ROGON NI NGE TAL E FANENIKAN

2 | Dab Mu Sulweg Taban E Kireb

Be Gaar e Bible:

“Faanra rin’ be’ ban’en nib kireb ngomed, ma dab mu sulweged taban ngak nib kireb. . . . Mu rin’ed urngin e tin nrayog romed ngam pired ni ba aw e gapas u thilmed nge urngin e girdi’. . . . Dab mu fulweged ngak be’ taban e kireb ni rin’ ngomed. . . . Ya be yog e babyor nib thothup ni be gaar, ‘Be gaar Somol, ke mil fan ngog, ni gag e bay gu fulweg taban e kireb.’”—ROMA 12:17-19.

N’en Be Yip’ Fan:

Yugu aram rogon nib ga’ ni gad ma damumuw u nap’an ni ke rin’ be’ ban’en nib kireb ngodad, machane de m’agan’ Got ngay ni ngad sulweged taban e pi n’em. Ya baadag ni ngad gum’an’naged gadad ni bochan e ke micheg ndab ki n’uw nap’an ma bayi yal’uweg urngin e ngongol nde mat’aw ni yibe rin’.—Psalm 37:7, 10.

N’en Nrayog ni Ngam Rin’:

Nap’an nra sulweg e girdi’ ndawor ra flontgad taban e kireb ni yibe rin’ ngorad, ma aram miki mun daken e fanenikan. Ere faanra ke kirebnag be’ lanin’um ara ke gafgownagem, ma dab mu sulweg taban e pi n’em ngak. Mu guy rogon ni ngam t’ar lanin’um mag ngongol u reb e kanawo’ nra awnag e gapas. Yu ngiyal’ e kab fel’ ni nge dab kum lemnag e n’en ke buch. (Proverbs 19:11) Ma yu ngiyal’ e ba fel’ ni nga mog ngak be’ e n’en ke buch. Bod ni faanra ke rin’ be’ ban’en ngom nib kireb nib togopuluw ko motochiyel ko am, ma rayog ni ngam dugliy ni nga mog ko polis ara boch e girdi’ ko am nrayog ni ngar pied e ayuw.

Yira sulweg taban e kireb ma ra mun daken e magawon

Machane uw rogon ni faanra gowa dariy reb e kanawo’ nrayog ni ngan pithig fare magawon riy u fithik’ e gapas? Fa reb e kam rin’ urngin ban’en nrayog rom ni ngam pithig fare magawon u fithik’ e gapas? Faanra aram rogom, ma dab mu sulweg taban e kireb ni kan rin’ ngom, ya ra mun daken fare magawon. N’en ni ngam rin’ e ngam guy rogon ni nge dabki ulul e fanenikan. Rayog ni ngam fil rogon ni nge pagan’um nga rogon ni ma pithig Got e magawon. “Mu pagan’um ngak, me ayuwegem.”—Psalm 37:3-5.

Murung’agen Be’—ADRIÁN

e Tal Ndaki Lemnag ni Nge Sulweg Taban e Kireb

Nap’an ni kab fel’ yangaren Adrián me mang be’ nib ta cham, ma ma fanenikan e girdi’, ma baadag ni nge gafgownag e piin yad be gafgownag. I gaar: “Ba ga’ nug ma un ko cham ni yima tay ni yibe fanay e boyoch, ma bay in yay nni digeyeg u lan e kanawo’ ni gub thiy ko racha’ ni ke chugur ni nggum’.”

Nap’an ni gaman 16 e duw rok, me tabab ko fol Bible. Ki ulul ngay ni gaar: “Nap’an nug be mon’og ko fol Bible nug be tay, mug guy ni bay boch ban’en u rarogog nib t’uf ni ngu thilyeg.” Ba t’uf ni nge tal ndab ki fanenikay e girdi’ ma dabki un ko cham. Ri yib angin ngak e n’en ni fil ko Roma 12:17-19 ni be yog ndab un sulweg taban e kireb. I gaar: “Munmun me m’agan’ug ngay nra chuweg Jehovah urngin ban’en ni be buch nde mat’aw u rogon nib m’agan’ ngay nge ngiyal’ ni ke dugliy. Buchuuw ma buchuuw me yag ni nggu tal ndab kug un ko cham.”

Bay reb e nep’ ni yib ba ulung i pagel ni ngar lied ni ur chamgad kafram. I tolul e en nib ga’ rorad ni gaar: “Moy ngad chamgad!” I yog Adrián ni gaar: “Rug baadag ni nggu cham.” Machane de un ngorad ko cham, ya meybil ngak Jehovah u laniyan’ me chuw.

I ulul ngay ni gaar: “Faani bin migid e rran mug guy faen nib ga’ rorad ni yigoo ir. Nap’an nug guy ma rug damumuw nug baadag ni nggu sulweg ngak taban e n’en kar rin’ed ngog. Machane mu kug meybil ngak Jehovah bayay u lanin’ug ni gu be wenig ngak ni nge ayuwegeg ni nggu filan’ug rok. Gu lemnag ni ku ra damumuw, machane mug gin ngay u nap’an ni yib ko gin gu bay riy me gaar ngog: ‘Mu n’ag fan rog e n’en ni buch fowngan. Bin riyul’ riy e, gu baadag ni nggu bodem. Gu baadag ni nggu fil e Bible.’ Rug felfelan’ ni yag rog ni nggu filan’ug ko damumuw rog! Bochan e re n’ey, ma aram me yag ni nggu tababgow ko fol Bible u taabang.”