Mu Par Ni Gab Falfalan’ Ko Pigpig Ku Jehovah

“Gubin ngiyal’ ni nguum falfalan’gad ko taab girdi’ ni kam tiyed Somol. Ere ngku gog bayay ni nge lungug: mu falfalan’gad!”​—FILIPPI 4:4.

1, 2. Uw rogon ni ke yog rok fare walag ni pumoon nge tabinaw rok ni kar pared ni yad ba falfalan’ nyugu aram rogon ni ke m’ay urngin e chugum rorad?

JAMES, e ir reb e Kristiano ni 70 e duw rok ni ma par u Sierra Leone, e ke un ko maruwel nib gel u nap’an e yafas rok. Mu lemnag feni gel e falfalan’ rok u nap’an ni ke yog rok ni nge kunuy boch e salpiy ni ke gaman ni nge chuwiy reb naun nib fel’ ni bay aningeg e singgil riy! Machane dawori n’uw nap’an u tomren ni ke par James nge chon e tabinaw rok, me yib e mahl ni civil ko re nam nem, ma ke yik’ e naun rorad ni ga’ngin. Dakuriy fare naun rorad, machane dawori m’ay e falfalan’ rorad. Mang fan?

² James nge chon e tabinaw rok e dar lemnaged e tirorad ni ke kireb, ya kar tayan’rad ko tin ni ka ba’. Ke weliy James ni gaar: “Mus ko ngiyal’ ni bay ban’en ni ma k’aring e marus, ma kug muulungad u taabang, ma kug bieged e Bible, ma kug meybilgad u taabang, ma chu uw ni ka ba’ romad ban’en e kug pied boch ngak yugu boch e girdi’. Kug pared ni gamad ba falfalan’ ya bochan ni kug tedan’mad ko tin ni ba fel’ u thilmad Jehovah.” Bochan e yad ma lemnag e tin nib fel’ ni ke yog ngorad, ma tin th’abi ga’ fan u fithik’ e aram ke fel’ thilrad Jehovah, ma arfan ni pi Kristiano ney nib yul’yul’ e ke yog rorad ni ngar “pared ni yad ba falfalan’.” (2 Korinth 13:11) Riyul’, ni gathi mmom ni ngar k’adedan’rad ko pi magawon ni keb ngorad ni ke kirebnag lanin’rad. Machane ka yad be par nib falfalan’rad ko pigpig ku Jehovah.

3. Uw rogon ni piin Kristiano kakrom e ke yog ni nguur pared ni yad ba falalan’?

³ Piin Kristiano kakrom e ke yib ngorad e skeng ntaabrogon ko tin ni ke buch rok James nge chon e tabinaw rok. Machane, Paul ni apostal e ke yoloy e pi thin n’ey nge yan ngak e piin Kristiano nu Hebrew ni gaar: “[Gimed be] falfalan’ nyugu aram rogon ni kan fek e chugum romed u fithik’ e yargel.” Ngemu’ me weliy Paul murung’agen kenggin e falfalan’ rorad me gaar: “Gimed manang ni ka ba’ ban’en romed ni kab gel feni fel’, ni bayi par ndabi m’ay biid.” (Hebrews 10:34, New World Translation) Arrogon, piin Kristiano ko fa bin som’mon e chibog e bay e athap rorad nib gel. Yad be sonnag ni kari l’agan’rad ngay ni nge yog ngorad e tin ni dabkiyog ni ngan fek u fithik’ e yargel​—ni aram e “teeliyaw ko yafas” u Gil’ilungun e tharmiy ndabi kireb. (Revelation 2:10) Chiney, athap rodad​—ndemtrug ko tharmiy ara fayleng—​e ra ayuwegdad ni nge par ni gad ba falfalan’ nyugu aram rogon ni keb e magawon ngodad.

“Yira Falan’ ko Athap”

4, 5. (a) Mang fan ni fonow ni ke pi’ Paul ni ngan “falfalan’ nbochan fare athap” e aram e tayim nib puluw ko piyu Roma? (b) Sana mang e ra k’aring reb e Kristiano ni nge pag e athap rok?

⁴ Paul ni apostal e ke pi’ e athamgil nga laniyan’ e pi walag u Roma ni nge “falan’rad ko athap” rorad ni yafas ndariy n’umngin nap’an. (Roma 12:12) Ireram e fonow ni fan ko piyu Roma nrib puluw ko tayim. Ba lich ko ragag e duw u tomren ni ke yol Paul ngorad, me yib e togopuluw ngorad nib gel, ma boch iyad e kan gafgownag nge mada ko yam’ ya aram e motochiyel ni i ta’ Nero ni Pilung. Dariy e maruwar riy nbochan ni ke michan’rad ni ra pi’ Got ngorad e teeliyaw ko yafas ma ir e ke ayuwegrad u nap’an ni ke yib e gafgow ngorad. Uwrarogodad e chiney?

⁵ Bochan ni gadad e piin Kristiano, maku rayog ni ngeb e togopuluw ngodad. (2 Timothy 3:12) Maku, gad manang ni “tayim nge n’en ni dan lemnag” e rayog nra buch rodad ni gadad urngin. (Eklesiastes 9:11) Rayog ni nge yim’ e en nib t’uf rodad nbochan e maadad nib tomgin. Llabthir ara reb e fager e rayog ni nge yim’ nbochan e m’ar nib gel. Faan manga gathi ri gad ma tedan’dad ko athap rodad ko Gil’ilungun, ma sana ra yib e magawon ngodad ko tirok Got nfaanra keb e skeng ngodad ni aram rogon. Arfan, ni ffel’ ni ngada fithed gadad, ‘Ke “falan’ug nbochan fare athap”? In yay ni ri gu ma fal’eg i lemnag? Ba riyul’ fare Paradis ni ra yib u wan’ug? Gu ma sananag ni gu ra moy u rom? Ka be par ni ri gu ma lemnag ko wuin e ra m’ay e re m’ag ney ntaabrogon ko ngiyal’ ni kefin gu nang e thin riyul’?’ Re deer ney ni bin tomur e ba t’uf ni ngan lemnag nib fel’ rogon. Mang fan? Ya bochan faanra ffel’ fithik’ i dowam, ma rayog e salpiy ngom ni boor, ma ga be par u bang ni gathi ri bay e mahl riy, nge magawon ko ggan, ara gathi ri ma yib e gafgow riy nib gel, ma rayog​—ni ngada paged talin ni rib t’uf ni ngeb e fayleng nib biech rok Got.

6. (a) Nap’an ni keb e gafgow ngak Paul nge Silas, ma kar tew e lem rorow nga daken e mang? (b) Uw rogon ni nge pi’ e athamgil nga lanin’dad e ngiyal’ ney e tin ni ke rin’ Paul nge Silas?

⁶ I fonownag Paul piyu Roma ni “ngar pired nib gum’an’rad u fithik’ e tin ni be yib ngorad ni yad be gafgow riy.” (Roma 12:12) Manang Paul rogon e gafgow. Ba’ biyay, ni kan piliyeg e changar rok me guy be’ nib moon ni be wenig ngak ni nge “yan nga Macedonia” ni fan ni nge ayuweg e girdi’ u rom ni ngar filed murung’agen Jehovah. (Acts 16:9) Ma arfan ni, Paul, nge Luke, nge Silas, nge Timothy, e ka ranod nga Europe. Mang e n’en ni be sonnag e pi missionary nem ni yad ba pasig? Gafgow! Tomren ni kara machibgad u lan fare mach nu Macedonia u Filippi, ma Paul nge Silas e kan toyrow min kalbusnagrow. Ba tamilang, ni boch e girdi’ ni ma par u Filippi e gathi kemus ni ma dariyfannag e thin nib fel’ ko Gil’ilungun​—ya ri yad ba togopuluw ngay. Tin ni ke buch rok e gali missionary ney ni yow ba pasig e ke m’aynag e falfalan’ rorow? Danga’. Tomren ni kan toyrow min kalbusnagrow, “ma gonap’an e ke lukngun e nep’ mi i meybil Paul nge Silas ma yow be yin’ e tang ni yow be pining e sorok ngak Got.” (Acts 16:25, 26) Riyul’, de falfalan’ Paul nge Silas nbochan kan toyrow, machane dagathi aram e n’en ni be sap e gali missionary nem ngay. Yow ma lemnag murung’agen Jehovah nge rogon ni ra flaabnagrow. Bochan ni kar ‘athamgilgow u fithik’ e gafgow,’ ma aram e dag Paul nge Silas e tin nib fel’ ngak e pi walagrow u Filippi nge yugu boch e binaw.

7. Mang fan ni meybil rodad e ba muun ngay ni ngan pining e magar?

⁷ I yoloy Paul ni gaar: “Mu um meybilgad ni gubin ngiyal’.” (Roma 12:12) Ga ma meybil u nap’an ni ke magafan’um? Mang e ga ra yibilay? Bod ni ngam weliy e magawon rom nrogon nib tamilang ma ga ning e ayuw ngak Jehovah. Machane ku rayog ni ngam mog e magar ya kam falfalan’ ko pi flaab ni ma yib ngom. Ra ngada fal’eged i lemnag e tin nib fel’ ni ke rin’ Jehovah ngodad ma ra ayuwegdad ni “nge falan’dad ko fare athap” u nap’an ni ra sum boch e magawon. David, ni ir be’ ni kan suguy e yafas rok ko magawon, i yoloy ni gaar: “Somol ni Got rog, pire’ ban’en ni yira ngat ngay ni kam ngongliy ni fan ngomad; dariy be’ ni bod gur! Boor ban’en nib fel’ ni ke m’ay i lemnag rom ni fan ngomad. Ra nggu weliy murung’agen ni gubin, ma ra yan i aw ndabiyog rog ya kaygi pire’.” (Psalm 40:5) Faanra bod rogon David, ni gadad ma fal’eg i lemnag ni gubin ngiyal’ e pi flaab ni ke pi’ Jehovah ngodad, ma mutrug ni gad ra falfalan’.

Nge Par e Lem nib Mudugil ni Fan ko Machib

8. Mang e ra ayuweg reb e Kristiano ni nge par nib falfalan’ u nap’an ni keb e togopuluw ngak?

⁸ I pi’ Jesus e athamgil nga laniyan’ pi gachalpen ni nguur pared ni ba mudugil lanin’rad ko ngiyal’ ni yad ra mada’nag boor mit e skeng. Be gaar: “Ngam falan’gad ko ngiyal’ nra yog e girdi’ e thin nib tagan ngomed mi yad ngongliy e tin nib kireb ngomed ma yad be tunguy urngin mit e thin nib kireb nib togopuluw ngomed ni bochan e gimed girdieg.” (Matthew 5:11) Mang fan ni gad ra falfalan’ u nap’an ni gad bay u tan e pi magawon n’ey? Gelngidad ni be ayuwegdad ni ngada gelgad ko togopuluw e be micheg ni gelngin Jehovah e bay u dakendad. Peter ni apostal e ke yog ngak yugu boch e Kristiano ko ngiyal’ nem ni gaar: “Mu falfalan’gad ni faanra nog e thin nib kireb ngomed ni fan e gimed girdien Kristus, ya ra er rogon ma fare Kan nib sorok ni aram Fare Kan ni Thothup rok Got e ke yib nga dakenmed.” (1 Peter 4:13, 14) U daken gelngin Jehovah, e ku ra ayuwegdad ni ngada gum’an’gad, ma angin nra yib riy, e ku rayog rodad ni ngada pared ni gad ba falfalan’.

9. Mang e ke ayuweg boch e walag ni ngar pirieged e falfalan’ u nap’an ni kan kalbusnagrad nbochan e michan’ rorad?

⁹ Mus ko ngiyal’ ni kaygi mo’maw’ e par rodad, rayog rodad ni ngada pirieged boch tapgin ni ngad falfalan’gad. Reb e Kristiano ni Adolf fithingan e ke guy ni riyul’ ni aram rogon. Ma par ko reb e nam ni fare maruwel ni ma tay e Pi Mich rok Jehovah e yima magawonnag u lan boor e duw. Adolf nge yugu boch e girdi’ ni yad ma chag e kan kolrad min nog ni ngan kalbusnagrad nib n’uw nap’an ya bochan ndar n’aged e michan’ rorad ni ko Bible. Mo’maw’ e par u lan e kalbus, machane bod rogon Paul nge Silas, ya Adolf nge pi walagen e kar pirieged boch tapgin ni nguur pininged e magar ngak Got. Kar rogned ni, tin ni ke buch rorad u lan e kalbus, e ke ayuwegrad ni nge gel e michan’ rorad ma ke ayuwegrad ni nge yog ngorad boch e felngin e Kristiano nib ga’ fan, ni bod e gol, nge runguy, nge t’ufeg ngak e pi walag. Ni bod e tin ni baaray, ni nap’an ni keb reb e chugum ngak reb e kalbus, me pi’ boch ban’en ni bay ko fare chugum ngak e pi walagen, ma be lemnag ni ereram boch e ayuw ni ke pi’ Jehovah ngorad, ni ir e en ni ma pi’ “urngin e taw’ath nib fel’.” Re felngin nem ni gol e ke falfalan’ag e cha’ nem ni ir e ke pi’ ban’en ngak yugu boch e girdi’ nge pi cha’ nem ni kan pi’ ngorad boch ban’en. Ere tin ni ke buch rorad ni kan ta’ ni fan ni ra warnag e michan’ rorad e ke gelnagrad ko tirok Got!​—James 1:17; Acts 20:35.

10, 11. Mang e ke rin’ reb e walag ni ppin u nap’an ni kan fith ngak boch e deer u gubin ngiyal’ min kalbusnag nib n’uw nap’an?

¹⁰ Ella, ni ku arrogon e ma par u reb e nam ni ke n’uw nap’an ni kan taleg fare maruwel ko machib riy ni fan ko Gil’ilungun, e kan kol nbochan ni ma wereg fare athap ko Kristiano ngak yugu boch e girdi’. U lan meruk e pul, ni yug yima fith ngak boch e deer u gubin ngiyal’. Tomuren min fek i yan ko puf oloboch, min dugliy ni nge par u kalbus ni ragag e duw ko gin ni dariy yugu reb e tapigpig ku Jehovah riy. Ke mus ni 24 e duw rok Ella ko ngiyal’ nem.

¹¹ Mmutrug ni, de lemnag Ella ni nge fanay e yafas rok ko ngiyal’ ni be ilal iyan u lan e kalbus. Machane dabiyog ni nge thiliyeg e par rok, me duguliy ni nge thiliyeg e lem rok. Tin ni ke rin’, e ke tabab i lemnag ni kalbus e ir e gin ni nge wereg e machib riy. Me yog ni gaar, “Boor e girdi’ ni susun ngan machibnagrad,” me ulul ngay ni gaar, “arfan ni gowa papey ni be yan e duw.” Ke pag boor ko lal e duw nga tomren, min fith Ella biyay. Bochan ni piin ni ke fith ngak boch e deer e kar guyed ni fare kalbus e de kirebnag e michan’ rok, ma aram ma rogned ngak ni: “Dabiyog ni nggu paged gur u kalbus; ya dawor mu thil.” Me fulweg Ella nrogon nib mudugil ni gaar, “Machane kug thil e chiney!”. Me ulul ngay ni gaar, “Kab manigil e lem rog e chiney ko ngiyal’ ni som’mon ni kugub nga kalbus, ma ke gel boch e michan’ rog e chiney ko kafram!” Me ulul ngay ni gaar: “Faan manga dab mu paged gag, ma gu ra par nge mada’ ko ngiyal’ ni ke guy Jehovah e tayim nib puluw ni ngan pageg u kalbus.” Ke par Ella nib falfalan’ nyugu aram rogon ni ke par u kalbus u lan lal nge baley e duw! Ke fil rogon ni nge par nib falfalan’ ndemtrug rogon e par ni be un ngay. Rayog ni ngam fil ban’en ko n’en ni ke buch rok?​—Hebrews 13:5.

12. Mang e ra fek e gapas i yib ngak reb e Kristiano ko ngiyal’ ni mo’maw’ e par rok?

¹² Dab mog ni kan pi’ ngak Ella reb e taw’ath nib thil ni ke ayuweg ni ke pag be un ko pi magawon nem. Nap’an ni be weliy Ella murung’agen e tayim ni yima fith ngak boch e deer u lan fapi pul ni daworni nog e gechig ni yira pi’ ngak, me tamilangnag ni gaar: “Ke yib ngan’ug fare tayim ni be chachafin nguweleg, ma kug thamiy ni kug bod e arche’ ni sparrow ko marus.” Machane, Ella e bay e michan’ rok ku Jehovah nib gel. Ke fil rogon ni nge pagan’ ngak. (Proverbs 3:5-7) Ma angin ni ke yib riy, ke par nib riyul’ Got u wan’ ni kab gel boch ko kafram. Be weliy ni gaar: “Gubin ngiyal’ ni gu ma yan nga singgil ni yima fitheg riy, ma gu ma thamiy e gapas ni ke yib nga dakenag. . . . Ngiyal’ nri ma k’aring e marus ngog, ma ra gel boch e gapas nra yib ngog.” Jehovah e ir kenggin e re gapas nem. Be weliy Paul ni apostal ni gaar: “Ma dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ercha’med nge tafinay romed ngi i par rok Kristus .”​—Filippi 4:6, 7.

13. Mang e be micheg ni faanra ke yib e gafgow ngodad, ma bay gelngidad ni ngada k’adan’dad?

¹³ Ka nap’an ni kan pag Ella u kalbus, e ke par ni be falfalan’ u fithik’ e magawon. Ke yog rok ni nge par ni aram rogon, ni gathi bochan gelngin, machane bochan gelngin Jehovah ni ke pi’ ngak. Maku aram rogon Paul ni apostal, i yoloy ni gaar: “Ere kari gu falfalan’ ni nggu uf ko meewar rog, ni fan e nggu thamiy rog ni ke yib gelngin Kristus ngog ni nge mang yoror rog. . . . Ya nap’an ni gub meewar, e aram e ngiyal’ ni gub gel.”​—2 Korinth 12:9, 10.

14. Ngam weliy rogon reb e Kristiano ni keb e skeng ngak ma rayog ni nge par nib mudugil laniyan’ ma mang angin ni ra yib.

¹⁴ Sana ba thil e magawon ni keb ngom e chiney ko pi magawon ni kada weliyed kafram u roy. Machane, demtrug ko mang e pi n’en nem, ma mo’maw’ ni ngan k’adan’uy riy. Ni bod e tin ni baaray, ni masta rom e sana ma yog e thin nib togopuluw ko maruwel ni ga be rin’​—nrogon ni kab gel ndawori chuchugur ko piin nib thil e teliw rorad. Sana mo’maw’ ngom ni ngam gay yugu reb e maruwel. Uw rogon ni ngam par ni gab falfalan’? Mu lemnag Adolf nge pi walagen, ni tin ni ke buch rorad u lan e kalbus e ke fil ngorad rogon ni nge yog ngorad boch e felngin nib ga’ fan. Faanra ngam athamgil u fithik’ e yul’yul’ ni ngam falfalan’ag e masta rom​—nyugu aram rogon ni ir be’ ni “de mom ni ngani falfalan’ag”—​ma rayog ni nge yog ngom boch e felngin e Kristiano ni bod e k’adan’ nge gum’an’. (1 Peter 2:18) Maku, sana ga ra mang tamaruwel nib fel’, ma sana ra mab e kanawo’ ni nge yog ngom reb e maruwel nib fel’ reb e rran. Gad ra weliy e chiney yugu boch e kanawo’ nrayog ni ngada pared ni gad ba falfalan’ ko pigpig ku Jehovah.

Ngan Momnag Ban’en Ma Ra Yibnag e Falfalan’

15-17. Mang e ke rin’ ba wu’ i mabgol nrayog ni nge chuw e kireban’ rorow, nyugu aram rogon ndabiyog ni ngan chuweg kenggin ni polo’?

¹⁵ Sana mo’maw’ rom ni ngam mel’eg mmit e maruwel nrayog ni ngam un ngay ara u uw e maruwel ni ga ra maruwel riy, machane sana bay bang ko yafas rom nrayog ni ngam gagiyegnag boch ban’en. Mu lemnag e tin ni ke buch rok be’ ni gad ra weliy.

¹⁶ Ba wu’ i mabgol ni Kristiano e kar piningew reb e piilal ni ngeb nga tabinaw rorow ko abich. Nap’an ni balayal, ma fare walag ni pumoon nge leengin e kar weliyew salprow ngak ni dawori n’uw nap’an ma kar thamiyew ni ke tomal lanin’row nbochan e magawon ni keb ngorow. Yugu aram rogon ni yow l’agruw ma bay e maruwel rorow ni polo’ e rran ma dariy rogon ni ngar gayew yugu reb e maruwel. Yow be lemnag ko uw n’umngin nap’an e rayog ni ngar kadan’row ko par ni aram rogon.

¹⁷ Nap’an ni kara ningew ni nge pi’ fare piilal e fonow ngorow, me yog ngorow ni, “Ngam momnag ban’en.” Uw rogon? Fare figirngiy nge leengin e ma fanay dalip e awa u gubin e rran ni nga ranow ko maruwel rorow mar sulow nga tabinaw rorow. Fare piilal ni ri manang e re wu’ i mabgol nem, e ke yog ni ngar lemnagew ko rayog ni ngar gayew e binaw ni yow ra par riy nib chuchugur ko maruwel rorow, ma aram rogon rayog ni ngara lichnagew e tayim ni ngar fanew ko yan ko maruwel nge sul nga tabinaw rorow u gubin e rran. Ma yugu boch e tayim rorow e rayog ni ngar fanayew nga yugu boch ban’en ni baga’ fan​—ara ngan fanay ni fan ko toffan. Faan manga ke buchuw e falfalan’ rom nbochan e kaygi tomal e yafas rom, mang fan ni dabmu yaliy ko rayog ni ngan thiliyeg boch ban’en ni fan ni nge puluw boch ban’en?

18. Mang fan ni baga’ fan ni ngada lemnaged nib fel’ rogon u m’on ni ngada dugliyed ban’en?

¹⁸ Yugu reb e kanawo’ ni ngan lichnag e magawon e aram ran lemnag nsom’mon nib fel’rogon u m’on ni ngani duguliy ban’en. Ni bod ni, reb e Kristiano e ke duguliy ni nge toy reb e naun. Ke mel’eg reb e design nib mo’maw’, yugu aram rogon ni dawori toy reb e naun kafram. Chiney ke yib ngan’ ni sana rayog ni nge siyeg boch e magawon nfaanra ke ‘fal’eg i lemnag boch ban’en’ u m’on ni nge mel’eg reb e design ko naun rok. (Proverbs 14:15) Yugu reb e Kristiano e ke micheg ni ra ayuweg reb e walag ko malfith ni ke tay. Ma rogon ni yog e babyor, faanra dabiyog ko cha’ nem ni bay e malfith rok ni nge sulweg e salpiy ma en ni ke micheg ni ir e ra ayuweg e thingari thang fare malfith. Som’mon, ma dariy e magawon, machane ke yan boch e tayim ma cha’ nem ni bay e malfith rok e ke tabab ni nge siyeg i fol ko tin ni ke micheg. Ke magafan’ e cha’ ni ke pi’ e malfith ma ke towasariy e cha’ nem ni ka nog backer ngak ni nge sulweg urngin salpiy rok. Ke yib e magawon ngak e cha’ ni backer nrib gel. Sana rayog ni nge palog ko re magawon nem nfaanra ke lemnag urngin ban’en u m’on ni micheg ni ir e nge mil fan fare malfith ngak?​—Proverbs 17:18.

19. Mang boch e kanawo’ nrayog ni nge lichnag e kireban’ ko yafas rodad?

¹⁹ Nap’an ni kada magargad, ma dabda musegned nra baud boch ban’en ma ra gel biyay e falfalan’ rodad nfaanra ngan buchuwnag e tayim rodad ni fan ko fol Bible ni goo gadad, nge tayim ni fan ko machib, nge tayim ni fan ko muulung. Danga’, dabda rin’ed e re n’em ya bochan aram boch e kanawo’ ni baga’ fan ma rayog ni nge yog ngodad e kan ni thothup rok Jehovah, ni falfalan’ e ir e woom’ngin. (Galatia 5:22) Maruwel ko Kristiano e ra pasiganagan’dad u gubin ngiyal’ ma baga’ ni dabda magargad nib gel. (Matthew 11:28-30) Ma baga’ ni fapi maruwel rodad ni secular ara boch e fafel e ra aw parowdad riy, ma gathi tirok Got ban’en. Ngan fil rogon ni ngan mol ko awa nib puluw e ra pi’ gelngidad biyay. Ngan uneg boch e tayim ko toffan e ri ba’ angin. N. H. Knorr, ni ir bang ko fare Governing Body ko Pi Mich rok Jehovah nge mada’ ko ngiyal’ ni ke yim’, e ma yog ngak e pi missionaries ni gaar: “Faani ra mulan’um, ma bin som’mon ni ga ra rin’ e ngam toffan boch. Ga ra gin ngay ni mom ni ngan pithig urngin e magawon u tomren ni kam toffan kam mol nib fel’ rogon ni nep’!”

20. (a) Ngam weliy boch e kanawo’ nra ayuwegdad ni ngada pared ni gad ba falfalan’. (b) Mang boch i fan ni rayog ni ngam lemnag ni ngan falfalan’? (Mu guy e kahol ni bay ko page 23.)

²⁰ Kan tawaathnag e piin Kristiano ni ngar pigpiggad ko “Got ni ba falfalan’.” (1 Timothy 1:11) Rogon e n’en ni kada guyed, rayog ni ngada pared ni gad ba falfalan’ nyugu aram rogon ni keb ngodad e pi magawon nib gel. Gubin ngiyal’ ma ngada ted e athap ko Gil’ilungun nga p’eowchedad, ngan fal’eg rogon boch ban’en ni fan e nge puluw, ma ngada momnaged e par rodad u gubin ngiyal’. Ngemu’, demtrug rogon e par rodad, ma gad ra fol ko thin rok Paul ni apostal ni gaar: “Gubin ngiyal’ ni nguum falfalan’gad ko taab girdi’ ni kam tiyed Somol. Ere ngku gog bayay ni nge lungug: mu falfalan’gad!”​—Filippi 4:4.

Mu Fal’eg i Lemnag e Pi Deer N’ey:

• Mang fan ni piin Kristiano e thingara tiyan’rad ko fare athap rorad ko Gil’ilungun nib fel’ rogon?

• Mang e ra ayuwegdad ma rayog ni ngada pared ni gad ba falfalan’ ko ngiyal’ nib mo’maw’ e par rodad?

• Mang fan ni thingarda guyed rogon ni ngan momnag e par rodad?

• Mang e yungi n’en ni girdi’ riy e kar momnaged e par rorad?

[Box/​Pictures on page 23]

Yugu Boch e Tapgin nra Peth ko Falfalan’

Gadad e piin ni Kristiano, e bay boor fan ni gad ra falfalan’. Ngam mu lemnag e tin ni baaray:

1. Gad manang Jehovah.

2. Kada nanged e thin riyul’ ko Thin rok Got.

3. Rayog ni ngan n’agfan e kireb rodad u daken e michan’ rodad ko maligach ni pi’ Jesus.

4. Gil’ilungun Got e be gagiyeg​—ma dabki n’uw nap’an me yib fare fayleng nib biech!

5. Ke fekdad Jehovah nga paradis nib spiritual.

6. Gad be chag ngak e piin Kristiano u fithik’ e falfalan’.

7. Bay e tawaath rodad ni ngada uned i wereg e machib.

8. Gadad ba fas, ma ba mudugil gelngidad gelngidad.

Uw Urngin Boch i Fan ni Ngan Falfalan’ ni Rayog ni Ngam Mog?

[Picture on page 19]

I par nib falfalan’ Paul nge Silas u lan e kalbus

[Pictures on page 21]

Kam yiluy owchem ko tin ni yibe sonnag u fithik’ e falfalan’ ni aram e fayleng nib biech rok Got?