Rogon ni Nge Dabki Maruwar Boch Ban’en u Wan’um

1-2. (a) Mang boch ban’en nrayog ni nga i maruwar u wan’ boch e tapigpig rok Jehovah? (b) Mang e gad ra weliy ko re article ney?

GUBIN e girdi’ ni bay yu ngiyal’ ni ma maruwar boch ban’en u wan’rad.a Bod nreb e Pi Mich ni kab fel’ yangaren e rayog ni nga i lemnag ko rriyul’ ni ma lemnag Jehovah fa danga’. Bochan e re n’ey, ma rayog ni nga i maruwar u wan’ ko nge un ko taufe fa danga’. Fa reb e mu lemnag reb e walag ni pumoon ni mel’eg ni nge m’oneg e pigpig rok ngak Jehovah u nap’an ni kab fel’ yangaren ko bin nge mel’eg ni nge yoor e salpiy rok, ma chiney ni ke ilal e kemus ni chi urngin e salpiy nrayog ni nge yognag e tin nib t’uf ko tabinaw rok riy e ir e be yag ngak. Ere rayog ni nga i maruwar u wan’ ko ba puluw e n’en ni mel’eg u nap’an ni kab fel’ yangaren fa danga’. Kum lemnag reb e walag nib pin ni ke pilibthir ma ke meewar. Sana rayog ni nge mulan’ ni bochan e dabkiyog ni nge rin’ boch ban’en ni bod urngin e tin ni i rin’ kafram. Bay ba ngiyal’ ni ka am fithem ni ke lungum: ‘Gur, rriyul’ ni ma lemnageg Jehovah, fa? Bay m’ay fan urngin ban’en ni kug pag fan ni fan ngak, fa? Ka bay ban’en nrayog ni nggu rin’ ni fan ngak, fa?’

² Faanra dab da guyed rogon ni ngad nanged e fulweg u boch e deer ni gad ma lemnag ni aray rogon, ma rayog ni nge magawonnag e liyor rodad. Ere gad ra weliy ko re article ney rogon nrayog ni nge ayuwegdad e Bible ni faanra gad be lemnag nder ma lemnagdad Jehovah, ara de fel’ e n’en kad dugliyed kafram ni ngad rin’ed, fa reb e dakuriy ban’en nrayog ni ngad rin’ed ni fan ngak Jehovah.

ROGON NI NGE DABKI MARUWAR BOCH BAN’EN U WAN’UM

3. Mang reb e kanawo’ nrayog ni nge dabki maruwar boch ban’en u wan’dad?

³ Reb e kanawo’ nrayog ni nge dabki maruwar boch ban’en u wan’dad e aram e ngad gayed e fulweg ko deer rodad u lan e Thin rok Got. Faan gad ra rin’ e re n’ey, ma aram e ra yib gelngidad, ma gad ilal ko tirok Got ban’en, me yag ni ngad ‘pired ni gad mmudugil u fithik’ e michan’ rodad.’​—1 Kor. 16:13.

4. Uw rogon ni ngad “sikengniged urngin ban’en”? (1 Thessalonika 5:21)

⁴ Mu beeg e 1 Thessalonika 5:21. Mu tay fanam i yan riy ni be pi’ e Bible e athamgil nga lanin’dad ni ngad “sikengniged urngin ban’en.” Uw rogon nrayog ni ngad rin’ed e re n’ey? Rayog ni ngad guyed ko rriyul’ e n’en nib mich u wan’dad fa danga’ ni aram e ngad taareb rogonnaged ko n’en be yog e Bible. Am lemnag fare fel’ yangaren ni be maruwar u wan’ ko ba ga’ fan u wan’ Got fa danga’. Gur, nga yigi digey e re deer rok ney ndabi gay e fulweg riy? Danga’, ya susun e nge ‘skengnag urngin ban’en,’ ni aram e be yip’ fan ni nge guy rogon ni nge nang rogon laniyan’ Jehovah ko re n’ey.

5. Uw rogon ni ngad pirieged e fulweg rok Jehovah ko deer rodad?

⁵ Nap’an ni gad ra beeg e Thin rok Got, ma gowa be non Jehovah ngodad. Machane bay boch ban’en nib t’uf ni ngad rin’ed ya nge yag nda nanged rogon laniyan’ u reb e deer rodad. Ba t’uf ni ngad gayed ma gad fil boch e thin nu Bible nra pi’ e fulweg ko deer rodad. Rayog ni ngad fal’eged i gay murung’agen e re n’ey u lan boch e babyor rodad. (Prov. 2:​3-6) Rayog ni ngad meybilgad ngak Jehovah ni nge pow’iy e pi n’en gad be gay murung’agen, me ayuwegdad ni ngad nanged rogon laniyan’ ko deer rodad. Ku rayog ni ngad gayed boch i kenggin e motochiyel u Bible nge boch ban’en ni bay rogon ko magawon rodad. Kub ga’ angin ni faan gad ra beeg boch e thin nu Bible ni murung’agen boch e girdi’ ni ur lemgad ni bod gadad.

6. Uw rogon ni ma ayuwegdad e muulung ni nge dabki maruwar boch ban’en u wan’dad?

⁶ Ku ma non Jehovah ngodad u daken e pi muulung rodad. Faanra gubin ngiyal’ ni gad ma un ko muulung, ma rayog ni ngad rung’aged ban’en ni kan weliy u reb e welthin ara reb e fulweg ni kan pi’ nra ayuwegdad ni nge dabki maruwar boch ban’en u wan’dad. (Prov. 27:17) Ere chiney e ngad weliyed rogon ni nge dabki maruwar boch ban’en u wan’dad.

NAP’AN NI BE MARUWAR U WAN’UM KO MA LEMNAGEM JEHOVAH FA DANGA’

7. Mang reb e deer nrayog ni nga i fith boch e girdi’?

⁷ Bay ba ngiyal’ ni ke lungum u wan’um, ‘Rriyul’ ni ma lemnageg Jehovah, fa?’ Faanra ga ma lemnag ni gur be’ ndariy fam, ma sana rayog ni ngam lemnag ndabiyog ni ngam mang fager rok e En Ke Sunmiy e palpalth’ib. Sana rayog ni ku ireray e n’en ni i lemnag David ni Pilung. I lemnag nriyul’ nri yira ngat ngay ni mus ko girdi’ ma ma lemnagrad Jehovah. Ere fith ni gaar: “Somol, girdi’ e mang ni ga ma lemnagrad? Kemus ni gamad bogi girdi’, ma ga ma lemnagmad?” (Ps. 144:​3, BT) Ere uw e rayog ni ngam pirieg e fulweg ko re deer ney riy?

8. Mang e ma guy Jehovah ko girdi’ nrogon ni be yog e 1 Samuel 16:​6, 7, 10-12?

⁸ Kad filed u Bible ni ma lemnag Jehovah e piin nde ga’ farad u wan’ yugu boch e girdi’. Bod ni l’og Jehovah Samuel ni nge yan nga tafen Jesse ni nge liyef e gapgep nga lolugen reb fapi pagel ni fak ni nge mang pilung u Israel. Ere pining Jesse medlip ko fa meruk i pagel ni fak ni ngar mada’gad Samuel, machane de uneg David ngay ni ir e en th’abi bitir.b Yugu aram rogon, ma David e ir e ke mel’eg Jehovah. (Mu beeg e 1 Samuel 16:​6, 7, 10-12.) I guy Jehovah e bin riyul’ i rarogon David. Manang nrib t’uf ko re pagel nem.

9. Mang fan nrayog ni nge pagan’um ngay ni ma lemnagem Jehovah? (Kum guy e sasing.)

⁹ Am lemnag rogon ni ke dag Jehovah ni ma lemnagem. Ma pi’ e tin th’abi fel’ e fonow nra ayuwegem ko tin nib t’uf rom. (Ps. 32:8) Dabiyog ni nge rin’ e re n’ey ni faanra de nangem nib fel’ rogon. (Ps. 139:1) Nap’an ni ga ra fol ko fonow rok mag guy rogon ni be ayuwegem, ma aram e ra mich u wan’um nriyul’ ni ma lemnagem. (1 Kron. 28:9; Acts 17:​26, 27) Ma guy Jehovah e athamgil ni ga ma tay. Ma guy pi fel’ngim ma baadag ni ngam mang fager rok. (Jer. 17:10) Kub gel e felfelan’ nra tay ni faanra m’agan’um ngay ni ngam mang fager rok.​—1 John 4:19.

FAANRA BE MARUWAR U WAN’UM KO BA FEL’ E N’EN NIM DUGLIY NI NGAM RIN’ KAFRAM FA DANGA’

10. Mang boch e deer nrayog ni ngaud lemnaged u nap’an ni gad ra lemnag e pi n’en kad dugliyed ni ngad rin’ed kafram?

¹⁰ Bay yu ngiyal’ nrayog ni nge sul boch e girdi’ ngaur lemnaged boch ban’en ni ur dugliyed kafram, mi i maruwar u wan’rad ko ba puluw e n’en kar dugliyed fa danga’. Sana rayog nra dugliyed ni ngar digeyed reb e maruwel nib tolang puluwon ara dab ra tababnaged reb e siyobay ya nge yag nra yoornaged e tayim ni fan ko pigpig rorad ngak Jehovah. Machane chiney ni ke yan boor e duw e rayog ni ngar guyed boch e girdi’ ni yad manang nib thil e n’en nra dugliyed ni ngar rin’ed ni ke yoor e salpiy rorad ma kub fel’ e par rorad. Ere rayog ni nge lungurad u wan’rad: ‘Bay fan e pi n’en kug pag ni fan ngak Jehovah? Fa gur, ireray e pi n’en ke talegeg nde yag boch ban’en nib fel’ ngog?’

11. Mang e i magawonnag laniyan’ e en ni yoloy e Psalm 73?

¹¹ Faanra ga ma lemnag boch e deer ni aray rogon, ma ngam lemnag rogon laniyan’ faen ni yoloy e Psalm 73. I guy ni bay boch e girdi’ ndarur pigpiggad ngak Jehovah, machane ba fel’ fithik’ i dowrad, ma yad ba flaab, ma bod ndariy e magawon rorad. (Ps. 73:​3-5, 12) Ere nap’an ni guy ni be m’ug riy nib fel’ e par rorad, ma aram me k’aring ni nge lemnag ndariy rogon e athamgil ni be tay ni nge pigpig ngak Jehovah. I par ni “be gafgow [“be magawon laniyan’,” NW] ni kakadbul nge mada’ ko nep’” ni bochan e re n’ey. (Ps. 73:​13, 14) Ere uw rogon ni gel ko biney e lem nde puluw ni i tay?

12. Mang e ayuweg fare psalmist ni nge tal ndaki lemnag boch ban’en ni i muleg laniyan’ nrogon ni be yog e Psalm 73:​16-18?

¹² Mu beeg e Psalm 73:​16-18. I yan fare psalmist nga tempel rok Jehovah, ma aram e gin ni yag ni nge lem riy nib fel’ rogon. I nang ni yugu aram rogon nib fel’ rogon e par rok boch e girdi’, machane dariy e athap rorad boch nga m’on. Re n’ey e ayuweg ni nge dabki mulan’ me pagan’ ngay ni pigpig ni be tay ngak Jehovah e aram e n’en th’abi fel’ ni ke mel’eg ni nge rin’ u lan e yafos rok. Angin ni yib riy e yag ni nge dugliy u wan’ ni nge ulul ko pigpig ni be tay ngak Jehovah.​—Ps. 73:​23-28.

13. Uw rogon nrayog ni nge gapas lanin’um ni faanra be maruwar u wan’um ko ba puluw e pi n’en nim dugliy ni ngam rin’ kafram fa danga’? (Kum guy e sasing.)

¹³ Ku rayog ni nge ayuwegem e Thin rok Got ni ngki gapas lanin’um ni bod fare Psalmist. Ni uw rogon? Mu lemnag e pi n’en nib manigil ni bay rom nib muun ngay e pi tow’ath ni be pi’ Jehovah ngom, ma dab mu pagtalin ndabi ayuweg e piin ndarur pigpiggad ngak. Rayog ni kemus ni yigoo tin nib fel’ ni be yag ngorad ko par rorad e chiney e ir e yad be taga’ ngay ni bochan e dariy e athap rorad boch nga m’on. Machane gur e gathi kemus ni boor e tow’ath ni be pi Jehovah ngom e chiney, ya ku boor ban’en nib manigil ni ke micheg nra pi’ ngom boch nga m’on. (Ps. 145:16) Am lemnag e re n’ey: Rayog ni ngar da nanged rogon nra yan i aw e par rodad ni faan gomanga ba thil e n’en kad dugliyed ni ngad rin’ed, fa? Taa ban’en e rayog ni nge pagan’dad ngay ni aram e: Piin yad ma dugliy boch ban’en ni bochan e ba t’uf Got nge girdi’ rorad e gubin ngiyal’ nra yag boch ban’en nib manigil ngorad.

FAANRA BE MARUWAR U WAN’UM KO KA BAY BAN’EN NRAYOG NI NGAM RIN’ NI FAN NGAK JEHOVAH FA DARIY

14. Mang magawon e ma mada’nag boch e walag, ma mang deer e rayog ni ngar fithed yad riy?

¹⁴ Bay boch e tapigpig rok Jehovah ndabkiyog ni ngar rin’ed urngin ban’en ni yad baadag ni bochan e kar pilibthirgad, ara kar m’argad, ara bay boch ban’en ndabiyog ni ngar rin’ed. Ere rayog ni ngar lemnaged ndaki ga’ farad u wan’ Jehovah. Rayog ni ngar fithed ni nge lungurad, ‘Ka bay ban’en nrayog ni nggu rin’ ni fan ngak Jehovah, fa?’

15. Mang e ba mich u wan’ e en ni yoloy e Psalm 71?

¹⁵ Ku ireray e n’en ni i magafan’ e en ni yoloy e Psalm 71 ngay. I meybil ni gaar: “Dab mu n’ageg e chiney ni kug meewar.” (Ps. 71:​9, 18, BT) Yugu aram rogon, me par fare psalmist nib pagan’ ni faanra ulul ko pigpig ni be tay ngak e Got rok u fithik’ e yul’yul’, ma ra pow’iy Jehovah me ayuweg. I fil e re psalmist nem nib felfelan’ Jehovah ngak e piin yad ma rin’ e tin nrayog rorad ni ngar pigpiggad ngak ni yugu aram rogon ni bay boch ban’en ndabkiyog rorad.​—Ps. 37:​23-25.

16. Mang boch e kanawo’ nrayog ni nge fanay Jehovah e piin pilibthir riy? (Psalm 92:​12-15)

¹⁶ Gimed e piin pilibthir e ngam lemnaged rogon ni ma lemnagmed Jehovah. Rayog ni nge ayuwegmed ni ngam pared ni gimed ba yul’yul’ ngak ni yugu aram rogon ni ke meewar fithik’ i dowmed. (Mu beeg e Psalm 92:​12-15.) Ere mu lemnaged e tin nrayog ni ngam rin’ed ko bin ngam lemnaged e tin ndabkiyog romed. Bod nrayog ni ngam ayuweged yugu boch e girdi’ u rogon e yul’yul’ ni gimed ma tay nge rogon ni gimed ma dag ngorad ni gimed be lemnagrad. Rayog ni ngam weliyed rogon ni ke ayuwegmed Jehovah u lan e pi duw ni ke yan nge pi n’en ke micheg ni gimed be athapeg ni ngam guyed ni ke lebug boch nga m’on. Maku reb e, dab mu paged talin nib ga’ angin e meybil ni gimed ma pi’ ni fan ngak yugu boch e girdi’. (1 Pet. 3:12) Demtrug rogodad, ma gad gubin ni bay ban’en nrayog ni ngad pied ngak Jehovah nge yugu boch e girdi’.

17. Mang fan nsusun e dab ud taareb rogonnaged gadad ngak yugu boch e girdi’?

¹⁷ Faanra be kankanan’um ni bochan e boor ban’en ndabkiyog ni ngam rin’ ni fan ko pigpig rom ngak Jehovah, ma nge pagan’um ngay nib ga’ fan u wan’ e tin nrayog ni ngam rin’. Sana rayog ni ngaum taarebrogonnag e tin ga be rin’ ko tin nrayog ni nge rin’ yugu boch e girdi’. Machane dab mu rin’ e re n’ey! Mang fan? Ya der ma rin’ Jehovah ban’en ni aray rogon. (Gal. 6:4) Bod ni Maria e pi’ ba florida ngak Jesus nrib tolang puluwon. (John 12:​3-5) Ma fare pin nib gafgow ni ke yim’ figirngin e kemus ni l’agruw chi kobre’ nrow e yag ni nge pi’ ni ayuw u tempel. (Luke 21:​1-4) Machane l’agruw e gal tow’ath ney ni sap Jesus ngay ni ban’en ni ke pi’ l’agruw ni’ ni bochan e michan’ rorow. Rib ga’ fan u wan’ Jehovah ni Chitamangin urngin ban’en ni ga ma rin’ ni bochan e yul’yul’ nge t’ufeg rom ngak ni yugu aram rogon ni ga be lemnag ni ban’en nib achig.

18. Mang e ra ayuwegdad ndab ki maruwar boch ban’en u wan’dad? (Kum guy fare kahol ni kenggin e “Rayog ni Nge Ayuwegem e Thin rok Got ni Nge Dabki Maruwaran’um.”)

¹⁸ Gad gubin ni bay yu ngiyal’ ni ma maruwar boch ban’en u wan’dad. Machane kad filed nrayog ni nge ayuwegdad e Bible ni nge dabki maruwar boch ban’en u wan’dad. Ere mu athamgil u rogon nrayog rom ni ngam pirieg e fulweg ko pi deer ni ga be lemnag, ya faan ga ra rin’ ma aram e rayog ni nge pagan’um ma dabki magafan’um. Ri ma lemnagem Jehovah. Ba ga’ fan u wan’ e pi n’en ga ma pag fan ma ra tow’athnagem. Ma nge pagan’um ngay ni ma sap Jehovah ngay ni gubin e tapigpig rok ni bay rogon ni nge t’ufegrad me lemnagrad.