Gur, Thingar Gu Un ko Tayam’?

1. (a) Mang e n’en nib mo’maw’ ni ngad dugliyed, ma susun mang e thingari ga’ fan u wan’dad? (b) Mang boch e deer e susun ni ngad fithed gadad riy?

¹ Sana ba mo’maw’ ni ngan dugliy ko ga ra un ko tayam’ rok be’ ni gathi tapigpig rok Got, fa. Bochan ni gad baadag ni ngad dugliyed ban’en nra felfelan’nag Jehovah, ere bfel’ ni ngad fithed gadad ni nge lungudad: ‘Mang e baadag Jehovah ni nggu rin’? Susun mang kenggin e motochiyel u Bible e ra pow’iyeg u nap’an ni nggu dugliy ban’en? Uw rogon ni nge par e nangan’ rog nib fel’, ma dab gu kirebnag e michan’ rog nge michan’ rok yugu boch e girdi’?’

2. (a) Susun nge uw rogon u wan’dad e tayam’ ni bay rogon ko machib nde puluw ko thin nu Bible? (b) Mang e riya’ riy nfaanra gad bay u fithik’ e girdi’ ni yad be un ko re yalen ney?

² Mu Lemnag e Pi Kenggin e Motochiyel u Bible: Reb e kenggin e motochiyel nu Bible nib puluw ko re n’ey e bay ko 2 Korinth 6:14-18. Verse 17 ni be gaar: “‘Thingar mu chuwgad rorad, ngam pithiged gimed rorad. Ma dariy ban’en ni ngkum rin’ed ko n’en nde klin.’” Ere, thingar dab da uned ko pi n’en ni yima rin’ u nap’an e tayam’ ni bay rogon ko machib ni googsur ni be yog ni nap’an nra yim’ be’ ma ka bay ban’en u fithik’ i dow ndawori yim’ nrayog ni nge kirebnag ara ayuweg e piin nib fas. Yugu aram rogon ni gad be lemnag ni kemus ni ngad guyed e pi n’en ni yibe rin’ u nap’an e tayam’, mab fel’ ni ngad fithed gadad nfaanra gad bay u fithik’ ba ulung i girdi’ ni yad be un ko ngongolen e machib ni googsur, ‘Ma re n’ey e ra mo’maw’nag ngog ni nggu siyeg ni nge dab gu un ko n’en ni yibe rin’?’ Dubdad ni ngad uned nga ban’en ni bay rogon ko liyor ni googsur ni mus ko ngiyal’ ni ke kireban’ e girdi’ ya gad baadag ni ngad yul’yul’gad ngak Jehovah. Ere faan gad ra un ko gin ni yira tayam’ riy mab fel’ ni ngad dugliyed u m’on riy nri dab da uned i rin’ ban’en nra kirebnag fithingan Jehovah.

3. Mang e pi n’en nthingar da lemnaged ni bay rogon ko ngongol rodad nrayog ni nge magawonnag boch e girdi’?

³ Bin l’agruw e kenggin e motochiyel u Bible e bay ko 1 Korinth 10:32 ni be gaar: “Um ngongolgad ni gimed be guy rogon ndab mu magawonniged laniyan’ e girdi’ nu Israel, ara girdien e galesiya rok Got.” Ma uw rogon nfaanra kad uned nga reb e tayam’ ni gathi rib tamilang ko ba kireb fa danga’, machane bay boch ban’en ni yibe rin’ riy ni be m’ug ni yibe tayfan e piin ni kar m’ad? Gur, gad ra magawonnag laniyan’ e girdi’ ni yad manang e n’en ni ke mich u wan’ e Pi Mich Rok Jehovah nge n’en ni yad be fil ngak e girdi’ u murung’agen e yam’? Ra magawon laniyan’ e pi walag u lan e ulung nge girdien e binaw rodad nfaan gad ra yan ko tayam’ ni aram rogon, fa? Ara ra magawon laniyan’ girdien e binaw rodad nfaanra dab da uned ko tayam’ ni fan ngak reb e girdi’ rodad ni gathi reb e Pi Mich?​—Matt. 18:6; 1 Kor. 8:12, 13.

4. Mang fan nib ga’ fan ni nge par e nangan’ rodad u p’eowchen Jehovah nib fel’?

⁴ Bin dalip e kenggin e motochiyel u Bible e bay ko Roma 14:22, 23 ni be gaar: “Ba felfelan’ e en nde magawon laniyan’ ngak ko ngiyal’ ni rin’ e tin ni be finey ni ir e mmat’aw!” Ere ngam fal’eg i lemnag nib fel’ rogon, ko n’en ni kam dugliy e ra magawonnag e nangan’ rom, fa!

5. (a) Susun mini’ e ra dugliy ko ra un be’ ko tayam’ ni fan ngak be’ nder un ko tin riyul’? (b) Uw rogon me yag ni ngad dugliyed ban’en u fithik’ e gonop?

⁵ Ban’en nib Milfan Ngom: Tomuren ni kan fal’eg i lemnag nib fel’ rogon e pi kenggin e motochiyel u Bible ni kad weliyed, ma ra reb e Kristiano ma nge dugliy ko ra un nga reb e tayam’ fa danga’, ndemtrug ko ngan tay u galesiya, ara naun rok be’, ara gin ni ngan gum’eyag riy. (Gal. 6:5) Ra reb e Kristiano mab milfan ngak ni nge fal’eg i lemnag fare magawon ma dabi siyeg wenegan e n’en ni ke dugliy. (Rom. 14:12) Yalen ko girdi’ e rayog ni nge magawonnagdad. Machane, nangan’ rodad ni kan skulnag ko Thin rok Got e ra ayuwegdad ya nge yag ni ngad dugliyed e tin nib fel’ ni ir e ngad rin’ed.​—Ps. 119:105.