Babyor Ni Ke Yib Ko Fare Ulung ni Ma Pow’iyey

Ngak e Pi Walag:

Jehovah ni Chitamangidad nu tharmiy e rib fel’ rogon ni ma t’ufegey. Aram fan ni be yog e Bible ni gaar: “Got e t’ufeg.” (1 John 4:16) Yugu aram rogon nrib gel gelngin, ma Thin rok e der yog ni, “Got e gelngiy.” Ma gagiyegnigey u fithik’ e t’ufeg. Aram fan nri gad baadag daken!

Gadad ba felfelan’ ni Jehovah e gathi ba pilung nder ma runguyey ma der ma towasariydad ni ngad pigpiggad ngak. Baadag ni ngad pigpiggad ngak u fithik’ e t’ufeg. Gad ra rin’ e re n’ey ma gad be dag ni ke mich u wan’dad ni gagiyeg rok e ba mat’aw ma ma t’ufegey. Mab tamilang e re n’ey ko som’on u nap’an ni sunmiy e girdi’ ke yan i mada’ ko ngiyal’ ney.

De towasariy Adam nge Efa ni ngar pigpiggow ngak, ya ke bing e kanawo’ ngorow ni ngar mel’egew e tin ni yow baadag ni ngar rin’ew. Faanra riyul’ nrib t’uf Jehovah rorow, mab ga’ fan u wan’row e tin ni ke rin’, ma susun ni ngar gelnagew yow ma dab ra pagew Satan ni nge wawliyrow ngar togopuluwgow ngak Got.

Nap’an ni pi’ Moses e bin tomur e welthin ngak e girdi’ nu Israel me yog ni gaar: “Daba’ e kug taymed ni ngam turguyed ko fel’ rogon nge yafos e nge yib ngomed ara gafgow nge yam’.” (Deut. 30:15) Kan pi’ mat’awun e girdi’ ni ngar dugliyed ko uw rogon ni ngar ngongolgad. Miki yog Joshua ngak piyu Israel ni gaar: “Faanra der m’agan’med ngay ni ngam pigpiggad ngak Somol, me ere mu dugliyed e daba’ e re kan ni nguum pigpiggad ngak.” Me pi’ e girdi’ e fulweg ngak Joshua ni lungurad: “Dariy e n’en nra rin’ ma gamad lemnag ni nggu paged Somol” (Josh. 24:15, 16) Ku ireray e n’en ni gad ma lemnag e ngiyal’ ney. Bochan nrib t’uf Jehovah rodad, ma “dariy e n’en nra rin’” ma gadad lemnag ni ngad paged.

Bochan ni gad bang ko ulung ni Kristiano, ma kari tamilang u wan’dad fan e puf rogon. Yugu aram rogon ni piin piilal e kan pi’ mat’awrad ni ngar pied e fonow ara ngar llowan’naged e pi walag machane dubrad ni ngar gagiyegniged rogon e yafas ara michan’ rorad. Ke yoloy apostal Paul ni gaar: “Gathi gamad be guy rogon ni nggogned ngomed e n’en ni ir e thingari mich u wun’med, ya ke mudugil u wun’med e n’en ni ke michan’med ngay. Machane gamad be ayuwegmed ni fan ko felfelan’ romed.”​—2 Kor. 1:24.

Ba gel e felfelan’ ni ma yib ngodad nfaanra gad be rin’ ban’en ni bochan ni gad baadag ko bin ni ngan towasariydad! Be piningdad Jehovah ni ngad rin’ed e tin nib fel’, ya bochan nib t’uf rodad. Gad ra guy feni rib ga’ fan e re n’ey ko thin ni kan thagthagnag nga laniyan’ Paul ni gaar: “Ra gu pi’ urngin e tin ni ba’ rog, ni mus nga downgig mu gu pi’ nga ni urfiy machane faanra de t’uf Got rog nge girdi’ ma dabi fel’ rogog riy.”​—1 Kor. 13:3.

Nap’an ni gad ra guy bokum milyon e pi walag ni yad be pigpig ngak Jehovah ya rib t’uf rorad, ma rib gel e felfelan’ nra yib ngak, ma yira pining e sorok ngak!

Jehovah e ba t’uf rok e piin ni yad ma pigpig ngak, ni gimed e piin bitir nge piin nib fel’ yangaren ni gimed be dag nrib t’uf Jehovah romed ma gathi re fayleng ney nge tin nib mil fan ngaray nga fayleng. Maku dab mu paged talin nri gimed ba t’uf romad.​—Luke 12:42, 43.

Bochan nib t’uf Jehovah romed ma fa bin wuru’ e duw ni ke yan, ma gimed gubin e kam thognaged 1,748,697,447 e awa ni fan ko machib. Maku bochan e t’ufeg, ma ke gaman 7,782,346 e pi walag ni kar uned ko machib u ga’ngin yang e fayleng. Gadad ba felfelan’ ni ke gaman 268,777 e pi walag ni kar uned ko taufe, nib muun boor e piin fel’ yangaren ngay. Ma re n’ey e be yip’ fan ni gubin e wik ma sogonap’an 5,168 e girdi’ ni kan taufenagrad. Rib gel e felfelan’ ni gamad be tay!

Ngiyal’ ney ni gadad be par ko tin tomuren e rran, ma ke yoor e magawon ni gadad be mada’nag, nge gafgow nge togopuluw, nge m’ar, maku bay e piin ni kar magawongad ni bochan ni kar pilibthirgad. Machane ke mudugil lanin’dad ndab da ‘pied keru’dad ngak Got’ ma dabi “mulan’dad.” Ri gimed ba t’uf romad.​—Heb. 10:39; 2 Kor. 4:16.

Pi Walagmed,

Fare Ulung ni Ma Pow’iyey ko Pi Mich Rok Jehovah