Faanra Kad Mada’naged Reb e Bitir u Mit e Tabinaw

Nap’an ni gad be yan ko machib ma gad mada’nag reb e bitir u tabinaw mab fel’ ni nga dogned ngak ni gad baadag ni ngad nonad ko gallabthir rok. Faan gad ra rin’ e re n’ey ma aram e gad be dag ni gad be tayfan e gallabthir rok. (Pr 6:20) Ra piningdad fare tir nga naun, ma susun ndab darod. Faanra de moy e gallabthir rok ma rayog ni nge feni bayay ma gad sul.

Faanra fare tir ni kad mada’naged e bay e duw rok u thilin e 15 nge mada’ ko 19 mab t’uf ni nga dogned ngak ni gad baadag ni ngad nonad ko gallabthir rok. Ma faanra dar moyew ma rayog ni ngad fithed ngak ko ma pag e gallabthir rok ni nge mel’eg e pi n’en ni baadag ni nge beeg fa danga’. Faanra gaar yow ma pag ma aram e rayog ni ngad pied reb e babyor ngak min weliy ngak murung’agen fare website rodad ni jw.org.

Nap’an ni gad ra yan ni ngkud mada’naged reb e fel’ yangaren ni baadag e machib, ma thingar dogned ngak ni gad baadag ni ngad mada’naged e gallabthir rok. Faan gad ra rin’ e re n’ey ma rayog ni ngad weliyed fan ni ka darod ko fare tabinaw maku rayog ni ngkud daged ngorad rogon nrayog ni nge pagan’dad ko pi fonow ni bay u lan e Bible ni fan ko tabinaw. (Ps 119:86, 138) Faan gad ra dag ni gad be tayfan e piin gallabthir ma gad be lemnag lanin’rad, ma re n’ey e ra k’aringrad ni ngar adaged ni ngar filed murung’agen e thin nib fel’ ni gad ma machibnag maku ra ayuwegdad e re n’ey ni ngkud machibnaged girdien fare tabinaw.​—1Pe 2:12.