Ngada Ayuweged E Michan’ Rodad

“Ngam ted fan Kristus u gum’erchamed, mi gimed tay ni ir e Somol romed. Mu fal’eged rogomed ni gubin ngiyal’ ni ngam pied e fulweg ko n’en nra fith be’ ngomed ni ngam weliyed u murung’agen e re n’en ni ir e ke l’agan’med ngay.”​—1 PETER 3:15, New World Translation.

1, 2. Mang fan nder gin e Pi Mich Rok Jehovah ko togopluw ni ma yib ngorad, ma mang e yad ba adag?

U LAN boor e binaw ma ba lingagil e Pi Mich Rok Jehovah ni yad e piin nib yul’yul’ mab klin e par rorad. Boor e girdi’ e ma lemnag ni yad e piin buguli yoror rorad nib fel’ ma dar ma k’aringed e wagey. Machane, kan gafgownag e pi Kristiano ney ni yugu aram rogon ni yad ma par nib gapas​—ko ngiyal’ ni bay e mahl nge ngiyal’ nib gapas. Dar gingad ko togopluw. Ya bin riyul’ riy e yad ma nang nra buch ngorad. Ya goo yad manang ni pi Kristiano u nap’an e bin som’on e chibog C.E. e kan “fanenikayrad,” ere dabi thil rogon ni ran ngongol ngak e piin ni ma lek Kristus ko ngiyal’ ney. (Matthew 10:22) Maku be weliy e Bible ni gaar: “Urngin e girdi’ ni yad ba adag ni ngar pired u reb e pangin nib m’agan’ Got ngay ma kar taab girdi’gad Kristus Jesus e bay ni gafgownagrad.”​—2 Timothy 3:12.

² Der ma gay e Pi Mich Rok Jehovah ni ngan gafgownagrad, ma gathi yad ba adag ni ngan gafgownagrad​—ni ngan bakkingnagrad, ara ngan nin’rad nga kalbus, ara ngan ngongol nib kireb ngorad. Yad ba adag ni ngar pired u ‘fithik’ e mocha’ nge gapas’ ni aram e rayog ni ngar wereged fare thin nib fel’ ko Gil’ilungun Got ndariy e togopluw riy. (1 Timothy 2:1, 2) Yad ma pining e magar riy ni boor e binaw ni rayog ni ngar liyorgad nib puf rogon, ma yad ma rin’ urngin e tin nrayog rorad ngar pired ni “ba aw e gapas u thil[rad] nge urngin e girdi’,” nib muun ngay e pi tayugang ko am. (Roma 12:18; 13:1-7) Ere mang fan ni yibe “fanenikayrad”?

3. Mang reb i fan ni kan fanenikay e Pi Mich Rok Jehovah?

³ Taareb fan ni yibe fanenikay e Pi Mich Rok Jehovah nge tin som’on e Kristiano. Som’on ma ma ngongliy e Pi Mich Rok Jehovah e michan’ rorad ma boch e girdi’ e dubrad. Susun, yad ma machibnag fare thin nib fel’ ko Gil’ilungun Got u fithik’ e pasig, ma boch e girdi’ e dar nanged fan mi yad lemnag ni “kaygi elmirin e machib” ni yad be tay. (Mu taarebnag ko Acts 4:19, 20.) Ku yad ma par u mathilin e magawon ko pi am nge pi mahl, ma aram e kan lemnag ni yad e piin ndar yul’yul’gad ko binaw rorad.​—Mikah 4:3, 4.

4, 5. (a) Uw rogon ni kan wereg e thin ngoogsur u murung’agen e Pi Mich Rok Jehovah? (b) Chon mini’ e yad tapgin e togopluw ni yibe tay ngak e pi tapigpig rok Jehovah?

⁴ Bin l’agruw, e kan t’ar e thin nga daken e Pi Mich Rok Jehovah​—ni thin ni go’ ban, ma kan pingeg e thin u murung’agen e michan’ rorad. Wenegan ni yib riy e kan nog ni yad ba ulung i sect nib kireb u boch e binaw. Maku bochan ni yad ma gayiy e tafalay ni dariy e racha’ riy ya nge puluw ko motochiyel ko Bible ni ngan ‘palog ko racha’’ ma aram e kan nog ni yad e “piin ma thang e fan ko bitir” nge ba ulung ni “cult ni yad ma li’rad.” (Acts 15:29) Machane bin riyul’ riy e ri baga’ fan e yafas u wan’ e Pi Mich Rok Jehovah, ma yad ma gayiy e bin th’abi fel’ e tafalay ni fan ngorad nge bitir rorad. Dariy e mich riy ni fre thin ni ka nog murung’agrad ni gubin e duw ma boor e bitir ko Pi Mich Rok Jehovah e ma yim’ ni bochan e dar paged ni ngan k’uruf e racha’ ngorad. Dariy e babyor ni rayog ni ngan micheg e re n’em. Maku ka nog ni Pi Mich e ma n’igin ni nge dar e tabinaw ni bochan boch e girdi’ u lan e tabinaw e dubrad ni ngar uned ko thin riyul’ ko Bible. Machane, piin ni manang e Pi Mich Rok Jehovah e goo yad manang ni yad ma tay fan e par u tabinaw ma yad ma athamgil ni ngar folgad ko pi motochiyel ko Bible ni be yog ni ra bagayow ma nge t’ufeg bagayow ni an figirngiy nge an leengiy me tay bagayow fan bagayow, ma bitir e nge fol ko gallabthir rorad ndemtrug ko taareb e michan’ rorad fa danga’.​—Efesus 5:21–​6:3.

⁵ Boor yay ma piin ni ma k’aring e togopluw ngak e Pi Mich Rok Jehovah e yad e girdi’ ko yugu boch e teliw ni kar k’aringed e pi tayugang ko am nge girdien e shimbung ni ngar taleged e maruwel ko Pi Mich. Susun uw rogon ni nge fulweg e Pi Mich Rok Jehovah e togopluw ni yibe tay ngorad​—ndemtrug ko aram wenegan e michan’ rodad nge ngongol rodad fa bochan ni kan wereg e thin ngoogsur u murung’agdad?

“Mu Sumunguygad nge Urngin e Girdi’ me Nang”

6. Mang fan ni baga’ fan ni nge puluw lanin’dad u murung’agen e girdi’ ni gathi yad bang ko ulung ko Kristiano?

⁶ Ba t’uf ni nge puluw e lem rodad​—ko lem rok Jehovah​—u murung’agen e piin nde taareb e michan’ rorad ngodad. Ya ra danga’ ma ra aw ni gad be pining e togopluw nge fanenikay nge yib ngodad. “Mu sumunguygad nge urngin e girdi’ me nang,” i yoloy apostal Paul. (Filippi 4:5) Ere be yog e Bible ni nge thebthebal e lem rodad ni fan ko piin gathi yad bang ko ulung ko Kristiano.

7. Uw rogon ni ngad pared ni “dabi kirebnagdad e kireb nu fayleng”?

⁷ Machane ku be yog e Bible ni ngan “ayuwegey nge dabi kirebnigey e kireb nu fayleng.” (James 1:27; 4:4) Rogon ni yog fre bugithin ni “fayleng” ko re thin ney e ba sor fan ko girdi’ ni be par nib dar ko Kristiano. Gad ma par u fithik’ e girdi’ nu fayleng; ma gad ma mada’nagrad u tabon e marwel, ngu skul, ngu lan e binaw. (John 17:11, 15; 1 Korinth 5:9, 10) Machane gad ma par ni dabi kirebnagdad e kireb nu fayleng ya gad ma siyeg e lem, nge thin, nge ngongol nib togopluw ko kanawo’ rok Got nib mat’aw. Ku baga’ fan ni ngad nanged ni bay e riya’ riy ni ngan chag ko girdi’ ko re fayleng ney, ni baga’ ni piin ni dariy fan u wan’rad e pi motochiyel rok Jehovah.​—Proverbs 13:20.

8. Mang fan dariy rogon ngodad ni ngad sapgad nga but’ ko yugu boch e girdi’ ni bochan e gad be par ni dabi kirebnagdad e kireb nu fayleng?

⁸ Machane gathi rayog ni ngan sap nga but’ ko piin ni gathi yad e Pi Mich Rok Jehovah ni bochan e kan pi’ e fonow ni nge dabi kirebnagey e kireb ko fayleng. (Proverbs 8:13) Mu lemnag e pi tayugang ko teliw ni Jew, ni kan weliy murung’agrad ko fa binem e thin. De felan’ Jehovah ko liyor ni ur sunmiyed; maku de n’igin nge fel’ thilrad e piin ni gathi yad e Jew. (Matthew 21:43, 45) Pi girdi’ nem nib tolangan’rad e ur sapgad nga but’ ko piin ni Gentile. Ma gathi aram rogon gadad, ma dabda sapgad nga but’ ko piin ni gathi yad e Pi Mich. Bod rogon apostal Paul, ma gad ba adag ni urngin e girdi’ e yad ra rung’ag e thin riyul’ ko Bible me felan’ Got ngorad.​—Acts 26:29; 1 Timothy 2:3, 4.

9. Faanra bpuluw e lem rodad ko Bible ma uw rogon ni gad ra weliy u murung’agen e piin nde taareb e michan’ rorad ngodad?

⁹ Susun nge puluw ko Bible e n’en ni gad ma weliy u murung’agen e piin ni gathi yad e Pi Mich. Yog Paul ku Titus ni nge puguran ko pi Kristiano nu Crete ni “dabra t’ared e thin nga daken be’, machane ngar pired nib fel’ thilrad e girdi’ ma ba fel’ owcherad nge thin rorad ngak e girdi’, ma gubin ngiyal’ ni ngar sumunguygad ngak urngin e girdi’.” (Titus 3:2) Mu tiyan’um ngay ni susun ndabi t’ar e pi Kristiano e thin nga daken be’​—ni mus ngak piyu Krete ni gathi yad e Kristiano, ni boch i yad e ba gilbuguwrad ni bochan ni yad ma sabanban, ma yad e madbul, ma yad ba malmal. (Titus 1:12) Ere ba togopluw ko Bible ni ngad t’ared e thin nga daken e piin ni de taareb e michan’ rorad ngodad. Lem nib tolang e dabi ayuweg e girdi’ ngar adaged e liyor ku Jehovah. Ya nap’an ni gad ra lemnag e yug girdi’ ma gad ngongol ngorad nib puluw ko Thin Rok Jehovah, ma ra “girngiy e fel’ ko machib” ni murung’agen Got.​—Titus 2:10.

Ngiyal’ ni Ngan Th’ab Galungey nge Ngiyal’ ni Ngan Non

10, 11. Uw rogon ni dag Jesus ni ke nang e (a) “ngiyal’ ni ngan th’ab galungey”? (b) nge “ngiyal’ ni ngan non”?

¹⁰ Be weliy ko Eklesiastes 3:7 ni gaar: “Bay e ngiyal’ ni ngam th’ab galungam ma bay e ngiyal’ ni ngam non.” Ere thingarni turguy e ngiyal’ nib puluw ni dabni pi’ e fulweg ko piin ni ma togopluw ngodad nge ngiyal’ nib puluw ni ngad micheged e n’en ni ke michan’dad ngay. Boor ban’en nrayog ni ngad filed ko fa en nib flont e kanawo’ ni dag u rogon ni ngan ngongol nib puluw​—aram Jesus. (1 Peter 2:21) I nang e “ngiyal’ ni ngan th’ab galungey.” Ba’ra rogon, nap’an ni yog e pi prist nib tolang nge piin piilal boch e thin ngoogsur u murung’agen ngak Pilate, ma “de yog ban’en.” (Matthew 27:11-14) Ya dabun ni nge yog ban’en nra n’igin ndabi lebug e n’en nib m’agan’ Got ngay ni fan ngak. Ere ke turguy ni nge pag e tin ni ngongliy u fithik’ e yoor me ir e nge mang mich rok. I nang ni mus ni ke yog e thin riyul’ ma dabi thil e lem rorad nib tolang nge gum’ercharad. Ere de yog ban’en ni nge pi’ e fulweg ngorad, me par ni de non.​—Isaiah 53:7.

¹¹ Machane ki nang Jesus ni bay e “ngiyal’ ni ngan non.” Yu ngiyal’ ma i pi’ e fulweg ko piin be togopluw ngak, me tamilangnag e thin ngoogsur ni ur rogned. Susun, nap’an ni ke t’ar e pi tamachib ko motochiyel nge pi Farise e thin nga daken Jesus u fithik’ e yoor mi yad yog ni Beelzebub e pi’ gelngin ni nge tuluf e moonyan’, ma aram me turguy Jesus ni nge tamilangnag ni yad be ban. Ke weliy e thin nib puluw me yog reb e fanathin ni be tamilangnag nib googsur e thin rorad. (Mark 3:20-30; ku mu guy Matthew 15:1-11; 22:17-21; John 18:37) Ku arrogon e ngiyal’ ni kan kol Jesus ma kan fek nga Sanhedrin, me yog Kaiaphas ni Prist nib Tolang ni gaar: “Chiney nggog ngom u daken fithingan fare Got ni be par nib fos ni nggu tiyem nga p’eowchen nga mog e tin riyul: mog ngomad ko gur fare Messiah ni Fak Got gur fa danga’.” Aram e “ngiyal’ ni ngan non,” ya faanra dabi yog ban’en ma rayog ni ngan nog ni be yog ni gathi ir fre Kristus. Ere ke fulweg Jesus ni gaar: “Bod rogon ni kam mog.”​—Matthew 26:63, 64; Mark 14:61, 62.

12. Mang e ke buch ma aram me non Paul nge Barnabas ndar rusgad u Ikonium?

¹² Ku mu lemnag apostal Paul nge Barnabas. Acts 14:1, 2 e be gaar: “Yan Paul nge Barnabas nga tafen e muulung rok piyu Israel ngar welthingow, ma boor piyu Israel nge piin ni gathi yad piyu Israel nra piggad nge mich Jesus u wun’rad. Machane piin nu Israel ndubrad ni nge mich Jesus u wun’rad e ra nonod ngak e piin ni gathi yad piyu Israel ngar pired ni kar damumuwgad ngak e piin ni walagey ni girdien Kristus.” Fre ke Bible ni The New English Bible e be gaar: “Piyu Jew ni dar piggad nge mich Jesus u wun’rad e kar k’aringed e piin ni Gentile ngar togopluwgad ko pi Kristiano ni gowa kar ted e yub u lanin’rad.” Piyu Jew e gathi ke mus ni ur togopluwgad ko fre thin nib fel’ ya kar dugdugthingad, mar guyed rogon nra dabuy e piin ni Gentile daken e pi Kristiano.a Rib gel rogon ni ur fanenikayed e Kristiano! (Mu taarebnag ko Acts 10:28.) Ere ke turguy Paul nge Barnabas ni aram e “ngiyal’ ni ngan non,” ya ra danga’ ma piin ni ka fin ra manged pi gachalpen Jesus e ra m’ingan’rad ko togopluw ni be tay e girdi’ ngorad. “Me par fa gal apostel [Paul nge Barnabas] u rom nib n’uw nap’an. Mu ur weliyew murung’agen Somol nda ur rusgow, me [Jehovah] e micheg e thin ni yow be weliy,” ya ke pi’ gelngirow ngar ngongliyew e maangang. Ma wenegan ni yib riy e fapi girdi’ u lan e re binaw nem e “boch i yad e ra folgad ngak piyu Israel, ma boch i yad e ra folgad ngak fa gal apostel.”​—Acts 14:3, 4.

13. Nap’an ni yibe gathibthibnagdad ma mangiyal’ ni “ngan th’ab galungey”?

¹³ Ere mang e susun ni ngad rin’ed u nap’an ni kan togopluw ngodad? Aram e ngan tor nga boch ban’en. Ya yu ngiyal’ ma ba t’uf ni ngan fol ko fre thin ko Bible ni be yog ni bay e “ngiyal’ ni ngan th’ab galungey.” Ma ri aram rogon nfaanra ba adag e piin ta togopluw ni ngar tugthingad ngodad. Dabda paged talin ni boch e girdi’ e dubrad ni ngar nanged e thin riyul’. (2 Thessalonika 2:9-12) Dariy fan ni ngan athamgil ni nge yib fan ko girdi’ nib el el gum’ercharad ma dabi mich u wan’rad. Ma faanra gad ra par ni gad be pi’ e fulweg ko urngin e piin ni ba adag e tugthin, ma rayog ni ngad maloggad u ban’en ni kab baga’ fan ngay​—aram e ngan ayweg e piin nib yul’yul’ ni ri yad ba adag ni ngar nanged e thin riyul’ ko Bible. Ere nap’an nra togopluw e girdi’ ngodad ma yad be gathibthibnagdad, ma ngad folgad ko pi thin ney ko Bible ni be gaar: “Mu tiyed gimed u urel rorad.”​—Roma 16:17, 18; Matthew 7:6.

14. Uw rogon nrayog ni ngad micheged e michan’ rodad ngak e girdi’?

¹⁴ Machane gathi aram e de t’uf ni ngad micheged e michan’ rodad ngak e girdi’. Ya ku bay e “ngiyal’ ni ngan non.” Ya bay boch e girdi’ nib yul’yul’ ni kan nog e thin ngoogsur u murung’agdad ngorad. Ere gad ba adag ni ngad tamilangnaged e michan’ rodad ngak e girdi’. I yoloy Peter ni gaar: “Ngam liyorgad ngak Kristus u lanin’med, mi gimed tay ni ir e Somol romed. Mu fal’eged rogomed ni gubin ngiyal’ ni ngam pied e fulweg ko n’en nra fith be’ ngomed ni ngam weliyed u murung’agen e re n’en ni ir e ke l’agan’med ngay. Machane ngam rin’ed u fithik’ e sumunguy nge ta’ fan.” (1 Peter 3:15) Nap’an ni ba adag e piin nib yul’yul’ ni ngad micheged ngorad e michan’ rodad fa yad ma fith u murung’agen e thin ngoogsur ni yog e pi tatogopluw rodad, mab mil fan ngodad ni ngad micheged e michan’ rodad, ma gad pi’ e fulweg ni bay ko Bible. Maku ngongol rodad e rayog ni nge mang mich rodad. Ya piin nib fel’ e tafinay rorad e ra guy ni riyul’ ni gad ma athamgil ni ngad pared nib puluw ko motochiyel rok Got nib mat’aw, ma aram mi yad guy ni googsur e n’en ni kan nog u murung’agdad.​—1 Peter 2:12-15.

Uw Rogon e Sabanban ni kan Wereg?

15. Mang reb e ban’en ni be dag ko uw rogon ni kan gathibthibnag e Pi Mich Rok Jehovah u lan e shimbung ara tv ara radio?

¹⁵ Yu ngiyal’ ma kan weliy boch e thin ngoogsur u murung’agen e Pi Mich Rok Jehovah u lan e shimbung ara tv, fa radio. Susun, nap’an e August 1, 1997, ma reb e shimbung nu Russia e ke weliy boch e thin ni be t’ar e thin nga daken e Pi Mich me yog ni reb e motochiyel rorad e ‘ngan n’ag e pi leengiy nge figirngiy, nge gallabthir ni faanra dar nanged fan ma dar adaged ni ngar uned ko michan’ rorad.’ Ma piin ni ma nang e Pi Mich Rok Jehovah e goo yad manang ni de riyul’ e re thin nem. Ya be yog e Bible ni piin Kristiano e thingara t’ufeged girdien e tabinaw rorad ni de taareb e michan’ rorad ngorad min tay farad, ma ma athamgil e Pi Mich ni ngar folgad riy. (1 Korinth 7:12-16; 1 Peter 3:1-4) Machane kan wereg e re thin nem u lan fare shimbung, ma boor e girdi’ e ke bieg. Ere uw rogon nrayog ni ngad micheged e michan’ rodad u nap’an ni kan nog e thin ngoogsur u murung’agdad?

16, 17, nge kahol ko page 28. (a) Mang e kan weliy u lan fre The Watchtower u murung’agen rogon ni ngan fulweg e thin ngoogsur ni kan nog u lan e shimbung ara yugu ban’en? (b) Ra uw rogon ma aram e ra pi’ e Pi Mich Rok Jehovah e fulweg ko thin ngoogsur ni kan nog u murung’agrad ko shimbung ara boch ban’en?

¹⁶ Ere bay e “ngiyal’ ni ngan th’ab galungey nge ngiyal’ ni ngan non.” Kan weliy u lan The Watchtower ni gaar: “Thingarni gonopiy ko bpuluw ni dabkun fulweg e thin ngoogsur fa ngan tamilangnag e thin riyul’ u rogon nib m’ag u lan e simbung ma re n’em e ma tor ko mini’ tapgin e thin ngoogsur, nge mang fan ni ke yog e pi thin nem.” Yu ngiyal’ mab fel’ ni dabkun lemnag e pi report ni aram rogon, ma aram e dabki lingagil e thin ngoogsur.

¹⁷ Machane yu ngiyal’ ma aram e “ngiyal’ ni ngan non.” Ya sana be’ nib yul’yul’ ni ma yoloy e thin ko shimbung e kan nog e thin ngoogsur ngak u murung’agen e Pi Mich Rok Jehovah, ma sana ra adag ni ngada weliyed e thin riyul’ u murung’agdad ngak. (Mu guy fare kahol ni “Kan Yal’uweg e Thin Ngoogsur.”) Faanra ke laniyan’ e girdi’ ngodad ni bochan e thin nde fel’ ni kan nog ni murung’agdad u lan e shimbung ma kan magawonnag e maruwel rodad ko machib, ma aram e boch e girdi’ ni yad owchen fre branch ofis ko Watch Tower Society e rayog ni ngar tamilangnaged e thin riyul’ u rogon nib m’ag.b Susun, nrayog ni ngan dugliy boch e piin piilal ko ulung ni ngar weliyed e thin riyul’ ko tv, nfaanra ra dabra rin’ed e re n’em ma ra m’ug riy ni dabiyog ni ngad pied e fulweg. Boch e Pi Mich e yad ma maruwel u taabang ko fre Watch Tower Society nge piin owchen mar folgad ko n’en ni kar turguyed.​—Hebrews 13:17.

Ngan Micheg e Thin nib Fel’ u lan e Court

18. (a) Mang fan nde t’uf ni ngad ninged ko pi am ni ngar paged ni ngad machibgad? (b) Mang kanawo’ ni gad ma lek u nap’an ni kan nog ni dabda machibgad?

¹⁸ Got e pi’ mat’awun e ulung rodad ni ngad machibnaged fare thin nib fel’ ko Gil’ilungun Got. Ke tay Jesus chilen ni ngad rin’ed e re maruwel ney ma kan pag fan urngin ban’en ng[ak] u tharmiy ngu but’.’ (Matthew 28:18-20; Filippi 2:9-11) Ere de t’uf rodad ni ngad ninged ko pi am ni ngar paged ni ngad machibgad. Machane gad manang ni faanra ba puf rogon e teliw u lan e binaw ma ra mom ni ngan wereg e thin ko Gil’ilungun Got. U boch e binaw ma bay mat’awdad ko liyor ni gad ma tay, ma aram e gad ra fanay e court ni ngad ayweged nge par ni aram rogon. Nap’an ni dan pi’ mat’awdad ko liyor rodad, ma gad ra fanay e motochiyel ko binaw ni nge yog e re n’em ngodad. Gathi gad be guy rogon ni ngad thiliyeged e par ko girdi’ ya gad be nameg ni “ngan ayweg fre thin nib fel’ min micheg ko uw rogon nib puluw ko court nge motochiyel.”c​—Filippi 1:7, New World Translation.

19. (a) Mang wenegan nrayog ni nge yib ngodad ni bochan e gad ma ‘pi’ ngak Got e tirok ban’en’? (b) Mang e ke mudugilan’dad ngay ni ngad rin’ed?

¹⁹ Manang e Pi Mich Rok Jehovah ni Ir e Ani Ga’ u palpal th’ib. Motochiyel rok e th’abi tolang. Gad ma athamgil ni ngad folgad ko pi am nu fayleng, ma gad ‘pi’ ngak e pilung nu Roma e tirok ban’en.’ Machane dabda paged ban’en nge talegdad ngad lubeged ban’en ni kab baga’ fan nib mil fan ngodad​—aram e ngad ‘pied ngak Got e tirok ban’en.’ (Matthew 22:21) Gad manang ni bochan e re n’em ma ra “fanenikaydad” e pi nam, machane gad manang ni aram puluwon ni ngan pi’ ni ngan mang reb e gachalpen Jesus. Pi n’en ni rin’ e Pi Mich Rok Jehovah u lan e bin 20 e chibog ni ngar micheged e maruwel rorad ko court e aram e mich riy ni kari mudugilan’rad ni ngar ayweged e michan’ rorad. Jehovah e ra ayuwegdad ni ngad “ul’ulgad ngay nguud filed ngak e girdi’ ma ngad machibnag ngak e girdi’ fre thin nib fel’.”​—Acts 5:42, NW.

[Boch e Thin nra Tamilangnag Murung’agen]

Ka Ga Manang?

◻ Mang fan ni yibe “fanenikay” e Pi Mich Rok Jehovah”?

◻ Susun uw rogon u wan’dad e piin nde taareb e michan’ rorad ngodad?

◻ Mang kanawo’ ni dag Jesus nib thabthabel uw rogon ni ngan ngongol ngak e piin tatogpluw?

◻ Nap’an ni yibe gafgownagdad ma uw rogon nrayog ni ngad folgad ko fre thin ni bay e “ngiyal’ ni ngan th’ab galungey nge ngiyal’ ni ngan non”?

[Kahol ko page 28]

Kan Yal’uweg e Thin Ngoogsur

“U Yacuiba, Bolivia, ma bay reb e teliw ni kar pied ko TV station e kachido ni ngan pag ni ke fl’eg e piin ni apostate. Ke yib wenegan nib kireb ko Pi Mich Rok Jehovah ni bochan, ma ke turguy e piin piilal ni nga ranod ko l’agruw e TV station min nog ni yad ra pi’ puluwon ni ngan pag e pi video ni Jehovah’s Witnesses​—The Organization Behind the Name nge The Bible​—A Book of Fact and Prophecy. Tomren ni ke guy e pi video ko Society ma fa en ni fen reb e radio station e ke damumuw ni bochan e thin ngoogsur ni yog e pi apostate ma aram me yog ni nge pag ko radio murung’agen e convention ko Pi Mich Rok Jehovah ni dariy puluwon. Boor e girdi’ e kar uned ko re convention nem, ma piin nib yul’yul’ e ur fithed boch e deer u nap’an ni yib e Pi Mich nga tafenrad.”​—1997 Yearbook of Jehovah’s Witnesses, page 61-2.

[Sasing ko page 29]

Yu ngiyal’ ma ke tamilangnag Jesus u fithik’ e yoor e thin ngoogsur ni yog e pi tatogopluw rok