“Gonop Rok Got e Ke M’ug nib Riyul’ ko Tin ni Kan Guy ni Ke Yib Riy”

1. Uw rogon e maruwel rodad u wan’ boch e girdi’?

¹ Yu ngiyal’ e gad ma mada’nag e girdi’ ni dubrad ni ngar motoyilgad ngodad ni bochan e dar nanged gadad fa ke weliy be’ ngorad boch ban’en nde riyul’ u murung’agen e Pi Mich Rok Jehovah. Ma reb e sana dubrad ni ngar motoyilgad ngodad ni bochan e pi n’en ni kar guyed u T.V. ara kar rung’aged u radio ni murung’agdad. U boch e nam e yima yog riy ni gadad “barba’ e teliw ni gad ba kireb.” Mang e susun ni ngad rin’ed ni faanra ke yog be’ ban’en ngodad ni aram rogon?

2. Mang e ra ayuwegdad ni nge dabi mulan’dad u nap’an ni ka nog e thin nib kireb u murung’agdad?

² Dabi Mulan’um: Nap’an e bin som’on e chibog, mab ga’ ni u nog boch ban’en nib togopuluw ngak Jesus nge ku boch e tapigpig rok Jehovah. (Acts 28:22) Yugu aram rogon ma dar tamra’gad ni bochan fare thin nib fel’ ni yad be machibnag. I gaar Jesus: “Gonop rok Got e ke m’ug nib riyul’ ko tin kan guy ni ke yib riy.” (Matt. 11:18, 19) I ulul nge rin’ e tin nib m’agan’ e Chitamangin ngay u fithik’ e pasig, ya manang ni piin ni yad be gay e tin riyul’ e yad ra guy fel’ngin e machib ni yad be tay. Faan gad ra lemnag ni mus ngak Fak Got mi ki mada’nag e magawon ni aram rogon, ma aram e rayog ni nge dabi mulan’dad.

3. Mang fan ndab da gingad ko thin nib kireb ni yima yog u murung’agdad?

³ I yog Jesus nra fanenikay e girdi’ nu fayleng pi gachalpen ni bod e n’en nni rin’ ngak. (John 15:18-20) Ere, dab da gingad ko thin nib togopluw ni yima yog u murung’agdad e ngiyal’ ney. Ma bin riyul’ riy e susun ni ngad nanged nri bayi gel i yan e togopuluw ni yibe tay ngodad ni bochan e gad be chugur i yan ko tomur. (Rev. 12:12) Rayog ni nge felfelan’dad ni bochan e dabki n’uw nap’an ni nge par e fayleng rok Satan.

4. Faanra ke togopluw be’ ngodad u nap’an e machib, ma mang e ngad rin’ed?

⁴ Ngad Pied e Fulweg u Fithik’ e Sumunguy: Faan yira yog e thin nib togopluw ngodad, ma ngad fulweged u fithik’ e sumunguy. (Prov. 15:1; Kol. 4:5, 6) Faanra gad be guy nrayog, ma nga dogned ngak faen ni be togopuluw ni boor ban’en nde riyul’ ni yima weliy u murung’agen e Pi Mich Rok Jehovah ara da fithed ngak ko mang fan ni aram rogon e tafinay rok. Faan gad ra non u fithik’ e sumunguy ma rayog ni nge k’aring facha’ ni nge fal’eg i lemnag e n’en ni ke rung’ag u murung’agen e Pi Mich Rok Jehovah, me motoyil’ ko yay ni migid ni kan yan nga tafen. Machane, faanra kari damumuw faen ni gad be non ngak, mab fel’ ni nga darod ngad chuwgad. Demtrug rogon ni ma sap e girdi’ ngodad, machane gad manang nib ga’ fan e machib ni gad be tay u wan’ Jehovah.​—Isa. 52:7.