Pi Reference ni Fan ko fare Babyor ni Pi N’en ni Ma Rin’ e Piin Kristiano nge Machib ni Yad Ma Tay
August 5-11
BOCH E THIN NIB GA’ FAN KO THIN ROK GOT | 2 TIMOTHY 1-4
“Ke Pi’ Got e Athamgil Nga Lanin’dad ni Nge Dab Da ‘Rusgad’”
Piin nib Fel’ Yangaren—Mu Daged ni Kam Mon’oggad ko Tirok Got
9 I puguran Paul ngak Timothy ni gaar: “Gathi lem ni der rus e ke pi’ Got ngodad ya lem nib mudugil ma ma t’ufegey mab fel’.” (2 Tim. 1:7, NW) Girdi’ ni bay e ‘lem rok nib fel’’ e be yip’ fan ni rayog nge gonopiy me weliy ban’en nib fel’ rogon. Ma ku ra yog ni k’adan’ ni demtrug e magawon nra yib ngak. Boch e piin nib fel’ yangaren e yad be rus ko magawon nib gel ni ma yib ngorad ma aram e yad ma mol ara yad ma yaliy e kachido nib n’uw nap’an. Ma ku boch i yad e ma fanay e falay ni kireb ma yad ma unum e alkul ma yad ma un ko mur nib pag rogon nge ngongol ni darngal. Ere kan fonownagdad ni “ngad paged pangidad nge ngongol rodad nde m’agan’ Got ngay nge chogowen urngin ban’en u fayleng nde mat’aw u owchen Got.”—Titus 2:12.
‘Mpired Ni Gimed Ba Gel Ma Damur Rusgad!’
7 I yol Paul ngak Timothy ni gaar: “Ya kan ni thothup ni ke pi’ Got ngodad e dar ma ngongliydad ni ngad rusgad, machane kan ni thothup rok e ma pi’ gelngidad . . . Ere dab mu tamra’ ni nguum weliy murung’agen e Somol rodad.” (2 Timothy 1:7, 8; Mark 8:38) Kada bieged e re thin nem u Bible, ere ngada fithed gadad: “Gu ma tamra’ ni bochan e michan’ rog, fa ba gel lanin’ug? Yi manang u taban e maruwel (ara u skul) ni gag reb e Mich Rok Jehovah, fa gu ma mithag? Gu be tamra’ ni bochan e gub thil ko yugu girdi’, fa gub falfalan’ ni bochan e ba fel’ thilmow Jehovah?” Faan manga ke tamra’ be’ ni bochan e be machibnag fare thin nib fel’ ara be rin’ ban’en ni der ma rin’ e yugu girdi’ ma dabi pag talin fare thin ni yog Jehovah ngak Joshua ni gaar: “Dab mu rus ma ga par ni gab gel.” Ma dab mu pag talin ni n’en ni baga’ fan e gathi lem rok e girdi’ ni gad ma maruwel u taabang ara girdi’ ni gad nga skul ya n’en ni baga’ fan e lem rok Jehovah nge Jesus Kristus.—Galatia 1:10.
Ngan Fal’eg i Gay Boch Ban’en nib Ga’ Fan ko Thin rok Got
Ngan Nameg e Bin Riyul’ e Flaab
13 Timothy e ir be’ nrib gel e michan’ rok. Tomuren ni yog Paul ni Timothy e ir reb e “salthaw rok Kristus, . . . nib yul’yul’,” ma aram me gaar ngak: “Ba salthaw ni be un ko mahl e der ma un ko tin ni be muruwliy e girdi’ ni gathi salthaw [“pi n’en ni yima rin’ u roy u fayleng ni bay rogon ko siyobay nge salpiy,” NW], ya ba adag ni nge yan nga laniyan’ e en ni pilungen e ba’ rok e salthaw.” (2 Tim. 2:3, 4) Pi gachalpen Jesus e ngiyal’ ney nib muun ngay e pi walag ni yad ma machib u polo’ e tayim rorad ni ke pag reb e milyon urngirad e yad ma athamgil ni ngar folgad ko fare fonow ni pi’ Paul u rogon nrayog rorad. Yad ma siyeg e pi n’en ni ma ognag e re fayleng ney nib chogow e girdi’ riy. Ku yad ma guy rogon ndab ra paged talin fare kenggin e motochiyel ni be gaar: “Ga ra man salpiy ni malfith ma ga ra mang sib ko en ni kam malfith ngak.” (Prov. 22:7, BT) Ri baadag Satan ni nge guydad ni gad be fanay e tayim rodad nge gelngidad ni fan ko pi n’en ni yima rin’ u roy u fayleng ni bay rogon ko siyobay nge salpiy. Bin riyul’ riy e, bay boch ban’en ni gad ma dugliy ni ngad rin’ed ni gad ma aw riy nga tabon e malfith u lan bokum e duw. Bay boch e girdi’ ni yad ma loannag e salpiy nib ga’ ni ngar chuw’iyed ara ra toyed e naun riy, ara ngar chuw’iyed e karrow, ara ngar pied puluwon pi fakrad ni nga ranod ko skul nib tolang, ara ra fanayed ni fan ko madnom ko m’agpa’ rorad. Rayog ni nge m’ug ni gad ba gonop ni faan gad ra momnag e par rodad, ma gad buchuuwnag e malfith rodad, nge urngin e salpiy ni gad be fanay nga boch ban’en, ma gad fanay e tayim rodad ni ngad pigpiggad ngak Got ko bin ni ngad manged sib ko pi n’en ni yima rin’ u roy u fayleng ni bay rogon ko siyobay nge salpiy.—1 Tim. 6:10.
Girdi’ rok Jehovah e Yad Ma ‘Pi’ Keru’rad ko Ngongol nib Kireb’
10 Girdi’ rok Jehovah e ngiyal’ ney e gathi gubin ngiyal’ ni yad ma mada’nag e piin ni kar chelgad yad be togopuluw ko bin riyul’ e liyor u lan e ulung. Yugu aram rogon ma nap’an ni gad ra mada’nag e piin ni yad ma machibnag boch ban’en nde puluw ko Bible, ma thingar da palognaged gadad rorad ni demtrug e gin ni ke sum e machib rorad riy. De fel’ ni ngad luaged e pi girdi’ ney e thin u nap’an ni kad mada’naged yad, ara nap’an ni gad bay ko internet, ara ku boch e kanawo’. Yugu aram rogon ni gad be guy rogon ni ngad ayuweged facha’ ni nge tamilang e thin rok Got u wan, ma de fel’ ni ngad rin’ed e re n’ey, ya faan gad ra rin’ ma aram e gad be togopuluw ko n’en ni gad be weliy u roy. Ere, n’en nib fel’ ni ngad rin’ed e aram e ngad ted gadad u orel ko pi girdi’ ney ni kar digeyed e bin riyul’ e liyor ma kar chelgad kar togopuluwgad ngay ni bochan e gadad e girdi’ rok Jehovah.
August 12-18
BOCH E THIN NIB GA’ FAN KO THIN ROK GOT| TITUS 1–FILEMON
“Ngan ‘Dugliy e Piin ni Ngar Manged’ Boch e Piilal”
w14-E 11/15 28-29
Deer ko Piin Ma Beeg
Yugu aram rogon ni gathi ri be tamilangnag e Bible rogon ni un dugliy e piin ni ngar manged boch e piilal kakrom, machane bay boch ban’en u Bible ni be weliy rogon ni un rin’ e re n’ey. Kan weliy nnap’an ni sul Paul nge Barnabas ko bin som’on e milekag rorow ni yow be machib, ‘mi yow turguy e piin ni piilal ni yad e nguur ayuweged girdien e galesiya riy; mi yow par ni kar pagew e abich ngar piew yad ngak Somol u fithik’ e meybil, ni fare Somol ni ir e ke pagan’rad ngak.’ (Acts 14:23) Boch e duw nga tomuren, me yol Paul ngak Titus ni ir bagayad e piin nra uned ngak ko machib ni gaar: “Gu pagem u Krete ni fan e ngam fal’eg rogon e tin ni ka bay ban’en ni ngan muruwliy, ma nge reb e binaw ma ga dugliy e piin ni ngar manged piilal ko galesiya riy. Dab mpag talin e tin ni ku gog ngom.” (Titus 1:5) Ku arrogon Timothy ni boor yang ni un ngak apostal Paul riy ko machib ni kun pi’ mat’awun ni ngki dugliy e piin piilal. (1 Tim. 5:22) Ere, rib tamilang ni piin ni yad ma lekag e ulung e yad e kar dugliyed e piin piilal, ma gathi pi apostal nge piin piilal ni yad bay u Jerusalem.
Bochan ni weliy e Bible ni aray rogon ni un dugliy e piin piilal kakrom, ma aram fan ni chiney e fare Ulung ni Ma Pow’iyey ko Pi Mich Rok Jehovah e kar thilyeged rogon ni yima dugliy e piin ni ngar manged boch e piilal ara ministerial servant. Ere ka nap’an e September 1 ko duw ni 2014 ma ireray e yaram u rogon ni ngan dugliy e piin piilal ara ministerial servant: Ra reb e piilal ni ma lekag e ulung ma thingari fal’eg i yaliy boch ban’en u murung’agen e piin ni ka nog ni ngar manged boch e piilal ara ministerial servant. Nap’an nra lekag e pi ulung ney, ma nge gay rogon ni nge nang boch ban’en u rarogorad ni aram e nge un ngorad ko machib ni faanra rayog. U tomuren ni ke non faen ni ma lekag e ulung nge piin piilal ko fare ulung u murung’agrad, ma aram e faen ni ma lekag e ulung e ir e ra dugliy e pi walag ni ngar manged e piin piilal nge ministerial servant ko re ulung nem. Faan yira fol ko re yaram ney, ma aram e ra chugur nga rogon ni un rin’ ko bin som’on e chibog.
Mini’ e piin ni yad ba muun ko re yaram ney? Ba ga’ ni “fare tapigpig nib yul’yul’ ma ba gonop” e yad e ba milfan ngorad ni ngar pied e tin nib t’uf ko tin ka bay e tapigpig ni fan ko tirok Got ban’en. (Matt. 24:45-47) Re n’ey e ba muun ngay rogon ni yad ma fal’eg i gay fan e thin nu Bible u daken e ayuw rok gelngin Got nib thothup, ya nge yag ni ngar pied e fonow u rogon nrayog ni ngad folgad ko pi kenggin e motochiyel u Bible ni bay rogon ko yaram nthingari fol e pi ulung rodad riy. Kub milfan ko re ulung ney ni ngar dugliyed e piin ni ngar manged e en ni ma lekag e ulung nge piin ni yad girdien e Branch Committee. Ma aram e ra reb e branch ma ir e ra guy rogon ni nge fol e pi ulung ni bay u tan e birorad e branch ko pi yaram ney. Ma piin piilal u lan e ulung e thingar ra fal’eged i yaliy murung’agen e piin ni yad be lemnag nrayog ni ngar manged e ministerial servant ara piin piilal ko chon mini’ e ke bung rogorad ni ngar rin’ed e re n’ey. Tomur riy ma faen ni ma lekag e ulung e ir e ba milfan ngak ni nge fal’eg i yaliy murung’agen e pi walag ney me yibilay murung’agen, ngemu’ me dugliy ko chon mini’ e ke bung rogorad ni ngar manged e ministerial servant ara piin piilal.
Ngan Fal’eg i Gay Boch Ban’en nib Ga’ Fan ko Thin rok Got
w89-E 5/15 31 ¶5
Deer ko Piin Ma Beeg
Rogon e thin rok e re profet ney e de yog ni aram e ngan laniyan’ ngak piyu Krete. Rayog ni nge pagan’dad ko re ney ni bochan ni manang Paul ni bay e piin Kristiano u Krete ni yad ba yul’yul’ miki mel’egrad Got u daken gelngin nib thothup. (Acts 2:5, 11, 33) Boor e pi walag u rom ni yad ba yul’yul’ nrayog ni ngan sunmiy boch e ulung ko Kristiano u “reb e binaw” ngu reb. Yugu aram rogon ni pi Kristiano ney e dawor ra flontgad, machane rayog ni nge pagan’dad ngay ni gathi yad e girdi’ nib sasalap lungunrad, ara yad ba malmal, ara yad ma abich nib pag rogon. Ya faanra riyul’ ni aray rogon ma dabiyog ni ngar fel’gad u wan’ Jehovah. (Filippi 3:18, 19; Revelation 21:8) Bochan ni gad be pirieg e girdi’ u gubin e nam ni yad baadag e tin riyul’, me ere ku rayog ni ngad pirieged e girdi’ nu Krete ni bay boch i yad ni kar dabuyed e ngongol nde mat’aw ni be rin’ e girdi’ u toobrad mab m’agan’rad ngay ni ngar motoyilgad ko fare thin nib fel’.—Ezekiel 9:4; mu taareb rogonnag ko Acts 13:48.
Tin Ba Ga’ Fan ko Pi Babyor ni Yan Ngak Titus, Filemon nge Piyu Hebrew
15, 16—Mang fan nde yog Paul ngak Filemon ni nge pag Onesimus nge dabki mang sib? Baadag Paul ni nge chichiiy ir ko maruwel rok ni nge ‘machibnag murung’agen e gagiyeg rok Got ma be machibnag murung’agen Somol Jesus Kristus.’ Aram fan ni lemnag ni nge par u orel ndabi un nga yugu boch ban’en ni bod murung’agen sib.—Acts 28:31.
August 19-25
BOCH E THIN NIB GA’ FAN KO THIN ROK GOT | HEBREWS 1-3
“Nge T’uf Rom e Ngongol nib Mat’aw Mag Fanenikay e Ngongol Nde Mat’aw”
Ngan Pining e Sorok ngak Kristus ni Ir fare Pilung nib Gilbuguwan!
8 Ke dugliy Jehovah Fak ni nge mang Pilung u Gil’ilungun fare Messiah u tharmiy u nap’an e duw ni 1914. ‘Ba mat’aw rogon ni ma gagiyegnag e girdi’ rok,’ ere rayog ni nge pagan’dad nib mat’aw rogon e gagiyeg nra tay. Bay mat’awun ni nge mang Pilung ni bochan e ‘Got e ir e ke pi’ ngak.’ Re n’ey e be yip’ fan ni Jehovah e ir e ke dugliy ni nge mang pilung. Maku reb e, fare lung ni kan pi’ ngak e ra par ni “manechibog ko pi chibog.” Ere, gathi ga be felfelan’ ni ga be pigpig ngak Jehovah u tan pa’ fare Pilung ni Ir e ke dugliy?
Ngan Pining e Sorok ngak Kristus ni Ir fare Pilung nib Gilbuguwan!
7 Mu beeg e Psalm 45:6, 7. Bochan nrib t’uf e tin nib mat’aw rok Jesus ma ma fanenikay e pi n’en nrayog ni nge kirebnag thin Jehovah ni Chitamangin, ma aram fan ni kan dugliy ni nge mang Pilung u Gil’ilungun fare Messiah. Kan “puog e felfelan’” ni yoor nga daken ndabi taareb rogon ngak “boch e pilung,” ni aram e pi pilung nu Judah nra bad ko tabinaw rok David. Uw rogon e re n’ey? Bin som’on e, Jehovah e ir e ke dugliy Jesus. Maku reb e, ki dugliy ni nge mang Pilung nge Prist nib Tolang. (Ps. 2:2; Heb. 5:5, 6) Maku reb e, kan dugliy ni gathi aram e kan liyef e gapgep nga daken lolugen ya kan dugliy nga gelngin Got nib thothup, ma gathi fayleng e ra par riy nge gagiyeg, ya tharmiy.
Ngan Fal’eg i Gay Boch Ban’en nib Ga’ Fan ko Thin rok Got
it-1-E 1185 ¶1
Yaan
Gur, n’umngin nap’an e yafos rok Jesus ma i m’ug rarogon e Chitamangin rok nib fel’ rogon, fa?
Bin nganni’ i Fak Got ni aram Jesus e nni sunmiy ni bay rarogon e Chitamangin rok. (2Ko 4:4) Ireray e en ni non Got ngak u nap’an ni gaar: ‘Chiney e ngad ngongliyew e girdi’; girdi’ e bay ra boded gadow mi yad bod yaadow.’ Ere, re n’ey ni ma m’ug rarogon Jehovah ni Chitamangin rok Fak e ban’en ni immoy rok ni ka nap’an ni sunmiy Jehovah. (Ge 1:26; Joh 1:1-3; Kol 1:15, 16) Nap’an ni immoy Jesus u fayleng ni ir be’ nib flont, ma gubin ban’en ni ma rin’ e ma m’ug pi fel’ngin e Chitamangin rok nge rogon e lem rok nrib fel’ rogon. Ere aram fan nrayog ni nge yog ni “cha’ ni ke guyeg e ke guy e en ni Chitamangiy.” (Joh 14:9; 5:17, 19, 30, 36; 8:28, 38, 42) Ma ngiyal’ ni baaram ni faseg Jesus ko yam’ me sul nga tharmiy nib kan ni ke ‘pag fan [Jehovah ni Chitamangin] urngin ban’en ngak u tharmiy ngu but’,’ ma aram e kari gel rogon ni m’ug rarogon e Chitamangin rok. (1Pe 3:18; Mt 28:18) Ma ka nap’an ni ke tay Got Jesus ni “ir e th’abi tolang u tharmiy,” ma aram e kari gel boch rogon ni nge dag Jesus rarogon e Chitamangin ko ngiyal’ ni baaram u m’on ni nge yib nga fayleng. (Fil 2:9; Heb 2:9) Aram fan ni chiney e gowa kari “taareb rogorow Got.”—Heb 1:2-4.
it-1-E 1063 ¶7
Tharmiy
Fapi thin ko Psalm 102:25, 26 e bay rogon ngak Jehovah Got, machane ke yog apostal Paul e pi thin ney ni kub l’ag rogon ngak Jesus Kristus. I yog e re n’ey ni bochan e Fak Got nib maagirag rok e aram e En ni fanay Got ni ngar sunmiyew e palpalth’ib. U roy e be weliy Paul e n’en nib thil u n’umngin nap’an nra par faen ni Fak Got riy nge n’umngin nap’an nra par e tin kan sunmiy ban’en. Ya faanra baadag Got ma rayog rok ni nge bichibichiy e pi n’em ni “bod rogon ba ke mad.”—Heb 1:1, 2, 8, 10-12; mu taareb rogonnag ko 1Pe 2:3.
August 26–September 1
BOCH E THIN NIB GA’ FAN KO THIN ROK GOT| HEBREWS 4-6
“Mu Rin’ Urngin Nrayog Rom ni Ngam Un ngak Got ko Toffan”
Mang e Toffan rok Got?
3 L’agruw fan nrayog ni nga dogned ndawori mus e bin medlip e rran u nap’an e ngiyal’ ni immoy Jesus riy nge tin som’on e Kristiano. Bin som’on i fan e ba tamilang ko n’en ni yog Jesus ngak e pi toogor rok. Pi girdi’ nem e ra damumuwgad ni bochan e ke golnag Jesus e girdi’ ko rofen ni Sabbath. Machane, i fulweg Jesus ngorad ni gaar: “Chitamag e gubin ngiyal’ ni be maruwel, ere ku er rogog nthingar gu maruwel.” (John 5:16, 17) Ere mang e be yog Jesus u roy? Be gaar: “Gamow e Chitamag e taab mit i maruwel e gamow be rin’. Ke maruwel e Chitamag u lan bokum biyu’ e duw u nap’an e Sabbath rok, ma ka be maruwel e chiney. Ere, rayog ni nggu maruwel ko rofen ni Sabbath.” Ere ba tamilang ko thin rok Jesus nnap’an e ngiyal’ ni immoy u fayleng ma ka be Toffan Got.
4 Bin l’agruw i fan nnap’an e ngiyal’ ni immoy Jesus u fayleng, ngu nap’an e tin som’on e Kristiano ma dawori mus e bin medlip e rran e tamilangnag apostal Paul. Nap’an ni be sul u daken e thin ko Genesis 2:2, ni be weliy murung’agen e toffan rok Got, me yoloy ni gaar: “Gadad e piin ni ke michan’dad ko thin rok e nga darod ngak Got ngad uned ngak ko toffan.” (Heb. 4:3, 4, 6, 9) Ere nap’an Paul ma dawori mus fa bin medlip e rran. Ere wuin e ra mus e bin medlip e rran?
5 Ra ngad nanged e fulweg ko re deer ney ma thingar dab da paged talin e n’en ni lemnag Got ni fan ko bin medlip e rran. Genesis 2:3 e be gaar: “Me thothupnag e bin medlip e rran nge ta’ ni reb e rran nib thil nga urngin e rran.” I thothupnag Jehovah e re rran nem ni bochan e nge lebguy e tin nib m’agan’ ngay ni fan ko fayleng. N’en nib m’agan’ ngay e aram e nge sug e fayleng ko girdi’ nib fel’ mi yad par riy ngaur ayuweged. (Gen. 1:28) Fan ni ka be “maruwel” Jehovah Got nge Jesus Kristus ni ir e “Somol ko Sabbath” e bochan ni nge lebug e n’en nib m’agan’ Got ngay ni fan ko fayleng. (Matt. 12:8) Ere, fare rran rok Got ko toffan e ra mus ko ngiyal’ ni ke lebug e tin nib m’agan’ ngay ni aram e tungun fare Biyu’ i Duw ko Gagiyeg rok Kristus.
Mang e Toffan rok Got?
6 Rib tamilang rogon ni weliy Got ngak Adam nge Efa e n’en nib m’agan’ ngay ni fan ko fayleng, machane mi yow togopuluw ngay. Riyul’ ni ku bokum milyon e girdi’ nga tomuren nda ur folgad. Mus ngak piyu Israel ni yad e girdi’ rok Got ni ku da ur folgad. Ere i yog Paul ngak e pi Kristiano ko bin som’on e chibog ni ngar kol ayuwgad ya ku rayog ni ngar boded piyu Israel ndar folgad. I yoloy ni gaar: “Ngad athamgilyed ngad uned ngak Got ko toffan. Thingari dariy bagadad ni nge dabi fol ni bod ni rin’ fa piinem, nde yog nra uned ngak Got ko toffan.” (Heb. 4:11) Ere, mu tay fanam i yan riy ni n’en ni yog Paul e be dag ni piin ndab ra folgad e bad ra uned ngak Got ko toffan. Ma uw rogodad? Faan gad ra togopuluw ko tin nib m’agan’ Got ngay, ma rayog ni ngad uned ngak ko toffan, fa? Rib ga’ fan ni ngad nanged e fulweg ko re deer ney, ma aram e n’en ni gad ra weliy taaboch. Machane, som’on e ngad weliyed boch ban’en nde puluw ni i rin’ piyu Israel nge fan ndar uned ngak Got ko toffan.
Mang e Toffan rok Got?
16 Dariy bagadad e ngiyal’ ney ni ke mich u wan’ ni faanra fol e pi Kristiano ko Motochiyel rok Moses ma ra yog e yafas ngak. Ba tamilang e thin ni yog Paul ngak piyu Efesus ni gaar: “Yu daken e runguy rok Got ngodad e ir e ke thapegmed riy ngak, ni bochan e ke mich Jesus u wun’med. Gathi gimed e mmuruwliyed nge yog, ya ba tow’ath ni ke pi’ Got ngomed. Dariy ban’en ko pi n’ey ni ngam ufanthingad ngay, ni fan e gathi ban’en ni gimed e mmuruwliyed ngam yogniged.” (Efe. 2:8, 9) Mang e be yip’ fan ni nge un e pi Kristiano ngak Got ko toffan? Dab mu pagtalin ni tay Jehovah e bin medlip e rran ni nge mang rran rok ko toffan ni bochan e nge lebguy e n’en nib m’agan’ ngay ni fan ko fayleng nge piin yad ma fol rok. Rayog ni ngad uned ngak Jehovah ko toffan ni faan gad ra ngongol nib puluw ko tin nib m’agan’ ngay ni ma yog ngodad u daken e ulung rok.
17 Maku reb e faanra dab ud folgad ko fonow ni ma pi’ fare tapigpig nib yul’yul’ mab gonop, ma aram e gad be togopluw ko tin nib m’agan’ Got ngay. Re n’ey e rayog ni nge magawonnag e tha’ u thildad Jehovah. Bin migid e article e gad ra weliy riy boch e kanawo’ nrayog ni nge m’ug ni gad ba yul’yul’. Ma n’en ni gad ra dugliy ni ngad rin’ed ko pi n’ey e ir e ra m’ug riy ko gad be un ngak Got ko toffan fa danga’.
Ngan Fal’eg i Gay Boch Ban’en nib Ga’ Fan ko Thin rok Got
w16.09-E 13
Deer ko Piin Ma Beeg
Mang fare “thin rok Got” ni be weliy e Hebrews 4:12 nib “fos ma ba’ gelngin ni ma maruwel”?
▪ Pi verse ni bay u m’on ngu tomuren e re thin ney ni yog apostal Paul e be weliy murung’agen e n’en nib m’agan’ Got ngay nrogon ni bay u Bible.
Ba ga’ nnap’an ni yira weliy murung’agen fare thin ko Hebrews 4:12, ma yima fanay ni nge tamilangnag rogon nrayog ni nge thilyeg e Bible e yafos ko girdi’. Ma re n’ey e ban’en nib puluw. Machane kab fel’ ni ngan lemnag yugu reb i fan e re thin ney nrogon ni kan tamilangnag ko pi verse ni bay u m’on ngu tomuren e re verse ney. I pi’ Paul e athamgil nga laniyan’ e pi Kristiano nu Hebrew ni ngar maruwelgad Got u taabang nrogon nib puluw ko n’en nib m’agan’ ngay. Ma boor ko pi verse ney e bay u lan fare babyor nib thothup. Bod rogon e n’en ni weliy Paul ni murung’agen piyu Israel u nap’an nni chuwegrad ko sib u Egypt. Ngiyal’ nem e bay e athap rorad ni ngar uned nga lan fare nam ni kan micheg ni “ba yong’ol e but’ riy” ni aram e gin nrayog ni ngar pirieged e toffan riy.—Ex. 3:8; Deut. 12:9, 10.
Ireray e n’en nib m’agan’ Got ngay. Machane da i fol piyu Israel rok Got ni bochan e yad ba gelan’, ma darur michan’rad ngak. Ere aram fan ni yooren i yad e de yag ni ngar uned ngak Got ko toffan rok. (Num. 14:30; Josh. 14:6-10) Yugu aram rogon ma ka be micheg Paul ni ka “rayog ni nga darod ngad uned ngak [Got] ko toffan.” (Heb. 3:16-19; 4:1) Re n’ey ni “yog Got” e ba tamilang ni aram e n’en nib l’ag rogon ko n’en nib m’agan’ ngay. Ere rayog ni ngad beeged ma gad fol ko n’en nib m’agan’ Got ngay ni bod rogon e pi Kristiano nu Hebrew. N’en ni weliy Paul murung’agen e kan fek ko Genesis 2:2 nge Psalm 95:11. Re n’ey e be tamilangnag nib puluw e n’en ni kan micheg ko n’en ni be yog e Bible.
Fare thin ni micheg Got ni ka “rayog ni nga darod ngad uned ngak [Got] ko toffan” e susun nra pi’ e athamgil nga lanin’dad. Ba pagan’dad ngay nre n’ey e ban’en nrayog ni ngad uned ngay, ma kad tababgad i rin’ e tin nib t’uf ni ngad rin’ed ya nge yag ni ngad uned ngak Got ko toffan. Dawor da rin’ed e re n’ey u nap’an nda guyed rogon ni ngad folgad ko fare Motochiyel rok Moses ara da rin’ed boch e maruwel ni bochan e ngad fel’gad u wan’ Jehovah. Ya n’en ni kad rin’ed e aram e kad rin’ed e n’en nib m’agan’ Got ngay u fithik’ e felfelan’, ma ka gad be ulul i rin’ e re n’ey ni bochan e ba michan’dad ngak. Maku reb e, ka bay bokum biyu’ e girdi’ u ga’ngin yang e fayleng ni kar tababgad ni ngar filed e Bible nge n’en nib m’agan’ Got ngay. Ma angin ni ke yib riy e kar thilyeged boch ban’en u lan e yafos rorad ni nge puluw ko n’en nib m’agan’ Got ngay, mar maruweliyed e michan’ rorad ngak, ma kar uned ko taufe kar manged e Kristiano. Aram e mich riy nriyul’ ni “thin rok Got e ba fos ma ba’ gelngin ni ma maruwel.” Ere ke tabab ni nge yib angin e n’en nib m’agan’ Got ngay ko yafos rodad e chiney, maku ra ulul ni ngki yib angin gelngin e thin rok nga lan e yafos rodad boch nga m’on.
it-1-E 1139 ¶2
L’agan’
Re l’agan’ ara athap ney nra yognag e yafos ni manemus ngak e piin ni ‘ke piningrad Got’ ni nga ranod nga tharmiy ma nge yag ba dowef ngorad ndab ki kireb e be tor nga daken ban’en nrayog ni nge pagan’uy ngay. (Heb 3:1) L’agruw ban’en ni be tor e re athap ney ngay ni aram e Got e der ma ban u nap’an nra micheg ara mownag ban’en. Ma reb e re athap ney e ba l’ag rogon ngak Kristus ni bay e chiney u tharmiy ndab ki yim’ biid. Aram fan ni ka nog nre n’ey e ke “mang angkar rok lanin’dad, ya be par nib mudugil, ma ke yan ke kuruf fa gi kateng ko tempel nu tharmiy ke yan i par nga lan fare singgil ni ir e th’abi thothup ko tempel [ni bod e n’en ni rin’ fare prist nth’abi tolang u nap’an ni yan ko fa Gin Th’abi Thothup ko Rofen ni Biyul]. I Jesus e ke yan nga lan e re singgil nem ni ke m’on rodad, me ir owchedad ngaram. Ke mang prist nib th’abi tolang ndariy n’umngin nap’an, ni bod rogon Melkizedek.”—Heb 6:17-20.