Rok Got?
2 Ngan Pag Nge Mang Thin Rok Got e Nge Tamilangnag: Som’on e ngan tamilangnag min tay fan e Thin ni yib rok Got ni bay e gonop riy. Rogon gelngin e michan’ rodad ko Thin Rok Got e rayog ni nge k’aring e girdi’ ngar motoyilgad ko thin nu Bible ni gad be beeg ngorad. (Heb. 4:12) Rayog ni ngam gaar: “Ke yib angin ngog ya ke tamilangan’ug ko mang e be yog e thin rok Got u murung’agen e re n’ey. Am guy ko mang e be yog e Thin Rok Got riy.” Faanra rayog ma ngam pag e Thin Rok Got nge mang ir e tamilangnag e n’en ni ga be weliy ni aram e ngam beeg ngak.
3. Tomren ni kam bieg e thin ko Bible, ma mang e rayog ni ngam rin’ ya nge tamilang u wan’ facha’ e n’en ni kam weliyew?
3 Bin migid, ma ga weliy fan fare thin nu Bible ni kam beeg. Boor e girdi’ nib mo’maw rorad ni ngar nanged fan reb e thin nu Bible ni kan beeg ngorad ko yay nsom’on. Ba t’uf ni ngan weliy rogon nib m’ag fare thin nu Bible ko n’en ni yad be weliy murung’agen. (Luke 24:26, 27) Ngan tamilangnag e tin nib ga’ fan riy. Ngam fith ni faanra ke tamilang u wan’ e n’en ni kam weliyew.—Prov. 20:5; Acts 8:30.
4. Mang e bin tomur e n’en nrayog ni ngan k’aring laniyan’ e girdi’ u nap’an ni gad be fil e Bible ngorad?
4 Ngan Weliy Fan e Thin ko Bible: Bin tomur ma ngam guy rogon ni nge taw e thin rok Got nga gum’erchaen e girdi’. Ma ga ayuweg facha’ nge nang ko uw rogon nib m’ag fare thin nu Bible ngak. Ngam weliy fan fare thin nu Bible ma rayog ni nge k’aring facha’ nge thiliyeg e lem rok. (Acts 17:2-4; 19:8) Susun, tomren ni kad bieged e Psalm 83:18 ma rayog ni ngad weliyed ko uw fene ga’ fan ni ngad nanged ni faanra nge chugur e tha’ u thildad be’ mab t’uf ni ngad nanged fithingan. Ma ga fith ni ngam gaar, “Ga be lemnag ni faanra ga manang fithingan Got ma ra fel’ boch e meybil ni ga ma tay?” Ngan weliy ko uw rogon nib m’ag fare Thin nu Bible ngak ma ra nang feni ga’ fan. Ngan machibnag e Thin rok Got ni aram rogon ngak e piin nib yul’yul’ ma ra ayuwegrad ngar liyorgad ngak Jehovah ni bin riyul e Got.—Jer. 10:10.