Piin Gallabthir​—Mu Ayuweged Pi Fakmed ni Nge T’uf Jehovah Rorad

1-2. Mu weliy rogon nrayog ni nge ga’ fan boch e thin nu Bible u wan’dad u nap’an nra thil boch ban’en u lan e yafos rodad.

NAP’AN nra mabgol l’agruw ni’, mab ga’ ni ma pi’ reb e piilal ba welthin ni murung’agen e mabgol. Pi thin nu Bible ni yira weliy ko re welthin nem e gathi fin aram e som’on ni kar rung’agew. Machane chiney e kari ga’ fan e pi thin ney u wan’row. Mang fan? Ya chiney e kar mabgolgow mab t’uf ni ngar folgow ko pi thin nem.

² Ku arrogon u nap’an nra fakay ba wu’ e mabgol ni Kristiano e bitir. Sana rayog ni ke yoor e duw ni yow ma rung’ag boch e welthin ni yima pi’ u murung’agen e chugol bitir. Machane chiney e kari ga’ fan e pi kenggin e motochiyel ney u wan’row, ya aram e ngar fakayew reb e bitir. Rib ga’ e biney e maruwel ni ke milfan ngorow! Ere nap’an nra thil boch ban’en u lan e yafos rodad, ma bay boch e thin nu Bible nra gel feni ga’ fan u wan’dad. Ireray reb i fan ni ma beeg e pi tapigpig rok Jehovah e thin nu Bible mar fal’eged i lemnag u “n’umngin nap’an e yafos” rorad ni bod rogon nnog ko pi pilung nu Israel ni ngar rin’ed.​—Deut. 17:19, BT.

3. Mang e gad ra weliy ko re article ney?

³ Gimed e piin gallabthir e bay reb e tin th’abi fel’ e tow’ath romed nrayog ni nge yag ngak e piin Kristiano. Re tow’ath nem e aram e ngam filed ngak pi fakmed murung’agen Jehovah. Machane gathi kemus ni ngam filed e tin riyul’ u murung’agen e Got rodad ngorad, ya ki gimed ba baadag ni ngam ayuweged yad ni ngari t’uf rorad. Ere mang e rayog ni ngam rin’ed ya nge yag ni ngari t’uf Jehovah rok pi fakmed? Gad ra weliy ko re article ney aningeg kenggin e motochiyel u Bible nra ayuwegmed e piin gallabthir. (2 Tim. 3:16) Ku gad ra weliy angin ni ke yib ngak boch e gallabthir ni Kristiano ni bochan e kar folgad ko pi fonow u Bible.

ANINGEG KENGGIN E MOTOCHIYEL U BIBLE NRA AYUWEG E PIIN GALLABTHIR

4. Mang reb i kenggin e motochiyel nra ayuweg e piin gallabthir ya nge yag nra ayuweged pi fakrad ni nge t’uf Jehovah rorad? (James 1:5)

⁴ Bin 1: Mu sap ngak Jehovah ni nge pow’iyem. Mog ngak Jehovah ni nge pi’ e gonop ngom ya nge yag nim ayuweg pi fakam ni nge t’uf rorad. (Mu beeg e James 1:5.) Ir e En th’abi fel’ ni nge pi’ e fonow ngodad. Boor fan ni ir e en th’abi fel’ ni nge rin’ e re n’ey. Baaray l’agruw. Bin som’on e bochan ni ir e en th’abi yoor ban’en ni manang u murung’agen rogon ni ngan mang gallabthir. (Ps. 36:9) Ma bin l’agruw e gubin ngiyal’ ni ma yib angin e fonow ni ma pi’ ni bay e gonop riy.​—Isa. 48:17.

5. (a) Mang e ma pi’ e ulung rok Jehovah ni nge ayuweg e piin gallabthir? (b) Mang e kam fil u rogon ni chuguliy Brother nge Sister Amorim pi fakrow nrogon ni ke m’ug ko fare video?

⁵ Boor ban’en ni be pi’ Jehovah u daken e Thin nge ulung rok nra ayuweg e piin gallabthir ni ngar chuguliyed pi fakrad ni nge t’uf rorad. (Matt. 24:45) Rayog ni ngam pirieg boch e fonow nib manigil u lan fapi article ni kenggin e “Help for the Family” ni immoy kafram u lan e Awake!, ma chiney e kan tay ko website rodad. Ku boor e video ko jw.org nrayog ni nge ayuweg e piin gallabthir ni ngar folgad ko fonow rok Jehovah u nap’an ni yad be chuguliy pi fakrad.b​—Prov. 2:4-6.

6. Uw rogon u wan’ reb e matam e fonow ni ma pi’ e ulung rok Jehovah ngorow leengin?

⁶ Boor e gallabthir ni ka rogned nri yad be pining e magar ko ayuw ni be pi’ Jehovah ngorad u daken e ulung rok. Bay reb e matam ni ka nog Joe ngak ni yog ni gaar: “De mom ni ngan chuguliy dalip e bitir ko tin riyul’. Gubin ngiyal’ ni gamow ma ning leengig e ayuw ngak Jehovah u daken e meybil. Mab ga’ ni ma yib reb e article ara video ko ngiyal’ nib puluw nra ayuwegmow ko magawon ni gamow be mada’nag. Gubin ngiyal’ ni gamow ma taga’ ko fonow rok Jehovah.” Ke guy Joe nge leengin ni pi n’ey e be ayuweg pi fakrow ni ngar chugurgad ngak Jehovah.

7. Mang nib ga’ fan ni nge athamgil e piin gallabthir u rogon nrayog rorad ni ngar daged e ngongol nib manigil ni nge folwok pi fakrad riy? (Roma 2:21)

⁷ Bin 2: Mu fil ban’en ngorad u daken e ngongol rom. Piin bitir e yad ma fal’eg i yaliy e ngongol ko gallabthir rorad mab ga’ ni yad ma folwok riy. Riyul’ ndariy reb e gallabthir nib flont. (Rom. 3:23) Machane susun ni ngar athamgilgad u rogon nrayog rorad ni ngar daged e ngongol nib manigil ni nge folwok pi fakrad riy. (Mu beeg e Roma 2:21.) I weliy reb e matam murung’agen e piin bitir ni gaar: “Yad bod e sponge ndemtrug ban’en nib ranran nra wanum nga fithik’.” Ki gaar: “Nap’an ni yad ra guy ndarud rin’ed e n’en gad be fil ngorad ni ngar rin’ed ma yad ra yog ngodad.” Ere faanra gad baadag ni nge t’uf Jehovah rok pi fakdad, ma thingari ki t’uf rodad me m’ug ko ngongol rodad.

8-9. Mang e kam fil ko n’en ni yog Andrew nge Emma?

⁸ Boor e kanawo’ nrayog ni nge fil e piin gallabthir ngak pi fakrad ni nge t’uf Jehovah rorad. Mu tay fanam i yan ko n’en ni yog reb e walag ni kab pagel ni 17 e duw rok ni ka nog Andrew ngak ni gaar: “Gallabthir rog e gubin ngiyal’ ni yow ma fil ngog feni ga’ fan ni ngaun meybil. Gubin e blayal’ ni gamow ma meybil e chitamag u taabang ni yugu aram rogon ni kug mu’ ko meybil ni yigoo gag. Gubin ngiyal’ ni ma puguran e gallabthir romow ngomow ni yow ma gaar: ‘Rayog ni ngam nonow ngak Jehovah ndemtrug urngin yay ni gimew baadag.’ Bochan e re n’ey ma aram mi ri ga’ fan e meybil u wan’ug, ma chiney e ke mom ngog ni ngaug meybil mug tay Jehovah ni ir reb e Matam ni gub t’uf rok.” Gimed e piin gallabthir e dab mu paged talin ni t’ufeg romed ngak Jehovah e rayog ni nge ayuweg pi fakmed ni ngki t’uf Jehovah rorad.

⁹ Kum lemnag e n’en ni buch rok Emma. Nap’an ni n’ag e chitamangin e tabinaw rok, mab ga’ e malfith rok ni immoy nib t’uf ni nge thang e chitiningin. I gaar Emma: “Boor yay ni ma magawon e chitinag ko salpiy, machane gubin ngiyal’ ni ma weliy rogon ni ma ayuweg Jehovah e pi tapigpig rok ma be pi’ e tin nib t’uf rorad. Rayog ni ngguy ko ngongol rok nrib mich e re n’ey u wan’. Chitinag e ma fol ko n’en ma fil ngog.” Ere mang e gad be fil riy? Piin gallabthir e rayog ni ngar filed ban’en ngak pi fakrad u daken e ngongol rorad ni yugu aram rogon ni yad be mada’nag e magawon.​—Gal. 6:9.

10. Mingiyal’ e rayog ni nge weliy e pi gallabthir nu Israel murung’agen Jehovah ngak pi fakrad? (Deuteronomy 6:6, 7)

¹⁰ Bin 3: Um non ngak pi fakam ni gubin ngiyal’. I yog Jehovah ngak piyu Israel kakrom ni ngaur filed murung’agen ngak pi fakrad ni gubin ngiyal’. (Mu beeg e Deuteronomy 6:6, 7.) Pi gallabthir nem e ra reb e rran ma boor e kanawo’ nrayog ni ngaur sabethingad pi fakrad riy ma yad be fil ngorad ni nge t’uf Jehovah rorad. Bod nreb e pagel e rayog ni boor e awa ni ma ayuweg e chitamangin riy ni ngar yungew e woldug ma yow be kunuy wom’engin e woldug ngar tew nga naun. Ma walagen nib pin e rayog nib ga’ e tayim u reb e rran ni ma ayuweg e chitiningin ni ngar yip’ew e mad, ma yow be lifith boch ban’en, maku yow be rin’ boch e maruwel u tabinaw. Ere nap’an ni yad be maruwel u taabang ma boor ban’en nib ga’ fan nrayog ni ngar weliyed. Bod nrayog ni ngar weliyed rogon feni manigil Jehovah nge rogon ni be ayuweg e tabinaw rorad.

11. Mingiyal’ e rayog ni nge non e piin gallabthir ngak pi fakrad?

¹¹ Ke thil rogon e par e chiney ko kafram. Boor e nam ni gallabthir nge bitir riy e dakurur rin’ed boch ban’en u taabang u reb e rran. Ya rayog ni ke yan fa gallabthir ko maruwel ma ke yan e bitir nga skul. Ere aram fan nthingari gay e piin gallabthir e tayim nrayog ni ngar nonad riy ngak pi fakrad. (Efe. 5:15, 16; Fil. 1:10) Rayog ni ngar rin’ed e re n’ey u nap’an e fol Bible ni tabinaw. I yog reb e walag ni kab pagel ni ka nog Alexander ngak ni gaar: “Chitamag e gubin ngiyal’ ni ma yarmiy e fol Bible ni tabinaw, ma der ma pag ban’en ni nge talegmad ndab gu ted e fol Bible. Nap’an ni gamad ra mu’ ko fol Bible, ma gamad sabethin.”

12. Mang e susun ni nge guy e en lolugen e tabinaw rogon ni nge rin’ u nap’an e fol Bible ni tabinaw?

¹² Faanra gur reb i lolugen e tabinaw, ma mang e rayog ni ngam rin’ ya nge yag ni adag pi fakam e fol Bible ni tabinaw ni gimed ma tay? Sana rayog ni ngam fil ngorad fare ke babyor rodad ni kab beech ni Mu Par Ndariy N’umngin Nap’an ni Gab Felfelan’! Re ke babyor ney e ma momnag rogon ni ngaun weliy boch ban’en u taabang. Ga baadag ni ngar weliyed lanin’rad ngom nge pi n’en be magafan’rad ngay, ere dab um fanay e ngiyal’ ni fan ko fol Bible ni tabinaw ni ngam gathibthibnagrad ara mu puwan’ ngorad. Kum guy rogon ndab mu damumuw ni faanra ka rogned ban’en nde puluw ko Bible. Ya ngam felfelan’ ngay ndarur magagawongad ni ngar weliyed e n’en bay u lanin’rad, mu kum pi’ e athamgil ngorad ni ngaur rin’ed e re n’ey. Rayog ni ngarim ayuweg pi fakam ni faanra ga manang rogon lanin’rad.

13. Ku mang boch e tayim nrayog ni nge ayuweg e piin gallabthir pi fakrad riy ni ngar chugurgad ngak Jehovah?

¹³ Gimed e piin gallabthir e ngam gayed boch e tayim u lan reb e rran ni ngam ayuweged pi fakmed riy ni ngar chugurgad ngak Jehovah. De t’uf ni ngam songad nga fini taw ko ngiyal’ ni ngam filed e Bible ngorad mfin mu weliyed murung’agen e Got rodad ni gad ba t’uf rok. Mu ted fanmed i yan ko n’en ni yog reb e matin ni ka nog Lisa ngak ni gaar: “Gamow ma ayuweg pi fakmow ni ngar nanged e n’en nib peth u thilin e tin kan sunmiy ban’en nge Jehovah. Bod nnap’an nra rin’ e kus romad ban’en nib mak’ak’ar u wan’rad, ma gamow ma yog ngorad nre n’ey e be dag ni Jehovah e ir reb e Got nib felfelan’ ma ke sunmiydad ni ngaud felfelan’gad mu kud minmingad nga boch ban’en nib mak’ak’ar.”

14. Mang nib ga’ fan ni nge ayuweg e piin gallabthir pi fakrad ni ngar fal’eged i mel’eg e piin ngar manged fager rorad? (Proverbs 13:20)

¹⁴ Bin 4: Mu ayuweg pi fakam ni nge yag boch e fager nib manigil ngorad. Be tamilangnag e Thin rok Got ni pi fager rodad e rayog ni ngar suruyed gadad ko tin nib fel’ ara tin nib kireb. (Mu beeg e Proverbs 13:20.) Ere ga manang ko mini’ e fager rok pi fakam, fa? Kam mada’nagrad ma kam rin’ed boch ban’en u taabang, fa? Mang e rayog ni ngam rin’ ya nge yag nim ayuweg pi fakam ni ngar m’ag fagergad ngak e piin nib t’uf Jehovah rorad? (1 Kor. 15:33) Rayog ni ngam ayuweg pi fakam ni nge yag boch e fager nib manigil ngorad ni aram e ngaum pining e piin nib fel’ e tha’ u thilrad Jehovah ni ngam rin’ed pi fakam boch ban’en u taabang.​—Ps. 119:63.

15. Mang e rayog ni nge rin’ e piin gallabthir ya nge yag nra ayuweged pi fakrad ni nge yag boch e fager nib manigil ngorad?

¹⁵ Bay reb e matam ni ka nog Tony ngak ni weliy e n’en kar rin’ew leengin ya nge yag nra ayuwegew pi fakrow ni nge yag boch e fager nib manigil ngorad. I gaar: “Ke yoor e duw ni gamow ma pining leengig boor e walag nga tabinaw romad nib thilthil yangarrad nge gin kar bad riy. Gamad ma abich u taabang mu kur uned ngomad ko fol Bible ni tabinaw. Ireray reb e kanawo’ nib manigil nrayog ni ngan nang riy boch e girdi’ nib t’uf Jehovah rorad ma yad be pigpig ngak u fithik’ e felfelan’. Bay boch e walag ni yad ma lekag e ulung, nge boch e missionary, nge yugu boch e walag ni ka ur pared romad. Boor ban’en ni ke fil pi fakmow ko pi n’en yad ma weliy ni ke buch rorad, nge rogon farad pasig, nge maruwel nib gel ni yad ma tay ni fan ko pigpig rorad ngak Jehovah, ma ke ayuwegrad e re n’ey ni ngar chugurgad ngak Jehovah.” Gimed e piin gallabthir e ngam dugliyed u wan’med ni ngam ayuweged pi fakmed ni nge yag boch e fager nib manigil ngorad.

DABI MULAN’UM!

16. Uw rogon ni faanra bay reb e bitir ni ke yog ndabun ni nge pigpig ngak Jehovah?

¹⁶ Uw rogon ni faanra bay reb e bitir rom ni ke yog ndabun ni nge pigpig ngak Jehovah ni yugu aram rogon ni kam athamgil u rogon nrayog rom ni ngam ayuweg? Dab mu lemnag nde yag ni ngam rin’ e maruwel rom ni gur reb e gallabthir. Gad gubin ni ke pi’ Jehovah e puf rogon ngodad nrayog ni ngad dugliyed ko ngad pigpiggad ngak fa danga’, ni kub muun fakam ngay. Faanra ke dugliy fakam ndab ki pigpig ngak Jehovah, ma ka rayog ni ngam athapeg nra ba ngiyal’ miki sul nge pigpig ngak. Mu lemnag fare fanathin u murung’agen fare pagel ni malog. (Luke 15:11-19, 22-24) Re pagel nem e boor ban’en nib kireb ni rin’, machane me yan i tomur riy me sul ko chitamangin. Sana ra gaar boch e girdi’: “Re n’ey e kemus nib fanathin. Gur, rayog ni nge buch ban’en ni aray rogon?” Rayog! Bin riyul’ riy e ireray e n’en ni buch rok be’ nib pagel ni ka nog Elie ngak.

17. Uw rogon ni ke pi’ e n’en ni buch rok Elie e athamgil nga lanin’um?

¹⁷ I weliy Elie murung’agen e gallabthir rok ni gaar: “Ra athamgilgow u rogon nrayog rorow ni ngar ayuwegew gag ni nge t’uf Jehovah rog nge Thin rok ni aram e Bible. Machane, nap’an ni fel’ yangareg mug tabab ko togopuluw.” I tabab Elie ni nga i mith nga i rin’ boch ban’en nib kireb, ma de motoyil ko gallabthir rok u nap’an ni yow be guy rogon ni ngar ayuwegew ni nge par nib chugur ngak Jehovah. Tomuren ni chuw u tabinaw, ma aram mi i rin’ boch e ngongol nib kireb. Yugu aram rogon, ma bay yu ngiyal’ ni yow ma weliy reb e fager rok murung’agen e Bible. I gaar: “Nap’an ni yoor ban’en u murung’agen Jehovah nug weliy ngak e fager rog, ma aram mug tabab ni ngaug lemnag Jehovah. Munmun ma tin riyul’ ni fil e gallabthir rog ngog e tabab ni nge ilal u gum’irchaeg.” Boch nga tomuren, me sul Elie ko tin riyul’.c Am lemnag gelngin e felfelan’ ni tay e gallabthir rok ni kar filew murung’agen Jehovah ngak u nap’an ni kab bitir!​—2 Tim. 3:14, 15.

18. Uw rogon u wan’um e pi gallabthir ni yad ma maruwel nib gel ni ngar filed ngak pi fakrad ni nge t’uf Jehovah rorad?

¹⁸ Gimed e piin gallabthir e ke pi’ Jehovah reb e tow’ath nrib manigil ngomed ni aram e ngam chuguliyed pi fakmed ni ngar manged e bin migid e mfen ni ngar pigpiggad ngak. (Ps. 78:4-6) De mom e re n’ey, ma gamad be pining e magar ngomed ko maruwel nib gel ni gimed be tay ni ngam ayuweged pi fakmed! Ere rayog ni nge pagan’med ngay ni faan gimed ra ulul ni ngam rin’ed e tin rayog romed ni ngam ayuweged pi fakmed ni nge t’uf Jehovah rorad mi gimed fil ngorad ni ngaur folgad rok, ma aram e ra felfelan’ e Chitamangidad ni bay u tharmiy ni gad ba t’uf rok.​—Efe. 6:4.