Rayog ni Ngam Ayuweg e Girdi’ ni Ngar Manged Boch i Gachalpen Jesus, Fa?

1. Mang e ke rin’ Jehovah ni fan ngom?

UW ROGON nim mang reb e Pi Mich Rok Jehovah? Som’on e sana mu rung’ag “fare Thin Nib Fel’” ko gallabthir rom, ara be’ ni gimew nga maruwel, ara skul, ara nap’an ni yib e Pi Mich nga tabinaw rom u nap’an e machib. (Mark 13:10) Ngemu’ ma bay be’ ni tay e tayim ni nge fil e Bible ngom. Aram e ngiyal’ ni t’uf Jehovah rom mag nang ni gab t’uf rok. Ke pow’iyem Jehovah ko tin riyul’ ma chiney ni kam mang reb i gachalpen Jesus Kristus e ke yag e athap ko yafos ni manemus ngom. (John 6:44) Ere ba mudugil ni ga be pining e magar ngak Jehovah ni ke fanay be’ ni nge fil e tin riyul’ ngom, ma ke m’agan’ ngay ni ngam mang reb e tapigpig rok.

2. Mang e gad ra weliy ko re article ney?

² Chiney ni kad nanged e tin riyul’ e ku rayog ni ngad ayuweged boch e girdi’ ni ngar uned ngodad ko fare pa’ i kanawo’ ni be sor ko yafos. Rayog nib mom ni ngaud machibgad, machane sana ba mo’maw’ ni ngad ognaged e fol Bible ngak be’ ara da filed e Bible ngak. Aray rogon e lem rom, fa? Faanra arrogon, ma bay boch ban’en ko re article ney nra ayuwegem. Gad ra weliy e n’en ni ma k’aringdad ni ngad uned i ayuweg e girdi’ ni ngar manged boch i gachalpen Jesus. Ku gad ra weliy rogon nrayog ni ngad gelgad nga boch e magawon nrayog ni nge talegdad ndab da filed e Bible ngak be’. Machane som’on e ngad weliyed fan nthingar da machibnaged e girdi’, mu kud filed fare thin nib fel’ ngorad.

I TAY JESUS CHILEN NI NGAD MACHIBNAGED E GIRDI’ MA GAD FIL E TIN RIYUL’ NGORAD

3. Mang fan ni gad ma machib?

³ Nap’an ni immoy Jesus u fayleng me yog ngak pi gachalpen ni ngar rin’ed ba maruwel ni l’agruw ban’en nib muun ngay. Som’on e yog ngorad ni ngar machibnaged fare thin nib fel’ ni murung’agen Gil’ilungun Got me dag ngorad rogon ni ngar rin’ed. (Matt. 10:7; Luke 8:1) Bod ni yog ngorad e n’en ni ngar rin’ed ni faanra motoyil e girdi’ ngorad, nge n’en ni ngar rin’ed ni faanra dabi motoyil e girdi’. (Luke 9:2-5) Nap’an ni yog ni yad ra ‘machib u gubin yang u fayleng,’ ma aram e be yog ngorad ni boor e girdi’ ni yad ra machibnag ma boor e nam ni yad ra machib riy. (Matt. 24:14; Acts 1:8) I yog ngorad ni ngar weliyed ko girdi’ murung’agen Gil’ilungun Got, nge n’en nra lebguy ndemtrug ko yad ra motoyil fa danga’.

4. Mang e be yog e Matthew 28:18-20 ni kub t’uf ni ngad rin’ed u nap’an ni gad be machibnag murung’agen Gil’ilungun Got?

⁴ Mang e n’en ni migid ni yog Jesus ngorad ni ngar rin’ed? I yog ngak pi gachalpen ni ngar filed ko girdi’ rogon ni ngar folgad u gubin ban’en ni ke tay chilen. Sana rayog ni nge yog boch e girdi’ nre n’ey ni yog Jesus ni ngan machib, min fil e tin riyul’ ko girdi’ e yigoo tin som’on e Kristiano e fan ngorad. Machane gur, riyul’ e re n’ey? Danga’, ya yog Jesus ni yira rin’ e re maruwel ney nge yan i mada’ nga “tomren e fayleng.” (Mu beeg e Matthew 28:18-20.) Rayog ni yog Jesus e re n’ey u nap’an ni m’ug ngak pi gachalpen nib pag 500 urngirad. (1 Kor. 15:6) Ma nap’an ni pilyeg e changar rok John, me tamilangnag ni baadag ni urngin pi gachalpen ni ngar ayuweged e girdi’ ngar nanged murung’agen Jehovah.​—Rev. 22:17.

5. Mang e weliy Paul ko 1 Korinth 3:6-9 ni nge dag ni machib ni gad ma tay e ba peth nga rogon ni gad ma fil e tin riyul’ ko girdi’?

⁵ I taarebrogonnag apostal Paul fare maruwel ni ngan ayuweg e girdi’ ngar manged boch i gachalpen Jesus nga rogon ni ngan ayuweg e woldug ni nge dag ni gathi kemus ni ngad yunged e awoch, ya ku bay ban’en nib t’uf ni ngad rin’ed. I puguran ngak piyu Korinth ni gaar: “I gag e gu yung e awoch me tugul, mi Apollos e i puog e ran ngay . . . ma gimed e gimed e milay’ rok Got.” (Mu beeg e 1 Korinth 3:6-9.) Bochan ni gad be maruwel u “milay’ rok Got,” ma aram fan ni gathi kemus ni gad be yung e awoch ya ku gad be rannag ma gubin ngiyal’ ni gad be yaliy rogon ni be ilal. (John 4:35) Machane gad manang ni Got e be pi’ gelngin e awoch ni kad yunged ni nge tugul me ilal.

6. Mang e thingar da ayuweged e girdi’ ni ngar rin’ed u nap’an ni gad be fil e tin riyul’ ngorad?

⁶ Gad be gay e piin “bay rogon ni nge yag e yafos ni manemus ngorad.” (Acts 13:48, NW) Ra ngad ayuweged e pi girdi’ ney ni ngar manged boch i gachalpen Jesus, ma thingar da ayuweged yad ni ngar (1) nanged fan, (2) me mich u wan’rad, mar (3) folgad ko pi n’en kar filed u Bible. (John 17:3; Kol. 2:6, 7; 1 Thess. 2:13) Gubin e girdi’ u lan e ulung nrayog ni ngar ayuweged e piin yad be fil e Bible ni aram e ngar daged e t’ufeg ngorad, ma ranod ra nonad ngorad u nap’an ni kar bad ko muulung. (John 13:35) Maku en be fil e Bible ngorad e rayog ni boor e tayim nib t’uf ni nge fanay ni nge ayuwegrad ni ngar ‘kirebnaged e yungi n’en ni ke fal’eg e moonyan’ rogon ke par riy be cham ngodad,’ ara ngar digeyed boch ban’en ni ke mich u wan’rad ara ngongol ni kar mechamgad ngay nib mo’maw’ ni ngar digeyed. (2 Kor. 10:4, 5) Sana rayog ni boor e pul nib t’uf ni ngan ayuweg be’ ni nge thilyeg e pi n’ey u rarogon, ya nge yag ni munmun me bung rogon ni nge un ko taufe. Machane faanra rin’ e re n’ey, ma ra yib angin ngak.

T’UFEG E MA K’ARINGDAD NI NGAD AYUWEGED E GIRDI’ NGAR MANGED BOCH I GACHALPEN JESUS

7. Mang fan ni gad ma machib ma gad be fil fare thin nib fel’ ko girdi’?

⁷ Mang fan ni gad ma machibnag e girdi’ ma gad ayuwegrad ni ngar manged boch i gachalpen Jesus? Bin som’on e bochan nib t’uf Jehovah rodad. Faan ga ra athamgil u rogon nrayog rom ni ngam fol ko re n’ey ni kan tay chilen, ma aram e ga be dag nib t’uf Got rom. (1 John 5:3) Am lemnag e re n’ey: Ga ma machibnag e girdi’ ni bochan e ba t’uf Jehovah rom. Ba mom ni ngam fol ko re thin ney, fa? Sana danga’. Kam rus u nap’an nim un ko machib ko yay nsom’on, fa? Ba mudugil ni kam rus! Machane ga manang ni ireray e re maruwel ni baadag Jesus ni ngam rin’, ma aram mag fol ko n’en ni tay chilen. Ma faani n’uw boch nap’an ni kam un ko machib, ma rayog ni ke mom boch ngom. Machane uw rogon u wan’um e bin ni ngam fil e Bible ngak be’? Nap’an ni ga ra lemnag e re n’ey ma ma k’aring e marus ngom, fa? Dabisiy. Machane faan ga ra meybil ngak Jehovah ma gog ngak ni nge ayuwegem ni nge dab kum rus me yag nim ognag e fol Bible ku be’, ma aram e rayog ni nge ayuwegem ni ngam adag ni ngam ayuweg e girdi’ ngar manged boch i gachalpen Jesus.

8. Mang e ku ra ayuwegdad ni ngad adaged ni ngad filed e tin riyul’ ko girdi’ nrogon ni bay ko Mark 6:34?

⁸ Bin migid e bochan nib t’uf e girdi’ rodad, ma aram fan ni gad ma fil e tin riyul’ ngorad. Bay bayay nri aw parawon Jesus nge pi gachalpen ni bochan e ba elmerin e machib ni ur ted. Ba t’uf ni nga ranod nga bang ngar toffangad, machane me yib ba ulung i girdi’ ngorad. Bochan ni kari taganan’ Jesus ngorad, ma aram me tabab i machibnag “boor ban’en” ngorad. (Mu beeg e Mark 6:34.) Yugu aram rogon ni ke aw parawon, machane me athamgil nge machibnagrad. Mang fan? Bochan ni manang rogon lanin’rad. Baadag ni nge ayuwegrad ni bochan e ke guy ni yad be gafgow mab t’uf ban’en ni nge l’agan’rad ngay. Ku arrogon e girdi’ e ngiyal’ ney ni yugu aram rogon ni yira guyrad ma bod ni yad ba felfelan’ mab fel’ u wan’rad e par rorad, machane ku bay e magawon rorad mab t’uf ban’en ni nge l’agan’rad ngay. Yad bod bogi saf ni kar maloggad ndariy be’ ni be gafaliyrad. I yog apostal Paul ni girdi’ ni aray rogon e dar nanged Got ma dariy ban’en ni be l’agan’rad ngay. (Efe. 2:12) Yad be yan u daken fare pa’ i kanawo’ ni be sor i yan ko “nifiy” ara yam’! (Matt. 7:13) Faan gad ra lemnag rogon feni t’uf rorad ni ngar nanged Got, ma t’ufeg nge runguy rodad ngorad e ra k’aringdad ni ngad ayuweged yad. Ma bin th’abi fel’ e kanawo’ nrayog ni ngad ayuweged yad riy e aram e ngad ognaged e fol Bible ngorad.

9. Uw rogon nrayog ni nge ayuwegem Jehovah nrogon ni be yog e Filippi 2:13?

⁹ Rayog ndamur ognag e fol Bible ku be’ ni bochan e ga manang ni boor e tayim nib t’uf ni ngam tay ni ngam fal’eg rogom riy nge tayim ni ngam fil e Bible ngak. Faanra aray rogon e lem rom, mag weliy lanin’um ngak Jehovah. Mog ngak nge ayuwegem ngam adag ni ngam pirieg be’ nrayog ni ngam fil e Bible ngak. (Mu beeg e Filippi 2:13.) Ke yog apostal John ngodad nra fulweg Got taban e meybil nib puluw ko n’en nib m’agan’ ngay. (1 John 5:14, 15) Ere rayog ni nge pagan’um ngay nra ayuwegem Jehovah ni ngam adag ni ngam fil e tin riyul’ ko girdi’.

ROGON NI NGAD GELGAD NGA YUGU BOCH E MAGAWON

10-11. Mang e rayog ni nge talegdad ndab da filed e Bible ngak be’?

¹⁰ Gad manang nrib ga’ fan ni ngad filed e tin riyul’ ko girdi’, machane sana rayog ni bay boch ban’en ni be talegdad ndabiyog ni ngad rin’ed e re n’ey ni bod rogon ni gad baadag. Ere ngad weliyed boch e pi n’ey, nge rogon nrayog ni ngad gelgad ngay.

¹¹ Sana gad be lemnag ni boor ban’en ndabiyog ni ngad rin’ed ni bochan rarogodad. Bay boch e walag ni kar pilibthirgad ara kar m’argad. Gur bagayad e pi girdi’ ney, fa? Faanra gur bagayad, ma ngam lemnag ban’en ni kad filed ko fare m’ar ni COVID-19. Kad guyed nrayog ni ngad filed e Bible ko girdi’ ni gad be fanay e phone, ara computer, ara tablet! Ere sana rayog ni ngam tababnag mag fil e Bible ngak be’ u tabinaw rom ni ke mom boch ngom. Ku bay reb i fel’ngin e re n’ey. Bay boch e girdi’ ni baadag ni nge fil e Bible, machane dabiyog ni ngar filed ko ngiyal’ nib ga’ ni ma machib e pi walag riy. Machane sana rayog ni ngar filed e Bible nri kakadbul ara nap’an ni ke nep’. Rayog ni ngam filew be’ e Bible ko ngiyal’ ney, fa? I fil Jesus boch ban’en ngak Nikodemus ni ke nep’ ni bochan e aram e ngiyal’ ni ke mel’eg.​—John 3:1, 2.

12. Mang boch ban’en nra ayuwegdad ni nge pagan’dad nrayog ni ngad filed e Bible ngak be’?

¹² Sana gad be lemnag ndabiyog ni ngad filed e Bible ngak be’. Rayog ni gad be lemnag nib t’uf ni ngki yoor boch ban’en ni ngad nanged, ara ba t’uf ni ngkud salapgad boch u rogon ni gad ma fil e tin riyul’ ko girdi’ u m’on ni nga fini yag ni ngad filed e Bible ngak be’. Faanra aray rogon e lem rom, ma baaray dalip ban’en nrayog ni nge pi’ e pagan’ ngom. Bin som’on e, manang Jehovah nrayog ni ngam fil e tin riyul’ ko girdi’. (2 Kor. 3:5) Bin migid e, Jesus ni ir e ‘kan pag fan urngin ban’en ngak u tharmiy ngu but’’ e ke pi’ mat’awum ni ngam fil e tin riyul’ ko girdi’. (Matt. 28:18) Ma bin dalip e, rayog ni ngam taga’ ngak boch e girdi’ ni ngar ayuweged gur. I taga’ Jesus ko tin i fil e Chitamangin ngak ni nge yog, maku arrogom. (John 8:28; 12:49) Maku reb e, rayog ni nga mog ko en ma yarmiy e machib ko re ulung ni ga ma un riy ko machib, ara reb e pioneer, ara yugu reb e walag nib salap ko machib ni nge ayuwegem ni ngam tababnag mag fil e Bible ngak be’. Reb e ban’en nra pi’ e pagan’ ngom e aram e ngam un ngak bagayad e pi walag ney u nap’an ni nge fil e Bible ngak be’.

13. Mang fan nib t’uf ni nge m’agan’dad ngay ni ngad thilyeged rogon ni gad be fil e Bible ko girdi’?

¹³ Sana ba mo’maw’ ngodad ni ngad machibgad u boch e kanawo’ nib beech, ma gad be fanay boch ban’en ni ka fin ni ngongliy ni fan ko machib. Ke thil rogon ni gad be fil e Bible ko girdi’ e chiney. Fare ke babyor ni Enjoy Life Forever! ni gad be fanay ko fol Bible e be dag nib t’uf ni ngad thilyeged rogon ni gad ma fal’eg rogodad ma gad fil e Bible ko girdi’ nga rogon ni ud rin’ed kafram. Ke lich e paragraph ni yibe beeg, ma ke yoor e deer ni yibe fith, ma ke yoor ban’en ni nge weliy e en yibe fil e Bible ngak. Ki yoor boch e video nge boch ban’en ko website rodad nge JW Library^® ni yibe fanay. Faanra dam nang rogon ni ngam fanay e pi n’ey, ma gog ngak be’ nge ayuwegem. Gadad e girdi’ e gad baadag ni ngaud rin’ed ban’en u rogon ni kad mechamgad ngay. Ere de mom ni ngad thilyeged rogon ni gad be rin’ boch ban’en. Machane faanra ayuwegem Jehovah nge yugu boch e walag, ma ra mom ngom ni ngam thilyeg rogon ni ga be rin’ boch ban’en, mag adag ni ngaum fil e Bible ko girdi’. Ke yog reb e pioneer ni biney e kanawoen e fol Bible e rayog ni nge “k’aring e felfelan’ ngom nge en ga be fil e Bible ngak.”

14. Mang e susun ndab da paged talin u nap’an ni gad be machib u boch e binaw ni gathi ri ma motoyil e girdi’ riy? Uw rogon ni be pi’ e 1 Korinth 3:6, 7 e athamgil nga lanin’dad?

¹⁴ Sana gad be par u bang nib mo’maw’ ni ngan tababnag e fol Bible riy. Sana bay boch e girdi’ ndubrad ni ngar motoyilgad ara yad ma togopuluw ko machib rodad. Ere mang e ra ayuwegdad ni nge dabi mulan’dad ko machib u boch e binaw ni aray rogon? Dab mu pagtalin ni gad be par u ba fayleng ni be gel e kireb riy, ere rayog ni nge thil rogon e par ko girdi’ nib tomgin. Girdi’ nda ur motoyilgad kafram e rayog ni nge munmun mar nanged nib t’uf ni nge ayuwegrad Got. (Matt. 5:3) Bay boch e girdi’ nda ur feked e babyor rodad kafram ni ke m’agan’rad ni ngar uned ko fol Bible boch nga tomuren. Ku gad manang ni Jehovah e Ir e Ba Ga’ ko mokun woldug ni gad be tay. (Matt. 9:38) Baadag ni ngad ululgad i yung e awoch ma gad be puog e ran ngay, machane Ir e be pi’ gelngin be ga’. (1 Kor. 3:6, 7) Kub gel e athamgil ni be yib nga lanin’dad ni gad manang ni yugu aram rogon nder yag ni ngad filed e Bible ngak be’ e chiney, ma ra tow’athnagdad Jehovah ko athamgil ni gad be tay ma gathi bochan angin e maruwel ni gad be rin’!b

MU FELFELAN’ NI NGAM AYUWEG E GIRDI’ NGAR MANGED BOCH I GACHALPEN JESUS

15. Uw rogon u wan’ Jehovah u nap’an nra m’agan’ be’ ngay ni nge fil e Bible me fol ko tin be fil?

¹⁵ Ma felfelan’ Jehovah u nap’an nra fil be’ e tin riyul’, miki fil e pi n’em ko girdi’. (Prov. 23:15, 16) Ba mudugil nri be felfelan’ Jehovah ni be guy e pi n’en be buch e ngiyal’ ney! Bod ni yugu aram rogon ni bay fare m’ar ni ke garer u ga’ngin yang e fayleng u thilin e September 2019 nge August 2020, ma 7,705,765 e girdi’ ni kan fil e Bible ngak ma 241,994 i yad e kar ognaged yad ngak Jehovah kar uned ko taufe. Pi girdi’ ney e ku yad ra fil e Bible ngak yugu boch e girdi’ mar ayuweged yad ngar manged boch i gachalpen Jesus. (Luke 6:40) Dariy e maruwar riy ni ma felfelan’ Jehovah u nap’an ni gad ra ayuweg e girdi’ ni ngar manged boch i gachalpen Jesus.

16. Mang e ba fel’ ni ngad nameged?

¹⁶ De mom ni ngan ayuweg e girdi’ ni ngar manged boch i gachalpen Jesus, machane ra ayuwegdad Jehovah ni ngad rin’ed e re maruwel ney ni aram e ngad ayuweged e girdi’ ni nge t’uf e Chitamangidad ni bay u tharmiy rorad. Ere gur, rayog ni ngad nameged ni ngad pirieged taabe’ ni ngad filed e Bible ngak, fa? Faan gad ra ognag e fol Bible ngak urngin e girdi’ ni kad mada’naged u nap’an e machib, ma dabisiy ni gad ra pirieg be’ nra adag ni nge fil e Bible. Rayog ni nge pagan’dad nra tow’athnagdad Jehovah ko athamgil ni gad be tay.

17. Uw rogon u wan’dad ni faanra yag ni ngad filed e Bible ngak be’?

¹⁷ Ri gad ba tow’ath ni gad be machibnag e girdi’ ma gad be fil e tin riyul’ ngorad! Re maruwel ney e ri ma yibnag e felfelan’ ngodad. Apostal Paul e boor e girdi’ u Thessalonika ni ayuwegrad ni ngar manged boch i gachalpen Jesus. I weliy rogon laniyan’ ni gaar: “Bin riyul’ riy e gimed e l’agan’ nge felfelan’ romad nge tapgin ni nggu felfelan’gad ko gel ni kug tiyed, ni aram e nggu felfelan’gad u p’eowchen Somol ko ngiyal’ ni bay sul riy. Riyul’ ni gimed e kug ufgad ngomed ma kug felfelan’gad ngomed!” (1 Thess. 2:19, 20; Acts 17:1-4) Boor e walag e ngiyal’ ney ni ku aray rogon e lem rorad. Stéphanie ni boor e girdi’ ni kar ayuwegew e pumoon rok kar uned ko taufe e yog ni gaar, “Rib gel e felfelan’ riy ni ngan ayuweg e girdi’ ngar ognaged e yafos rorad ngak Jehovah.”