Mu Un Ko Falfalan’ Ni Ngan Pi’ E Taw’ath!
“Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.”—ACTS 20:35.
1. Uw rogon ni ma dag Jehovah ni ma falfalan’ ni nge pi’ ban’en?
FALFALAN’ ni ma yib ni bochan e ke tamilang e machib u wan’uy nge fapi flaab ni ma yib ni bochan, e aram e pi taw’ath ni yib rok Got. Boor i fan ni nge falfalan’ e piin ni yad manang Jehovah. Yugu aram rogon ni bay e falfalan’ riy ni nge yog e taw’ath ngom, ku bay e falan’ ni ngan pi’ e taw’ath. Jehovah e ir e ma pi’ “urngin e tin nib fel’ nge urngin e taw’ath nib manigil” ma ir e “Got ni ba falfalan’.” (James 1:17; 1 Timothy 1:11) Ma pi’ e machib nib fel’ ngak urngin e piin ni ra motoyil ngak, ma ra falan’ ngak e piin ni ma fol ko tin ni ma fil ngorad, ni bod rogon ni ma falan’ e pi gallabthir u nap’an ni ra fol pi fakrad ko fonow rorad.—Proverbs 27:11.
2. (a) Mang e i yog Jesus u morngaagen ni ngan pi’ ban’en? (b) Mang falfalan’ ni ma yib ngodad u nap’an ni gad ra fil e machib ngak yugu boch e girdi’?
2 Ku arrogon Jesus ni i falfalan’ u nap’an ni immoy u fayleng me fol e girdi’ ko machib rok. I yoloy apostal Paul e n’en ni yog Jesus ni gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Falfalan’ ni ma yib ngodad u nap’an ni gad ra machibnag be’ e gathi ke mus ni ke fel’ lanin’dad ni bochan e ke taareban’ be’ ko tin ni ke mich u wan’dad. Kab ga’ e falan’ riy, ya gad manang ni gad be pi’ ban’en nib riyul’ ma dabi m’ay fan. Nap’an ni gad be pi’ e machib ma gad be ayuweg e girdi’ ni nge fel’ rogorad e chiney iyan nga manemus.—1 Timothy 4:8.
Ma Yib E Falfalan’ Ko Pi’ Ban’en Ngak Be’
3. (a) Uw rogon e falfalan’ rok apostal Paul nge apostal John ni bochan e kar ayuwegew yugu boch e girdi’ ko machib? (b) Mang fan nrayog ni ngan nog ni machib ni gad be tay ngak e pi bitir rodad e aram kanawoen e t’ufeg?
3 Arrogon, bod rogon ni ma falan’ Jehovah nge Jesus ni ngar piew e machib, maku arrogon e pi Kristiano. I falan’ apostal Paul ya manang ni ke ayuweg yugu boch e girdi’ ni ngar nanged e riyul’ u morngaagen e Thin Rok Got. I yol ngak e ulung u Thessalonika ni gaar: “Ya bin riyul’ riy e gimed e l’agan’ nge felfelan’ romad nge tapgin ni nggu felfelan’gad ko gel ni kug tiyed, ni aram e nggu felfelan’gad u p’eowchen Somol ko ngiyal’ ni bay sul riy. Riyul’ ni gimed e kug ufgad ngomed ma kug felfelan’gad ngomed!” (1 Thessalonika 2:19, 20) Ku arrogon apostal John ni i weliy morngaagen e piin ni ke machibnagrad ni gowa yad pi fak ni gaar: “Dariy ban’en nrib gel e felfelan’ nra pi’ ngog ko bin ni nggu rung’ag murung’agen pi fakag ni yad be fol ko tin riyul’.” (3 John 4) Amu lemnag e falfalan’ nra yog ngodad ni ngada ayuweged pi fakdad ni ngar uned ko machib! Ngan chuguliy e bitir ma “ngan llowan’nagrad nrogon ma ngan fonownagrad nrogon girdien Kristus” e aram rogon ni ma dag e gallabthir ni rib t’uf pi fakrad rorad. (Efesus 6:4) Aram rogon ni ma dag e gallabthir ni yad be lemnag ni nge thap pi fakrad. Ma nap’an ni ra fol pi fakrad ma rib gel e falfalan’ rok e gallabthir.
4. Mang thin u morngaagen be’ ni ma dag ni bay e falfalan’ ni ngan pi’ e tirok Got ban’en?
4 Be’ ni ppin ni Dell fithngan e ir e tamachib ni pioneer ma lal pi fak. Be gaar Dell: “Gu manang fan laniyan’ apostal John ya ri gu ma pining e magar riy ni aningeg pi fakag e yad be “fol ko tin nriyul’.” Gu manang ni yima pining e sorok ngak Jehovah u nap’an ni ke taareban’ e pi tabinaw ni yad be liyor ngak, ere ke fel’ lanin’ug ni gu be guy e flaab ni ke yib ngog ni gu be machibnag pi fakag. Gu be athapeg ni nggu par nib fas ni manemus u Paradis u taabang ko chon e tabinaw rog, ma re athap ney e ma pi’ e pasig nga lanin’ug ni nggu k’adan’ug ni yugu aram rogon ni boor e skeng nge magawon.” Ba gafgow ya kan tharbog reb e rugod ni fak Dell ko ulung ni Kristiano ni bochan e ka be un ko ngongol nde Kristiano. Machane be athamgil Dell ya nge fel’ laniyan’. Be gaar: “Gu be athapeg ni ra taw ko reb e rran me sobut’an’ fakag me sul ku Jehovah. Machane gu be pining e magar ngak Got ya tin ni ka bay e pi fakag e yad ma pigpig ngak u fithik’ e yul’yul’. Falfalan’ ni ma yib ngog ni bochan e ma gelnageg.”—Nehemiah 8:10.
Nge Yog E Pi Tafager Nra Par Ni Manemus
5. Ra fel’ lanin’dad u nap’an ni gad ra machibnag yugu boch e girdi’ ya ngar manged pi gachalpen Jesus, ya mang e gad manang?
5 I yog Jesus ngak pi gachalpen ni ngar ayuweged yugu boch e girdi’ ni ngar manged pi gachalpen ma ngar filed ngorad morngaagen Jehovah nge pi motochiyel rok. (Matthew 28:19, 20) Ke ayuweg Jehovah nge Jesus e girdi’ ni ngar nanged kanawoen e riyul’. Ere nap’an ni gad ra un ko fare maruwel ni ngan ayuweg e girdi’ ni ngar manged pi gachalpen Jesus ma ke fel’ lanin’dad ni gad manang ni gad be folwok rok Jehovah nge Jesus ni bod rogon ni rin’ e tin somm’on e Kristiano. (1 Korinth 11:1) Ma nap’an ni gad ra un ko maruwel rok Ani Ga’ nge Fak nib t’uf rok, ma bay fan e yafas rodad. Ri gad ba taw’ath ni bochan e “gad be maruwel rok Got u taabang”! (1 Korinth 3:9) Ma gad ba falfalan’ ya pi engel e ku yad be un ko fare maruwel ni ngan machibnag fare thin nib fel’, fa?—Revelation 14:6, 7.
6. Chon mini’ e ra mang e fager rodad u nap’an ni gad ra pi’ e tirok Got ban’en ngak yugu boch e girdi’?
6 Ma nap’an ni gad ra un ko re maruwel ney ni ngada pied e tirok Got ban’en ngak yugu boch e girdi’, gathi ke mus ni gad e tamaruwel rok Got—ya gad ra mang e pi tafager rok ni manemus. Bochan e michan’ rok Abraham, kan pining e tafager rok Jehovah ngak Abraham. (James 2:23) Ma nap’an ni gad ra athamgil ni ngada rin’ed e tin nib m’agan’ Got ngay maku rayog ni ngada manged e pi tafager rok Got. Ma faan gad ra rin’, maku gad ra mang e pi tafager rok Jesus. I yog ngak pi gachalpen ni gaar: “Machane nggog ni gimed e tafager rog, ni bochan e kug weliy ngomed urngin e tin ni kug rung’ag rok e Chitamag.” (John 15:15) Boor e girdi’ ni yad ma falan’ ni bochan e pi tolang ara pi tayugang’ e yad e fager rorad, machane gadad e pi tafager rok e fa gali cha’ ni yow e th’abi tolang!
7. (a) Uw rogon ni ke pirieg be’ ni ppin reb e reb e tafager? (b) Ke buch ban’en ni aram rogon ngom, fa?
7 Nap’an ni gad ra ayuweg yugu boch e girdi’ ni ngar nanged Got ma yad ra mang e pi tafager rodad, ma gad ma falfalan’ ni bocherad. Be’ ni ppin ni Joan fithngan ni ma par u Meriken e ke fil e Bible ngak be’ ni ppin ni Thelma fithngan. I togopuluw chon e tabinaw rok Thelma ko machib, machane i athamgil me un to taufe u tomren reb e duw. I yol Joan ni gaar: “Gathi ke mus ni ke fel’ e thin romow u nap’an e machib, machane kugu tafagergow ni ke 35 e duw e chiney. Ma boor yay ni gamow ma yan i machibnag yugu boch e girdi’ ma kug unew ko assembly u taabang. Kug chuw ko binaw rog kug par u reb e binaw ni 500 e mayel palngin. Machane ka ma yol Thelma ngog u Post mab fel’ e babyor rok ni be yog ni ma taurengnageg me pining e magar ngog ni gag e fager rok ni kug fil e machib nu Bible ngak. Be’ ni tafager rog ni aram rogon e aram e taw’ath ko athamgil ni kug tay ni kug ayuweg ni nge nang Jehovah.”
8. Mang ayuw nra yog ngodad ni faanra puluw lanin’dad u nap’an ni ad be machib?
8 Faanra gad be athapeg ni gad ra pirieg be’ ni ba adag ni nge fil e tin riyul’ e machib ma ra ayuwegdad ni nguuda athamgilgad ni yugu aram rogon ni boor e girdi’ ni dubrad ni ngar motoyilgad ko Thin Rok Jehovah. Bochan ni dariy fan e machib u wan’ e girdi’ ma thingar da athamgilgad ni ngi mich u wan’dad ma nguuda k’adedan’dad. Machane faanra puluw lanin’dad ma rayog ni nguuda k’adedan’dad. Be’ ni Fausto ni be’ nu Guatemala e ke gaar: “Nap’an ni gu ra machibnag yugu boch e girdi’ e gu ma lemnag fene fel’ ni faanra mang faanem ni gu be machibnag reb i walagdad. Rogon ni gu ma lemnag e manga taa be’ ni gu ra machibnag e ra mich e Thin Rok Got u wan’. Re lem nem e ma ayuwegeg ni nggu athamgil boch ma ku ma falan’nageg.”
Ngan Kunuy E Taw’ath U Tharmiy
9. Mang e i yog Jesus u morngaagen e flaab u tharmiy, ma mang e gad ra fil ko thin rok?
9 De mom ni ngan ayuweg yugu boch e girdi’ ara pi fakdad ni ngar manged pi gachalpen Jesus. Ba t’uf ni ngan fanay e tayim riy ara ngan guman’ ara ngan athamgil. Machane dab mu pag talin ni ba fel’ u wan’ boor e girdi’ ni ngar kunuyed e chugum nu fayleng, ni pi n’en ni der ma falan’nagrad ara der ma par ni manemus. I yog Jesus ngak e girdi’ ni yad be motoyil ngak ni kab fel’ boch ni ngan kunuy e tirok Got ban’en. I gaar: “Dab mu ulunguyed e flaab u roy u fayleng, ya ra kirebnag e ngal nge t’ay ma ra yib e moro’ro’ nga naun nge iring. Machane ngam ulunguyed e flaab romed u tharmiy, ya dabi kirebnag e ngal nge t’ay, ma dabi yib e moro’ro’ nga naun nge iring.” (Matthew 6:19, 20) Faanra l’agan’dad ko tirok Got ban’en−nib muun ngay ni ngan un ko fare maruwel ni ngan ayuweg yugu boch e girdi’ ni ngar manged pi gachalpen Jesus−ma aram e ra fel’ lanin’dad ni bochan e gad be rin’ e tin nib m’agan’ Got ngay ma ra taw’athnagdad. I gaar apostal Paul: “Yi Got e gathi ba laniyan’. Gathi bayi pag talin e maruwel ni kam ngongliyed, ara rogon nib t’uf romed ni kam daged ni bochan e ayuw ni kam pied ma ki gimed be pi’ ngak e piin ni gimed ni girdien Kristus.”—Hebrews 6:10.
10. (a) Mang fan ni ba flaab Jesus ko tirok Got ban’en? (b) Uw rogon ni ke pi’ Jesus ir, ma uw rogon ni ke fel’ rogon yugu boch e girdi’ riy?
10 Faan gad ra athamgilgad ni ngada ayuweged yugu boch e girdi’ ni ngar manged pi gachalpen Jesus ma gad be “ulunguy e flaab u tharmiy” ni bod rogon ni yog Jesus. Ma aram e ra yog e falfalan’ ni bochan e ke yog e flaab ngodad. Machane faan gad ra pi’ ban’en ngak yugu boch e girdi’ ma ra yog e flaab ngodad. I pigpig Jesus ngak Jehovah ni bokum billion e duw. Amu lemnag e flaab ni ke ulunguy u tharmiy! Machane de guy Jesus rogon ni nge fel’ ngak. I yol apostal Paul ni gaar: “Kristus e pi’ ir ni fan ko denen rodad ni nge pithigdad ko re ngiyal’ i n’ey ntin nib kireb e be gagiyegnag e girdi’, ni bod rogon ni ba adag e Got rodad ni ir e Chitamangidad ni nge rin’ Kristus.” (Galatia 1:4) Gathi ke mus ni de lemnag Jesus ir u nap’an ni i machib machane i pi’ e yafas rok ni fan ko biyul ya nge yog ni nge ulunguy yugu boch e girdi’ e flaab rorad u tharmiy.
11. Mang fan ni kab fel’ ni ngan pi’ e tirok Got ban’en ko bin ni ngan pi’ e chugum?
11 Nap’an ni gad ra fil e machib ngak e girdi’ u morngaagen Got, gad be ayuwegrad ni ngar nanged rogon ni ngar ulunguyed e flaab rorad ni tirok Got e flaab ni dabi m’ay. Dariy reb e taw’ath ni kab fel’ ngay ni rayog ni ngam pi’, fa? Faan manga ga ra pi’ reb e klok, ara karro, ara naun nib tolang puluwon ngak be’ ni fager rom, dabi siy ni ra falan’ faanem me pining e magar ngom, ma ga ra falfalan’ ni bochan e kam pi’ ban’en. Machane uw rogon e ra taw’ath nem ni 20 e duw ngaram? Ma uw rogon 200 e duw ngaram? Ma uw rogon ni 2,000 e duw ngaram? Machane, faanra kam athamgil kam ayuweg faanem ni nge pigpig ku Jehovah ma ra fel’ rogon faanem ni manemus.
Ngan Gayiy E Piin Ni Yad Ba Adag E Machib
12. Mang e ke rin’ boch e girdi’ ya kar pied yad ya ngar ayuweged yugu boch e girdi’ ko machib?
12 Be machib e girdi’ rok Jehovah u fayleng iyan ya ngar uned ko fare falfalan’ ni ngan pi’ e tirok Got ban’en ngak e girdi’. Bokum biyu’ e girdi’ rok Jehovah ni kar paged e tabinaw rorad ya ngar uned ko missionary u boch e binaw ma kar filed e thin nib biech nge yalen nib biech. Yugu boch e girdi’ e kar ranod ko boch e binaw ko nam rorad nib t’uf ni ngan machib riy. Yugu boch e girdi’ ni kar filed e thin rok e girdi’ nu bang ya ngar machibnaged e pi wasol ni bay ko binaw rorad. L’agruw e mabgol ni ma par u New Jersey u Meriken e ke ilal l’agruw i fakrow ni yow be maruwel ko tochuch ko Pi Mich rok Jehovah, ere fa gali mabgol e kar uned ko pioneer ma kar filew e thin nu China. U lan dalip e duw e kar filew e Bible study ngak 74 e girdi’ nu China ni yad be un ko reb e college nib chugur ko binaw rorow. Rayog ni nge yoor boch e machib ni ga be tay ya nge yog ni nge ga’ boch e falan’ rom ni ga be ayuweg yugu boch e girdi’ ni ngar manged pi gachalpen Jesus, fa?
13. Mang e rayog ni ngam rin’ ya nge yib waamngin e machib ni ga be tay?
13 Sana ri ga ba adag ni ngam fil e Bible ngak be’ machane dawori yog rom. U boch e binaw e mo’maw’ ni ngan pirieg be’ ni ba adag e machib. Ma sana piin ni gimew ma non e gathi ri yad ba adag e machib nu Bible. Faanra arrogon, ma ngam weliy rogon ni ga ba adag ni ngam fil e Bible ngak yugu be’, ya ga manang ni Jehovah nge Jesus Kristus e yow be ayuweg e machib ma rayog ni ngar powˈiyew gur ngam pirieg be’ ni ir bod e saf. Mu non ngak e piin u lan e ulung ni yad manang rogon ni ngan machibnag e girdi’ ara piin ni bay e Bible study rorad. Mu tayan’um ko ayuw u nap’an e pi muulung rok e pi Kristiano. Mu tayan’um ko ayuw rok e piin ni piilal ni yad ma lekag e ulung nge ppin rorad. Ma bin ni baga’ fan e ngkum athamgil. I gaar fare moon nib llowan’: “Mu yung e woldug ko ley ni kadbul e yal’ nge mathig yal’; ma dabiyog ni ngam nang ko gubin nra tugul nib fel’ rogon fa danga’, fa reb e ra tugul bang e woldug rom nib fel’ rogon ma bang e dabi fel’ rogon.” (Ecclesiastes 11:6) Ma dab mu pag talin e piin nib yul’yul’ ni bod rogon Noah nge Jeremiah. Yugu aram rogon ni de yoor e girdi’ ni fol ko machib rorad, ba fel’ e machib ni ur tayew. Ya bin ni baga’ fan riy e ke falan’ Jehovah ngay.
Mu Rin’ Ni Mus Rogom
14. Uw rogon e piin ni kar pilibthirgad ni kar pigpiggad ku Jehovah u wan’ Jehovah?
14 Sana bochan rarogom ma dabiyog ni ngam rin’ urngin e machib ni ga ba adag ni ngam rin’. Sana kam pilibthir ma ke lich e pi n’en ni ngam rin’ ni ga be pigpig ku Jehovah. Machane dab mu pag talin e n’en ni yog fare moon nib llowan’ ni gaar: “Manna’ lolgey e aram e teeliyaw nib fel’ yaan ni faanra kan pirieg u kanawoen e mat’aw.” (Proverbs 16:31) Uw p’eowchen Jehovah e rib fel’ yaan e yafas rok be’ ni ke pigpig ngak. Miki gaar e Bible: “Faanra ke pilibthir be’ ma gag Jehovah e dawor gu thil; ma faanra manna’ lolgen be’ maku gu ra ayuweg. Gu ra maruwel rok, ni gu ra ayuweg ma gu ra pi’ e kanawo’ ngak.” (Isaiah 46:4) Chitamangidad nu tharmiy e ke micheg ni ra ayuweg e piin nib yul’yul’ ngak.
15. Mmich u wan’um ni manang Jehovah rarogom? Mang fan?
15 Ma sana ke yib e m’ar ngom, ara be togopuluw e ani mabgol rom ni de mich u wan’, ara boor e maruwel rom u tabinaw, ara yugu boch e magawon rom. Manang Jehovah rarogodad maku manang e pi n’en nrayog rodad, ma ri ma t’ufegdad ni bochan ni gad be athamgil ni ngada pigpiggad ngak. Maku ma t’ufegdad ni yugu aram rogon ni pi n’en ni gad ma rin’ e ba lich boch ko tin ni ma rin’ yugu boch e girdi’. (Galatia 6:4) Manang Jehovah ni gathi gad ba flont, ma manang e tin nrayog rodad. (Psalm 147:11) Faan gad ra rin’ e tin nrayog rodad ni mus rogodad riy ma rayog ni nge mich u wan’dad ni gad ba t’uf rok Got ma dabi pag talin e pi n’en ni gad ma rin’ ni fan ngak ni bochan e ke mich u wan’dad.—Luke 21:1-4.
16. Uw rogon ni urngin e girdi’ u lan e ulung e yad be ayuweg be’ ni nge mang gachalpen Jesus?
16 Ma dab mu pag talin ni ra mang be’ e gachalpen Jesus ni bochan boor e girdi’ ni be maruwel u taabang. Gathi taa be’ ni be ayuweg yugu be’ ni nge mang gachalpen Jesus ni bod rogon ni gathi ke mus ni taab gaf i n’uw ni be aw ni ra ayuweg e woldug ni nge tugul. Riyul’ ni sana taa be’ e ra machib me pirieg yugu be’ ni nge fil e Bible ngak. Machane nap’an ni ra yib faanem ko Kingdom Hall, ma urngin e girdi’ u lan e ulung e ra ayuweg faanem ni nge mang e machib. Ra guy faanem ni girdien e ulung e yad walag ma ra guy ni be maruwel e kan ni thothup rok Got u fithik’rad. (1 Korinth 14:24, 25) Ra rung’ag faanem e thin rok e piin nib bitir nge piin nib fel’ yangaren me guy ni yad ba thil ko pi bitir nu fayleng. Ra guy faanem e piin nib m’ar nge piin nib pilibthir ni yad be un ko muulung ma ra fil rorad ko be mang e athamgil. Yugu demutrug yangardad ara rarogodad, gad gubin ni gad be ayuweg e piin ni ka fin nra uned ko machib ni nge t’uf e machib nu Bible rorad ma ngar mon’oggad iyan nge mada’ ko taufe. Sana gathi ri baga’ fan gubin e awa ni gad ma machib, ma gubin ngiyal’ ni gad ra sul ngak e piin ni ra motoyil, ma gubin e girdi’ ni gad ra non ngorad u lan e Kingdom Hall, machane urngin e pi n’en ney e aram bang ko reb e maruwel ni baga’ ni Jehovah e be rin’.
17, 18. (a) Gathi ke mus ni gad be pi’ ban’en u nap’an ni gad be machib, ya mang boch e kanawo’ nrayog ni ngada falfalan’gad ko pi’ ban’en ngak be’? (b) Gad be folwok rok mini’ u nap’an ni gad be falfalan’ ko pi’ ban’en?
17 Gathi goo be un e pi Kristiano ko fare maruwel ni baga’ fan ni ngan ayuweg yugu boch e girdi’ ni ngar manged pi gachalpen Jesus, ya ku yad ba falfalan’ ni ngar pied ban’en u yugu boch e kanawo’. Gad ma pi’ e salpiy rodad ni ngada ayuweged e bin riyul’ e liyor ngak Got maku gad ma ayuweg e piin nib gafgow. (Luke 16:9; 1 Korinth 16:1, 2) Gad ma guy rogon ni ngada golgad ngak yugu boch e girdi’. (Roma 12:13) Gad ma athamgil ni “ngada ngongliyed e ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got u fithik’ e mich u wan’uy ngak Kristus.” (Galatia 6:10) U boor e kanawo’ ni gathi ri baga’ machane baga’ fan ni gad ma pi’ ban’en ngak yugu boch e girdi’−gad ra yol ngak be’, ara telephone ngak, ara pi’ e taw’ath, ara ayuw ara gad ra pi’ e gel nga laniyan’.
18 Nap’an ni gad ra pi’ ban’en ngak yugu be’ ma gad be folwok rok e Chitamangidad nu tharmiy. Ku gad be dag e t’ufeg ngak e pi walagdad ni aram e pow ko tin riyul’ e Kristiano. (John 13:35) Pi n’en ney e ra ayuwegdad ni ngada falfalan’gad ko pi’ ban’en ngak be’.
Rayog Ni Ngam Weliy Fan?
• Uw rogon ni ke pi’ Jehovah nge Jesus e kanawo’ ngodad u rogon ni ngan pi’ e tirok Got ban’en?
• Uw rogon nrayog e tafager ngodad ni ra par ni manemus?
• Mang boch ban’en nrayog ni ngada rin’ed ya nge fel’ boch e machib ni ad be tay?
• Uw rogon nrayog ni nge un urngin e girdi’ u lan e ulung ko falfalan’ ni ngan pi’ ban’en?
[Pictures on page 13]
Baga’ e falfalan’ rok e gallabthir u nap’an ni ma fol e bitir
[Picture on page 15]
Rayog ni nge yog e tafager ngodad u nap’an ni gad be machib
[Picture on page 16]
Ma ayuwegdad Jehovah u nap’an ni gad ra pilibthir
[Pictures on page 17]
Rayog e falfalan’ ngodad u nap’an ni gad ra pi’ ban’en ni gathi ri baga’ machane baga’ fan