Ngan Fil e Tin Riyul’ ko Girdi’

Ra tabab e pul ni September ma fare babyor ni kenggin e Pi N’en ni Ma Rin’ e Piin Kristiano nge Machib ni Yad Ma Tay e bay reb e kanawo’ riy u rogon ni ngan fil e Bible ngak be’ ni kenggin e “Ngan Fil e Tin Riyul’ ko Girdi’.” Kan ngongliy e re n’ey ya nge ayuwegdad u rogon ni ngad filed e tin riyul’ ni bay u lan e Bible ko girdi’ ni aram e ngad fanayed reb e deer nge reb thin nu Bible.

Faanra gad be guy ni baadag facha’ ni be motoyil, ma rayog ni ngkud pied reb e babyor ngak ara ngad daged reb e video ko jw.org., ya nge adag ni ngkud sulod ngak. Thingar da gayed rogon ni ngad sulod ngak facha’ nib papey ya nge yag ni ngkud ululgad i weliy e n’en ni kad weliyed ko som’on. Pi kanawo’ nib beech u rogon ni ngan fil e Bible ngak be’ e yira fek ko pi n’en ni bay u lan fare babyor ni kenggin e Mang e Ri Be Fil e Bible? Aram e gin nrayog ni ngan pirieg e pi deer nge boch e thin nu Bible riy ni ku ra ayuwegdad u rogon ni ngad sulod ngak e piin ni kad madaʼnaged yad u napʼan e machib ara ngad filed e Bible ngorad ni kemus ni gad be fanay e thin ko Bible.

Kemus ni taareb e kanawo’ ni be sor i yan ko yafos. (Mt 7:13, 14) Bochan ni gad ma non ngak e girdi’ nib thilthil e teliw rorad ma kub thilthil e gin ni kar bad riy, ma thingar da weliyed e tin riyul’ ni bay u lan e Bible ngorad ya nge yag ni ngar adaged ni ngar filed e Bible. (1Ti 2:4) Nap’an nra mom rodad ni ngad weliyed e thin ni bay u lan e Bible ko girdi’, mu kud mon’oggad u rogon ni ngad ‘machibnaged e thin rok Got nrogon,’ ma ra gel e felfelan’ rodad ma ra yib angin e machib ni gad be tay.​—2Ti 2:15.