Rogon ni Ngaum Tiyan’um ko Fol Bible ni Ga Ma Tay

Ga baadag ni ngam par ni gab yul’yul’ u nap’an nra yib e skeng ngom ni bod rogon Daniel, fa? Ke fal’eg i fil Daniel e Thin rok Got nib muun ngay e pi yiiy. (Da 9:2) Ere faan ga ra fal’eg i fil e thin nu Bible, ma ra ayuwegem ni ngam par ni gab yul’yul’ ngak Jehovah. Ni uw rogon? Re n’ey e ra gelnag e michan’ rom nra lebguy Got e pi n’en ni ke micheg. (Jos 23:14) Ku ra ayuwegem ni nge gel e t’ufeg rom ngak Got ni aram e n’en nra k’aringem ni ngam rin’ e tin nib mat’aw ban’en. (Ps 97:10) Machane uw rogon ni ngam tabab i fil e Bible? Baaray boch e kanawo’ nrayog ni ngam rin’ e re n’ey riy.

• Mang boch ban’en nrayog ni nggu fil? Faanra nge fel’ rogon e fol Bible ni ga ma tay, mab muun ngay ni ngam fil e pi n’en ni yira weliy ko muulung u m’on riy. Rayog ni ngki yib angin e beeg Bible ni ga ma tay ni gubin e wik ni faan ga ra tay e tayim ni ngam fal’eg i gay boch ban’en ko pi thin nu Bible nem ndamur nang fan. Ku bay boch e girdi’ ni kar mel’eged ni ngar filed boch ban’en u murung’agen e pi yiiy u Bible, ara murung’agen fapi wom’engin gelngin Got nib thothup, ara pi milekag ni tay Paul, ara ngar filed murung’agen e pi n’en ni ke sunmiy Jehovah. Ma faanra kam lemnag reb e deer ni bay e fulweg riy u lan e Bible, mag yoloy nga but’ ya nge yay ni migid ni ngam tay e fol Bible rom ni yigoo gur, mag guy rogon ni ngam gay boch ban’en ni murung’agen e re n’em.

• Uw e rayog ni nggu gay murung’agen boch ban’en riy? Mu yaliy fare video ni kenggin e Research Tools for Discovering Spiritual Treasures ya nge yag nim nang boch ban’en nrayog ni ngam fanay. Rayog ni ngam skengnagem ni aram e ngam fal’eg i gay e n’en ni be yip’ fan e pi gamanman ni weliy Daniel murung’agen ko guruy ni 7.

• Uw urngin e tayim ni thingar gu tay ni fan ko fol Bible? Faanra ngam mon’og ko tirok Got ban’en ma thingar mu fil e thin rok ni gubin ngiyal’. Ere, faanra ba mo’maw’ ngom ni ngam fil e Bible rom nib n’uw nap’an, ma rayog ni ngam tabab i fil ndabi n’uw nap’an. Ma ra munmun ma rayog ni ngam yoornag e tayim ni ga be tay ni fan ko fol Bible. Nap’an ni ga ra fil e Thin rok Got ma bod ni ga be gay e machaf nib mith, ya nap’an ni ga ra pirieg boch ban’en nib manigil ko fol Bible ni ga be tay, mab mudugil ni ga ra adag ni ngkum gay boch! (Pr 2:3-6) Ga ra ulul ni ngam rin’ e re n’ey, ma ga ra adag ni ngaum fil e Thin rok Got ni gubin ngiyal’, ma aram e fol Bible ni ga ma tay e ra par ni aram ban’en ni ga ma rin’ ni gubin ngiyal’.​—1Pe 2:2.

MANG E BE YIP’ FAN FAPI GAMANMAN NI KAN WELIY MURUNG’AGEN KO DANIEL GURUY NI 7?

• Da 7:4

• Da 7:5

• Da 7:6

• Da 7:7

YUGU BOCH E DEER:

Uw rogon ni ke lebug fare thin ni bay ko Daniel 7:8, 24?

N’EN NRAYOG NI NGAM FIL KO YAY NI MIGID:

Mang e be yip’ fan fapi gamanman ni bay ko Revelation 13?