Mang Fan Nder Yag ni Nge Chuw e Fanenikan?

Mang e Fanenikan?

Fanenikan e aram e ngarin dabuy daken be’ ara ba ulung i girdi’. Biney e lem e kab gel ko bin kemus ni ngan damumuw ngak be’ u lan ba ngiyal’.

FAN NI MA TABAB E GIRDI’ NI NGAUR FANENIKAYED YAD

Boor fan ni ma tabab e girdi’ ni ngar fanenikayed yugu boch e girdi’. Ba ga’ ni yad ma fanenikay yugu boch e girdi’ ni gathi ri bochan e n’en yad ma rin’, ya bochan rarogorad. Rayog ni yad be fanenikayrad ni bochan e yad be lemnag ni yad boch e girdi’ nib kireb, ma yad ma gafgownagey, ma dabiyog ni ngar thilgad. Rayog ni ngaun lemnag ndariy farad ara yad be magawonnag e girdi’. Piin yad be fanenikay yugu boch e girdi’ e rayog ni ka un li’rad, ara ka un rin’ boch ban’en nde mat’aw ngorad, ara ka i buch boch ban’en rorad ni ke k’aring ni nge sum e fanenikan nga gum’ircha’rad.

ROGON NI MA GARER

Bay yu ngiyal’ ni ma fanenikay e girdi’ yugu boch e girdi’ ndariy ba ngiyal’ ni kar mada’gad. Bod ni girdi’ e ba ga’ ni yad ma lemnag rarogon ba ulung i girdi’ ni bod rogon ni be lemnag chon e tabinaw nge pi fager rorad. Aram fan ni faanra bay boch e girdi’ u lan e tabinaw rorad ni be fanenikay ba ulung e girdi’, ma dabi n’uw nap’an ma sana gubin e girdi’ u lan fare tabinaw ni yad ra tabab ni ngaur lemgad ni aram rogon.

Nap’an ni gad ra nang feni mom ni ma garer e fanenikan, ma aram e gad ra nang fan ni boor e girdi’ ni yad ma fanenikay yugu boch e girdi’. Machane ra nge tal e fanenikan mab t’uf ni ngad nanged rogon ni sum. Bible e rayog ni nge ayuwegdad ngad nanged e re n’ey.

BE WELIY E BIBLE ROGON NI SUM E FANENIKAN

FANENIKAN E GATHI GIRDI’ E SUM RORAD. I tabab u nap’an ni chel reb e engel u tharmiy nge togopuluw ngak Got, me boch nga tomuren mu un pining Satan ni Moonyan’ ngak. I mang “be’ ni ma thang e fan” u nap’an ni togopuluw. Bochan ni ir e “ma lifith l’ugun me ir e chitamangin urngin e malulifith,” ma aram fan ni ka be ulul ni nge k’aring e fanenikan nge ngongol u fithik’ e maangach. (John 8:44; 1 John 3:11, 12) Be yog e Bible ni ir be’ nrib kireb, mab damumuw, ma ma ngongol u fithik’ e maangach.​—Job 2:7; Revelation 12:9, 12, 17.

BA MOM KO GIRDI’ NDAWOR RA FLONTGAD NI NGAUR FANENIKAYED E GIRDI’. Adam ni ir e bin som’on e pumoon ni immoy e folwok ko n’en ni rin’ Satan. Bochan e re n’ey, ma aram fan ni urngin e girdi’ ni ke af e denen ngorad ma dakur flontgad. (Roma 5:12) Kain ni ir e bin som’on i fak Adam e thang e fan rok Abel ni walagen ni bochan e be fanenikan. (1 John 3:12) Riyul’ ni boor e girdi’ ni yad ma dag e t’ufeg nge runguy. Machane bochan ni ke af e denen ngodad, ma aram fan ni boor e girdi’ ni yigoo yad e yad ma lemnaged yad, ma yad ma awan’, mab tolangan’rad. Ireray boch e ngongol ni ma k’aring e fanenikan.​—2 Timothy 3:1-5.

BE’ NDABUN DAKEN E PIIN YAD BA THIL NGAK E BA MOM NI NGE FANENIKAN BE’. Re fayleng ney e ma tay tanggin e lem nge ngongol ndariy e runguy riy nge pi n’en nra gafgownag e girdi’, ma aram e n’en be munnag daken e fanenikan ni be tay e girdi’. Bochan ni Satan ni Moonyan’ e ir e ke ‘suwey’ e re fayleng ney, ma aram fan nder tal e laniyan’, nge thin nib kireb, nge girdi’ ni yibe gafgownagrad, nge piin dubrad daken e piin yad ba thil ngorad, nge piin yad be kirebnag boch ban’en.​—1 John 5:19.

Machane gathi kemus ni be yog e Bible e gin ni sum e fanenikan riy ya ku be yog rogon nra chuw.