Dalip e Kanawo’ ni Ngan Taga’ Riy Ngak Jehovah

I gel David ngak Goliath ni bochan e taga’ ngak Jehovah. (1Sa 17:45) Baadag Jehovah ni nge ayuweg urngin e pi tapigpig rok. (2Kr 16:9) Ere uw rogon ni ngad taga’gad ko ayuw ni ma pi’ ngodad ko bin ni ngad taga’gad ko tin gad manang nge tin nrayog rodad? Baaray dalip e kanawo’:

• Mmeybil ni gubin ngiyal’. Gathi kemus ni ngam meybil ni ngan n’ag fan e kireb rom u tomuren ni kam oloboch, ya ngkum meybil ni ngan pi’ gelngim u nap’an ni ke yib e lumel ngom ni ngam rin’ ban’en nib kireb. (Mt 6:12, 13) Gathi kemus ni ngam meybil ngak Jehovah ni nge tow’athnagem ko n’en kam dugliy ni ngam rin’, ya ngku mog ngak ni nge pow’iyem me pi’ e gonop ngom u m’on ni ngam dugliy boch ban’en.​—Jas 1:5

• Mu tay ba ngiyal’ ni fan ko beeg Bible nge fol Bible. Mu beeg e Bible ni gubin e rran. (Ps 1:2) Mu fal’eg i lemnag murung’agen boch e girdi’ u Bible mag fol ko n’en ni kam fil rorad. (Jas 1:23-25) Mu fal’eg rogom ni fan ko machib u m’on riy ko bin ni ngam taga’ ko tin ga manang. Mu fal’eg rogom u m’on ko muulung ya nge yag ni ngari yib angin ngom

• Mu fol ko n’en be yog e ulung rok Jehovah. Mu guy rogon ni ngam nang e tin nib beech e yaram nge fonow ni be yib ko ulung mag gurnagem ngam fol riy. (Nu 9:17) Mu fol ko fonow ni ma pi’ e piin piilal nge yaram ni kar ngongliyed.​—Heb 13:17

NGAN YALIY FARE VIDEO NI NO REASON TO FEAR PERSECUTION, NGEMU’ MIN PI’ E FULWEG KO GAL DEER NEY:

• Mang boch ban’en ni buch rok e pi walag ney ni k’aring e marus ngorad?

• Mang e ayuwegrad ni ngar athamgilgad u fithik’ e pi n’em ni k’aring e marus ngorad?