Mu Folwok u Rogon ni i Machib Jesus u Fithik’ e Pasig

1. Mang reb e kanawo’ nib thil e girdi’ rok Jehovah riy ko piin yad ma dake yad e Kristiano?

REB e kanawo’ nib thil e pi tapigpig rok Jehovah riy ko piin yad ma dake yad e Kristiano e aram e yad ba pasig ko machib. (Titus 2:14) Machane yu ngiyal’ e rayog ni nge mo’maw’ ni nge pasigan’um ko machib. Sana taareb rogon e lem romew reb e piilal nib gel e maruwel ni ma tay ni gaar, “Yu ngiyal’ e dabug ni nggu un ko machib.”

2. Mang e rayog ni nge mo’maw’nag ngodad yu ngiyal’ ni ngad pared ni gad ba pasig ko machib?

² Sana rayog ni gad baadag ni gad ma rin’ yugu boch ban’en ni fan ko pigpig rodad ngak Jehovah ko bin nga darod ko machib. Mang fan? Ya rayog nnap’an ni gad ra un i toy boch e naun rodad ma gad be ngongliy e yungin ke kireb riy, ara da ayuweged e piin kar gafgowgad u nap’an ni ke buch ban’en ni kan gafgow riy, ara da pied e athamgil nga laniyan’ pi walagdad, ma gad be guy angin ni ka chingiyal’ nem maku gad ma felfelan’ ngay. Gad ba felfelan’ ko gapas nge t’ufeg ni bay u thildad e pi walag ni gad ma maruwel u taabang, ma gad manang nib ga’ fan u wan’rad e n’en gad be rin’ ni fan ngorad. Machane rayog ni ke yoor e duw ni gad be machib u taabang i ban’en ma gathi ri gad be pirieg e girdi’ ni be motoyil. Fa reb e rayog ni gad be mada’nag e girdi’ ndubrad e machib. Ku gad manang nra gad be chugur i yan ko tomur, ma ra yoor e girdi’ nra ur togopuluwgad ngodad. (Matt. 10:22) Ere mang e rayog ni nge ayuwegdad ni ngad pared ni gad ba pasig ko machib ara nge gel boch e pasig rodad?

3. Mang e gad be fil u murung’agen Jesus ko fare fanathin ni bay ko Luke 13:​6-9?

³ Rayog ni ngad filed ban’en u rogon ni ngad pasiggad ko machib ko n’en ni rin’ Jesus. Gubin ngiyal’ ni i machib u fithik’ e pasig. Bin riyul’ riy e nap’an ni ke n’uw boch nap’an ni be machib, ma aram me yoornag e tin be rin’. (Mu beeg e Luke 13:​6-9.) Sogonap’an dalip e duw ni i machibnag Jesus e pi Jew, machane yooren i yad e dar manged boch i gachalpen ni bod fare moon ni dalip e duw ni i ayuweg ba ke gek’iy ni fig ni ke tugul u milay’ rok, machane de yib wom’engin. De mulan’ Jesus u puluwon e girdi’ ni i machibnag ara malmal ko machib ni be tay ni bod fare moon nde tal i ayuweg fare ke gek’iy ni fig. Bin riyul’ riy e gelnag Jesus boch e maruwel ni be tay ni nge ayuwegrad ni nge m’agan’rad ko fare thin nib fel’.

4. Mang aningeg ban’en ni rin’ Jesus ni gad ra weliy murung’agen?

⁴ Gad ra weliy ko re article ney rogon ni i par Jesus nib pasig nib ga’ nu lan fa nel’ ni tomur e pul ni i machib riy. (Mu guy e study note ko Luke 10:1 u tan fare thin ni “After these things.”) Gad ra fil ban’en ko n’en ni i fil ko girdi’ ma gad folwok ko n’en ni rin’, ma ra ayuwegdad ni ngad pared e ngiyal’ ney ni gad ba pasig. Ere chiney e ngad weliyed aningeg ban’en nrayog ni ngad filed rok Jesus: (1) Ba m’on u wan’ e n’en nib m’agan’ Jehovah ngay, (2) manang rogon ni i lebug e pi yiiy u Bible, (3) i taga’ ngak Jehovah ni nge ayuweg, ma (4) ba pagan’ ngay ni bay boch e girdi’ nra motoyil ngak.

BA M’ON U WAN’ E N’EN NIB M’AGAN’ JEHOVAH NGAY

5. Uw rogon ni dag Jesus nib m’on u wan’ e n’en be rin’ nib m’agan’ Got ngay?

⁵ I machibnag Jesus “fare Thin Nib Fel’ ni murung’agen e gagiyeg rok Got” u fithik’ e pasig ni bochan e manang ni aram e maruwel ni baadag Got ni nge rin’. (Luke 4:43) Fare maruwel ni machib e aram e n’en th’abi ga’ fan u wan’ Jesus. Mus nga nap’an ni ke chugur nga tungun e machib ni i tay, ma i yan u “lan e tin ni ba ga’ e binaw nge tin ni ba achig” ni be fil e thin rok Got ko girdi’. (Luke 13:22) Ki skulnag yugu boch i gachalpen ni ngkur rin’ed e re maruwel ney.​—Luke 10:1.

6. Uw rogon ni bay rogon fare maruwel ni machib nga yugu boch e maruwel ni gad ma rin’ ni fan ngak Jehovah? (Kum guy e sasing.)

⁶ Ku arrogon e ngiyal’ ney ni fare maruwel ni ngan machibnag fare thin nib fel’ e aram e bin th’abi ga’ fan e maruwel ni baadag Jehovah nge Jesus ni ngad rin’ed. (Matt. 24:14; 28:​19, 20) Gubin e maruwel ni gad ma rin’ ni fan ngak Jehovah e bay rogon ko fare maruwel ni machib. Bod ni gad ma un i toy boch e naun rodad ara da pigpiggad u Bethel ni ngad ayuweged fare maruwel ni machib. Gathi kemus ni gad ma pi’ e tin nib t’uf ko pi walagdad ni kar gafgowgad u nap’an ni ke buch ban’en ni kan gafgow riy ni bochan e ngad ayuweged yad, ya bochan e ngki yag ni ngkur sulod i rin’ e pi n’en yad ma rin’ ni fan ko liyor rorad nib muun e machib ngay. Nap’an ni gad ra nang feni ga’ fan fare maruwel ni machib mu kud nanged ni aram e bin th’abi ga’ fan e maruwel ni baadag Jehovah ni ngad rin’ed, ma aram e ra k’aringdad ni ngad uned ko machib ni gubin ngiyal’. János nreb e piilal ni ma par u Hungary e yog ni gaar: “Gu ma puguran ngog ndariy reb e maruwel ni gad ma rin’ ni fan ngak Jehovah nrayog ni nge yan nga lon fare maruwel ni machib, ya aram e bin th’abi ga’ fan e maruwel nib milfan ngodad.”

7. Mang fan ni baadag Jehovah ni ngad ululgad ko machib? (1 Timothy 2:​3, 4)

⁷ Rayog ni ngad pasiggad ko machib ni faanra ud lemnaged e girdi’ ni bod ni ma lemnagrad Jehovah. Baadag ni nge rung’ag urngin e girdi’ nrayog ni ngar rung’aged fare thin nib fel’ me m’agan’rad ngay. (Mu beeg e 1 Timothy 2:​3, 4.) Aram fan ni be skulnagdad ni ngad mon’oggad u rogon ni gad be weliy e re thin ney nra ayuweg e yafos ko girdi’. Bod nu nap’an e muulung ni gad ma tay u lan e wik ma gad ma fil rogon ni ngaud tababnaged e numon ko girdi’. Mus ni faanra dabi tabab e girdi’ ni ngar pigpiggad ngak Jehovah e chiney, ma rayog ni nge mab e kanawo’ ngorad ni ngar rin’ed e re n’ey u m’on ni nge mus fare gafgow nib ga’. N’en gad ra yog ngorad e chiney e rayog ni nge k’aringrad ni ngar adaged ni ngar pigpiggad ngak Jehovah boch nga m’on. Machane rayog ni nge buch e re n’ey ni faan gad ra ulul ko machib.

MANANG ROGON NI I LEBUG E YIIY U BIBLE

8. Bochan ni manang Jesus rogon nra lebug boch e yiiy u Bible, ma mang e rin’ e re n’ey nga rogon ni i maruwel ko tayim rok?

⁸ Manang Jesus rogon nra lebug e pi yiiy u Bible. Manang ni kemus ni dalip nge baley e duw nra machib riy. (Dan. 9:​26, 27) Ku manang e n’en nni yiiynag u murung’agen e ngiyal’ nge rogon nra yim’. (Luke 18:​31-34) I fanay e n’en ni manang ni nge gagiyegnag rogon ni be maruwel ko tayim rok. Bochan e re n’ey, ma i machib u fithik’ e pasig ya nge yag ni mu’nag e maruwel ni kan pi’ ngak ni nge rin’.

9. Mang fan ni be k’aringdad e pi yiiy u Bible ni ngad machibgad u fithik’ e pasig?

⁹ Gad ra nang rogon ni be lebug e yiiy u Bible, ma ra k’aringdad ni ngad machibgad u fithik’ e pasig. Gad manang ndab ki n’uw nap’an min thang e re m’ag ney. Gad manang ni pi n’en be buch e ngiyal’ ney nge rogon e lem ko girdi’ e be dag e n’en ni yiiynag e Bible nra buch ko tin tomuren e rran. Kad guyed nrogon e togopuluw ni be buch u thilin yu Ngalis nge yu Meriken nge yu Russia nge pi nam nib mang ngak e be lebguy fare yiiy ni murung’agen fare pilung ko yimuch nge fare pilung ko lel’uch “u nap’an e tin tomuren e rran.” (Dan. 11:​40, NW) Ki tamilang u wan’dad ni yu Ngalis nge yu Meriken e be yip’ fan rifrifen ay fare liyos ni bay murung’agen ko Daniel 2:​43-45. Bochan ni kad filed e pi yiiy u Bible, ma ke mich u wan’dad ndab ki n’uw nap’an ma ra thang Gil’ilungun Got e pi am ko girdi’. Gubin e pi yiiy ney ni be tamilangnag ni kari chugur e tomur, ere thingar da fanayed e tayim rodad nib fel’ rogon ni ngad machibnaged fare thin nib fel’.

10. Ku mang boch e kanawo’ nrayog ni nge k’aringdad e pi yiiy u Bible ni ngad pasiggad ko machib?

¹⁰ Bay boch ban’en ko pi yiiy u Bible nri gad baadag ni ngad weliyed ko girdi’. Carrie nreb e walag nib pin ni ma pigpig u Dominican Republic e yog ni gaar, “Pi n’en nib manigil ni ke micheg Jehovah nra buch boch nga m’on e be k’aringeg ni nggu weliy e tin riyul’ ko girdi’.” Ki gaar: “Nap’an nug ra guy e magawon ni be mada’nag e girdi’ e ngiyal’ ney, ma kug nang ni pi n’ey ni kan micheg e gathi kemus ni yigoo gag e fan ngog ya ku fan ngorad.” Pi yiiy u Bible e be pi’ e athamgil nga lanin’dad ni ngad ululgad ko machib ni bochan e gad manang ni be ayuwegdad Jehovah ko re maruwel ney. Leila ni ma par u Hungary e yog ni gaar: “Be k’aringeg e Isaiah 11:​6-9 ni ngkug machibnag fare thin nib fel’ ngak e piin gowa dabi m’agan’rad ngay. Gu manang ndemtrug be’ nrayog ni nge ayuweg Jehovah ni nge thil.” Ma Christopher nreb e walag ni pumoon ni ma par u Zambia e yog ni gaar: “Be garer fare thin nib fel’ u ga’ngin yang e fayleng ni bod nni yiiynag ko Mark 13:​10, ma gub tow’ath ni gu be un i lebguy e re yiiy ney.” Mang boch e yiiy u Bible ni be k’aringem ni ngam ulul ko machib?

I TAGA’ NGAK JEHOVAH NI NGE AYUWEG

11. Mang fan nib t’uf ni nge taga’ Jesus ngak Jehovah ya nge yag ni ulul ko machib u fithik’ e pasig? (Luke 12:​49, 53)

¹¹ I taga’ Jesus ngak Jehovah ni nge ayuweg ni nge ulul ko machib u fithik’ e pasig. Yugu aram rogon ni ma gonopiy rogon ni ma non ko girdi’, machane manang ni fare thin nib fel’ ni murung’agen Gil’ilungun Got e ra k’aring e damumuw ngak boch e girdi’ miki k’aring yugu boch i yad ni ngar togopuluwgad. (Mu beeg e Luke 12:​49, 53.) Boor yay ni i guy e pi tayugang’ ko teliw rogon ni ngar thanged e fan rok Jesus ni bochan e machib ni i tay. (John 8:59; 10:​31, 39) Machane i ulul ko machib ni bochan e manang ni bay Jehovah rok ni be ayuweg. I yog ni gaar: “Gathi goo gag ngay; ya en ni Chitamangiy ni ir e ke l’ugeg ku gub e ba’ rog. . . . Dawori pageg nggu par ni goo gag, ya gubin ngiyal’ ma gu be rin’ e tin nib m’agan’ ngay.”​—John 8:​16, 29.

12. Uw rogon ni fal’eg Jesus rogon pi gachalpen ni ngar ululgad ko machib ngki mada’ ko ngiyal’ ni yibe togopuluw ngorad?

¹² I puguran Jesus ngak pi gachalpen nrayog ni ngar taga’gad ngak Jehovah ni nge ayuwegrad. Boor yay ni i micheg nga lanin’rad nra ayuwegrad Jehovah ngki mada’ ko ngiyal’ ni yibe gafgownagrad. (Matt. 10:​18-20; Luke 12:​11, 12) Aram fan ni yog ngorad ni ngar kol ayuwgad. (Matt. 10:16; Luke 10:3) I yog ngorad ndab ra towasariyed e girdi’ ni ngar motoyilgad ngorad ni faanra dubrad. (Luke 10:​10, 11) Ki yog ngorad ni ngar milgad ngar chuwgad ni faanra yibe gafgownagrad. (Matt. 10:23) Yugu aram rogon nib pasig Jesus ma i pagan’ ngak Jehovah, machane i siyeg boch ban’en ni bay e riya’ riy ko ngiyal’ nrayog.​—John 11:​53, 54.

13. Mang fan nrayog ni nge pagan’um ngay nra ayuwegem Jehovah?

¹³ Ba t’uf ni nge ayuwegdad Jehovah e ngiyal’ ney ni ngad ululgad ko machib u fithik’ e pasig ngki mada’ ko ngiyal’ ni yibe togopuluw ngodad. (Rev. 12:17) Mang fan nrayog ni nge pagan’um ngay nra ayuwegem Jehovah? Am lemnag e meybil ni tay Jesus ni bay ko John ko guruy ni 17. I yog Jesus ngak Jehovah ni nga i yororiy e pi apostal rok, me fulweg Jehovah taban e re meybil nem. Fare babyor ni Acts e be weliy rogon ni ayuweg Jehovah e pi apostal ni ngar machibgad u fithik’ e pasig ni yugu aram rogon ni yibe gafgownagrad. Ki yog Jesus ngak Jehovah u lan e meybil rok ni nge yororiy e piin nra mich u wan’rad e thin ni be machibnag e pi apostal rok. Gab muun ko pi girdi’ ney. Dawori tal Jehovah i fulweg taban e re meybil nem, ma ra ayuwegem ni bod ni ayuweg e pi apostal.​—John 17:​11, 15, 20.

14. Uw rogon ni kad nanged nrayog ni ngad ululgad ko machib u fithik’ e pasig? (Kum guy e sasing.)

¹⁴ Mus ni faanra gel boch e mo’maw’ riy ni ngan machibnag fare thin nib fel’ u fithik’ e pasig u nap’an nra chugur ko tomur, machane ku yira ayuwegdad. (Luke 21:​12-15) Gad ma folwok rok Jesus nge pi gachalpen ni aram e gad ma pag e girdi’ ni ngar dugliyed ko yad ra motoyil fa danga’ ma darud luaged e thin. Mus ko pi walagdad ni yad ma par u boch e nam ndabiyog ni ngar machibgad riy nib puf rogorad e ku be yag ni ngar machibnaged fare thin nib fel’ ni bochan e yad be taga’ ngak Jehovah ko bin ngar taga’gad nga gelngirad. Ma pi’ Jehovah gelngidad e ngiyal’ ney ni ngad ‘weliyed urngin e thin rok’ nge yan i mus nga rogon nib m’agan’ ngay, ni bod ni pi’ gelngin e pi tapigpig rok ko bin som’on e chibog. (2 Tim. 4:17) Rayog ni nge pagan’um ngay ni faan ga ra taga’ ngak Jehovah, ma aram e ku rayog ni ngam ulul ko machib u fithik’ e pasig.

BA PAGAN’ NGAY NI BAY BOCH E GIRDI’ NI YAD RA MOTOYIL

15. Mang e be dag nib pagan’ Jesus ngay ni bay boch e girdi’ ni yad ra motoyil ko fare thin nib fel’?

¹⁵ Ba pagan’ Jesus ngay ni bay boch e girdi’ ni yad ra motoyil ko fare thin nib fel’. Ireray e n’en ni ayuweg ni nge par nib pasig ko machib. Bod nu tungun e duw ni 30 C.E., me guy ni boor e girdi’ ni ke m’agan’rad ngay ni ngar motoyilgad ko thin ni be machibnag, ma aram me taareb rogonnagrad nga bangi milay’ ni bay e woldug riy ni ke el ni ke taw nga nap’an ni ngan t’ar. (John 4:35) Sogonap’an reb e duw nga tomuren, me gaar ngak pi gachalpen: “Woldug ni ngan kunuy ngan tay nga naun e ba ga’ ni ba ga’ yang.” (Matt. 9:​37, 38) Boch nga tomuren miki sul u daken ni gaar: “Woldug e ba ga’ ni ba ga’ yang . . . Mmeybilgad ngak e en ni ir e suwon e woldug ngki pi’ boch girdien e maruwel ngar muruwliyed e re woldug rok nem nge af nga naun.” (Luke 10:2) Gubin ngiyal’ nib pagan’ Jesus ngay ni bay boch e girdi’ ni yad ra motoyil ko fare thin nib fel’, ma nap’an nra motoyilgad me felfelan’.​—Luke 10:21.

16. Uw rogon ni tamilangnag fa gal fanathin ni weliy Jesus nra yib angin e machib ni yibe tay? (Luke 13:​18-21) (Kum guy e sasing.)

¹⁶ I ayuweg Jesus pi gachalpen ni ngar pared ni yad ba pasig ni aram e puguran ngorad nra yib angin e machib ni yad be tay. Am lemnag l’agruw e fanathin ni weliy. (Mu beeg e Luke 13:​18-21.) I weliy murung’agen awochngin e mustard ni nge fil ngorad ni boor e girdi’ nra m’agan’rad ko fare thin nib fel’, ma dariy ban’en nrayog ni nge taleg e re n’ey. Ki weliy murung’agen e n’en ni ma thownag e flowa ni nge tamilangnag rogon nra garer fare thin ni murung’agen Gil’ilungun Got u boor e nam u ga’ngin yang e fayleng, me k’aring e girdi’ ni ngar thilyeged boch ban’en u rarogorad ni yugu aram rogon nrayog ndabi gagiyel e pi n’em nib papey. Ere ayuweg Jesus pi gachalpen ni ngar nanged nra yib angin e machib ni yad be tay.

17. Mang boch i fan ni ngad sapgad nga fel’ngin e machib ni gad be tay?

¹⁷ Nap’an ni gad ra lemnag rogon ni be ayuweg fare maruwel ni machib boor e girdi’ u ga’ngin yang e fayleng e ngiyal’ ney, ma be pi’ e athamgil nga lanin’dad ni ngad ululgad ko machib. Gubin e duw ni bokum milyon e girdi’ ni yad ma un ko Puguran mar uned ngodad ko fol Bible. Bokum miriay e biyu’ e girdi’ ni yima taufenagrad mar uned ngodad ko fare maruwel ni machib. Dad nanged urngin e girdi’ ni bay ki m’agan’rad ko fare thin nib fel’ ni gad be machibnag boch nga m’on, machane gad manang ni be kunuy Jehovah ba ulung i girdi’ ni yad boor ni yad ra magey ni yad ba fos u nap’an fare gafgow nib ga’. (Rev. 7:​9, 14) Jehovah e Ir e Ba Ga’ ko mokun woldug ni gad be tay mab pagan’ ngay ni ka boor e girdi’ nra m’agan’rad ko fare thin nib fel’, ere gad ra ulul ko machib ni gad be tay.

18. Mang e gad baadag ni nge nang e girdi’ u rarogodad?

¹⁸ Kab kafram i yib ni yigoo yimanang pi gachalpen Jesus ni bochan e yad ba pasig ko machib. Nap’an ni guy e girdi’ rogon ni i non e pi apostal rok Jesus ndarur rusgad, ‘mi yad nang ni ur uned ngak Jesus.’ (Acts 4:13) Ere nap’an nra guydad e girdi’ ni gad be machib u fithik’ e pasig, ma manga yugu ra nanged ni gad be folwok rok Jesus.