Mu Par Ni Gab Falfalan’ Ya Got Nib Falfalan’ E Bay Rom

“Pi walageg, mu pared ni gimed ba falfalan’, . . . ma Got ni ta runguyey ma ba gapas e bayi un ngomed.”​—2 KORINTH 13:11, New World Translation.

1, 2. (a) Mang fan ni boor e girdi’ ni ri buchuw e falfalan’ ni ma yib ngorad? (b) Mang e falfalan’, ma uw rogon ni ngada gayed rogon e re n’ey?

PI RRAN n’ey nib talumor, e boor e girdi’ ni kar guyed ni ke boch’uw fan ni ngar falfalan’gad. Nap’an nra aw e gafgow nib gel ngodad ara ngak e en nib t’uf rorad, ma sana yad ra lem ni bod Job kakrom, ni yog ni gaar: “Girdi’, ni ke gargeleg e ppin, e ba ngoch nap’an e yafas rok ma ke par u fithik’ e wagagey.” (Job 14:1, NW) Piin Kristiano e ku ma yib ngorad e magawon ni ma tomalnag lanin’rad ko ngiyal’ ney ni “ke mo’maw’ ni ngan par riy,” ere dabni gin ngay ni pi tapigpig rok Jehovah nib yul’yul’ e yu ngiyal’ e ku ma war lanin’rad.​—2 Timothy 3:1.

² Piin Kristiano e ku rayog ni nge par ni yad ba falfalan’, nyugu aram rogon ni keb e skeng ngorad. (Acts 5:40, 41) Ra ngan nang fan ko u rogon me yog e re n’ey, ma som’mon e ngan fal’eg i lemnag ko mang e falfalan’. Kan weliy fan e falfalan’ ni aram e “lem ni ma yib gelngin ni bochan ban’en ni nge yog ara ban’en nib fel’ ni bay nra nra yib.”a Arfan, nfaanra ngada pared ba ngiyal’ ni ngada fal’eged i lemnag e pi flaab ni bay rodad e chiney ma gad fal’eg i lemnag e pi flaab ni be sonnagdad ni bay nga m’on u fayleng rok Got nib biech, ma rayog ni gad ra falfalan’.

3. Uw rogon ni rayog ni nga dogned ni urngin e girdi’ ma bay boch i fan ni ngar falfalan’gad?

³ Urngin e girdi’ ma bay boch e flaab ni keb ngak ni susun ni nge pining e magar. Reb e lolugen e tabinaw e sana kan taleg ko maruwel rok. Mmutrug ni ra magafan’ ngay. Baadag ni nge ayuweg e piin nib t’uf rok. Yugu aram rogon, ma faanra kab gel ma kab fel’ fithik’ i downgin, ma ku ra pining e magar nbochan. Faan manga ke pirieg e maruwel, ma rayog ni nge maruwel nib elmirin. Maku reb, e susun reb e ppin ni Kristiano sana ke yib e m’ar ngak ni ke meewar. Yugu aram rogon, maku rayog ni nge pining e magar nbochan e ayuw ni ke pi’ e pi fager rok nge girdien e tabinaw ni kar ayuwegned ke yog ni nge gel laniyan’ me gum’an ko m’ar rok. Ma urngin e Kristiano nib yul’yul’, ndemtrug rarogorad, e rayog ni nge falan’rad ya bochan ni kara nanged Jehovah ni ir e “Got nib falfalan’,” nge Jesus Kristus ni, “ba falfalan’ ma goo ir e be Gagiyeg.” (1 Timothy 1:11; 6:15) Arrogon, Jehovah Got nge Jesus Kristus e ri yow ba falfalan’. Yow be par ni ba falfalan’row nyugu aram rogon ni rarogon e fayleng e ke thil ko n’en ni i finey Jehovah aram ko tabolngin. Tin ni yow ma rin’ e ra fil ngodad rogon ni ngada pared ni gad ba falfalan’.

De M’ay e Falfalan’ Rorow

4, 5. (a) Mang e rin’ Jehovah u nap’an ni ke togopuluw e bin som’mon e girdi’? (b) Uw rogon ni ke par nib mudugil e lem rok Jehovah u murung’agen e girdi’?

⁴ U lan fare milay’ nu Eden, me Adam nge Efa e ur falfalan’gow ya ba fel’ fithik’ i dowrow mab flont laniyan’row. Imoy e maruwel rorow ma bay angin ma ba fel’ yaan e gin ni yow ma par riy. Tin th’abi fel’ riy, e rayog ni ngar nonad Jehovah u gubin ngiyal’. M’agan’ Got ngay ni nge yog ngorow e yafas nib falfalan’ nga m’on. Machane de falfalan’ e bin som’mon e gallabthir rodad ko urngin e pi taw’ath ney nib fel’; ya kar iringew woom’ngin fake gek’iy ni ka nog ni dabni kay ni “fare ke gek’iy ni ma tamilangnag an’uy ko tin nib fel’ nge tin nib kireb.” Re togopuluw nem ni kar tew e ir lik’ngin urngin e kireban’, ni ke yib ngodad ko ngiyal’ n’ey ya gadad pi fakrow.​—Genesis 2:15-17; 3:6; Roma 5:12.

⁵ Machane, de pag Jehovah e ngongol rok Adam nge Efa ni da ur piningew e magar ni nge chuweg e falfalan’ rok. Manang ni boch e girdi’ ni pi fakrow e bay u gum’ercha’rad nra k’aringrad ni ngar pigpiggad ngak. Riyul’ ni ri manang mab mudugil u wan’, ni arfan ni u m’on ni ke yib e bitir rok Adam nge Efa, me weliy murung’agen e tin nib m’agan’ ngay ni ra biyuliy pi fakrow ni piin ma fol! (Genesis 1:31; 3:15) Tomren ni ke yan boch e chibog, ma kab boor ko baley ko girdi’ e kar leked luwan ay Adam nge Efa, machane de n’ag Jehovah e girdi’ nbochan fare togopuluw ni ke garer. Ya tin ni i rin’, e kari tiyan’ ngak e piin pumoon nge piin ni ppin ni ‘ur falfalan’naged gum’ercha’en,’ fapi cha’ ni riyul’ ni kar athamgilgad ni ngar falfalan’naged ya bochan ni ba t’uf rorad.​—Proverbs 27:11; Hebrews 6:10.

6, 7. Mang e pi n’en ni ke ayuweg Jesus ke par nib falfalan’?

⁶ Ma uw rogon Jesus​—mang e i rin’ me par ni ba falfalan’? Bochan ni Jesus e ir ba kan u tharmiy nib gel gelngin, ma arfan ni ri bay rogon ni nge yaliy e tin ni ma rin’ e piin pumoon nge ppin u fayleng. Yad ma oloboch ya dawora flontgad, machane yad ba t’uf rok Jesus. (Proverbs 8:31) Ma munmun, nap’an ni keb nga fayleng me “par rok e girdi’ ”, ma dawori thil e lem rok u murung’agen e girdi’. (John 1:14) Mang e ke ayuweg Fak Got nib flont nra par nib fel’ e lem rok u murung’agen e girdi’ ntadenen?

⁷ Som’mon, ba thabthabel e lem rok Jesus u murung’agen nge yugu boch e girdi’. Manang ni dabi fol urngin e girdi’ nu fayleng rok. (Matthew 10:32-39) Ere ma falfalan’ ku taa be’ nib yul’yul’ nra ke fol ko fare thin ko Gil’ilungun. Yugu aram rogon ni ngongol nge lem ko pi gachalpen yu ngiyal’ e de fel’, ma manang Jesus ni baadag gum’ercha’rad ni ngar rin’ed e tin nib m’agan’ ngay, ma bochan e re n’em mi i runguyrad Jesus. (Luke 9:46; 22:24, 28-32, 60-62) Nap’an ni be meybil Jesus ngak e Chitamangin u tharmiy, i sumarnag e tin nib fel’ ni ke rin’ pi gachalpen ke mada’ ko ngiyal’ nem me gaar: “Kar folgad ko thin rom.”​—John 17:6.

8. Ngam mog boch e kanawo’ nrayog ni ngada folwokgad rok Jehovah nge Jesus uwrogon ni ngad pared nib falfalan’.

⁸ Dariy e maruwar riy, ni ra yib angin ngodad ni gadad gubin nfaan gad ra fal’eg i lemnag e tin ni i rin’ Jehovah Got nge Jesus Kristus. Rayog rodad ni ngada folwokgad rok Jehovah u polo’ i lanin’dad ni sana bod e tin ni baaray ni dabda paged ni ngari magafan’dad nfaanra de buch e n’en ni kad athapeged? Rayog rodad ni ngada folwokgad rok Jesus ni ngada lemnaged e tin nib fel’ ko par rodad e chiney, maku ngada maruwelgad nge par e lem rodad nib m’ag ko tin ni rayog rodad nge yugu boch e girdi’? Gad ra yaliy rogon boch ko pi kenggin e motochiyel ney ni ba m’ag nga reb e kanawo’ ko piin Kristiano nib pasig u gubin yang​—ni yibe wereg e machib riy.

Mu Par nib Mudugil Lanin’um ko Machib

9. Uw rogon ni kan gelnag biyay e falfalan’ rok Jeremiah, ma uw rogon ni tin ni ke rin’ e ra ayuwegdad?

⁹ Baadag Jehovah ni nge falfalan’dad ko pigpig ngak. Falfalan’ rodad e de tor nga daken angin e tin kad rin’ed. (Luke 10:17, 20) Jeremiah ni profet e i machib u lan bokum e duw ni de yib angin. Nap’an ni i yaliy e girdi’ ni dubrad e machib me war e falfalan’ rok. (Jeremiah 20:8) Machane nap’an ni ke fal’eg i lemnag fel’ngin fare machib ni be machibnag, me gel biyay e falfalan’ rok. I yog Jeremiah ngak Jehovah ni gaar: “Ka ni pirieg e thin rom, ma gu be ka’ e pi n’em; ma thin rom e ke mang falfalan’ nga gum’ircha’eg; ya bochan nyibe pining fithingam ngog, O Jehovah.” (Jeremiah 15:16, NW) Arrogon, i par Jeremiah ni be falfalan’ ko tawaath ko maruwel rok ni be wereg e Thin rok Got. Ku arrogon gadad.

10. Uw rogon ni nge par ni gad ba falfalan’ nyugu aram rogon ni binawen e machib rodad e de yib angin e chiney?

¹⁰ Yugu aram rogon ni boor ko baley ko girdi’ e dabi motoyil ko fare thin nib fel’, ma ri bay tapgin ni ngad falfalan’gad u nap’an ni gad be un ko machib. Dabmu pagtalin ni rib pagan’ Jehovah ngay ni bay boch e girdi’ nra pigpig ngak. Bod rogon Jehovah, ma thingar dabda talgad i lemnag ni ka bay boch e girdi’ ni bayi munmun me tamilangan’rad ko re machib nem mar folgad ko fare thin ko Gil’ilungun. Thingar dabda paged talin ni ma thil rarogon e girdi’. Faanra yib e gafgow ngak be’ ara magawon ni dan lemnag, maku en ni kari fel’ rogon maku ra tabab i lemnag ko mang fan e yafas. Ga ra moy u rom ni ngam ayuweg u nap’an ni ke pirieg ni ‘ba t’uf rok e tirok Got ban’en’? (Matthew 5:3) Dabi siy ni bay be’ ko binaw ni gimed ma machib riy ni ke adag ni nge rung’ag e thin nib fel’ ko ngiyal’ ni kam man ngam guy e cha’ nem biyay!

11, 12. Mang e ke buch u reb e flak, ma mang e kada filed riy?

¹¹ Maku rayog ni nge thil rarogon binawen e machib rodad. Mu lemnag e n’en ni buch. U lan reb e flak nib achichig, ma bay e piin ni pumoon nge ppin ni dawori n’uw nap’an ni kar uned ko mabgol ma bay boch e bitir rorad mab fel’ thilrad ni yad ma par u rom. Ma nap’an ni yib e Pi Mich rok Jehovah ni ngar guyed yad, ma taab thin e yad ra yog ngorad ni ra gaargad, “Dubmad!” Faanra dag be’ ni ke adag e thin ko Gil’ilungun, ma piin ni buguli yoror rok e yad ra papey ngar guyed rogon ni ngar warnaged laniyan’ e cha’ nem ma nge dabki mada’nag e Pi Mich rok Jehovah biyay. Ba tamilang, ni kaygi mo’maw’ ni ngan wereg e machib u rom. Yugu aram rogon, ma de mulan’ e Pi Mich; ya kara ululgad i wereg e machib. Mang angin?

¹² Munmun, ma boor e bitir ko re flak nem e kara ilalgad, ma kar uned ko mabgol, ma kar pared u rom. Bochan ni keb ngan’rad ni yafas rorad e de pi’ e falfalan’ nib riyul’ ngorad, ma boch i yad ni kar ilalgad boch e ur tababgad i gay e tin riyul’. Ma kara pirieged e re n’ey u nap’an ni kar motoyilgad ko fare thin nib fel’ ni ke wereg e Pi Mich. Ere tomren ni ke yan boor e duw, ma fini tabab i mon‘og ko fare ulung nib achichig. Mu lemnag feni falfalan’ fapi tamachib ko Gil’ilungun ni de mulan’rad! Yibe athapeg ni ku ra yib e falfalan’ ngodad nfaanra dabda talgad i wereg e machib ko Gil’ilungun!

Pi Walag e Ra Ayuwegem

13. Nap’an ni ke mulan’dad ma mini’ e gad ra yan ngak?

¹³ Nap’an nra yib e magawon ni boor ngom ara keb e gafgow nib gel, ma uw e ngam chel ngay ngam ning e ayuw? Bokum milyon e pi tapigpig rok Jehovah ni kar ognaged yad ngak e som’mon ma yad ma chel ku Jehovah u daken e meybil, me migid ma pi walagrad ni pumoon nge ppin. Nap’an ni immoy Jesus u fayleng, ma ke falfalan’ ko ayuw ni ke pi’ pi gachalpen. Nap’an fare nep’ u m’on ndawori yim’ Jesus, me yog murung’agrad ni gaar “mpired rog nda mpaged gag.” (Luke 22:28) Riyul’ ni, pi gachalpen e dawora flontgad, machane yul’yul’ rorad e ke fal’eg laniyan’ Jesus ni Fak Got. Ere ku arrogon gadad nrayog ni ngeb gelngidad nbochan e ayuw ko pi walagdad.

14, 15. Mang e n’en ni ke ayuweg ba wu’ i mabgol ni kar k’adan’row u nap’an ni ke yim’ e bitir rorow ni pumoon, ma mang e kada filed ko tin ni ke buch rorow?

¹⁴ Ba wu’ i mabgol ni Kristiano ni Michel nge Diane fithingrow e kar filew feni ga’ fan e ayuw ni ma pi’ e pi walag ni pumoon nge ppin. Jonathan ni fakrow ni 20 e duw rok, ma ir reb e Kristiano nib pasig ma yima lemnag nra fel’ e yafas rok nga m’on, e kan pirieg ni bay e tumor ko maney rok. Ke guy rogon fapi togta ni ngar ayuweged Jonathan, machane be ubchiya i yan me reb e rran ni balayal’ me yim’. Michel nge Diane e kari kireban’row nib gel. Me yib ngan’row ni fare Service Meeting ko re nep’ nem e ke chuchugur ni nge m’ay. Ma bochan, ni ri yow baadag ni ngan fal’eg lanin’row, mar ningew e ayuw ngak reb e piilal ni immoy u toobrow ni nge un ngorow nga ranod nga Kingdom Hall. Kar tawgad u nap’an ni yibe weliy ngak girdien e ulung murung’agen Jonathan ni ke yim’. Tomren e muulung, ma gali cha’ nem ni yow be yor e ke longobiyrow e pi walag ni pumoon nge ppin, mi yad gumuchmuch ngorow nga ur fal’eged lanin’row. Meb ban’en ngan’ Diane me gaar: “Nap’an ni gubow ngaray nga hall ma rib kireban’mow, machane pi walag e kar fal’eged laninmow​—ma kar baudeged gamow! Yugu aram rogon ni dabiyog ni ngar chuweged e kireban’ romow, ma kar ayuweged gamow nrayog ni nggu athamgilgow!”​—Roma 1:11, 12; 1 Korinth 12:21-26.

¹⁵ Fare magawon ni keb ngak Michel nge Diane e ke ayuwegrow ni ngar parew nrib chuchugur ngak e pi walagrow. Maku ke ayuwegrow e re n’em ni ngari fel’ thilrow. I yog Michel ni gaar: “Kug fil rogon ni nggu dag e t’ufeg rog ngak e ppin rog ni kab gel boch ko kafram. Ngiyal’ ni ra kireban’mow, ma gamow weliy murung’agen e thin riyul’ u Bible nge rogon ni be ayuwegmow Jehovah.” Me ulul Diane ngay ni gaar: “Fare athap ko Gil’ilungun e kari gel i lemnag ni fan ngomow e chiney.”

16. Mang fan ni baga’ fan ni ngada gayed e kanawo’ ni nga dogned ngak e pi walagdad e tin nib t’uf rodad?

¹⁶ Arrogon, pi walagdad ni pumoon nge ppin e “ri baga’ e ayuw ni yad ma pi’ ” ngodad u nap’an ni keb e gafgow ma aram e rayog ni ngada pared ni gad ba falfalan’. (Kolose 4:11) Riyul’ ni dar nanged e tin ni gad be lemnag. Ere nap’an ni ba t’uf rodad e ayuw, mab fel’ ni nga dogned ngorad. Nge mu’ ma ngada pininged e magar ngak e pi walagdad ko urngin e ayuw ni kar pied ngodad, ma ngada lemnaged ni aram e ayuw ni yib rok Jehovah.​—Proverbs 12:25; 17:17.

Ngam Sap ko Ulung Rom

17. Mang magawon ni keb ngak reb e matin ndariy figirngin, ma uw rogon u wan’ e girdi’ ni taab rogon ngak?

¹⁷ Faanra u mu fal’eg i yaliy pi walagem nib fel’ rogon, ma aram e rayog ni ngam adag dakenrad mu u mu falfalan’ ni nga um chag ngorad. Ngam mu sap ko ulung rom. Mang e ga ra guy? Bay reb e llabthir ni go’ ir ni be athamgil ni nge chuguliy pi fak ni nga u ri folgad ko kanawo’ ko tin riyul’? Kaa yugu mu fal’eg i lemnag e tin nib fel’ ni ke rin’? Ayugu mu lemnag boch e magawon ni be mada’nag. Reb e matin ni ba muchugbil ni Jeanine fithingan e ke weliy boch ban’en ni bod e: kireban’ nge tawreng, nge piin ni pumoon u tabon e maruwel ni yad ma gosgosnag nge puluwey ni rib lich. Machane ke yog ni magawon rok ni rib gel, e ba ma un ngay rogon ni ma yan nga laniyan’ pi fak ko tin ba t’uf rorad, ya ra reb e bitir ma rogon pangin. Me yog Jeanine murung’agen yugu reb e magawon ni gaar: “Ku rayog ni nge mang reb e magawon ni nga um siyeg ni ngam tay fakam ni pumoon nge mang lolugen e tabinaw ni susum nge yan nga luwan e en figirngiy. Bay e bitir rog ni ppin, ma mo’maw’ ni ngan lemnag ni dabkun pi’ ngak reb e maruwel nib gel nge mang tagil’ e puf magawon rog.” Jeanine e taab rogon ko bokum biyu’ e piin ni yad ba muchugbil ni bay madgun Got u wan’rad, ma be un ko maruwel ni polo’ e rran ni fan ni nge ayuweg e tabinaw rok. Maku be fil e Bible ngak e pi fak, be ayuwegrad ni ngar salapgad ko machib, ma ma fekrad ngar uned ko pi muulung. (Efesus 6:4) Uw feni falfalan’ Jehovah u gubin e rran ni be yaliy e re tabinaw ney ni be athamgil ni ngar pared nib yul’yul’ ngak! Gathi riyul’ nra falfalan’dad nfaanra bay boch e walag u fithik’dad ni aram rogon? Riyul’ ni aram rogon.

18, 19. Mu weliy uw rogon ni ngada gelnaged e falfalan’ rodad ngak e girdi’ u lan e ulung.

¹⁸ Ngam yaliy biyay e ulung rom. Sana rayog ni ngam guy e piin ni leengiy ni kem’ figirngin ara piin ni figirngiy ni kem’ leengin nib yul’yul’ ni “dar paged” e pi muulung. (Luke 2:37) Ba’ yu ngiyal’ ni ma ke kireban’rad? Arrogon. Yad ma tawrengnag e piin mabgol rorad! Machane kar ted ni nge yoor pa’ u puluwrad ko pigpig ku Jehovah ma yad baadag ni ngara ayuweged yugu boch e girdi’. Lem rorad nib mudugil mab fel’ e be gelnag e falfalan’ ko ulung! Reb e Kristiano ni ppin ni ke pag 30 e duw ni ke un ko pioneer e ke yog ni gaar: “Taareb u fithik’ e pi n’en ni ri ma yib e falfalan’ riy ngog e aram e nap’an ni nggu guy e pi walag ni pumoon nge ppin ni kara pillibthirgad ni kara mada’naged e pi skeng ma ka yad be par nib yul’yul’ ku Jehovah!” Arrogon, piin Kristiano ni bay u fithik’dad ni kara pillibthirgad e ri yad ma pi’ e athamgil nga laniyan’ e piin ni ka yad ba pagal.

¹⁹ Ma uw rogon e pi walag nib biech ni kefin ra tababgad i chag ko ulung? Gathi kad falfalan’gad u nap’an ni yad ra weliy rogon e michan’ rorad ko pi muulung ni kan ta’? Mu lemnag rogon ni ur mon’ogad iyan ni ka nap’an ni kar tababgad ko fol Bible. Kari falfalan’ Jehovah ngorad. Ku arrogon gadad fa? Kada daged e falfalan’ rodad ngorad, ma ka dogned e thin nib fel’ ngorad nbochan e maruwel ni kar ted?

20. Mang fan nrayog ni nga dogned ni urngin e girdi’ u lan e ulung e baga’ fan?

²⁰ Kam un ko mabgol, fa dawo’, ara reb e muchugbil ni bay fakam? Dakuriy e chitamam (ara chitinam), ara gur be’ ndakuriy figirngim ara gur be’ ndakuriy leengim? Kam chag ko ulung u lan boor e duw ara kefin mu chag ngorad? Mu tay nga lanin’um ni tin ni kam rin’ nib fel’ e ra gelnagmad ni gamad gubin. Ma nap’an ni ngam un i yon’ e tang ni fan ko Gil’ilungun, nge nap’an ni ngam pi’ e fulweg ara ngam pi’ e welthin ko Theocratic Ministry School, ma tin ni kam rin’ e ke gelnag e falfalan’ romad. Ma tin ni baga’ fan, ke falfalan’ag gum’ercha’en Jehovah.

21. Bay tapgin ni boor ni ngada rin’ed e mang, machane mang e pi deer nra m’ug?

²¹ Arrogon, yugu aram rogon ni gad bay ko re tayim ney nib yoor e magawon, ma rayog ni ngada falfalan’gad i pigpig ku Got rodad nib falfalan’. Boor tapgin ni ngada folgad ko fonow ni pi’ Paul ngodad ni gaar: “Mu pired ni gimed be falfalan’, . . . ma Got ni ta runguyey ma ba gapas e ra un ngomed.” (2 Korinth 13:11) Machane uw rogon nfaanra keb ngodad e gafgow, nge togopuluw, ara magawon ko salpiy nib gel? Rayog rodad ni ngada pared ni gad ba falfalan’ nyugu demtrug ni rogon e par rodad? Ga ra weliy fan ko ngiyal’ ni ga ra beeg e bin migid e article.

[Footnotes]

Rayog ni Ngam Pi’ e Fulweg?

• Uw rogon ni kan weliy e falfalan’?

• Uw rogon ni ra ngan par nib mudugil e lem ma ra ayuwegdad ni gad ra par ni gad ba falfalan’?

• Mang e ra ayuwegdad ni ra par nib fel’ e binawen e machib ko ulung rodad u wan’dad?

• Mang boch e kanawo’ ni ga be dag nib t’uf rom e pi walag ni pumoon nge ppin u lan e ulung rom?

[Pictures on page 16]

Ra thil e girdi’ ko binawen e machib rodad

[Picture on page 18]

Mang boch e magawon ni ke yib ngak e piin u lan e ulung rom?