Rogon ni Ngarim Felfelan’ ko Machib ni Ga Ma Tay

1. Uw rogon u wan’ boch e walag ni ngar machibnaged e girdi’? (Kum guy e sasing.)

GADAD e girdi’ rok Jehovah e gad ma machibnag e girdi’ ni bochan e ba t’uf rodad e Chitamangidad ni bay u tharmiy ma gad baadag ni ngad ayuweged yad ni ngar nanged murung’agen. Boor e tamachib nri yad baadag ni yad ma un ko machib. Machane bay boch nib mo’maw’ ni ngar adaged ni ngar uned ko machib. Mang fan? Bay boch i yad nri yad ba tamra’ ma der pagan’rad ngorad. Ma boch i yad e ma magagawon ni nge yan nga tafen e girdi’ ndawor ni pining. Ma boch e yad be rus nri damumuw e girdi’ ngorad. Ku boch i yad e kan fil ngak ni nga i guy rogon ndabi k’aring e damumuw ko girdi’. Yugu aram rogon nrib t’uf Jehovah ko pi walag ney, machane ba mo’maw’ ngorad ni ngar weliyed fare thin nib fel’ ko girdi’ ndar nanged. Yugu aram rogon ma yad manang feni ga’ fan e re maruwel ney ma yad ma un ngay ni gubin ngiyal’. Ba mudugil nrib felfelan’ Jehovah ngorad!

2. Mang fan nsusun e dabi mulan’um ni faanra ba mo’maw’ ni ngam felfelan’ ko machib ni ga ma tay?

² Gur, bay yu ngiyal’ nib mo’maw’ ni ngam felfelan’ ko machib ni ga ma tay ni bochan e ga be lem ni aray rogon, fa? Faanra bay, ma dabi mulan’um. Re n’ey e rayog ni be dag ni gur be’ ni gab sobut’an’ ma dabum ni nge yog e girdi’ e sorok ngom maku dabum ni ngam k’aring e damumuw ko girdi’. Maku reb e dariy be’ ni baadag ni nge k’aring e damumuw ko girdi’ nib ga’ ni faanra be guy rogon ni nge rin’ boch ban’en nib fel’ ni fan ngorad. Manang e Chitamam ni bay u tharmiy e magawon ni ga be mada’nag ma baadag ni nge ayuwegem. (Isa. 41:13) Ere gad ra weliy lal ban’en ko re article ney nra ayuwegdad u rogon ni ngad gelgad ko mit ney e lem nge rogon ni ngad felfelan’gad ko machib ni gad ma tay.

MU PAG E THIN ROK GOT NI NGE PI’ GELNGIM

3. Mang e ayuweg Jeremiah ni profet ni nge machibnag e girdi’?

³ Kab kafram i yib ni ma pi’ e thin rok Got gelngin e pi tapigpig rok u nap’an nra t’uf ni ngar rin’ed reb e maruwel nib mo’maw’. Ireray e n’en ni buch rok Jeremiah ni profet. Nap’an ni yog Jehovah ngak ni nge machibnag e girdi’ ma dabun ni nge rin’ e re maruwel nem ni kan pi’ ngak. Ya yog ni gaar: “Da gu nang rogon e welthin; ya kayigi gel fanag bitir.” (Jer. 1:6) Ere uw rogon ni yag ni nge pagan’? I pi’ e thin rok Got gelngin. I gaar: “Mi i gak’ e thin rom ni bod ba nifiy u fithik’ i lanin’ug ngu fithik’ e yil rog ni dabiyog ni nge chuw. Me ngochngochan’ug ni kug tay rog ndagur yog.” (Jer. 20:​8, 9) Ere yugu aram rogon ndabun e girdi’ ko gin ni i machib riy ni ngar motoyilgad ngak, machane thin nnog ngak ni nge machibnag e pi’ gelngin ni nge mu’nag e maruwel rok.

4. Mang e ma buch u nap’an ni gad ra beeg e Thin rok Got ma gad fal’eg i lemnag? (Kolose 1:​9, 10)

⁴ N’en bay u lan e Thin rok Got e ma pi’ gelngin e piin Kristiano. Nap’an ni be yol apostal Paul ko fare ulung nu Kolose me yog ni faanra yag e bin riyul’ e tamilangan’ ngak pi walagen, ma aram e ra k’aringrad ni ngar “ngongolgad nrogon ni ba adag Somol” u nap’an ni be ulul ni nge ‘yib wom’engin i pangirad u fithik’ urngin mit e maruwel nib fel’.’ (Mu beeg e Kolose 1:​9, 10.) Re maruwel nem nib fel’ e ba muun ngay ni ngan machibnag fare thin nib fel’. Ere nap’an ni gad ra beeg e Thin rok Got ma gad fal’eg i lemnag, ma aram e be gel e michan’ rodad ngak Jehovah maku be tamilang u wan’dad feni ga’ fan ni ngan machibnag murung’agen Gil’ilungun Got.

5. Uw rogon nrayog ni ngari yib angin ngodad e beeg Bible nge fol Bible ni gad ma tay?

⁵ Ra ngari yib angin e Thin rok Got ngodad, ma thingar da ted e tayim ni ngad beeged, ma gad be fil, ma gad be fal’eg i lemnag e n’en be yog. Faanra kam beeg reb e thin nu Bible ndamur nang fan ma yugu dab mu digey ngam man ko bin migid. Ya ngam fanay fare Watch Tower Publications Index ara fare Research Guide for Jehovah’s Witnesses ni ngam gay fan fare thin nu Bible. Faan ga ra tay e tayim ni ngam fal’eg i fil e Thin rok Got, ma aram e rra pagan’um ngay nib riyul’ e thin riy. (1 Thess. 5:21) Faanra pagan’um ko thin rok Got, ma aram e ri ga ra adag ni ngam weliy e n’en kam fil ngak yugu boch e girdi’.

MU FAL’EG ROGOM NIB FEL’ ROGON NI FAN KO MACHIB

6. Mang fan nsusun e ngad fal’eged rogodad nib fel’ rogon ni fan ko machib?

⁶ Faan ga ra fal’eg rogom nib fel’ rogon ni fan ko machib, ma dabisiy nra pagan’um u nap’an ni ga be non ko girdi’. I ayuweg Jesus pi gachalpen ni ngar fal’eged rogorad u m’on ni nge l’ograd ni nga ranod ko machib. (Luke 10:​1-11) Bochan nra folgad ko n’en ni fil Jesus ngorad, ma aram fan nrib gel e felfelan’ nra ted ko n’en ni yag ni ngar rin’ed.​—Luke 10:17.

7. Uw rogon nrayog ni ngad fal’eged rogodad ni fan ko machib? (Kum guy e sasing.)

⁷ Uw rogon nrayog ni ngad fal’eged rogodad ni fan ko machib? Ba t’uf ni ngad lemnaged rogon nrayog ni ngad weliyed e tin riyul’ nrogon ni keb u gum’ircha’dad. Kub fel’ ni ngad lemnaged l’agruw ara dalip ban’en nrayog ni nge yog be’ ngodad ko gin gad ma machib riy, ma gad lemnag rogon ni ngad pied e fulweg riy. Ma nap’an ni gad ra non ko girdi’ ma rayog ni ngad guyed rogon ni ngad pared nib gapas lanin’dad, ma gad siminmin, mu kud daged e sumunguy ngorad.

8. Uw rogon nib taareb rogon e piin Kristiano ko rume’ ni but’ ni weliy apostal Paul u lan e fanathin rok?

⁸ I yog apostal Paul ngak e pi walagen ni Kristiano ni gaar: “Gamad e piin ni ba’ romad e re n’ey nib fel’ . . . e gamad bod e rume’ ni but’.” (2 Kor. 4:7) Mang e re n’ey nib fel’? Aram fare maruwel nra yognag e yafos ko girdi’ ni aram e ngan machibnag murung’agen Gil’ilungun Got. (2 Kor. 4:1) Mang e be yip’ fan fapi rume’ ni but’? Be yip’ fan e pi tapigpig rok Got ni yad ma weliy fare thin nib fel’ ko girdi’. Pi ta fol chuway’ u nap’an Paul e yad ma fanay e rume’ ni but’ ni ngaur ted boch ban’en nib ga’ fan nga langgin ni bod e ggan, nge wain, nge salpiy ni ngar feked u bang nga bang. Ere ku arrogon Jehovah ni ke tay chilen ngodad ni ngad weliyed fare thin nib fel’ nib ga’ fan. Faanra ayuwegdad Jehovah ma aram e rayog ni nge yib gelngidad ni ngad machibnaged e re thin ney u fithik’ e yul’yul’.

MMEYBIL NI NGE DAB KUM RUS

9. Uw rogon nrayog ni nge dab kud rusgad ko girdi’ ara da rusgad nri chey min togopuluw ngodad? (Kum guy e sasing.)

⁹ Yu ngiyal’ e rayog ni gad be rus ko girdi’ ara gad be rus nri chey min togopuluw ngodad. Ere uw rogon ni ngad gelgad ko biney e magawon? Am lemnag e meybil rok e pi apostal u nap’an nnog ngorad ndab kur machibgad. Ra weniggad ngak Jehovah ni nge ayuwegrad ni ‘ngar weliyed e thin rok ndab kur rusgad’ ko bin ni ngar talgad ko machib ni bochan e yad be rus. Ka chingiyal’ nem me fulweg Jehovah taban e meybil rorad. (Acts 4:​18, 29, 31) Faanra bay yu ngiyal’ ni gad ma rus ko girdi’, ma susun e ngkud meybilgad ngak Jehovah ni nge ayuwegdad. Mu wenig ngak Jehovah ni nge ayuwegem ni nge gel e t’ufeg rom ko girdi’ ko marus rom ngorad.

10. Uw rogon ni ma ayuwegdad Jehovah ni ngad rin’ed e maruwel rodad ni gadad e Pi Mich rok? (Isaiah 43:​10-12)

¹⁰ Ke mel’egdad Jehovah ni ngad manged Pi Mich rok, ma ke micheg nra ayuwegdad ni nge dab da rusgad. (Mu beeg e Isaiah 43:​10-12.) Am lemnag aningeg e kanawo’ ni ma rin’ e re n’ey riy. Bin som’on e bay Jesus rodad u nap’an ni gad be machibnag fare thin nib fel’. (Matt. 28:​18-20) Bin l’agruw e ke mel’eg e pi engel ni ngar ayuweged gadad. (Rev. 14:6) Bin dalip e ke pi’ Jehovah gelngin nib thothup ni nge ayuwegdad ni nge yib ngan’dad e pi n’en kad filed. (John 14:​25, 26) Ma bin aningeg e ke pi’ Jehovah e pi walag ni ngaud machibgad u taabang. Bochan e ayuw ni be pi’ Jehovah nge pi walagdad ngodad, ma bay gubin ban’en nib t’uf rodad nra ayuwegdad ndab kud rusgad ma gad ulul ko machib.

MU THILYEG BOCH BAN’EN U RAROGOM MU UM SAP NGA FEL’NGIN BAN’EN

11. Uw rogon nrayog ni nge yoor e girdi’ ni ngam pirieg u nap’an e machib? (Kum guy e sasing.)

¹¹ Ma mulan’um ni faanra ba lich e girdi’ ni ga be mada’nagrad u nap’an e machib, fa? Ere mang ndab mu fithem ni nge lungum: ‘Uw e ke yan e girdi’ ngay ko gin gu be machib riy e chiney?’ (Acts 16:13) ‘Gur, ka ranod ko maruwel ara ka ranod nga kantin ko chuway’?’ Faanra arrogon, ma gur, ga ra machib u kanawo’ ma boor e girdi’ nrayog ni ngam piriegrad, fa? Bay reb e walag ni pumoon ni ka nog Joshua ngak ni gaar, “Kug pirieg boch e kanawo’ nrayog ni nggu machib riy u nap’an nug ra yan ko yungi n’en yima yan ngay ko chuway’ nge gin bay e girdi’ ni yoor riy.” Kur piriegew Bridget ni leengin ni faan yow ra yan ni blayal’ nge Madnom ni mithigyal’ ko machib ma boor e girdi’ ni yow ma mada’nag u tabinaw.​—Efe. 5:​15, 16.

12. Uw rogon nrayog ni ngad nanged e n’en nib mich u wan’ e girdi’ ara n’en yad baadag ni ngar nanged murung’agen?

¹² Faanra gathi ri baadag e girdi’ ni nge non ngom, mag guy rogon ni ngam nang e n’en nib mich u wan’rad ara n’en yad baadag ni ngar nanged murung’agen. Joshua nge Bridget e yow ma fanay e deer ni bay u wuru’ reb e tract u nap’an ni yow be non ngak be’. Bod nnap’an ni yow be fanay fare tract ni Uw Rogon e Bible u Wan’um?, ma ma lungurow: “Bay boch e girdi’ ni yad ma lemnag ni Bible e ba ke babyor ni yib rok Got, ma boch e darur lemgad ni aray rogon. Me gur e uw rogon u wan’um?” Re n’ey e ba ga’ ni ma bing e kanawo’ ngorow ni ngar tababgad e girdi’ ko numon.

13. Mang fan nrayog ni ngad lemnaged ni bay angin e machib ni gad be tay ni yugu aram rogon nder motoyil e girdi’ ngodad? (Proverbs 27:11)

¹³ Rogon angin e machib ni gad ma tay e der tor nga daken urngin e girdi’ ni be motoyil ngodad. Mang fan? Ya kad rin’ed e n’en baadag Jehovah nge Fak ni ngad rin’ed ni aram e ngad machibnaged fare thin nib fel’. (Acts 10:42) Ere mus ni faanra de yag ni ngad pirieged be’ ni ngad machibnaged ara dabuy ni ngan motoyil ngodad, ma rayog ni ngad felfelan’gad ni bochan e gad manang ni gad be rin’ e n’en nib m’agan’ e Chitamangidad ngay ni bay u tharmiy.​—Mu beeg e Proverbs 27:11.

14. Mang fan nrayog ni ngad felfelan’gad u nap’an nra pirieg reb e tamachib be’ ko gin yibe machib riy ni baadag ni nge motoyil?

¹⁴ Ku rayog ni ngad felfelan’gad u nap’an ni ke pirieg reb e tamachib be’ ko gin yibe machib riy ni baadag ni nge motoyil. Ke taarebrogonnag Fare Wulyang ko Damit e maruwel rodad ngak bochi tir ni ke malog ni yibe gay. Boor e girdi’ ni be un i gay e chi tir nem mab ga’ yang e gin yibe gay riy. Nap’an ni yira pirieg fachi tir ma urngin e girdi’ ni yad ra felfelan’ ma gathi kemus ni yigoo facha’ ni ke pirieg. Ere ku arrogon ni urngin e girdi’ u lan e ulung ni yad ma pi’ e ayuw u rogon ni ngan ayuweg be’ ni nge mang reb i gachalpen Jesus. Ba t’uf e ayuw rok urngin e tamachib ni ngan machibnag urngin e girdi’ ko gin yibe machib riy. Ma nap’an nra tabab be’ ni nge un ko muulung ma gad gubin ni gad ma felfelan’.

MU LEMNAG ROGON NIB T’UF JEHOVAH NGE GIRDI’ ROM

15. Faan gad ra fol ko fare thin ko Matthew 22:​37-39, ma uw rogon nra ayuwegdad ni nge gel e pasig rodad ko machib? (Kum guy e sasing.)

¹⁵ Rayog ni nge gel e pasig rodad ko fare maruwel ni machib ni faanra ud lemnaged rogon nib t’uf Jehovah nge girdi’ rodad. (Mu beeg e Matthew 22:​37-39.) Am lemnag gelngin e felfelan’ ni ma tay Jehovah u nap’an nra guy ni gad be rin’ e re maruwel ney nge gelngin e felfelan’ ni ma tay e girdi’ u nap’an ni yad ra tabab ni ngar filed e Bible! Kum lemnag rogon nra yag e yafos ngak e piin yad ra motoyil ko fare thin ni gad be machibnag.​—John 6:40; 1 Tim. 4:16.

16. Uw rogon nrayog ni ngad felfelan’gad ko machib ni gad ma tay ni yugu aram rogon ni gad ma par u tabinaw ndabkiyog ni nga darod nga bang? Mu weliy ban’en ni ke buch.

¹⁶ Gur be’ ni ga ma par u tabinaw ndabkiyog ni ngam man nga bang, fa? Faanra arrogon, mag lemnag e n’en nrayog ni ngam rin’ ni ngam dag nib t’uf Jehovah nge girdi’ rom. Samuel nge Dania e nap’an ni yib fare m’ar ni COVID-19 ma ur parew u tabinaw rorow ndaki yag ni nga ranow nga bang. Yugu aram rogon nib mo’maw’ e par rorow e ngiyal’ nem, machane gubin ngiyal’ ni yow ma machib u telefon, ma yow be yoloy e babyor ngar piew ko girdi’, maku yow be fil e Bible ko girdi’ u Zoom. Samuel e i machibnag e piin ni i mada’nagrad ko gin ni i yan ngay ni ngan tafalaynag e cancer rok. I yog ni gaar: “Nap’an ni gad ra mada’nag e magawon, ma rayog ni nge magafan’dad nib pag rogon, miki aw parowdad, miki skengnag rogon e michan’ rodad. Ere ba t’uf ni ngad felfelan’gad ko pigpig ni gad be tay ngak Jehovah.” Nap’an ni be buch e pi n’ey, miki mul Dania ma dalip e pul ni par u bet ndaki yag ni nge un ko yan. Tomuren ma nel’ e pul ni i yan u wheelchair. I yog ni gaar: “Gguy rogon ni nggu rin’ urngin e tin nrayog rog. I yag ni nggu machibnag reb e kangof ni i yib i guyeg, mu ku ug nonad e piin yad ma yib ra pied boch ban’en nga tabinaw. Ki yag ni nggu nonow be’ nib pin u telefon ni ma maruwel u bang ni yima pi’ boch e falay riy ni chuway’.” Yugu aram rogon ni bay boch ban’en ndabkiyog ni nge rin’ Samuel nge Dania, machane ur rin’ew e tin nrayog rorow me yag ni ngar piriegew e felfelan’.

17. Uw rogon ni ngari yib angin ngom fapi n’em ni kad weliyed ko re article ney?

¹⁷ Rra yib angin fa lal i n’em ni kad weliyed ko re article ney ni faan yira rin’ ni gubin u taabang. Ra reb e pi n’ey ma bod mam’en ba mit e ggan ni ngan ngongliy. Faan yira puthuy ni gubin nga taabang ngan lith ma ra yan i n’ag fare ggan mab fel’ lamen. Ere faan gad ra rin’ fa lal i n’em ni kan weliy murung’agen, ma aram e rayog ni ngad siyeged boch e lem nde puluw miki gel e felfelan’ rodad ko machib ni gad ma tay.