Mired Nga Micronesia Ngam Ayuweged Gamad!
1, 2. (a) Uw rogon ni ke folwok boor e Kristiano rok Abraham e ngiyal’ ney? (b) Mang thin e immoy u lan e Machib Ko Gil’ilungun ni fan ko pi walag nu Meriken, ma mang angin ni ke yib riy?
1 Rib t’uf e michan’ nib gel mfin nrayog ni nge digey be’ e tabinaw rok nge pi tafager rok ni fan e nge pigpig ngak Got. Gonap’an 4,000 e duw ni ke yan me m’ug e michan’ ni aram rogon rok Abraham. I gaar Got ngak, ‘Mpag e girdi’ rom nge nam rom ngam man nga reb e nam ni gag e bay fin gu dag ngom.’ (Acts 7:2, 3.)
2 Boor e Kristiano e ngiyal’ ney ni kar rin’ed e n’en ni rin’ Abraham. Ka ranod nga yugu boch e nam ni fan ko maruwel rok Jehovah. Nap’an nning e ayuw nga Meriken ni fan ko pi ulung nu Micronesia u lan fare Machib Ko Gil’ilungun ko February 2009, ma ba pag 100 e girdi’ nra paged e tabinaw rorad ni fan e ngar bad ni ngar pied e ayuw.
3. Mang e ke k’aring e pi walagdad ni ngar bad nga Micronesia?
3 Mang Fan ni Yad Ma Rin’? Mang e ke k’aring e pi walag ney ni ngar rin’ed e re n’ey? Bay ba wu’ e mabgol ni kar bad l’agruw i bitir ni fakrow nga Guam ni ke lungurow: “Kug dugliyew ni nggu piew e ayuw ni bochan e gamow baadag ni ngki yoor ban’en ni gu rin’ew ni fan ko fare maruwel ni machib.” Ku gamow baadag ni nggu ayuwegew e bitir romow ngar nangew ni ulung rok Jehovah e ga’ngin yang e fayleng ni bay riy, maku arrogon pi walagdad.” Ri gad be pining e magar ngak pi walagdad ni kar paged e tabinaw nge girdi’ rorad kar ‘bad nga Micronesia’ ni ngar ayuweged gadad ko fare maruwel ni fan nga Gil’ilungun Got!
4. (a) Mang boch e magawon ni ma mada’nag e piin ni yad ma yan nga boch e binaw ni ngar pied e ayuw ko machib? (b) Uw rogon ni nge pi’ girdien e ulung e ayuw?
4 Uw Rogon ni Ngad Pied e Ayuw? De mom ni ngam man mu par nga bang nib palog ko tabinaw rom. Ere, mang e ke ayuweg e piin ni kar dugliyed ni ngar pared ko gin ni ka ranod ngay ya nge yog nra pied e ayuw? Ke yog ba wu’ e mabgol ni lungurow: “T’ufeg nge gol ni ke dag e pi walag ngomow e kemus ni yigoo lan e ulung rok Jehovah e yira pirieg riy.” Re n’ey e be puguran ngomow fare thin rok Jesus u Mark 10:29, 30. Riyul’, ya kug pagew e tabinaw romow, machane bod ni ke pi’ Jehovah ngomow boch e girdi’ ni ngar manged chon e tabinaw romow nib beech.” Faan gad ra ngongol u fithik’ e gol, ma rayog ni ngad ayuweged e pi girdi’ ney ni kar bad ni ngar ayuweged gadad. Ere, mang ni dab mu nameg ni ngam nang boch ban’en u murung’agrad, mag dag ngorad nriyul’ ni gab felfelan’ ko ayuw ni yad be pi’?—3 John 8.
5. (a) Uw rogon nra fel’ rogon e piin piilal ko salap rok e pi walag ni ka yad ba beech nga lan e ulung? (b) Mang e ra ayuweg e piin piilal ni ngar maruwelgad u taabang nib taareb lanin’rad?
5 Uw rogon nra fel’ rogon e piin piilal ko ulung ko salap ko pi walag ney? Rayog ni ngad fith lanin’rad u boch ban’en. Faan gad ra dag ngorad ni gad baadag ni ngar pied e ayuw u boch ban’en ma aram e ra mom ngorad ni ngar ayuweged e ulung. Susun ni nge nameg gubin e piilal ni nge fel’ e numon u thilrad e tin ka bay e piilal ni aram e ngaur fithed lanin’rad u boch ban’en nib muun ngay e tin nib beech e piilal ni kar bad ni ngar pied e ayuw. Maku ra fel’ rogon e ulung ko salap rok e pi walag nib beech ney ni faan yira pagrad ni ngar maruwelgad ko salap rorad ni ngar ayuweged e ulung. Piin piilal ni ur rin’ed e pi maruwel nem kafram e thingar ra sobut’naged lanin’rad ngar folgad ko pi n’en ni kan thilyeg ni bay rogon ko maruwel rok reb nge reb e piilal. Thingari gubin e piilal u lan e ulung mar maruwelgad u taabang nib fel’ rogon, ya gathi yad be tagenging ngorad. (Galatia 6:4) Yad ba felfelan’ ko ayuw ni be pi’ e tin ni ka bay e piilal ko ulung, ndemtrug ko ka yad ba beech fa ke n’uw nap’rad ko ulung. Thingar dab ur tageninggad ngorad, mar ayuweged ni nge par e ulung nib taareban’ e girdi’ riy.
6. (a) Uw rogon nrayog ni nge pow’iy Jesus e ulung ko piin piilal e ngiyal’ ney? (b) Uw rogon ni nge tay e piin piilal farad?
6 Ku manang e piin piilal nrayog ni nge pow’iy Jesus laniyan’ reb e piilal u daken gelngin Got nib thothup ni nge pi’ e fonow nu Bible nra pithig reb e magawon fa ayuwegey ni ngan turguy ban’en nib ga’ fan. (Acts 15:6-15) Yugu aram rogon nra fel’ rogon e piin piilal ni faan yad ra motoyil ko pi walag ni boor e salap rorad, machane gathi goo taareb e piilal e bay rogon ni nge pow’iy gubin e piilal. Ra dag e piin piilal ni yad be tay farad ni faan yad ra motoyil u nap’an ni be weliy bagayad reb e fonow nu Bible fa reb e yaram ni ke yib rok fare Governing Body.
7, 8. Uw rogon nrayog ni nge folwok e piin ni ka ranod nga reb e binaw ni ngar pied e ayuw rok Nehemiah, ma mang angin nra yib riy?
7 N’en ni Rin’ Nehemiah: Piin ni yad ma yan nga reb e nam ni ngar pied e ayuw ko machib e rayog ni nge yib angin ngorad e n’en ni rin’ Nehemiah. Nap’an ni taw nga Jerusalem me guy rogon ni nge dabi lemnag e girdi’ ni ke yan e ngaram ni nge yaliy kirebun e n’en ni yad be rin’. I fal’eg i yaliy gubin ban’en u m’on ni nge non. (Mu taarebnag ko Proverbs 18:13) Angin ni yib riy e yog e pi ta maruwel rok ni lungurad: ‘Ngad ubunged. Mi yad fal’eg rogorad ni aram e ngar tababgad ko maruwel.’—Nehemiah 2:11-18
8 Pi walagdad ni pumoon nge ppin ni kar ‘bad’ nga Micronesia e yad ba felfelan’ ko ayuw ni yibe pi’ ngorad u nap’an ni yad be athamgil ni ngar nanged rarogon e gin nib beech ni ngar pared riy, ma yad manang ni ka boor ban’en nib t’uf ni ngar filed u murung’agen e gin ni ka ranod ni ngar pared ngay. (Acts 16:9) Thingar ra kol ayuwgad ni dab ra ‘weliyed lanin’rad u boch ban’en ndawora rung’aged e n’en ni ka nog’, ya thingar ra fith fithed boch e girdi’ u m’on ni ngar weliyed lanin’rad fa ngar pied e ayuw ni bod rogon Nehemiah.
9. Uw rogon u wan’um e piin ni kar ‘bad nga Micronesia’ ni ngar ayuweged gadad?
9 Ke yog reb e walag ni ppin ni gaar: “Rib fel’ ni gad be guy boor e walag ni kar paged gubin ban’en rorad ni fan e ngar ayuweged e ‘tabinaw’ rorad u Micronesia.” Ere, manga yugu da felfelan’gad ni ngad pied e athamgil nga laniyan’ e pi tamaruwel ni gadad ney ni kar ‘paged e girdi’ rorad nge nam rorad’ ni fan e ngar ayuweged gadad.