Mu Felfelan’ ko Machib ni Ga Be Tay

“Mmarod ngak girdien e pi nam . . . ngam pingeged yad ngar manged pi gachalpeg.”​—MATT. 28:19.

1-3. (a) Uw rogon u wan’ boch e girdi’ fare maruwel ni ngan fil e Bible ngak be’? (b) Mang boch e deer ni gad ra weliy?

REB e walag nib pin ni ma un nga reb e ulung u Meriken ni yad ma non ni Hindi e gaar: “Ke gaman 11 e wik ni kug fil e Bible ngak reb e tabinaw nu Pakistan. Kari fel’ e thin romad. Gu ra lemnag ni ngar sulod nga Pakistan ma ri ma sug sug e lu’ nga owcheg. Gathi kemus ni bochan e ngar sulod arfan ni gu ma yor, ya ku bochan gelngin e felfelan’ ni keb ngog ni kug fil murung’agen Jehovah ngorad.”

² Bay ba ngiyal’ ni kam felfelan’ ni aram gelngin ni bochan e fol Bible ni kam tew be’? Ri i felfelan’ Jesus nge pi gachalpen ko machib ni ur ted. Nap’an ni sul fa 70 i gachalpen Jesus ni ke l’ograd ni nga ranod ko machib nga rogned ngak e n’en ni ke buch, mi ri “felfelan’.” (Luke 10:17-21) Ku arrogon e ngiyal’ ney ni boor e girdi’ ni yad be felfelan’ ni yad be un ko re maruwel ney ni ngan yognag boch pi gachalpen Jesus. Mich riy e nap’an e duw ni 2007 ma sogonap’an nel’ nge baley e milyon e girdi’ ni fil e pi tamachib ney e Bible ngorad!

³ Machane, ku bay boch e tamachib ndawori yog ni ngar pirieged be’ ni ngar filed e Bible ngak. Ma boch e sana dawori pirieg be’ ni nge fil e Bible ngak u lan e pi duw ni ka fini yan ndawori n’uw nap’an. Mang magawon e rayog nda mada’naged u nap’an ni gad be athamgil ni ngad filed e Bible ngak be’? Uw rogon ni ngad gelgad ko pi magawon nem? Ma mang tow’ath e ra yib ngodad ni faan gad ra athamgil u rogon nrayog rodad ngad folwokgad ko fare n’en ni tay Jesus chilen ni gaar: “Mmarod ngak girdien e pi nam . . . ngam pingeged yad ngar manged pi gachalpeg”?​—Matt. 28:19.

Boch Ban’en Nrayog ni Chuweg e Felfelan’ Rodad

4, 5. (a) Uw rogon e machib u wan’ boch e girdi’ u yu yang u fayleng? (b) Mang boch e magawon ni ma yib ngak e tamachib u yu yang u fayleng?

⁴ Bay yu yang u fayleng nri baadag e girdi’ riy ni ngar feked e pi babyor ni gad ma wereg mar uned ngodad ko fol Bible. Immoy ba wu’ i mabgol nu Australia ni ur machibgow ba ngiyal’ u Zambia ni lungurow: “Riyul’ e re n’em. Rib fel’ e machib u Zambia. Nap’an ni gamad ra machib u kanawo’ ma boor e girdi’ ni ma yib ngomad ngar ninged e babyor ni ngar beeged.” U lan reb fapi duw ni ka fini yan ma ba pag 200,000 e girdi’ ni fil e pi walagdad nu Zambia e Bible ngorad. Faanra ngan susunnag, ma ra reb e tamachib u rom ma boor ko taareb e girdi’ ni be fil e Bible ngorad.

⁵ Machane, sana bay yu yang u fayleng nib mo’maw’ ko pi tamachib ni ngar wereged e babyor ko girdi’ mar filed e Bible ngorad ni gubin ngiyal’. Mang fan? Bochan e ba ga’ ni demoy e girdi’ u tabinaw rorad ma ku faanra bay be’ ma dabun ni ngan weliy murung’agen e Bible. Re n’ey e rayog ni bochan e kar ilalgad ko tabinaw ni girdi’ riy e darur uned nga barba’ e teliw fa kar dabuyed e ngongol ko pi yurba’ i teliw ni googsur. Ma boor e girdi’ ni kar pired ni ke magafan’rad ndar nanged e n’en ni ngar rin’ed ni bochan e machib ni googsur ni kan suguy nga lanin’rad. (Matt. 9:36) Pi girdi’ ney e yad be magar ni ngar uned i weliy murung’agen e Bible.

6. Mang boch ban’en nrayog ni nge lichnag e tin rayog ni nge rin’ be’ ko machib?

⁶ Ku bay reb e magawon nib thil ni ma mada’nag boch e tamachib nrayog ni nge chuweg e felfelan’ rorad. Immoy ni yad ba pasig ko machib, machane nap’an ni keb e m’ar ngorad fa nap’an ni kar pilibthirgad ma ke yoor ban’en ndabkiyog ni ngar rin’ed. Kum lemnag boch e magawon ni gadad e gad ma fek nga dakendad ni ma lichnag e tin nrayog ni ngad rin’ed ko machib. Ga ma lemnag ndabiyog rom ni ngam fil e Bible ngak be’? Sana taareb rogon lanin’mew Moses nnap’an ni yog Jehovah ngak ni nge yan i non ku Farao me gaar: “Wenig ngom, Somol; da gu fel’ ko welthin u fithik’ e girdi’ ni yoor, ara kug mang reb ko ngiyal’ ni mu tabab ko welthin ngog.” (Ex. 4:10) Faanra lemnag be’ ndabiyog ni nge rin’ ban’en ma bod ni be rus nri chey ma de yog rok. Sana gad be magarnag nri chey ma de mang be’ reb i gachalpen Jesus ni bochan e dad salapgad ko machib ma aram ma dab da filed e Bible ngak be’ ni bochan e nge dabi buch ban’en ni aram rogon. Ere uw rogon ni ngad gelgad ko pi magawon ney ni ka fin da weliyed?

Mu Fal’eg Lanin’um

7. Mang e ayuweg Jesus nge par nib pasig ko machib?

⁷ N’en som’on ni ngam rin’ e ngam fal’eg lanin’um. I yog Jesus ni gaar: “Ra be’ ma be yog l’ugun e pi n’en nib sug u laniyan’.” (Luke 6:45) Runguy rok Jesus ngak e girdi’ e aram e n’en ni ayuweg ni nge par nib pasig ko machib. Bod nnap’an ni guy fapi girdi’ nu Jew ni kar gafgowgad ko tirok Got mi ri “taganan’ ngorad.” Me gaar ngak pi gachalpen: “Woldug ni ngan kunuy ngan tay nga naun e ba ga’ ni ba ga’ yang . . . Mu yibilgad ngak e en ni ir e suwon e re woldug nem ngki pi’ boch girdien e maruwel ngar maruweliyed e re woldug rok nem nge thap nga naun.”​—Matt. 9:36-38.

8. (a) Mang e ba fel’ ni ngad lemnaged? (b) Mang e gad ra fil ko n’en ni yog be’ ni ma un ko fol Bible?

⁸ Chiney ni gad be un ko re maruwel ney ni machib e ba fel’ ni ngad fal’eged i lemnag angin e fol Bible nni tay ngodad ko som’on. Kub fel’ ni ngad lemnag e girdi’ ni gad ma mada’nag u nap’an e machib nge rogon nra yib angin e re thin ney ni gad be weliy ngorad. Bay reb e ppin ni yol ko branch ofis ko gin ni ma par riy ni gaar: “Gu baadag ni nggu pining e magar ngomed ni ke fil e Pi Mich e Bible ngog. Gu manang ni bay yu ngiyal’ ni ma chalbarad ngog ni bochan e boor e deer ni gu ma fith ngorad ma gubin ngiyal’ ni yad ma par u tafenag nge pag e tayim. Machane ri yad ma k’adan’rad ma ri yad baadag ni ngar weliyed ngog e tin ni kar filed. Kari magar Jehovah nge Jesus ni kar piew e pi cha’ ney ni ngar ayuweged gag.”

9. Mang e i tiyan’ Jesus ngay ma uw rogon ni ngad folwokgad rok?

⁹ Gathi gubin e girdi’ ni ur motoyilgad ngak Jesus. (Matt. 23:37) Boch e girdi’ e ra uned ngak u taabochingiyal’ mar dabuyed e machib rok mar paged ni “dakur uned ngak.” (John 6:66) Machane, de pag Jesus e re n’ey ni nge k’aring nge lemnag ndaki ga’ fan e re thin nem ni i weliy. I tiyan’ ko n’en nib fel’ ni be rin’ ni yugu aram rogon ni boor e n’en ni i machibnag nde yib angin. Ya manang ni ke el e woldug ma ke taw nga nap’an ni ngan t’ar wom’engin ma rib felfelan’ ngay ni nge un i pi’ e ayuw ko re maruwel nem. (Mu beeg e John 4:35, 36.) Gur, rayog ni ngad tedan’dad ko mokun woldug fa machib ni gad be tay ko bin ni kemus ni yungi n’en nder yib angin e machib riy e ngad tedan’dad ngay? Ngad weliyed rogon ni ngad pired nib fel’ e lem rodad.

Mmachib ni Ga be Nameg ni Ngam Fil e Bible Ngak Be’

10, 11. Uw rogon ni ngam par ni gab felfelan’?

¹⁰ Be’ ni ma milay’ e ma yung e awoch ni be nameg ni nge t’ar wom’engin. Ere ku arrogodad ni gad be machib ma gad be nameg ni ngad filed e Bible ngak be’. Ere uw rogon nfaanra ga be un ko machib ma gathi gubin ngiyal’ ni bay e girdi’ u tabinaw rorad fa kam sul ni ngam guy be’ ma demoy? Re n’ey e rayog ni nge k’aring e chalban. Machane, dab mu tal ko machib u mit e tabinaw. Ya ka be yog ni ngan mada’nag boor e girdi’ ko biney e kanawoen e machib.

¹¹ Machane, rayog ni ngam par ni gab felfelan’ nfaanra um thilthilyeg kanawoen e machib ni ga be tay. Kam gay rogon ni ngam machib u kanawo’ fa tabon e maruwel, fa? Rayog ni ngam machibnag e girdi’ u telefon fa mu fek e namba ko telefon ko piin ni kam machibnagrad nge yog ni mu telefonnagrad, fa? Ga ra athamgil ni yugu aram rogon nib mo’maw’ mag thilthilyeg kanawoen e machib ni ga be tay ma ga ra felfelan’.

N’en ni Ngam Rin’ Nfaanra Boor e Girdi’ Ndabun e Machib

12. Mang e rayog nda rin’ed nfaanra boor e girdi’ ko gin gad ma machib riy ndubrad ni ngan weliy murung’agen e teliw ngorad?

¹² Uw rogon nfaanra boor e girdi’ ko gin ni yima machib riy ndubrad ni ngan weliy murung’agen e teliw ngorad? Gur, rayog ni ngam thilyeg e n’en ni nga mog ngorad nge yog nra adaged ni ngar motoyilgad ngom? I yol Paul ni apostal ngak e pi walag u Korinth ni gaar: “Nap’an ni gu be maruwel u fithik’ piyu Israel e gu par ni gu bod be’ u Israel . . . ngiyal’ ni gu ba’ rok e piin ni gathi yad piyu Israel e gu be par ni gu bod bagayad, ni ba’ u wuru’ e Motochiyel rok piyu Israel.” Mang e be gay Paul rogon ni nge rin’? I gaar: “Kug mang urngin mit e girdi’ ngak urngin mit e girdi’, ni fan e nggu yognag boch i yad ngak Kristus.” (1 Kor. 9:20-22) Ere, gur, rayog ni ngad lemnaged boch ban’en nra adag e girdi’ ni ngar motoyilgad ngay? Boor e girdi’ ndarur uned nga baraba’ e teliw ni yad baadag ni nge fel’ e tabinaw rorad. Maku rayog ni yad be gay ban’en nra yib fan ko yafas rorad. Ere, gur, rayog ni ngad machibniged e pi girdi’ ney u reb e kanawo’ ni yad ra adag ni ngar motoyilgad ngay?

13, 14. Uw rogon ni nge gel e felfelan’ rodad ko machib ni gad be tay?

¹³ Boor e tamachib ni ke felfelan’rad ko machib ni yad be tay ni yugu aram rogon ni yooren e girdi’ e darur motoyilgad. Ni uw rogon? N’en ni yad ma rin’ e yad ma fil yugu reb e thin. Bay ba wu’ e mabgol nib pag 60 e duw rorow ni kar guyew ni boor e Chinese ko gin ni ma machib e ulung rorow riy. I yog fare moon ni gaar: “Karug adagew ni nggu filew e thin nu China ni bochan e re n’ey. Ba ga’ angin ni keb ngomow ni yugu aram rogon nra reb e rran ma boor e tayim ni kug tew ni fan e nggu filew e re thin nem. Ya boor e girdi’ nu China u rom ni ke yog ni nggu filew e Bible ngorad.”

¹⁴ Yugu ra dabiyog rom ni ngam fil yugu reb e thin, ma rayog ni ngam fanay fachi ke babyor ni Good News for People of All Nations (Thin nib Fel’ ni Fan Ngak Urngin e Nam) u nap’an ni kam mada’nag be’ nib thil e thin romew. Maku rayog ni ngam fek boch e babyor rodad ni thin ko piin ni ga ma mada’nag u nap’an e machib. Ba t’uf e tayim nge athamgil ni bochan e ba mo’maw’ ni ngam nonow be’ nib thil e thin romew. Machane, dab mu pagtalin fare thin ni gaar: “En nra yung e awoch ni pire’, e pire’ e n’en nrayog riy ngak.”​—2 Kor. 9:6.

Ba Muun e Ulung Ngay ni Ga’ngin

15, 16. (a) Mang fan nib muun e ulung ko machib ni gad ma tay? (b) Mang angin e piin pilibthir ngodad?

¹⁵ Gad manang ni ngan yognag boch pi gachalpen Jesus e der tor nga daken taabe’ nge tin ni ke rin’. Ya ba muun e ulung ngay ni ga’ngin. Mang fan? Ya yog Jesus ni gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Nap’an nra un be’ ni yibe fil e Bible ngak ko muulung, mab ga’ ni ma gin ko t’ufeg ni ma guy. Be’ ni ma un ko fol Bible e gaar: “Ri gu baadag ni gu ma un ko muulung ya rib fel’ e thin ni ma yog e girdi’ u lan e ulung ngog.” Ki yog Jesus ni piin ni yad ra un ngak e ra togopuluw e girdi’ rorad ngorad. (Mu beeg e Matthew 10:35-37.) Machane, ke micheg ngorad ni yad ra pirieg e pi ‘walag ni pumoon, nge ppin, nge chitiningiy, nge pi fakey’ u lan e ulung.​—Mark 10:30.

¹⁶ Pi walagdad ni pumoon nge ppin ni kar pilibthirgad e ri kub ga’ e ayuw ni yad ma pi’ ko piin ni yad be fil e Bible nge yog nra mon’oggad. Ni uw rogon? Yugu aram rogon ni bay boch i yad ndakir yog ni nge fil e Bible ko girdi’, ma fulweg ni yad ma pi’ u nap’an e muulung e ma pi’ e athamgil nga laniyan’ e piin ni kar uned ko muulung. N’umngin nap’an ni ka ranod u kanawoen e “mat’aw” e ir e ke mang gamogen e ulung ma ke ayuweg boor e girdi’ ni ngar bad ko ulung rok Got.​—Prov. 16:31.

N’en nra Rin’ Ma Dab Kud Rusgad

17. Mang e ngad rin’ed nfaanra gad be lemnag ndabiyog rodad ni ngad filed e Bible ngak be’?

¹⁷ Mang e ngam rin’ nfaanra ga be lemnag ndabiyog rom ni ngam fil e Bible ngak be’? Dab mu pagtalin rogon ni ayuweg Jehovah Moses faram. I pi’ gelngin nib thothup ngak nge Aron ni walagen ni nge ayuweg. (Ex. 4:10-17) Ke micheg Jesus nra pi’ Got gelngin ni nge ayuwegdad ko re maruwel ney. (Acts 1:8) Mus ngak Jesus mi ki l’og pi gachalpen nga ranod ko machib ni yad lal’agruw. (Luke 10:1) Ere, faanra be mo’maw’ ngom ni ngam tababnag e fol Bible ngak be’, mag meybil ngam ning gelngin Got nib thothup nge gonop rok. Mag un ngak reb e tamachib ni ga manang nrayog ni nge ayuwegem. Dab mu pagtalin ni ke mel’eg Jehovah e piin “ni be finey e fayleng” ndariy farad ni ngar rin’ed e re maruwel ney ya ra gelnag e michan’ rom.​—1 Kor. 1:26-29.

18. Mang e ngad rin’ed ma dab kud rusgad nri de yog ni ngad filed e Bible ngak be’?

¹⁸ Mang e ngad rin’ed ma dab kud rusgad nri de yog ni ngad filed e Bible ngak be’? Bfel’ ni ngad nanged nre maruwel ney e gathi bod e ggan ni kan lith ni be yan u rogon e salap ko en ni ke lith. Ya re maruwel ney e ku boor ban’en nib chagil ngay. Gin th’abi ga’ yang ko re maruwel ney ni aram e ngan chugurnag e girdi’ ngak Jehovah e ir e be rin’. (John 6:44) Ma gadad nge tin ni ka bay e girdi’ u lan e ulung e gad be fanay e salap rodad u rogon i fil ban’en ku be’ ni ngad ayuweged e piin gad be fil e Bible ngorad ni ngar mon’oggad ko tirok Got. (Mu beeg e 2 Timothy 2:15.) Ma piin yad be fil e Bible e ba t’uf ni ngar folgad ko tin ni yibe fil ngorad. (Matt. 7:24-27) Ra tal be’ ko fol Bible mab mutrug nra kireban’dad. Ere gad be athapeg ni ngar mel’eged e bin nib mat’aw e kanawo’. Machane, ra be’ ma ir rok e ra “weliy ngak Got e n’en ni i rin’.”​—Rom. 14:12.

Mang Angin Nra Yib?

19-21. (a) Faan gad ra fil e Bible ngak be’ ma mang angin nra yib ngodad? (b) Uw rogon u wan’ Jehovah e piin ni yad ma un ko fare maruwel ni machib?

¹⁹ Fol Bible ni gad ma tay ngak e girdi’ e ra ayuwegdad ni ngad tedan’dad i mon’eg e tirok Got ban’en. Re n’ey e ku ra ga’nag fan e Thin Rok Got u wan’dad. Mang fan ni aram rogon? Barak ni ma machib u polo’ e tayim rok e weliy fan ni gaar: “Fol Bible ni ga be tay ngak be’ e ra ayuwegem ni ngam mang be’ nib yul’yul’ ni ma fil e Thin Rok Got. Kug nang nib t’uf ni nggu gelnag e michan’ rog mfini yog ni gu fil e thin rok Got ngak be’.”

²⁰ Gur, bochan e damur fil e Bible ngak be’ ma aram e dariy fan e pigpig rom u wan’ Got? Gathi aram rogon, ya pigpig ni gad be tay e rib ga’ fan u wan’ Jehovah. Gubin e piin ni yad be un ko fare maruwel ni machib e ‘yad be maruwel Got u taabang.’ Machane, ri kura gel boch e felfelan’ rodad ni faan gad ra fil e Bible ngak be’ ma gad guy ni be mon’og ni bod e awoch ni kan yung ni Got e be pi’ gelngin be ga’. (1 Kor. 3:6, 9) Amy ni ma machib u polo’ e tayim rok e ki gaar: “Ga ra guy ni be mon’og be’ ni ga be fil e Bible ngak ma ri ga ra adag ni ngam pining e magar ngak Jehovah ni ke fanayem ni ngam weliy fare thin nib fel’ ngak facha’.”

²¹ Faan gad ra athamgil ni ngad filed e Bible ngak be’ ma ra ayuwegdad ni ngad tedan’dad ko pigpig ni gad be tay ngak Got me gel e athap rodad ni ngad thapgad ko bin nib beech e fayleng. U daken e ayuw rok Jehovah e ku rayog ni ngad ayuweged riy e piin ni yad ra motoyil ngodad. (Mu beeg e 1 Timothy 4:16.) Re n’ey e rra k’aring e felfelan’ nib gel ngodad!

Ka Ga Manang?

• Mang boch e magawon ni ma pirieg e pi tamachib ni ma taleg boch i yad ndabi fil e Bible ngak be’?

• Mang e ngad rin’ed nfaanra boor e girdi’ ko gin gad ma machib riy ndubrad ni ngan weliy murung’agen e teliw?

• Faan gad ra fil e Bible ngak be’ ma mang angin nra yib ngodad?

[Pictures on page 13]

Ga ma thilthilyeg kanawoen e machib ni ga ma tay nge yog nim pirieg e piin ni yad baadag e machib, fa?