Deer ko Piin Ma Beeg
Mang e be yip’ apostal Paul fan u nap’an ni yog ni ir e bod “be’ nni gargelnag ndawori taw nga pulan”? (1 Korinth 15:8)
I yog Paul ko 1 Korinth 15:8 ni gaar: “Gag e tomur ni ki m’ug ngog—ni yugu aram rogon ni gu bod be’ nni gargelnag ndawori taw nga pulan.” Kafram e u dogned nrayog ni be weliy Paul murung’agen e n’en ni buch rok u nap’an nni pilyeg e changar rok nge guy Jesus ni bay u tharmiy. Re n’ey e bod ni kan gargeleg ara kan faseg nga reb e dowef ni gathi downgin e girdi’ boch e chibog u m’on ni nge tabab e biney e fos ko yam’. Machane tomuren ni kan fal’eg i fil e re thin nu Bible ney, ma kan guy nib t’uf ni ngan thilyeg rogon ni yibe weliy.
Riyul’ ni be weliy Paul u roy e n’en ni buch rok u nap’an ni pig nge mang reb e Kristiano. Machane mang e be yip’ fan u nap’an ni yog ni kan “gargelnag ndawori taw nga pulan”? Baaray in ban’en nrayog ni be yip’ fan.
Ba tomgin ni pig nge mang reb e Kristiano maku yira gin ngay. Ba ga’ ni bitir ni yima gargeleg ndawori taw nga pulan e ban’en ni ma buch nib tomgin ndan lemnag. Nap’an ni be milekag Saul (ni boch nga tomuren mu un pining Paul ngak) i yan nga Damaskus ni nge gafgownag e pi Kristiano u rom, ma de lemnag ni yira pilyeg e changar rok nge guy Jesus ni ke fos ko yam’. Gathi kemus ni yigoo Paul e gin ko n’en ni buch rok, ya kub muun ngay e pi Kristiano ni be lemnag ni nge gafgownagrad. Maku reb e rib tomgin e n’en ni buch rok nri da’da’ ngay. Bochan e re n’ey me daki guy ban’en u lan ba ngiyal’.—Acts 9:1-9, 17-19.
I mang Kristiano u “ba ngiyal’ nde puluw.” Fare bugithin ni Greek ni kan pilyeg ni “be’ nni gargelnag ndawori taw nga pulan” e ku rayog ni ngan pilyeg ni “be’ nni gargeleg u ba ngiyal’ nde puluw.” Baaray rogon ni kan pilyeg e re thin ney ko The Jerusalem Bible. Be gaar: “Gowa bod ni kan gargelnageg u ba ngiyal’ ndan lemnag.” Nap’an ni pig Paul nge mang reb e Kristiano, ma ke sul Jesus nga tharmiy. De guy Jesus ni kan faseg ko yam’ ko ngiyal’ ni baaram u m’on ni nge yan nga tharmiy, nib thil ko tin baaram e girdi’ ni weliy murung’agrad ko pi verse u m’on ko re thin ney nra guyed Jesus nni faseg ko yam’. (1 Kor. 15:4-8) Re n’ey ni m’ug Jesus ngak nib tomgin e bing e kanawo’ ngak ni nge guy Jesus u tomuren ni kan faseg ko yam’ ni yugu aram rogon ni gowa bod ni buch e re n’ey u “ba ngiyal’ nde puluw.”
Be weliy murung’agen u fithik’ e sobut’an’. Bay boch e girdi’ ni boor ban’en ni yad manang ni ka rogned nre thin ney ni fanay Paul u roy e rayog ni nge m’ug riy ni ir be’ ndariy fan. Faanra aray rogon e n’en be lemnag Paul, me ere n’en be yog e dariy rogon ni nge yag e biney e tow’ath ngak. Bin riyul’ riy e ulul ngay ni gaar: “Gag e th’abi sobut’ u fithik’ urngin e apostel—ya ri dariy rogog ni nga nog ni gag reb e apostel, ni fan e gu gafgownag girdien e galesiya rok Got. Machane Got e runguyeg nge ayuwegeg me pingegeg nggu par ni bod rogog e chiney.”—1 Kor. 15:9, 10.
Ere rayog ni be weliy Paul rogon ni m’ug Jesus ngak nib tomgin nde lemnag, ara rogon ni mang Kristiano u ba ngiyal’ nde lemnag nra buch riy, fa reb e rayog ni be yog ndariy rogon ni nge guy ban’en ni aray rogon ni yira ngat ngay. Demtrug rogon, ma rib ga’ fan u wan’ Paul e re n’ey ni buch rok. Re n’ey e ri micheg nga laniyan’ ni kan faseg Jesus ko yam’. Dariy e maruwar riy ni aram fan nib ga’ ni ma weliy murung’agen e re n’ey ni buch rok nde lemnag u nap’an ni be machibnag ko girdi’ murung’agen e fos ko yam’ ni tay Jesus.—Acts 22:6-11; 26:13-18.