“Dab Mu Tamdag”
1. Ba miti mang magawon e rayog ni ngad mada’naged ni bod rogon Jeremiah?
1 Nap’an ni kan dugliy Jeremiah ni nge mang reb e profet, me lemnag ni dabiyog rok. Machane me yog Jehovah ngak ni ‘dabi tamdag,’ me pi’ gelngin ni nge rin’ e maruwel ni kan pag gafalngin ngak. (Jer. 1:6-10) Ngiyal’ ney e faanra ba tamra’ be’ ara be lemnag ni boor ban’en ndawori nang ma rayog ni nge magawonnag e machib ni ma tay. Sana yu ngiyal’ e gad ma rus ni ngad nonad ngak e girdi’ ni bochan e gad be rus nrin puwan’ ngodad. Ere uw rogon ni nge dab kud rusgad, ma mang tow’ath e ra yog riy ngodad?
2. Mang e gad ra rin’ ma dab kud rusgad ni ngad uned ko machib?
2 Ngam Fal’eg Rogom U M’on Riy: Faan gad ra fal’eg rogodad u m’on riy ma aram e dab da rusgad. Bod ni faan gad ra fal’eg i lemnag u m’on riy e n’en nra yog be’ ngodad ni nge talegdad ndab kud machibnaged, ma aram e rayog ni ngad nanged ko mang e nga dogned u nap’an ni ke togopuluw be’ ngodad. (Prov. 15:28) Rayog ni ngan weliy rogon ni ngan pithig boch e magawon ni yima mada’nag u skul ngu nap’an e machib ko Fol Bible ni Tabinaw, fa?—1 Pet. 3:15.
3. Faanra pagan’dad ngak Jehovah ma uw rogon nra ayuwegdad ni nge dab kud rusgad?
3 Nge Pagan’um Ngak Jehovah: N’en nra chuweg e marus rodad e aram e nge pagan’dad ngak Jehovah. Ke micheg Jehovah nra ayuwegdad. (Isa. 41:10-13) Dariy be’ nrayog ni nge pagan’dad ngak ni bod rogon Jehovah. Ma ki yog Jesus ni mus ni faan gad ra mada’nag boch e magawon nib tomgin, ma ra pi’ gelngin Got nib thothup gelngidad ni ngad machibgad nib fel’ rogon. (Mark 13:11) Aram fan nib ga’ fan ni ngad meybilgad ku Jehovah ni gubin ngiyal’ ni nge pi’ gelngin nib thothup ni nge ayuwegdad.—Luke 11:13.
4. Mang boch e tow’ath nra yog ngodad ni faan gad ra athamgil ko machib ni yugu aram rogon ni boor e magawon ni gad ma mada’nag?
4 Tow’ath: Faan gad ra athamgil ko machib u fithik’ e magawon, ma ra mom ngodad ni ngad k’adedan’dad u fithik’ e skeng nra yib ngodad boch nga m’on. Rayog ni nge dab kud rusgad, ya aram rogon e piin ni be gagiyegnagrad gelngin Got nib thothup. (Acts 4:31) Maku reb e, gad ra athamgil ni nge dab kud rusgad u daken e ayuw rok Jehovah, ma aram e ra gel e michan’ nge pagan’ rodad ngak Jehovah. (Isa. 33:2) Ku gad ra falfalan’ ni gad ra nang ni gad be felfelan’nag e Chitamangidad nu tharmiy. (1 Pet. 4:13, 14) Ere dab da rusgad ni ngad wereged fare thin nib fel’ u murung’agen Gil’ilungun Got, ma dab da paged talin ni gubin ngiyal’ ma bay Jehovah ni be ayuwegdad!