Ngad Mon’oggad ko Machib​—Rogon ni Nge Taw e Thin rok Got Nga Gum’irchaen e En ni Ga Be Fil e Bible Ngak ni Ga Be Fanay fare Babyor ni “Um Pired ni Gimed Ba T’uf rok Got”

FAN NIB GA’ FAN: Ba t’uf ni nge fil e girdi’ e pi motochiyel rok Jehovah mar gayed rogon ni ngar folgad riy ya nge yag ni ngar pigpiggad ngak nrogon nib m’agan’ ngay. (Isa 2:3, 4) Fare babyor ni kenggin e “T’ufeg rok Got” ni aram e ken ni l’agruw e babyor ni gad ma fanay u nap’an e fol Bible e rayog ni nge ayuweg e piin ni gad ma fil e Bible ngorad ni ngar nanged rogon nib l’ag e pi kenggin e motochiyel rok Jehovah ko pi n’en ni gad ma rin’ u reb e rran ngu reb. (Heb 5:14) Nap’an ni gad ra fil e Bible ngorad ma thingar da gayed rogon ni nge taw e thin rok Got nga gum’ircha’rad, ya re n’ey e ra ayuwegrad ni nge m’agan’rad ngay ni ngar gayed rogon ni ngar thilyeged boch ban’en ko yafos rorad.​—Ro 6:17.

ROGON NI NGAN RIN’:

• Ba t’uf ni ngam fal’eg rogom u m’on riy mag lemnag e n’en nib t’uf rok faen ni ga be fil e Bible ngak. Mu fal’eg rogon boch e deer nra ayuwegem ya nge yag ni ngam nang e n’en ni be lemnag. Ya faan ga ra fith e pi deer ney ma rayog ni ngam nang rogon laniyan’ u murung’agen e pi n’en ni be fil.​—Pr 20:5; be-E 259

• Mu fanay fapi kahol ni bay u lan e re ke babyor ney ni ngam ayuweg faen ni ga be fil e Bible ngak ni nge nang rogon nra yib angin ngak ni faan ra fol ko pi kenggin e motochiyel u Bible

• Mu ayuweg ni nge fil rogon ni nge dugliy boch ban’en ni be yan u rogon e nangan’ rok ma gathi gur e ngam dugliy e pi n’em ni fan ngak.​—Ga 6:5

• Mu fal’eg i lemnag ko bay boch e kenggin e motochiyel u Bible nib t’uf ni ngam ayuweg ni nge fol riy. Mu pi’ e athamgil ngak ni nge gay rogon ni nge thilyeg boch ban’en ko yafos rok ni bochan e ba t’uf Jehovah rok.​—Pr 27:11; Joh 14:31