Mu Gay Boch Ban’en Nrayog ni Ngam Fol Riy

Nap’an ni gad be beeg e Bible ma rayog ni ngad gayed murung’agen boch ban’en riy ya nge yag nda pirieged boch ban’en nrayog ni ngad filed ban’en riy ni kan taarebrogonnag ko machaf. Machane uw rogon nrayog ni ngari yib angin ngodad e beeg Bible ni gad ma tay?

Mu tiyan’um ko n’en ga be beeg u boch e thin nu Bible. Mu guy rogon ni ngam nang ko mini’ e yoloy fare thin, nge en ni yoloy nge yan ngak, nge ngiyal’ ni yoloy riy. Mang e be buch u nap’an nni yoloy e pi thin nem, ma mang e buch u m’on ngu tomuren e re ngiyal’ i n’em?

Mu lemnag e n’en nrayog ni ngam fil riy ni aram e ngam gay e fulweg ko pi deer ni baaray ni be gaar: ‘Uw rogon e lem rok e piin gu be beeg murung’agrad? Mang boch e fel’ngin ni i m’ug rorad? Ma mang fan nsusun e ngguy rogon ni nge m’ug e pi fel’ngin nem rog ara ngguy rogon ndab gu folwok ko ngongol nib kireb ni ur rin’ed?’

Mu fol ko n’en kam fil u nap’an e machib ara rogon ni ga ma ngongol ngak yugu boch e girdi’. Faan ga ra rin’ e re n’ey ma aram e ga be dag ni bay e gonop rok Got rom, ya be gaar e Bible: “Piin ni yad ba gonop e nguur lemniged e pi n’ey.”​—Ps. 107:43.

• Ban’en Nra Ayuwegey: Mu tay fanam i yan u rogon ni ma ayuwegdad e n’en bay u tan fare thin ni Tin nib Ga’ Fan ko Thin rok Got ni yima fil u nap’an e muulung ni yima tay u lan e wik ni ngad lemnaged rogon ni ngad folgad ko n’en gad be fil. Gubin ngiyal’ ni yima tay boch e deer ko n’en bay u tan e re thin ney nrayog ni ngad fithed gadad riy, nge boch ban’en nrayog ni ngad fal’eged i lemnag, nge boch e sasing nrayog ni ngad yaliyed.