Mu Filed Ban’en Rok e Pi Profet—Hosea
1. Mang reb e deer nsana kaam fithem riy ba ngiyal’?
1 ‘Mang boch ban’en nra m’agan’ug ngay ni nggu pag fan ya nge yag ni nggu pigpig ngak Jehovah?’ Dabisiy ni kam lemnag e re deer ney u nap’an ni ga be fal’eg i lemnag feni fel’ Jehovah nge rogon ni ma runguydad. (Ps. 103:2-4; 116:12) I m’agan’ Hosea ngay ni nge rin’ e n’en ni ke tay Jehovah chilen ngak ni yugu aram rogon ni bay boch ban’en ni ke pag fan. Ere, uw rogon ni ngad folwokgad rok Hosea?
2. Uw rogon nrayog ni ngad folwokgad rok Hosea ni ngad athamgilgad ngaud machibgad?
2 Ngam Machib ko Ngiyal’ nib Gel e Magawon: Bay e thin ni yog Hosea nga reb fa ragag i ganong nu Israel, ya ke chugur ni ngar talgad ko liyor ni yad be tay ngak Got. I denen Jeroboam II ni Pilung nib togopuluw ngak Jehovah, miki n’igin ni nge ulul e girdi’ ngar liyorgad ko liyos ni kan fal’eg ni yaan e garbaw ni be folwok ko n’en ni i rin’ reb e pilung nib m’on rok ni aram Jeroboam I. (2 Ki. 14:23, 24) Ku aram e n’en ni rin’ e tin baaram e pilung nra bad nga tomuren, me munmun ma dakur liyorgad ngak Got, me tomur riy min gothey e re ganong nem ko duw ni 740 B.C.E. Yugu aram rogon ni i liyor e girdi’ nga boch e got ni googsur, machane sogonap’an 59 e duw ni i par Hosea ni profet ni be pigpig u fithik’ e yul’yul’. Ma uw rogodad, kad dugliyed u wan’dad ni ngad machibgad ni yugu aram rogon ni bay boch e girdi’ ndubrad ni ngar motoyilgad ara yad be togopuluw ngodad, fa?—2 Tim. 4:2.
3. Uw rogon ni ke m’ug e runguy rok Jehovah ko n’en ni buch rok Hosea?
3 Ngaum Lemnag e Runguy ni Be Dag Jehovah: I yog Jehovah ngak Hosea ni nge “leay be’ nib pin ni ma pi’ ir ni chuway’.” (Hos. 1:2, BT) Yugu aram rogon ni gargeleg Gomer ni leengin reb e pagel ni fak, machane ki diyennag l’agruw e bitir ni gathi fak Hosea. Ba m’agan’ Hosea ngay ni nge n’ag fan e kireb rok leengin u wan’, ma re n’em e be dag gelngin e runguy ni i tay Jehovah ko fare nam nu Israel u nap’an ni kar kalgadngan’rad. (Hos. 3:1; Rom. 9:22-26) Ba m’agan’dad ngay ni ngad t’ared lanin’dad u boch ban’en, ya nge yag nda weliy murung’agen e runguy rok Jehovah ngak urngin mit e girdi’, fa?—1 Kor. 9:19-23.
4. Mang boch ban’en nrayog ni ngad paged fan ya nge yag nda pigpiggad ngak Jehovah?
4 Bay boch e tapigpig rok Jehovah ni kar talgad u boch e maruwel nib tolang puluwrad riy ni bochan e ngar yoornaged e tayim rorad ni fan ko machib. Ku bay boch e walag ndar uned ko mabgol ara dar fakayed e bitir ni bochan e ngar m’oneged boch ban’en ni fan nga Gil’ilungun Got. Nap’an ni gad ra lemnag e n’en ni buch rok Hosea, ma sana ra lungudad, ‘Dabiyog ni nggu rin’ e n’en ni ke rin’.’ Machane, faanra ga’ fan u wan’dad feni gol Jehovah me pagan’dad nga gelngin nib thothup, ma rayog ni nge fanaydad u reb e kanawo’ ndad lemnaged, ni bod e n’en ni buch rok Hosea.—Matt. 19:26; Fil. 2:13.