Mu Sul u Daken e Tin nib Ga’ Fan

Bay yu ngiyal’ nib mo’maw’ ni nge par u lanin’um e n’en ka fin mu fil, fa? Gad gubin ni ma buch e re n’ey rodad. Ere mang e rayog ni nge ayuwegem? Aram e ngam sul u daken e tin nib ga’ fan riy.

Nap’an ni ga be fil e Bible rom, mag guy rogon ni ngam tal ngam fal’eg i lemnag e n’en ka fin mu fil. Mu tay fanam i yan u rogon ni ayuweg apostal Paul e piin be yol ngorad ni ngar rin’ed e re n’ey u nap’an ni yoloy ni gaar: “N’en ni gadad be weliy murung’agen e baaray.” (Heb. 8:1) Aray rogon ni ayuwegrad ni ngar nanged fan e n’en be yog, nge rogon nib peth reb e ban’en ni be yog nga reb.

Sana rayog ni ngam tay ragag e minit u tomuren ni kam mu’ ko fol Bible ni ngam fal’eg i lemnag e tin nib ga’ fan ko n’en kam fil. Faanra dakir yib ngan’um, mag beeg e subheading ara bin som’on e sentence u reb e paragraph nge reb ya nge yib ngan’um e n’en kam fil. Faanra bay ban’en nib beech ni kam fil, mag guy rogon ni ngam weliy nrogon ni kam nang fan. Faan ga ra sul u daken e n’en nib ga’ fan ni kam fil, ma gathi kemus nra par u lanin’um ya ka ga ra nang rogon ni ngam fanay nga lan e yafos rom.