Mu Fanay e jw.org u Nap’an e Machib

Re Web site rodad ney e kan ngongliy ni nge ayuwegdad ni ngad wereged fare thin nib fel’ “nge yan i mada’ ko yungi n’en ni yan i mus e fayleng ngay.” (Acts 1:8) Yooren e girdi’ e dar nanged murung’agen e re Web site ney ni jw.org. Ba ga’ ni fin yad ma nang murung’agen u tomuren ni ke weliy reb e walag ngorad.

Bay reb e walag ni ma lekag e ulung ni ke downloadnag fare video ni kenggin e Mang Fan ni Ngam Fil e Bible? ko phone rok ma ma dag ko girdi’ ni ma mada’nagrad. Bod ni nap’an ni be un ko machib u mit e tabinaw, ma baaray e n’en ni ma yog: “Gu be ayuweg e girdi’ ni ngar pirieged e fulweg ko dalip i deer ni baaray ni gaar: Mang fan ni ke yoor e magawon u fayleng? Uw rogon nra pithig Got e pi magawon ney? Ma uw rogon nrayog ni nga darod u fithik’ e chiney? Re video ni baaray e be weliy murung’agen e pi deer ney.” Tomuren ni ke yog e pi thin ney, ma aram me playnag fare video me guy ko mang e ra rin’ facha’ ni be non ngak. Bochan rogon ni kan ngongliy e re video ney ma yooren e girdi’ ni ma dag ngorad e ri yad ma yaliy ni ga’ngin. Tomuren ni ke yaliy facha’ fare video, me gaar fare walag ngak: “Ka nog faram nrayog ni nga mog ni ngan fil e Bible ngom. Ere, rayog ni nggu dag ngom rogon ni yima rin’ e re n’ey.” Faanra ke m’agan’ facha’ ngay, ma aram me dag ngak rogon ni yima fil e Bible ko girdi’ ni be fanay fare brochure ni Thin nib Fel’. Faanra dariy e tayim rok facha’ ma aram me yarmiy ni ngar rin’ew e re n’ey ko yay ni migid nra sul ngak. Nap’an nra yan ko coffee shop ma ku aram rogon e n’en ni ma yog ngak be’ ni ke mada’nag u rom. Ere, ga be fanay e jw.org u nap’an e machib, fa?