Deer ko Piin Ma Beeg

Gur, fare thin ni bay ko 2 Thessalonika 3:14 ni be yog ni ngan ta’ fanay i yan rok be’ e ban’en ni nge rin’ e ulung ni ga’ngin ara piin Kristiano ni be’ nge be’?

I yol apostal Paul ko pi Kristiano u Thessalonika ni gaar: “Sana ba’ be’ u wur ni bay dabi fol ko thin ni kug pied ke yib ngomed u lan e gi babyor ney. Faanra ba’ mi gimed ta’ fanmed i yan rok.” (2 Thess. 3:14) Kafram e u dogned nre fonow ney e fan ko piin piilal. Faanra bay be’ nder fol ko pi kenggin e motochiyel u Bible ni yugu aram rogon ni ke yoor yay ni kan fonownag, ma rayog ni nge pi’ e piin piilal ba welthin ni be ginang e ulung. Tomuren, ma aram e dabki chag e pi walag ngak facha’ ni ngaur rin’ed boch ban’en u taabang ni ngar felfelan’gad ngay.

Machane ba t’uf ni ngad thilyeged rogon ni gad be weliy e re n’ey. Ba tamilang ni fonow ni pi’ Paul e fan ko n’en nsusun e nge rin’ e piin Kristiano ni be’ nge be’ u nap’an ni ke buch boch ban’en. Ere daki t’uf ni nge pi’ e piin piilal ba welthin ni be ginang e ulung. Mang fan ni kan thilyeg e re n’ey? Am lemnag e n’en be weliy Paul murung’agen u nap’an ni pi’ e re fonow ney.

I yog Paul ni bay boch e girdi’ u lan e ulung ni “darir folgad ko fonow.” Bay e fonow ni ke pi’ ngorad nib puluw ko Thin rok Got, machane darur folgad riy. Bay bayay ni yan i guy e ulung, me yog e pi thin ni baaray ni be gaar: “Cha’ ndabun ni nge maruwel e dabi abich.” Yugu aram rogon, ma bay boch e girdi’ nra siyeged ni ngar maruwelgad ni ngar yognaged e tin nib t’uf rorad ni yugu aram rogon nrayog rorad. Maku reb e, ku yad be magawonnag e maruwel rok boch e girdi’. Ere susun ni uw rogon e ngongol ni nge dag e pi Kristiano ko pi girdi’ ney ndarur folgad ko fonow?​—2 Thess. 3:​6, 10-12.

I gaar Paul: “Mi gimed ta’ fanmed i yan rok.” Fare bugithin ni Greek ni fan ko re thin ney e be yip’ fan ni ngan nang ko mini’ e cha’ney min kol ayuw rok. I pi’ Paul e re fonow ney ni fan ko ulung ni ga’ngin, ma gathi kemus ni yigoo piin piilal. (2 Thess. 1:1; 3:6) Ere faanra bay reb e Kristiano ni ke guy yugu reb e Kristiano nder fol ko fonow u Bible, ma aram e ‘nge par rok u urel.’

Ere gur, re n’ey e be yip’ fan ni ngaun tay facha’ ni gowa ir be’ ni kan tharbog ko ulung? Danga’, ya ki gaar Paul: “Ngam nonod ngak nge pag e tin ni be rin’, nrogon ni yira non ngak be’ ni walagey ni girdien Kristus.” Ere ka ra i chag e piin Kristiano ngak facha’ u nap’an e muulung nge machib, machane dab kur chaggad ngak ngar rin’ed boch ban’en u taabang ni ngar felfelan’gad ngay. Mang fan? Ya yog Paul ni gaar: “Nge mang ir e tamra’.” Faanra dab kud chaggad ngak, ma rayog ni nge tamra’ ko ngongol rok me thilyeg ir.​—2 Thess. 3:​14, 15.

Uw rogon nrayog ni nge fol e piin Kristiano ko re fonow ney e ngiyal’ ney? Som’on e ba t’uf ni ngari mich u wan’dad ni facha’ e ‘der fol ko fonow’ ni bod rogon ni yog Paul. Der weliy murung’agen e piin nib thil e nangan’ rodad ara ba thil e n’en yad baadag ko n’en gad baadag. Ku der yip’ fan e piin kar kirebnaged lanin’dad. Ya be weliy murung’agen e piin ni lem rorad ndab ra folgad ko fonow ni ke yib rok Got.

Faanra kad guyed ni be rin’ reb e Kristiano ban’en ni aray rogona e ngiyal’ ney, ma aram e rayog ni ngad dugliyed ndab kud chaggad ngak ngaud rin’ed boch ban’en u taabang ni ngad felfelan’gad ngay. Bochan ni gadad rodad e kad dugliyed ni ngad rin’ed e re n’ey, ma aram e dab da weliyed murung’agen ngak be’ ni gathi girdien e tabinaw rodad ni gad ma par u taabang. Ku gad ra ulul ni ngad chaggad ngak e cha’nem u nap’an e muulung nge machib. Ma nap’an nra thilyeg e ngongol rok, ma aram e rayog ni ngaud chaggad bayay ngak ngaud rin’ed boch ban’en u taabang ni ngad felfelan’gad ngay.