Mu Guy Rogon ni Nge Dabi M’ay Fan e Athamgil ni Ga Be Tay
1. Mang rogon fare thin ni bay ko 1 Korinth 9:26 ko machib ni gad ma tay?
1 I yoloy apostal Paul ni gaar: “Gu be mil i yan nib k’iy kanawoeg ko gin ni nga ni mus riy; aram fan ni gu bod be’ ni girdien e tug nder adbey e tug rok.” (1 Kor. 9:26) Be weliy Paul murung’agen rogon e pi n’en ni be nameg ni fan ko pigpig ni be tay ngak Jehovah. Machane, pi thin ney e bay rogon ko machib ni gad ma tay. Ngad guyed rogon ni nge dab da adbeyed e “tug” rodad ara athamgil ni gad be tay ya nge yog ni yib angin. Ni uw rogon?
2. Uw rogon ni ngad folwokgad rok Paul nge ku boch e tamachib ko bin som’on e chibog u rogon ni ngad mel’eged e ngiyal’ nge gin’en ni ngad machibgad riy?
2 Mman ko Gin ni Bay e Girdi’ Riy: I machib Paul nge ku boch e tamachib ko bin som’on e chibog ko yungi n’en ni yad manang ni bay e girdi’ riy. (Acts 5:42; 16:13; 17:17) Ere, faanra boor e girdi’ ko gin ni gad ma machib riy nra blayal’ ma yad bay u tabinaw, ma sana ireray e ngiyal’ nib fel’ ni nga darod ko machib u mit e tabinaw. Boor e girdi’ ko gin ni yima sonnag e bus riy ni kakadbul nge blayal’, fa? Mingiyal’ e boor e girdi’ ko pi kantin ni bay ko yungi n’en ni yima machib riy? Dabisiy ni aray e ngiyal’ nib fel’ ni ngan machib ko yungi n’ey.
3. Uw rogon ni ngad gonopiyed rogon ni gad ma machib ko pi binaw ni gad ma yan ngay?
3 Ngad Gonopiyed Rogon ni Gad Ma Machib ko Binaw ni Gad Ma Yan Ngay: Susun ni ngad gonopiyed rogon ni gad ma machib ko pi binaw ni gad ma yan ngay. Bod nrayog ni ngan kieg e girdi’ u but’ ni nge boch i yad me yan nga bang ko bin ni nge gubin e girdi’ ma ranod nga taabang i ban’en. Ku aram rogon ni faanra kan yan nga reb e binaw nib palog, ya rayog ni nge mom ni ngan mu’nag, maku rayog ni nge be’ me mada’nag boor e girdi’. Gur, rayog ni ngad mel’eged reb e binaw ni ngad machibgad riy nib chugur ko gin ni gad ma par riy ya nge yog ni lich e tayim ni ngaud milekaggad ko binaw ni ngad machibgad riy?
4. Uw rogon ni ngad salapgad i “yognag e girdi’ ”?
4 I yog Jesus ngak pi gachalpen ni ngar ‘yognaged e girdi’.’ (Mark 1:17) Pi tamachib e rayog ni ngan taareb rogonnagrad ngak be’ ni ma fita’. Be’ ni ma fita’ e gathi kemus ni ma yan nga maday ni nge pag e nug ya ku be nameg ni nge kol e nig. Ere, pi tafita’ ni yad ba salap ko fita’ e yad ma yan ko gin’en ni bay e nig riy nge ngiyal’ ni bay e nig. Ma nap’an ni yad ra taw e ngaram mar gurgad ngar fita’gad. Ere, manga yugu da athamgilgad u nap’an e machib ni bod rogon e pi ta fita’.—Heb. 6:11.