Fare Maruwel Nrib Ga’ Fan
1. Faanra rib ga’ fan fare maruwel ni machib u wan’dad, ma mang e ra k’aringdad ni ngad rin’ed?
1 Mang fan ni yima pi’ e athamgil nga lanin’dad ni ngad fanayed e tayim rodad, nge gelngidad, nge tin ni bay rodad ni fan ko machib? Bochan e dariy reb e maruwel ni kab ga’ fan ko biney e maruwel! Gad ra fal’eg i lemnag rogon angin e re maruwel ney, ma ra k’aringdad ni ngad uned i rin’ ya gad manang ndab kun rin’ ba ngiyal’.—Acts 20:24.
2. Uw rogon ni gad ma n’uf fithingan Jehovah u daken e machib ni gad ma tay?
2 Ma N’uf Fithingan Jehovah: Fare maruwel ni machib e ma tamilangnag ni Gil’ilungun Jehovah u daken Jesus Kristus e ra chuweg urngin e am nu fayleng ma ra pithig urngin e magawon ko girdi’. (Matt. 6:9, 10) Maku ma n’uf Jehovah ni bochan e goo ir e rayog ni nge chuwegdad ko m’ar nge yam’. (Isa. 25:8; 33:24) Bochan e gad be fek fithingan, ma ra i guy e girdi’ nib fel’ e ngongol rodad ma rayog ni ngar pininged e sorok ngak. (1 Pet. 2:12) Ri gad ra felfelan’ ni faan gad ra machibnaged fithingan Jehovah u ga’ngin yang e fayleng nge nang gubin e girdi’!—Ps. 83:18.
3. Mang boch e tow’ath nra yog ngak e piin ni yad ra motoyil ko fare thin nib fel’ ni murung’agen Gil’ilungun Got?
3 Ra Ayuweg e Yafos ko Girdi’: Dabun Jehovah “ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Pet. 3:9) Machane, uw rogon ni nge nang e girdi’ ko mang ngongol e ba puluw u wan’ Jehovah ni faanra dariy be’ ni nge yog ngorad? (Jonah 4:11; Rom. 10:13-15) Nap’an nra fol e girdi’ ko fare thin nib fel’ ma ra fel’ boch e par rorad ni bochan e kar paged boch e ngongol nib kireb. (Mik. 4:1-4) Maku reb e ra yog e athap ko yafos ni manemus ngorad. Machib ni gad ma tay e ra ayuweg e yafas rodad nge piin ni yad ra motoyil ngodad. (1 Tim. 4:16) Rib ga’ fan e n’en ni gad ma rin’ ko re maruwel ney nib ga’ fan!
4. Mang fan nthingar da tedan’dad i rin’ fare maruwel ni ngan machib min yognag boch i gachalpen Jesus?
4 Dabki n’uw nap’an ma ra yib fare gafgow ni baga’, ma aram e ngiyal’ ni yira thang e re fayleng nib kireb ney. Piin ni yad ba muun ko ba’ rok Jehovah e yad ra magey ni yad ba fos. Ere aram fan nrib ga’ fan fare maruwel ni yibe rin’ e ngiyal’ ney ni ngan machibnaged e girdi’ min pingegrad ngar manged boch i gachalpen Kristus. Ere ngad mon’eged e re maruwel ney u wan’dad!—Matt. 6:33.