Mu Fal’eg Bayay e Tha’ u Thilmew Jehovah

GUBIN e duw ni boor e walag ni yad ma sul ko ulung ni Kristiano bayay. Am lemnag gelngin e ‘felfelan’ ni yima tay u tharmiy’ ni bochan e re n’ey! (Luke 15:7, 10) Faanra gur bagayad e pi girdi’ ney, ma rayog ni nge pagan’um ngay nib felfelan’ Jesus, nge pi engel, nge Jehovah ni kam sul ko ulung bayay. Yugu aram rogon ma rayog ni ngam mada’nag boch e magawon u nap’an ni ga be fal’eg bayay e tha’ u thilmew Jehovah. Mang boch e pi magawon nem, ma mang e rayog ni nge ayuwegem?

MANG E PI MAGAWON NEM?

Bay boch e walag ni ku ma mulan’rad u tomuren ni kar sulod ko ulung. Sana rayog ni ngam nang rogon laniyan’ David ni Pilung. Mus nga tomuren ni kan n’ag fan e denen rok, me yog ni gaar: “Denen rog e ke ingeg.” (Ps. 40:12; 65:3) Tomuren nra sul be’ ngak Jehovah, ma rayog ni nge yan boor e duw ni yugu be lemnag e kireb ni i rin’ ara i tamra’ ko n’en ni i rin’. Isabelle e nni tharbog mab pag 20 e duw mfini sul ko ulung.a I yog ni gaar, “Ba mo’maw’ ni nge mich u wan’ug nrayog ni nge n’ag Jehovah fan e kireb rog.” Faanra mulan’um, ma rayog ni ngkum meewar bayay ko tirok Got ban’en. (Prov. 24:10) Ere mu gay rogon ndabi buch e re n’ey rom.

Ku bay boch e walag ni ma magafan’rad ni bochan e yad be lemnag ndabiyog ni ngar rin’ed e tin nib t’uf ni ngar rin’ed ya nge yag ni ngki chugur e tha’ u thilrad Jehovah bayay. Tomuren ni sul Antoine ko ulung me yog ni gaar, “Boor ban’en ni kug fil ara ug rin’ u m’on ni ngan tharbogeg ni kug pagtalin.” Bochan e re n’ey, ma aram fan ni bay boch e walag ndarur rin’ed urngin e tin nrayog rorad ni fan ngak Jehovah.

Faanra kireb e naun rok be’ u tan e yoko’, ma nap’an nra lemnag urngin e tayim nge gelngin e maruwel nib t’uf ni nge tay ni ngki ngongliy bayay, ma rayog ni nge pi’ magaran ngak. Ere ku arrogon ni faanra ke kireb e tha’ u thilmew Jehovah ni bochan reb e denen nib ubchiya’ ni kam rin’, ma rayog ni ngam lemnag ni boor ban’en nib t’uf ni ngam rin’ ya nge yag ni ngkum fal’eg e tha’ u thilmew Jehovah bayay. Machane bay ban’en nrayog ni nge ayuwegem.

Be gaar Jehovah ngodad: “Mired ngad puruy’gad [“ngad pithiged e magawon ni bay u thildad,” NW].” (Isa. 1:18) Ba gel e maruwel ni kam tay ni ‘ngam pithig e magawon ni bay u thilmew’ Jehovah. Gab t’uf rok ni bochan e kam rin’ e re n’ey. Am lemnag e re n’ey: Bochan ni kam sul ngak Jehovah, ma rayog ni nge micheg ni Satan e ba malulfith l’igin!—Prov. 27:11.

Ga ra sul ngak Jehovah, ma aram e kam chugurnagem ngak ma ke micheg ni ku ra chugurnag ir ngom. (Jas. 4:8) Machane ku bay boch ban’en nib t’uf ni ngam rin’ ko bin kemus ni nge nang e girdi’ ni kam sul ko ulung bayay. Ba t’uf ni ngam ulul ni ngam gelnag e t’ufeg u thilmew Jehovah ni ir e Chitamam nge Fager rom. Uw rogon nrayog ni ngam rin’ e re n’ey?

MU NAMEG BOCH BAN’EN NRAYOG NI NGAM RIN’

Mu guy rogon ni ngam nameg boch ban’en nrayog ni ngam rin’. Sana dawor mu pagtalin e tin nib mom e machib ni kam fil u murung’agen Jehovah nge Paradis ni ke micheg. Machane chiney e ba t’uf ni ngam rin’ boch ban’en bayay ni bod rogon e machib, nge muulung, ma ga be chag ko pi walag u lan e ulung. Am lemnag e pi n’en baaray nrayog ni ngam nameg.

Um meybil ngak Jehovah ni gubin ngiyal’. Manang e Chitamam ni bay u tharmiy ni faanra um par ni ga be lemnag e kireb ni um rin’, ma rayog ni nge mo’maw’ ngom ni ngam meybil ngak. (Rom. 8:26) Machane ‘um meybil ni gubin ngiyal’’ ni ga be yog ngak Jehovah gelngin nri ga baadag ni ngam mang fager rok. (Rom. 12:12) I yog Andrej ni gaar: “Ug par ni yug gu be lemnag e kireb ni kug rin’ ma gu be tamra’ ngay. Machane gubin yay ni gu ra meybil, me war boch e re lem ney rog miki gapas lanin’ug.” Faanra dam nang e n’en nga mog u lan e meybil rom, mag beeg fa gal meybil rok David ni Pilung ni bay ko Psalms 51 nge 65.

Um fil e Bible ni gubin ngiyal’. Re n’ey e ra ayuwegem ni nge gel e michan’ nge t’ufeg rom ngak Jehovah. (Ps. 19:7-11) I yog Felipe ni gaar: “Bochan nda ug beeg ma gu be fil e Bible rog ni gubin ngiyal’, ma aram tapgin nug meewar mug rin’ ban’en ni kirebnag laniyan’ Jehovah. Dabug ni ngkug kirebnag laniyan’ Jehovah bayay, ere gu dugliy ni ngaug fil e Bible rog ni gubin ngiyal’.” Ku rayog ni ngam rin’ e re n’ey. Faanra ba t’uf ni ngam nang boch ban’en nrayog ni ngam mel’eg ni ngam fil u nap’an e fol Bible, mag ning e ayuw ngak reb e fager rom ni ke ilal ko tirok Got ban’en.

Mu fal’eg bayay e tha’ u thilmed e pi walag. Bay boch e walag ni yad ra sul ko ulung, ma ma magafan’rad nri chey ma bay boch e walag ni yad ra damumuw ngorad. I yog Larissa ni gaar: “Rug tamra’ nib gel, ya gu lemnag ni bay boch e walag u lan e ulung ni kug kirebnag lanin’rad. Ba n’uw nap’an ni ug lem ni aray rogon.” Nge pagan’um ngay ni baadag e piin piilal nge pi walag ni kar ilalgad ko tirok Got ban’en ni ngar ayuweged gur ngki fel’ e tha’ u thilmew Jehovah bayay. (Mu guy fare kahol ni “Mang e Rayog ni Nge Rin’ e Piin Piilal?”) Yad ba felfelan’ ni kam sul ko ulung, ma yad baadag ni ngkum felfelan’!—Prov. 17:17.

Mang e ra ayuwegem ni ngam chugur ko ulung? Mu un nga gubin e muulung ma ga be chag ko pi walag ni gubin ngiyal’ u nap’an e machib. Uw rogon nra ayuwegem e re n’ey? I gaar Felix: “I athapeg e pi walag ni nggu sul ko ulung. Gu nang nri gub t’uf rorad. Ra ayuweged gag ni nggu nang ni kug mang bang ko ulung bayay, ma ke n’ag Jehovah fan e kireb rog, ma rayog ni nggu ulul ko pigpig ni gu be tay ngak.”—Mu guy fare kahol ni “Mang e Rayog ni Ngam Rin’?”

DABI MULAN’UM!

Ra ulul Satan ni nge k’aring boch e magawon ni nge yib ngom ni kan taarebrogonnag ko “yoko’,” ya nge guy rogon ni ngam meewar ndabkiyog ni ngam fal’eg e tha’ u thilmew Jehovah bayay. (Luke 4:13) Ere mu guy rogon ni ngam gelnag e tha’ u thilmew Jehovah e chiney.

Baaray e n’en ke micheg Jehovah u murung’agen e pi saf rok ni ke gaar: “Bay gu gayiy e tin ni ke yan nga bang, mu gu fulweg e tin ni kar olobochgad ka ranod nga bang, mu gu m’ag e mad ko yungi n’en ni ke maad’ad u downgin e tin ni ke maad’ad, mu gu golnag e tin ni ke m’ar.” (Ezek. 34:16) Boor e walag ni ke ayuwegrad Jehovah ni ngki fel’ e tha’ u thilrad bayay. Ere nge pagan’um ngay ni baadag ni nge ayuwegem ni ngki fel’ e tha’ u thilmew bayay.

Mang e Rayog ni Nge Rin’ e Piin Piilal?

Boor ban’en nrayog ni nge rin’ e piin piilal ni ngar ayuweged e pi walag ni kar sulod ko ulung ni ngki fel’ bayay e tha’ u thilrad Jehovah. Mu tay fanam i yan u boch ban’en nrayog ni ngar rin’ed ni fan ko pi walag ney.

Mu ayuweged yad ni ngki pagan’rad bayay. Manang apostal Paul nrayog ni ngari “kireban’” be’ ni ke sul ko ulung. (2 Kor. 2:7) Rayog ni nga i par ni be tamra’ ko kireb ni i rin’ me mulan’. I fonownag Paul e pi walag u lan e ulung ni gaar: “Ngam n’iged fan u wun’med e tin ni ke rin’ mi gimed pi’ e athamgil nga laniyan’.” Piin kar sulod ko ulung e ba t’uf ni ngar nanged ni yad ba t’uf rok Jehovah nge pi walagrad. Ra i yog e piin piilal fel’ngin e tin yad be rin’ mar ayuweged yad, ma aram e rayog ndabi mulan’rad.

Mmeybilgad u taabang. “Meybil rok be’ nib mat’aw e ba’ angin ni ba ga’.” (Jas. 5:16) Larissa ni faan kan weliy murung’agen e yog ni gaar: “Gu weliy ko piin piilal e pi n’en be maruwar u wan’ug nge pi n’en nug be rus ngay. Ere gu meybilgad u taabang mu kur pied e meybil ni fan ngog. Gu nang ndawori damumuw e piin piilal ngog, ya yad baadag ni ngar ayuweged gag ni ngki fel’ e tha’ u thilmow Jehovah bayay.” I gaar Theo: “Meybil nug ted e piin piilal u taabang e ayuwegeg ni nge pagan’ug ni gub t’uf rok Jehovah ma ma yaliy fel’ngig, ma gathi kemus ni yigoo thibngig.”

Ngam manged fager rorad. Piin kar sulod ko ulung e ba t’uf ni nge yag boch e fager ngorad u lan e ulung. I yog Justin nreb e piilal ni gaar: “Um machibgad u taabang ko ngiyal’ nrayog, mag yan mu guyrad nga taferad. Rib ga’ fan ni ngan m’ag fager ngorad!” Ki yog yugu reb e piilal ni ka nog Henry ngak ni gaar, “Faanra guy e pi walag u lan e ulung e piin piilal ni yad be m’ag fager ngak be’ ni ke sul ko ulung, ma aram e yad ra guy rogon ni ngkur rin’ed e re n’ey.”

Mu ayuweged yad u rogon ni ngar filed e Bible rorad. Rayog ni nge ayuweg reb e walag ni ke ilal ko tirok Got ban’en be’ ni ke sul ko ulung ni nge tabab ni nga i fil e Bible rok ni yigoo ir. I yog reb e piilal ni ka nog Darko ngak ni gaar: “Gu baadag ni gu ma weliy ngorad boch ban’en ni kug pirieg u nap’an e fol Bible nug ma tay ni yigoo gag, mu kug dag ngorad nrug baadag ni gu ma fil e Bible rog ni yigoo gag. Kug ma yarmiy ni nggu filed boch e article u taabang nra pi’ e athamgil nga lanin’rad.” Ki yog reb e piilal ni ka nog Clayton ngak ni gaar: “Gu ma pi’ e athamgil nga lanin’rad ni ngar gayed murung’agen boch e girdi’ u Bible ni ur mada’naged boch e magawon ni bod e magawon rorad, mar guyed e n’en nrayog ni ngar filed rorad.”

Mu pied e athamgil nga lanin’rad. Piin kar sulod ko ulung e yad manang ni piin piilal e yad boch e tapuf oloboch. Machane chiney e ba t’uf ni ngar nanged ni ku yad ma pi’ e athamgil nga lanin’uy. (Jer. 23:4) Mu gurgad ko motoyil mu u moged fel’ngin e tin yad be rin’. Um nonad ngorad ni gubin ngiyal’. Mu tay fanam i yan ko n’en ni yog Marcus nreb e piilal u nap’an nra yan i guy e pi walag ney ni nge pi’ e athamgil nga lanin’rad. I gaar: “Gamad ma beeg reb e thin nu Bible ngorad, ma gamad yog fel’ngin e tin yad be rin’, ma gamad yog ngorad ni gamad ba felfelan’ ni kar athamgilgad kar sulod ko ulung maku arrogon Jehovah nib felfelan’ ngorad. Tomuren mu ku gogned e rofen ni ngkug wan gguyed yad bayay.”

a Kan thilyeg fithingan e girdi’ ko re article ney.