“Mmarod . . . Ngam Pingeged Yad Ngar Manged Pi Gachalpeg”

1-2. (a) Mang maruwel e ba milfan ko ulung ni Kristiano nrogon nib puluw ko n’en ni tay Jesus chilen ko Matthew 28:18-20? (b) Mang boch e deer ni gad ra weliy ko re article ney?

BA MUDUGIL nri felfelan’ e pi apostal u nap’an nra muulunggad nga daken e burey. Tomuren ni fos Jesus ko yam’ me yog ngorad ni ngar mada’gad ko re gin’em. (Matt. 28:16) Rayog nsana ireray e ngiyal’ ni “m’ug ngak pi gachalpen u taab ngiyal’ ni yad ba pag e lal mir’ay.” (1 Kor. 15:6) Mang fan ni ke pining Jesus pi gachalpen ni ngar mada’gad ko re gin’em? Bochan e nge tay chilen reb e maruwel ngorad nra yibnag e felfelan’ ngorad. I gaar: “Mmarod ngak girdien e pi nam u gubin yang ngam pingeged yad ngar manged pi gachalpeg.”​—Mu beeg e Matthew 28:18-20.

² Pi gachalpen Jesus nrung’aged e pi thin ney ni yog e yad e piin nra manged bang ko ulung ni Kristiano ko bin som’on e chibog. Re maruwel nib milfan ko re ulung nem ni ngar rin’ed e aram e ngar ayuweged e girdi’ ngar manged boch i gachalpen Kristus.b Ngiyal’ ney e boor e ulung ko tin riyul’ e Kristiano u ga’ngin yang e fayleng, maku taab maruwel e ba milfan ngorad ni ngar rin’ed. U lan e re article ney e gad ra weliy riy e re aningeg i deer ni baaray ni be gaar: Mang nib ga’ fan fare maruwel ni ngan ayuweg e girdi’ ngar manged boch i gachalpen Jesus? Mang e ba muun ko re maruwel ney? Gubin e Kristiano ni yad be ayuweg e girdi’ ni ngar manged boch i gachalpen Jesus, fa? Mang fan nib t’uf ni ngad gum’an’gad u nap’an ni gad be rin’ e re maruwel ney?

MANG NIB GA’ FAN FARE MARUWEL NI NGAN AYUWEG E GIRDI’ NGAR MANGED BOCH I GACHALPEN JESUS?

3. Mang nib ga’ fan fare maruwel ni ngan ayuweg e girdi’ ngar manged boch i gachalpen Jesus nrogon ni bay ko John 14:6 nge 17:3?

³ Mang nib ga’ fan fare maruwel ni ngan ayuweg e girdi’ ngar manged boch i gachalpen Jesus? Bochan ni kemus ni yigoo piin ni yad ra mang pi gachalpen Kristus e rayog ni ngar manged fager rok Got. Maku reb e, piin ma lek Kristus e ba fel’ rogon e par rorad e ngiyal’ ney, ma bay e athap rorad ko yafos ni manemus boch nga m’on. (Mu beeg e John 14:6; 17:3.) Ere rriyul’ nib ga’ fan e re maruwel ney ni ke pi’ Jesus ngodad ni ngad rin’ed, machane gathi yigoo gadad e gad be rin’ e re maruwel ney. I yoloy apostal Paul murung’agen nge piin ni yad ma maruwel u taabang ni gaar: ‘Gamad be maruwel rok Got u taabang.’ (1 Kor. 3:9) Ere ireray reb e tow’ath ni ke pi’ Jehovah nge Kristus ngak e girdi’ ndawor ra flontgad!

4. Mang e gad be fil ko n’en ni buch rok Ivan nge Matilde?

⁴ Ba gel e felfelan’ nrayog ni ngad ted ko fare maruwel ni ngan ayuweg e girdi’ ngar manged boch i gachalpen Jesus. Am lemnag e n’en ni buch rok Ivan nge ppin rok ni ka nog Matilde ngak ni yow ma par u Colombia. Nap’an nra machibnagew be’ nib pagel ni ka nog Davier ngak, ma aram me yog ngorow ni gaar: “Gu baadag ni nggu thilyeg boch ban’en u lan e yafos rog, machane dabiyog ni nggu rin’ e re n’ey.” Davier e ir be’ ni ma un ko tug, maku ma fanay boch e falay ni kireb, ma ir be’ nib ta chingaw, maku yow ma par be’ nib pin u taabang ndawor ra mabgolgow ni ka nog Erika ngak. I weliy Ivan ni gaar: “Gu tababgow i fil e Bible ngak ni yugu aram rogon nib palog e binaw rok. Ere thingar gu warow u rat ni boor e awa ni gamow be yan u yu pa’ i kanawo’ nib tabarbar. Nap’an ni guy Erika ni ke thil e ngongol rok Davier nge rogon ni ma lemnag boch ban’en, ma aram me un ngomad ko fol Bible.” Munmun ma aram me tal Davier i fanay e falay ni kireb miki tal ko chingaw, ma daki un ko tug, ma aram mar mabgolgow Erika. I gaar Matilde: “Nap’an nni taufenag Davier nge Erika ko duw ni 2016, ma aram me yib ngan’mow e n’en ni yog Davier ni gaar, ‘Gu baadag ni nggu thilyeg boch ban’en u lan e yafos rog, machane dabiyog ni nggu rin’ e re n’ey.’ Daki yag ni nggu k’adan’mow ma aram ma gamow yor ni bochan e kar gu felfelan’gow.” Dabisiy ni ku gad ma felfelan’ u nap’an ni gad ra ayuweg be’ ni nge mang reb i gachalpen Kristus.

MANG E BA MUUN KO FARE MARUWEL NI NGAN AYUWEG E GIRDI’ NGAR MANGED BOCH I GACHALPEN JESUS?

5. Mang e n’en nsom’on nib t’uf ni ngad rin’ed ya ngad ayuweged e girdi’ ni ngar manged boch i gachalpen Jesus?

⁵ N’en nsom’on nib t’uf ni ngad rin’ed ya ngad ayuweged e girdi’ ni ngar manged boch i gachalpen Jesus e aram e ngad gayed “be’” nib m’agan’ ngay ni nge fil murung’agen Jehovah. (Matt. 10:11) Nap’an ni gad ra weliy murung’agen Jehovah ko girdi’ ni gad be mada’nag, ma aram e gad be micheg ni gad e Pi Mich Rok Jehovah. Gad ra fol ko n’en ni tay Jesus chilen, ma aram e gad be micheg ni gadad e tin riyul’ e Kristiano.

6. Mang e rayog ni ngad rin’ed ya nge yag ni motoyil e girdi’ ko n’en ni nga dogned ngorad?

⁶ Bay boch e girdi’ ni gad ma mada’nagrad ni yad baadag ni ngar filed e tin riyul’ u lan e Bible. Machane boch e girdi’ e gathi ri yad baadag ni ngar filed e tin riyul’ ko som’on. Ere rayog nib t’uf ni ngad rin’ed boch ban’en ya nge yag nra adaged ni ngar filed e Bible. Ba t’uf ni ngad fal’eged rogodad nib fel’ rogon ni faanra nge yib angin e machib rodad. Mmel’eg boch ban’en ni ga be lemnag nra adag e girdi’ ni ngar nanged murung’agen. Mag fal’eg i lemnag rogon ni ga ra tabab i weliy murung’agen e pi n’em ko girdi’.

7. Uw rogon ni ngam tababnag e numon ngak be’? Mang fan ni ga be lemnag nib ga’ fan ni ngan motoyil ngak min tayfan?

⁷ Bod nrayog ni ngam fith facha’ ni kam mada’nag ni nge lungum: “Rayog ni nggu fith lanin’um u ban’en? Boor e magawon ni gad be mada’nag e ngiyal’ ney ni ku be mada’nag e girdi’ u ga’ngin yang e fayleng. Ga be lemnag ni bay reb e am u roy u fayleng nrayog ni nge pithig e pi magawon ney, fa?” Ngemu’ mag weliy ngak fare thin ni bay ko Daniel 2:44. Ma reb e rayog ni nge lungum ngak be’: “Mang e bin th’abi fel’ e kanawo’ ni ngan fil ko bitir riy rogon ni nge fel’ pangirad? Uw rogon ni ga be lemnag?” Ngemu’ mag weliy ngak fare thin ni bay ko Deuteronomy 6:6, 7. Demtrug e n’en ni kam mel’eg ni ngam weliy murung’agen, ma n’en nib ga’ fan e ngam lemnag e piin ni ngar motoyilgad ngom. Mu lemnag angin nra yib ngorad ni faan yad ra fil e tin riyul’ ni bay u lan e Bible. Nap’an ni ga be non ngorad mab ga’ fan ni ngam motoyil, mag tayfan e pi n’en ni yad be lemnag. Ga ra rin’ ni aray rogon, ma aram e ga ra nang fan lanin’rad nib fel’ rogon, maku yad ra adag ni ngar motoyilgad ngom.

8. Mang fan nib t’uf ni ngad athamgilgad ngaud sulod ko girdi’ ni kad mada’naged?

⁸ U m’on ni nge dugliy be’ ni nge fil e Bible, ma rayog nib t’uf ni ngam tay e tayim mag athamgil ni ngam sul ngaum guy. Mang fan? Bochan e rayog ni bay yu ngiyal’ ni gad ra sul ni ngad guyed ma de moy u tafen. Maku reb e, rayog nib t’uf ni boor yay ni ngam sul ngak mfini m’agan’ ngay ni nge fil e Bible. Dab mu pagtalin ni woldug e rayog ni nge tugul me ga’ ni faanra un rannag ni gubin ngiyal’. Ere ku arrogon be’ nrayog ni nge gel e t’ufeg rok ngak Jehovah nge Kristus ni faanra ud weliyed murung’agen e Thin rok Got ngak ni gubin ngiyal’.

GUBIN E KRISTIANO NI YAD BE AYUWEG E GIRDI’ NI NGAR MANGED BOCH I GACHALPEN JESUS, FA?

9-10. Mang fan nrayog ni nga nog ni gubin e Kristiano ni yad be ayuweg e piin nriyul’ ni yad baadag ni ngar nanged e tin riyul’ ni ngar manged boch i gachalpen Jesus?

⁹ Gubin e pi tamachib ni Kristiano ni yad be un i pi’ e ayuw ni ngan pirieg e piin nriyul’ ni yad baadag ni ngar nanged e tin riyul’. Rayog ni ngad taareb rogonnaged e re maruwel ney nga bochi tir ni ke malog ni yibe gay. Uw rogon? Am lemnag e n’en ni buch u nap’an ni malog bochi pagel ndalip e duw rok. Sogonap’an 500 e girdi’ nra uned i gay. Ma sogonap’an 20 e awa nga tomuren ma aram me pirieg be’ e chi pagel nem u bangi ban’en ni yima yung e corn riy. Cha’nem ni pirieg e chi pagel ney e dabun ni ngan n’uf ni bochan e re n’ey, ya yog ni gaar: “Ke yag ni ngan pirieg e chi pagel ney ni bochan e gubin e girdi’ ni yad be maruwel u taabang.”

¹⁰ Boor e girdi’ ni bod e chi pagel ney ni ke malog. Dariy e athap rorad ma yad baadag ni ngan ayuwegrad. (Efe. 2:12) Ba pag meruk e milyon urngidad ni gad be maruwel u taabang ni ngad pirieged e pi girdi’ ney. Rayog nsana dawor mu pirieg be’ ni baadag ni ngam filew e Bible u taabang. Machane bay boch e walag ni gimed be machib u taabang i ban’en nrayog ni kar pirieged be’ ni baadag ni nge fil e tin riyul’ u lan e Thin rok Got. Nap’an nra mada’nag reb e walag be’ me munmun me mang reb i gachalpen Kristus, ma aram e gubin e piin nra pied e ayuw ko re maruwel ney e bay fan ni ngar felfelan’gad.

11. Mang boch e kanawo’ nrayog ni ngam pi’ e ayuw riy ni ngan pirieg e girdi’ ni ngar manged pi gachalpen Jesus ni yugu aram rogon ndariy be’ ni ga be fil e Bible ngak?

¹¹ Yugu aram rogon ndariy be’ ni ga be fil e Bible ngak e chiney, machane ku bay boch e kanawo’ nrayog ni ngam pi’ e ayuw riy ni ngan pirieg e girdi’ ni ngar manged pi gachalpen Jesus. Bod nnap’an ni ga ra guy be’ nib beech ni ke yib ko muulung nga Tagil’ e Liyor rodad, ma rayog ni ngam pining e magar ngak mag ayuweg. Faan ga ra dag e t’ufeg ko biney e kanawo’, ma aram e rayog ni ngam ayuweg ni nge nang ni gad e tin riyul’ e Kristiano. (John 13:34, 35) Pi fulweg ni ga ma pi’ u nap’an e muulung ni yugu aram rogon nib ngoch e rayog ni nge fil ngak e piin ni kafin nra uned ko muulung rogon ni ngar weliyed e michan’ rorad u fithik’ e yul’yul’ nge tayfan. Ku rayog ni ngam un ngak be’ ni ka fini un ko machib, mag ayuweg ni nge fanay e thin nu Bible ni nge machibnag e girdi’. Ga ra rin’ e re n’ey, ma aram e ga be fil ngak rogon ni nge folwok rok Kristus.​—Luke 10:25-28.

12. Ba t’uf ni nge yag boch e salap ngodad ni yugu ba thum’ nga wuru’ mfini yag ni ngad ayuweged e girdi’ ni ngar manged boch i gachalpen Jesus, fa? Mu tamilangnag.

¹² Dariy bagadad nsusun e nge lemnag nib t’uf ni nge yag boch e salap ngak ni yugu ba thum’ nga wuru’ mfini yag ni nge ayuweg e girdi’ ngar manged boch i gachalpen Jesus. Mang fan? Am lemnag e n’en ni buch rok Faustina ni ma par u Bolivia. Nap’an nra mada’gad e Pi Mich Rok Jehovah ma dabiyog ni nge beeg e babyor. Machane chiney e ke yag ni nge nang buchuuw e beeg babyor. Chiney e ke un ko taufe ma ri baadag ni ma machibnag e girdi’. Ba ga’ ni lal e girdi’ ni ma fil e Bible ngorad u gubin e wik. Yugu aram rogon ni yooren e piin ni ma fil e Bible ngorad e yad ba salap ngak ko beeg babyor, machane ke yag ni nge ayuweg nel’ i yad kar uned ko taufe.​—Luke 10:21.

13. Mang angin ni ma yib ngodad u nap’an ni gad ra ayuweg e girdi’ ni ngar manged boch i gachalpen Jesus ni yugu aram rogon ni boor pa’ u puluwdad?

¹³ Boor e Kristiano ni boor pa’ u puluwrad ni bochan e boor ban’en nib ga’ fan ni yad ma rin’. Machane ku yad ma tay e tayim ni ngar filed e Bible ko girdi’, mab gel e felfelan’ ni yad ma tay riy. Am lemnag e n’en ni buch rok Melanie nreb e walag nib pin ni ma par u Alaska ni yigoo ir ni ma chuguliy bochi buliyel ni fak ni ke gaman meruk e duw rok. Ma maruwel u polo’ e tayim rok, maku ma ayuweg bagayow e gallabthir rok ni ke cancer. Re binaw nem ni ma par riy e ba palog, ma kemus ni yigoo ir e Pi Mich ni ma par u rom. Gubin ngiyal’ ni ma meybil ni nge yib gelngin ya nge yag ni yan ko machib ni yugu aram rogon nib gel e garbeb, ya ri baadag ni nge pirieg be’ ni nge fil e Bible ngak. Ere munmun ma aram me mada’nag be’ nib pin ni ka nog Sara ngak. Ri felfelan’ e re ppin ney u nap’an ni nang ni bay fithingan Got. Boch nga tomuren me adag Sara ni nge fil e Bible. I gaar Melanie: “Ra yan i blayal’ ko Biyernes ma kari aw parawog, machane gamow ma yan e chi buliyel ni fakag nem ngguyew Sara nggu filed e Bible. Re n’ey e ma yib angin ngomow. Gamow ma felfelan’ u nap’an ni gamow be gay murung’agen boch e deer ni ma fith Sara ngomow, ma kar gu felfelan’gow ni ke mang reb e fager rok Jehovah.” I athamgil Sara nge par nib mudugil u fithik’ e togopuluw ni i yib ngak, miki chuw ko teliw ni i un ngay kafram, ma aram me un ko taufe.

FAN NIB T’UF NI NGAD GUM’AN’GAD U NAP’AN NI GAD BE AYUWEG E GIRDI’ NI NGAR MANGED BOCH I GACHALPEN JESUS

14. (a) Uw rogon ni fare maruwel ni ngan ayuweg e girdi’ ngar manged boch i gachalpen Jesus e taareb rogon ko fita’? (b) Mang e be k’aringem fapi thin ni yog Paul ko 2 Timothy 4:1, 2 ni ngam rin’?

¹⁴ Yugu aram rogon ndawor mu pirieg be’ ni baadag ni nge mang reb i gachalpen Jesus, machane dabi mulan’um i gay e pi girdi’ ney. Dab mu pagtalin ni taarebrogonnag Jesus e re maruwel ney ko fita’. Pi tafita’ e rayog ni boor e awa nthingar ra fita’gad riy mfin nra koled e nig. Ba ga’ ni yad ma fita’ nge n’uw e nep’ ara yad ma yan ko fita’ nri kab kakadbul. Ma yu ngiyal’ e thingar ranod ngar paloggad ko binaw mfin nra fita’gad. (Luke 5:5) Ere ku arrogon e pi tamachib ni boor e awa ni yad ma gum’an’naged yad ngar gayed e girdi’. Ku yad ma thilthilyeg e tayim nge gin ni yad ma rin’ e re n’ey riy. Mang fan? Ya nge yag nra mada’naged boch e girdi’. Piin nri yad ma athamgil ni ngar rin’ed e re n’ey e ba ga’ ni yima tow’athnagrad ni bochan e yad ma pirieg e girdi’ nriyul’ ni baadag ni nge motoyil ko n’en ni gad be machibnag. Ere gur, rayog ni ngam gay rogon ni ngam machib u reb e tayim ara bang nrayog ni ngam pirieg be’ riy?​—Mu beeg e 2 Timothy 4:1, 2.

15. Mang nib ga’ fan ni ngad gum’an’gad u nap’an ni gad be fil e Bible ngak be’?

¹⁵ Mang nib ga’ fan ni ngad gum’an’gad u nap’an ni gad be fil e Bible ngak be’? Reb i fan e bochan nib t’uf ni ngad ayuweged e en ni gad be fil e Bible ngak ni nge fil miki t’uf rok e pi n’en ni be fil e Bible. Ba t’uf ni ngad ayuweged nge nang Jehovah ni ir e En ni thin rok e bay u Bible, me t’uf rok. Gathi kemus ni ngad filed ngak e n’en ni baadag Jesus ni nge rin’ pi gachalpen, ya kub t’uf ni ngad filed ngak rogon ni nge fanay e pi motochiyel nem nga lan e yafos rok. Ba t’uf ni ngad gum’an’gad ngad ayuweged u nap’an ni be gay rogon ni nge fol ko pi kenggin e motochiyel u Bible. Bay boch e girdi’ ni kan fil e Bible ngorad ni ke yag ni ngar thilyeged e lem nge ngongol rodad u lan in e pul. Machane boch e girdi’ e ba n’uw nap’an mfini yag ni nge rin’ e re n’ey.

16. Mang e kam fil ko n’en ni buch rok Raúl?

¹⁶ Bay ban’en ni buch rok reb e walag ni pumoon ni ma missionary u Peru ni be m’ug riy ni bay angin e gum’an’ ni yima tay. I gaar: “L’agruw ken e babyor ni kug filew be’ ni ka nog Raúl ngak ni gamow ma fil e Bible. Machane ka bay boch e magawon ni i mada’nag nib mo’maw’ ni nge gel ngay. Gubin ngiyal’ ni bay e magawon u lan e mabgol rok, ma yugu ma yaba’, ma bitir rok e darur ted fan ni bochan e ba kireb e ngongol rok. Yugu aram rogon ma gubin ngiyal’ ni ma un ko muulung, ere gu ulul ni ngaug wan gguy ma gu be ayuwegrad chon e tabinaw rok. Ba pag dalip e duw nga tomuren nug mada’gow mfini yag ni nge bung rogon ni nge un ko taufe.”

17. Mang e gad ra weliy ko bin migid e article?

¹⁷ I yog Jesus ngodad ni ‘nga darod ngak girdien e pi nam u gubin yang ngad pingeged yad ngar manged pi gachalpen.’ Ra ngad rin’ed e n’en ni tay Jesus chilen, mab ga’ nib t’uf ni ngad nonad ngak e piin nrib thil e michan’ rodad. Pi cha’ney e ba muun ngay e piin ndariy barba’ e teliw ni yad ba muun ngay ara piin nde mich Got u wan’rad. Bin migid e article e ra weliy rogon ni ngad weliyed fare thin nib fel’ ngak e pi girdi’ ney.