ROGON NI NGE TAL E FANENIKAN

4 | Mu Gel Ko Fanenikan U Daken E Ayuw Rok Got

Be Gaar e Bible:

“Fare Kan ni Thothup [“gelngin Got nib thothup,” NW] e ma sunumeg u lanin’dad e t’ufeg, nge felfelan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an’, nge t’ar laniyan’.”—GALATIA 5:22, 23.

N’en Be Yip’ Fan:

Rayog ni nge tal e fanenikan u daken e ayuw rok Got. Gelngin nib thothup e rayog ni nge ayuwegdad ni nge yag boch e fel’ngin ngodad ndabiyog ni nge yag ngodad u gelngidad. Ere ba fel’ ni ngad taga’gad ko ayuw ni ma pi’ Got ko bin ni gadad rodad e ngad guyed rogon ni ngad taleged e fanenikan. Faan gad ra rin’ e re n’ey, ma aram e gad ra lem ni bod apostal Paul ni faani yoloy ni gaar: “Re gelngin nem ni ir e ba th’abi gel e yib rok Got, ma gathi gamad e yib romad.” (2 Korinth 4:7) Arrogon, rayog ni nge lungudad: “Ayuw ni ma yib ngog e ma yib rok Somol.”—Psalm 121:2.

N’en Nrayog ni Ngam Rin’:

“Ug moy ni gub ta cham ma ke ayuwegeg Jehovah kug mang be’ nug ma par ni gub gapas.”—WALDO

Mmeybil ngak Jehovah ngam ning gelngin nib thothup u fithik’ e yul’yul’. (Luke 11:13) Mu wenig ngak ni nge ayuwegem nge yag ni m’ug boch e fel’ngin rom nib manigil. Mu fil e n’en be yog e Bible u murung’agen e pi fel’ngin nrayog ni nge chuweg e fanenikan, ni bod e t’ufeg, nge gapas, nge gum’an’, nge t’ar laniyan’. Mu gay boch e kanawo’ nrayog ni nge m’ug e pi fel’ngin ney ko ngongol rom. Mu kum chag ngak e piin yad ma guy rogon ni nge m’ug e pi fel’ngin ney rorad. Pi girdi’ ney e rayog ni ngar ayuweged gur ni ngam ‘dag ko girdi’ ni yad ba t’uf rom ma ga be rin’ e tin nib fel’ ngorad.’—Hebrews 10:24.

Murung’agen Be’—WALDO

e Yag ni Nge Tal ko Cham nge Fanenikan

Waldo e ba gel e gafgow ni un tay ngak u nap’an ni kab bitir, ma aram me sug e fanenikan nga gum’irchaen. I gaar: “Gubin ngiyal’ ni gamad ma cham boch e girdi’ ni yad ma pi’ boch e falay ni kireb ni chuway’ . . . Bay bayay ni pi’ ba ulung i girdi’ nib kireb ni gamad ba tathil puluwon be’ nib pumoon nib ta cham ni nge yib i lieg nggum’, machane i yag ni nggu mil rok ni yugu aram rogon ni ke rogoy e yar ngog.”

De felfelan’ Waldo u nap’an ni tabab leengin ni ngar filed e Pi Mich Rok Jehovah e Bible. I gaar: “Rug ma fanenikay e Pi Mich, ma boor yay nug ma tolul ngorad ni gu be yog e thin nib kireb. Machane gubin ngiyal’ ni yad ma ngongol u fithik’ e gapas.”

Boch nga tomuren me un Waldo ko fol Bible. I gaar: “De mom ni nggu fol ko n’en nug be fil. Gu lemnag ndabiyog ni nggu digey e damumuw nge cham.” Machane bay ban’en ni fil u Bible nri ayuweg.

I weliy ni gaar: “Bay reb e rran ni yog Alejandro ngog ni ir e ma fil e Bible ngog ni nggu beeg e Galatia 5:22, 23. . . . I weliy ngog ndabiyog ni nge yag e pi fel’ngin ney ngog u gelngig, machane ra ayuwegeg Got u daken gelngin nib thothup. Re n’ey e ri thilyeg rogon e lem rog!”

I yag ni nge tal ndab ki fanenikay e girdi’ ni bochan e pag Got ni nge ayuweg. I gaar: “Girdi’ rog nge pi fager rog kafram e dabiyog ni nge mich u wan’rad gelngin ni ka rug thil.” Ki ulul ngay ni gaar: “Ug moy ni gub ta cham ma ke ayuwegeg Jehovah kug mang be’ nug ma par ni gub gapas.”