Mini’ E Riyul’ Ni Be Gagiyeg U Fayleng?

Pire’ e girdi’ e taareb rogon ni yad ma fulweg e re deer ney ni ma lungrad—Got. Ma rogon ni be m’ug u Bible e dariy bang ni be dag ni Jesus Kristus ara Chitamangin e riyul’ ni yow be gagiyegnag e re fayleng ney. Ya ba togopuluw ko thin rok Jesus faani gaar: “An be gagiyeg u fayleng e bay ni luf pa’.” Miki yog ni: “Ani be gagiyegnag e fayleng e bay yib ma dariy rogon ngog.”—John 12:31; 14:30; 16:11.

Ere ani be gagiyegnag e fayleng e ba togopuluw ngak Jesus. Ere susun ir mini’?

N’en Ra Ayuwegey Ngan Nange N’en Ba Mith u Rarogon e Fayleng

Dariy angin e tin be rin’ e girdi’ nib manigil, ya ka be gafgow e fayleng ni kab kakrom i yib. Ma re n’ey e be k’aring boch e girdi’ ni ma lemnag boch ban’en ni nge balyangan’rad ko mang tapgin ni bod David Lawrence ni yoloy boch ban’en me yog ni: “ ‘Gapas u fayleng’—ba chugur ni gubin e girdi’ e ba adag. ‘Piin ba fel’ laniyan’rad ngak e girdi’—kub chugur ni gubin e girdi’ nu fayleng e aram rogon ni yad ma rin’ ngak yugu boch e girdi’. Me ere mang e ka be kireb riy? Mang fan ni mahl e ke mang boch ban’en ni ke adag e girdi’?”

Be m’ug ni yibe yog boch ma boch e yibe rin’, fa? Ngiyal’ ni ba adag e girdi’ ni ngar pared u fithik’ e gapas, ma kar mechamgad ko fanenikay ma yad be lied boch i yad ni bochan e fanenikay. Amu lemnag rogon e cham e chiney ni gowa be cham e gamanman ni maloboch. Ke fanay e girdi’ fapi talin e cham ni gas chambers, concentration camps, flamethrowers, napalm bombs nge ku boch ni yima thang e fan ngay ni dakuriy buchuw e runguy riy ngak e girdi’.

Ke mich u wan’um ni girdi’ e be finey e gapas nge falfalan’ ma rayog rorad ni faanra ur rin’ed iyan ni aray feni kireb ni yad be togopuluw ngorad? Mang e be towasariy e girdi’ ko pi ngongol ney ni aray rogon feni kireb? Ka’ yib ngan’um bayay ni gowa bay ba gelngin u bang ni dab ni guy ni be suruy e girdi’ ni yad be ngongol ni aray rogon, fa?

Kan Poy Ko Mini’ e An Be Gagiyegnag e Fayleng

Dakuriy fan ni ngan gay nga bang ya ke tamilangnag e Bible ni bay be’ u bang ni dab ni guy nib salap ni be gagiyegnag e girdi’ nge pi nam. Ke yog ni “re fayleng ney ni polo’ e bay u tan gelngin faanem nib kireb.” Ke poy e Bible ni aram facha’ ni: “Ka nog Satan ni Moonyan ngak ni be pow’iy e re fayleng ney nga bang.”—1 John 5:19; Revelation 12:9.

Ba’ bayay ni “wawliy fare Moonyan” Jesus, ma de fith ngak ko mang rogon ni be gagiyegnag e fayleng. Be weliy e Bible e n’en ni buch: “Fek fare Moonyan Jesus iyan nga daken fare burey nib tolang me dag ngak urngin e gin suwon u fayleng nge fel’ngin, me ognag ngak Jesus me gaar ngak: ‘Gu ra pi’ urngin e pi n’ey ngom ni faan ga ra ragbug nga but’ ngam ta’ fag.’ Me gaar Jesus ngak: ‘Satan, mu churiy!’ ”—Matthew 4:1, 8-10.

Amu lemnag e re n’ey. Wawliy Satan Jesus nge ognag ngak “urngin e gin suwon u fayleng.” Re n’ey ni ognag Satan ngak e rayog ni skengnag ni faanra riyul’ ni gathi ir e be gagiyegnag e pi gil’ilungun ney? Danga’, da gathi er rogon. De maruwar u wan’ Jesus ni gubin e am nu fayleng e fen Satan, ni wod ni ke rin’ ni faanra dariy gelngin Satan riy. Ar fan, ni Satan ni Moonyan e riyul’ ni ir facha’ ni dab ni guy ni be gagiyeg u fayleng! Ke micheg e Bible ni ka nog ni “fare got ko re m’ag ney.” (2 Korinth 4:4) Uw rogon be’ nib kireb ni ke yib ko re liw ney nib gel gelngin?

Ani ke mang Satan e immoy nib engel ni sunmiy Got, me chogownag tagil’ Got. Ke togopuluw nga mat’awen Got ko gagiyeg rok. Me ni tomur me fanay reb e porchoyog ni nge non u l’ugun nge bannag e bin somm’on e ppin, ni Efa. Ya aram e gin ni rayog riy ni nge un figirngin ngak ni Adam ngar rin’ew ni aray rogon ma dab kur fol rok Got. (Genesis 3:1-6; 2 Korinth 11:3) Gowa be yog ni ra yog ni pingeg gubin i pi fak Adam nge Efa ni dawor ni gargelegrad ngar pied keru’rad ku Got. Ar fan ni ke pag Got Satan nib n’uw nap’an ni nge rin’ urngin nra yog rok nge micheg e tin ke yog, machane de yog rok.—Job 1:6-12; 2:1-10.

Ma be m’ug ni da gathi goo Satan e be gagiyeg u fayleng. Ya ki fel’ rogon ni guy rogon nge un boch e engel ngak ngar togopuluwgad ngak Got. Aram e pi cha’ ni ka nog e demon ngorad, kar manged e pi ta ayuw rok. Ke yog e Bible ngak e pi Kristiano ni: “Ngar pared ni yad ba mudugil, ngar togopuluwgad ko ngongol ko fare Moonyan; ya gadad be cham ni da gathi cham ngak e girdi’, ya . . . ngak e piin be gagiyegnag fithik’ e lumor, nge gelngin e kan ni kireb u lan e lang.”—Efesus 6:11, 12.

Togopuluw Ko Kan Ni Kireb

Pi kan ni kireb ney ni danir guyrad ni yad be gagiyegnag e re fayleng ney e yad be athmagil ni ngar pingeged gubin e girdi’ ngar paloggad ko bin riyul’ e liyor ngak Got. Reb e kanawo’ ni be maruwel e pi kan ni kireb ngay e fare lem ni kab fas be’ u bayang u tomren ni ke yim’ ni dariy fan ni be yog e Thin Rok Got nib tamilang ni piin ke yim’ e daki nang ban’en. (Genesis 2:17; 3:19; Ezekiel 18:4; Psalm 146:3, 4; Eklesiastes 9:5, 10) Ere, pi kan ni kireb e ma folwok u laman be’ ni ke yim’ ni nge non ngak be’ rok ara fager rok u l’ugun e sothuw, fa reb e “lam” ni ke yib ko giyow ko kan. Re “lam” nem e be dake laman be’ ni ka fini yim’ ma bin riyul’ riy e laman e demon!

Ere faan ga ra rung’ag reb e mit i “lam” nem ma dabi maruwaran’um. Dabmu rin’ e tin ke yog, mog fare thin ni yog Jesus faani gaar: “Satan, mu churiy!” (Matthew 4:10; James 4:7) Dab mu pagem ngam adag ni be non e kan ngom u bang ya ga ra l’ag ngay. Ma piin kar l’aggad ngay e kaa nog e sothuw ngorad ma ke yog Got ni nge ayuw e piin ma liyor ngak ko ngongol ko kan ni kireb. Ke yog e Bible ni “ngan palog ko piin ma non ko kan nge piin ma yog e tin bay nga m’on nge piin ma fith ban’en ko thagith.”—Deuteronomy 18:10-12; Galatia 5:19-21; Revelation 21:8.

Ya pi sothuw e yad ma ta’ e girdi’ nga tan pa’ e demon. Ngan siyeg ni dabni un ko pi n’ey ni demtrug rogon ni bay e falfalan’ riy ara yira gin ngay. Pi ngongol ney e ba chagil ngay e crystal-ball ni yima yaliy, nge Ouija boards, ESP, nge tamanwol nge yiiy ko t’uf. Ku ma k’aring e demon boch e lingan nib wagagey u lan e naun nge yuyang i ban’en ni kar ted ni taferad.

Pi kan ni kireb e kar mon’ognaged boch ban’en ni bod e babyor nge kachido, nge television ni aram ba yang ko ngongolen e darngal nge par ni de puluw nga rogon nib yalen. Manang e pi demon e n’en ba kireb ni faanra dab ni chuweg u lanin’uy. Ma ra fekey i yan ko ngongol ni darngal ngan bod yad.—Genesis 6:1, 2; 1 Thessalonika 4:3-8; Jude 6.

Riyul’ ke nang boor e girdi’ ni re fayleng ney e be gosgosnag e pi kan ni kireb. Machane dab da gingad ngay ni der mich u wan’rad ya Bible e yog ni ku rayog rok “Satan ni nge thiliyeg ir nge bod e engel ko tamilang.” (2 Korinth 11:14) Ere fan ni salap e ke malmitnag boor e girdi’ ko tin riyul’. Machane dab ni bannagem! Ya riyul’ ni ba’ fare Moonyan nge pi demon rok, ere ba t’uf ni ngam siyegrad.—1 Peter 5:8, 9.

Bay e falfalan’ riy ya ke chugur ngal’an ni nge chuw Satan nge pi chonggin! “Fayleng [nib muun ngay e gagiyeg ko demon] e goo ra chuw,” be micheg e Bible ni “Ani ra rin’ e tin ba m’agan Got ngay e ra m’agay.” (1 John 2:17) Gad ra pogofan nra chuw e ngongol ni kireb! Ere mang e yugu da moyed u fithik’ fapi cha’ ni ma rin’ e pi n’en ba m’agan Got ngay nge yog nni par u fithik’ e falfalan’ ni manemus u lan e bin biech e fayleng rok Got nib mat’aw.—Psalm 37:9-11, 29; 2 Peter 3:13; Revelation 21:3, 4.

Faanra danga’, ma ga ra pirieg urngin e pi thin ney u Bible ko fare New World Translation of the Holy Scriptures.

[Picture on page 4]

Rayog rok Satan ni nge ognag urngin e am u fayleng ngak Jesus ni faanra gathi fen?