Ga Be Fil Urngin Ban’en Nrayog ni Ngam Fil rok Jehovah, Fa?

1. Uw rogon e skul u wan’ Jehovah?

¹ Jehovah ni ir e “Sensey” rodad ni Th’abi Tolang e baadag ni nge skulnagdad. (Isaiah 30:20, NW) I tababnag e re maruwel ney u tomuren ni sunumiy e bin nganni’ i fak. (John 8:28) Tomuren ni togopuluw Adam ma de tal Jehovah i skulnag e girdi’ ndar flontgad.​—Isa. 48:17, 18; 2 Tim. 3:14, 15.

2. Mang skul e yibe tay e chiney?

² Ngiyal’ ney e be yarmiy Jehovah reb e skul nib ga’ ndawor ni tay bayay. Boor e girdi’ u ga’ngin yang e fayleng ni yad be yan ko fare “burey ni bay e tempel” rok Jehovah riy ni bod rogon ni yiiynag Isaiah. (Isa. 2:2) Mang fan ni nga darod e ngaram? Ya bochan e nge skulnagdad Jehovah. (Isa. 2:3) Nap’an e duw ni 2010, mab pag 1.6 bilyon e awa ni ke fanay e Pi Mich Rok Jehovah ni ngar machibnaged e girdi’ ma yad be fil e Bible ngorad. Maku gubin e wik ni yibe skulnag boch e walag u boor ko 105,000 e ulung u fayleng, maku be ngongliy fare tapigpig nib yul’yul’ mab gonop boch e babyor ni fan ko pi skul ney ni kan pilyeg nga boor ko 500 mit e thin.

3. Uw rogon ni ke yib angin e skul ni be tay Jehovah ngodad?

³ Nge Yib Angin Ngom: Rib ga’ angin e skul ni ke tay Got ngodad, ya kad filed ni Got e bay fithingan ma ma lemnagdad. (Ps. 83:18; 1 Pet. 5:6, 7) Maki ayuwegdad kad nanged e fulweg u boch e deer nib ga’ fan ni bod fare deer ni: Mang fan ni ma gafgow e girdi’ maku yad ma yim’? Uw rogon ni nggu pirieg e bin riyul’ e felfelan’? Mang fan e yafas? Ku bay e motochiyel ni ke pi’ Jehovah nra ayuwegdad ni ngad ‘mon’oggad.’​—Josh. 1:8.

4. (a) Mang boch e skul nrayog ni nge un e pi tapigpig rok Got ngay? (b) Mang fan ni ngad filed urngin ban’en nrayog ni ngad filed rok Jehovah?

⁴ Bay boch e skul ni ke fal’eg Jehovah rogon ke tay ni nge ayuweg boch e pi tapigpig rok ni ngar yoornaged e tayim ni yad be tay ni fan ko pigpig ngak. Page 4 nge mada’ ko 6 e be weliy murung’agen e pi skul ney. Gad be guy rogon ni nge yib angin ngodad yugu boch e kanawo’ ni ma skulnagdad Jehovah riy ni mus ni faanra dabiyog ni ngad uned ko pi skul ney, fa? Gad be pi’ e athamgil nga laniyan’ e pi fel’ yangaren nib ga’ ni ma guy e sensey u skul nge ku boch e girdi’ rogon ni ngar nameged e skul nib tolang ni ngar nameged boch ban’en ni fan ko tirok Got mar uned ko bin th’ab tolang e skul ni aram e skul rok Jehovah, fa? Faan gad ra fil urngin ban’en nrayog ni ngad filed rok Jehovah e chiney ma aram e rayog ni ngad felfelan’gad e chiney i yan e ngaram.​—Ps. 119:105; John 17:3.

Boch e Skul ni Yima Tay ko Ulung rok Jehovah

Skul ni Fan ko Piin Ndar Nanged e Yol nge Beeg Babyor

• Fan: Ngan fil e yol ngak e girdi’ nge rogon ngan beeg e babyor ya nge yog nra nanged rogon ni ngar beeged mar filed e Bible rorad ya nge yog nra filed e tin riyul’ ngak e girdi’.

• N’umngin Nap’an: Be yan u rogon e tin nib t’uf ko piin yad be un ngay.

• Gin ni Ngan Tay Riy: Kingdom Hall.

• Piin Rayog ni Ngar Uned Ngay: Gubin e publisher nge girdi’ ni baadag.

• Rogon ni Ngan Un Ngay: Piin piilal e yad ma yarmiy e re skul ney ni be yan u rogon e tin nib t’uf ko ulung ma yad ma pi’ e athamgil nga laniyan’ e piin nra yib angin ngorad ni ngar uned ngay.

Theocratic Ministry Skul

• Fan: Ngan skulnag e pi publisher u rogon ni ngar manged tamachib nge sensey nib salap i machibnag fare thin nib fel’.

• N’umngin Nap’an: Dabi mus.

• Gin ni Ngan Tay Riy: Kingdom Hall.

• Piin Rayog ni Ngar Uned Ngay: Gubin e publisher ni kub muun ngay e piin ni yad ma un ko muulung ni gubin ngiyal’ ni ke mich u wan’rad e n’en ni be fil e Bible ma yad be fol riy.

• Rogon ni Ngan Un Ngay: Mu non ngak e en ni ma yarmiy e Theocratic Ministry School.

Skul ni Ngan Fil e Thin nu Bang

• Fan: Ngan fil ko publisher rogon ni ngar machibnaged fare thin nib fel’ ko thin u yugu reb e nam.

• N’umngin Nap’an: Aningeg ara lal e pul. Skul e ba ga’ ni yima tay ko taareb i yan ko l’agruw e awa ko Sabado ni kakadbul.

• Gin ni Ngan Tay Riy: Ba ga’ ni yima tay u reb e Kingdom Hall nib chuchugur.

• Piin Rayog ni Ngar Uned Ngay: Publisher ni kar mon’oggad ko tirok Got ban’en ni yad baadag ni ngar machibgad u yugu reb e thin.

• Rogon ni Ngan Un Ngay: Branch ofis e yad ma yarmiy e skul ni ngan tay ni be yan u rogon e tin nib t’uf ni ngan fil.

Dimow Kingdom Hall

• Fan: Ngan toy e Kingdom Hall nge ngan fal’eg e yungi n’en ni ke kireb u reb e Kingdom Hall. Re n’ey e gathi ba skul, machane girdi’ ni ma un ngay e yima fil boch e maruwel ngorad ya nge yog nra uned ko dimow naun ni yibe tay.

• N’umngin Nap’an: Be yan u rogon n’umngin nap’an nrayog ni nge un be’ ko maruwel.

• Gin ni Ngan Tay Riy: Gin’en ni be maruwel e Regional Building Committee riy. Boch e walag ni kar ognaged yad ko re maruwel ney e rayog ni nga nog ngorad ni ngar pied e ayuw u reb e binaw ni ke yib e gafgow ngay ni bochan e yoko’, ara durru’, ara boch ban’en.

• Piin Rayog ni Ngar Uned Ngay: Piin ni kar uned ko taufe ma ke m’agan’ e piin piilal ngay nrayog ni ngar uned ko re maruwel ney ndemtrug ko bay ban’en ni yad ba salap riy fa dariy.

• Rogon ni Ngan Un Ngay: Ngan fal’eg bang e babyor ni ka nog e Kingdom Hall Volunteer Worker Questionaire (S-82) ngay ni ma pi’ e piin piilal ko ulung.

Skul ni Fan ko Piin Pioneer

• Fan: Ngan ayuweg e piin pioneer ni ngar ‘ngongliyed urngin e maruwel ni kan pi’ ngorad nrogon e tapigpig rok Got.’​—2 Tim. 4:5.

• N’umngin Nap’an: L’agruw e wik.

• Gin ni Ngan Tay Riy: Branch ofis e ma dugliy; machane ba ga’ ni yima tay u reb e Kingdom Hall nib chugur.

• Piin Rayog ni Ngar Uned Ngay: Piin ni ke gaman reb e duw ni kar uned ko pioneer.

• Rogon ni Ngan Un Ngay: Yima mel’eg e pi pioneer ni ngar uned ngay me yog e circuit overseer ngorad.

Skul ni Fan ko Piin ni Ka Ranod nga Bethel

• Fan: Re skul ney e kan fal’eg rogon ni nge ayuweg e piin ni kafin ranod nga Bethel ya nge yog nra nanged rogon ni ngar rin’ed e maruwel rorad nib fel’ rogon.

• N’umngin Nap’an: Ragag nge nel’ e wik nra reb e wik ma taareb e awa.

• Gin ni Ngan Tay Riy: Bethel.

• Piin Rayog ni Ngar Uned Ngay: Piin ni kan dugliyrad ni ngar uned ko maruwel u Bethel ara piin ni kan fekrad e ngaram ni ngar maruwelgad ni bay n’umngin nap’an (taareb e duw ara ba n’uw boch nap’an).

• Rogon ni Ngan Un Ngay: Piin ni ka ranod nga Bethel e thingar ra uned ko re skul ney.

Kingdom Ministry Skul

• Fan: Ngan skulnag e piin piilal nge ministerial servant u rogon ni ngar ayuweged e ulung mar rin’ed e tin nib milfan ngorad. (Acts 20:28) Re skul ney e gathi gubin e duw ni yima tay ya fini ngiyal’ ni ke dugliy fare Ulung ni Ma Pow’iyey ara Governing Body.

• N’umngin Nap’an: Fapi duw ni ka fini yan e reb nge baley e rran ni yima tay ni fan ko piin piilal ma taareb e rran ni fan ko ministerial servant.

• Gin ni Ngan Tay Riy: Ba ga’ ni yima tay u reb e Kingdom Hall ara reb e Assembly Hall.

• Piin Rayog ni Ngar Uned Ngay: Piin piilal ara ministerial servant.

• Rogon ni Ngan Un Ngay: Circuit overseer e ma yog ko piin piilal ara ministerial servant ni ngar uned ngay.

Skul ni Fan ko Piin Piilala

• Fan: Ngan ayuweg e piin piilal u rogon ni ngar rin’ed e maruwel rorad u lan e ulung.

• N’umngin Nap’an: Lal e rran.

• Gin ni Ngan Tay Riy: Branch ofis e ra dugliy; machane ba ga’ ni yima tay u reb e Kingdom Hall nib chuchugur ara Assembly Hall.

• Piin Rayog ni Ngar Uned Ngay: Piin piilal.

• Rogon ni Ngan Un Ngay: Branch ofis e ma yog ko piin piilal ni ngar uned ko re skul ney.

Skul ni Fan ko Piin ni Yad Ma Lekag e Ulung nge Ppin Roradb

• Fan: Ngan ayuweg e circuit nge district overseer ni ngar mon’oggad u rogon ni yad ma ayuweg e pi ulung ni yad ma lekag mar gelnaged e ‘machib ni yad be tay nge thin rok Got ni yad be fil ngak e girdi’’ mar ayuweged e piin ni kan pag gafalngin ngorad.​—1 Tim. 5:17; 1 Pet. 5:2, 3.

• N’umngin Nap’an: L’agruw e duw.

• Gin ni Ngan Tay Riy: Branch ofis e ra dugliy.

• Piin Rayog ni Ngar Uned Ngay: Circuit ara district overseer.

• Rogon ni Ngan Un Ngay: Branch ofis e ma yog ko piin ni ma lekag e ulung nge ppin rorad ni ngar uned ko re skul ney.

Skul ni Fan ko Pi Walag ni Pumoon ni Yad Ba Muchugbilc

• Fan: Ngan ayuweg e piin piilal nge ministerial servant ni ka yad ba muchugbil ni ngki milfan yugu boch e maruwel ngorad. Yooren e piin ni kar uned ko re skul ney e yad ma sul ko nam rorad ngar pigpiggad u rom. Ma in i yad e yima pi’rad nga yugu reb e nam ni ngar pigpiggad ni faanra ka rogned ko branch ofis ni rayog rorad.

• N’umngin Nap’an: L’agruw e pul.

• Gin ni Ngan Tay Riy: Branch ofis e ra dugliy; machane ba ga’ ni yima tay u reb e Kingdom Hall ara Assembly Hall.

• Piin Rayog ni Ngar Uned Ngay: Walag ni pumoon ni yad ba muchugbil ni bay e duw rorad u thilin e 23 nge 62 mab fel’ fithik’ i dowrad ma yad baadag ni ngar pied e ayuw ko gin nib t’uf e ayuw riy. (Mark 10: 29, 30) Thingari gaman l’agruw e duw ni yad be pigpig ni yad e piilal ara ministerial servant ma dariy ba ngiyal’ u lan e re l’agruw i duw nem ni kar talgad.

• Rogon ni Ngan Un Ngay: Faanra yima tay e re skul ney ko gin ni ga ma par riy, ma yima tay e muulung ko piin ni yad baadag ni ngar uned ngay u nap’an e circuit assembly. Ku bay boch ban’en u murung’agen e re skul ney ni yima weliy u nap’an e re muulung nem.

Skul ni Fan ko Piin Mabgol ni Kristianod

• Fan: Ngan skulnag e piin mabgol ya nge yog ni fanayrad Jehovah nge ulung rok nib fel’ rogon. Yooren e piin ni yad ra mu’nag e re skul ney e yima pi’rad nga boch e binaw ko nam rorad nib t’uf e ayuw riy ko machib. In i yad e yima pi’rad nga yugu boch e nam ni faanra ka rogned nrayog rorad.

• N’umngin Nap’an: L’agruw e pul.

• Gin ni Ngan Tay Riy: Tin som’on ko pi class ney e yibe tay ko fare Watchtower Educational Center ni bay u Patterson New York, U.S.A. Machane, nap’an nra m’ay e pi skul ney ma aram e branch ofis e bay i dugliy e gin ni ngan tay riy, machane ba ga’ ni bay un tay ko Assembly Hall ara Kingdom Hall.

• Piin Rayog ni Ngar Uned Ngay: Piin mabgol ni bay e duw rorad u thilin e 25 nge 50, mab fel’ fithik’ i dowrad, ma rayog ni ngar pied e ayuw ko gin nib t’uf e ayuw riy, maku bay fare lem rorad ni: “Bay gu wan! Mu l’ugeg.” (Isa. 6:8) Maku reb e thingari gaman l’agruw e duw ni kar mabgolgad ma ngki gaman l’agruw e duw ni yad be machib u polo’ e tayim ndar talgad.

• Rogon ni Ngan Un Ngay: Faanra yima tay e re skul ney ko gin ni ga ma par riy, ma yima tay e muulung ko piin ni yad baadag ni ngar uned ngay u nap’an e special assembly. Ku bay boch ban’en u murung’agen e re skul ney ni yima weliy u nap’an e re muulung nem.

Watchtower Bible School of Gilead

• Fan: Ngan skulnag e piin pioneer nge boch e walag ni yad ma pigpig u polo’ e tayim ni fan ko maruwel ko missionary.

• N’umngin Nap’an: Lal e pul.

• Gin ni Ngan Tay Riy: Watchtower Educational Center, Patterson, New York, U.S.A.

• Piin Rayog ni Ngar Uned Ngay: Piin mabgol ni ke gaman dalip e duw ni kar uned ko taufe ma immoy e duw rorad u thilin e 21 nge 38 u nap’an ni kar ngongliyed e babyor rorad ni ngar uned ko re skul ney. Susun ni yad manang e thin nu Meriken, ma ke gaman l’agruw e duw ni kar mabgolgad ma ngki gaman 2 e duw ni yad be machib u polo’ e tayim ndar talgad. Maku thingari fel’ fithik’ i dowrad. Piin pioneer ni yad be pigpig u yugu reb e nam (nib muun ngay e missionary); nge piin ni yad ma lekag e ulung; nge piin ni yad ma maruwel u Bethel; nge piin ni kar mu’naged e Ministerial Training Skul, nge Skul ni Fan ko Pi Walag ni Pumoon ni Yad Ba Muchugbil nge Skul ni Fan ko Piin Mabgol ni Kristiano e rayog ni ngar uned ko re skul ney ni faanra kan mel’egrad.

• Rogon ni Ngan Un Ngay: Bay boch e branch ni kan mel’eg ni yima tay e muulung riy ni fan ko piin ni yad baadag ni ngar uned ko re skul ney u nap’an e district convention. Faanra dab ni tay e re muulung ney u nap’an e district convention ko nam rom ma ga baadag ni ngam un ko re skul ney ma ga yol ko branch ofis.

Skul ni Fan ko Branch Committee nge Ppin Rorad

• Fan: Ngan ayuweg girdien e Branch Committee ni ngar mon’oggad u rogon ni yad be ayuweg e Bethel, nge pi ulung nib milfan ngorad, nge rogon ni yibe piliyeg e babyor, nge rogon ni yibe ngongliy e babyor, nge rogon ni yibe pi’ nga bang, nge ku boch e maruwel.​—Luke 12:48b.

• N’umngin Nap’an: L’agruw e pul.

• Gin ni Ngan Tay Riy: Watchtower Educational Center, Patterson, New York, U.S.A.

• Piin Rayog ni Ngar Uned Ngay: Girdien e Branch Committee ara Country Committee.

• Rogon ni Ngan Un Ngay: Fare Ulung ni Ma Pow’iyey ara Governing Body e yad ma fek e pi walag nge ppin rorad ni ngar uned ko re skul ney.

[Boch e Thin nra Tamilangnag Murung’agen]