Mu Togopuluw ngak Moonyan’ nge Pi Ban Rok

1, 2. Mini’ e piin ma felfelan’ u nap’an ni kan taufenag be’?

FAANRA ke yoor e duw ni kam pigpig ngak Jehovah, ma dabisiy ni ke yoor e welthin ko taufe ni yima pi’ u nap’an e assembly nge convention ni kam rung’ag. Yugu aram rogon ni ke yoor yay ni kam rung’ag e pi welthin ni yima pi’ ni fan ko piin ni ngar uned ko taufe, machane ku ra bayay ni ngan taufenag be’ ma ri ga ma felfelan’. Ra taw ko ngiyal’ nem, ma gubin e girdi’ ni kar felfelan’gad me tomur riy min wayway. Dabisiy nra sugsug e lu’ nga owchem u nap’an ni ga be yaliy facha’ ni ke dugliy ni nge pigpig ngak Jehovah. Aram ba ngiyal’ nrib gel e felfelan’ riy!

² Gadad e ra reb e duw, ma ri in yay ni kad guyed be’ ko ulung rodad ni kan taufenag, machane pi engel e yad ba tow’ath ya boor yay ni yad ma guy e girdi’ ni kan taufenagrad. Am lemnag gelngin e “felfelan’” ni yima tay u tharmiy ni yibe guy bokum biyu’ e girdi’ ko ulung rok Jehovah u fayleng ni yad be un ko taufe u gubin e wik. (Luke 15:7, 10) Ere, dariy e maruwar riy ni be felfelan’ e pi engel ni be yoor e pi tapigpig rok Jehovah i yan!​—Haggai 2:7.

MOONYAN’ E “YUGU BE YAN NI BOD BA LAYON NI BE TOLUL”

3. Mang fan ni be yan Satan ni “bod ba layon ni be tolul”? Mang e baadag ni nge rin’?

³ Machane, pi kan nib kireb e yad ba thil, ya nap’an ni yad ra guy be’ ni ke un ko taufe, ma ri ma gel e damumuw rorad. Satan nge pi moonyan’ rok e ri yad ma damumuw u nap’an ni yad ra guy bokum biyu’ e girdi’ ni kar pied keru’rad ko re fayleng ni kireb ney. Ke yog Satan ni girdi’ e darur pipgiggad ngak Jehovah ni bochan e ba t’uf rorad, maku dabiyog ni ngar pared ni yad ba yul’yul’ ngak u nap’an nra yib e skeng nib gel ngorad. (Mu beeg e Job 2:4, 5.) Machane, nap’an nra dugliy be’ ni nge pigpig ngak Jehovah, ma aram e be micheg nde riyul’ e n’en ni ke yog Satan. Ere, gubin e wik ni bokum biyu’ yay ni gowa yibe batnag owchen Satan. Aram fan ni “yugu be yan ni bod ba layon ni be tolul, ni be gayiy be’ ni nge longuy”! (1 Peter 5:8) Re “layon” ney e ri baadag ni nge longuydad ni aram e nge kirebnag e tha’ u thildad Got.​—Psalm 7:1, 2; 2 Timothy 3:12.

4, 5. (a) Mang l’agruw e kanawo’ ni be ayuweg Jehovah e pi tapigpig rok riy ya nge dabi gafgownagrad Satan nge pag rogon? (b) Mang e rayog ni nge pagan’ reb e Kristiano ngay?

⁴ Yugu aram rogon ni bay e toogor rodad nib damumuw, ma dariy rogon ni ngad rusgad. Mang fan? Ya bay l’agruw e kanawo’ ni be ayuweg Jehovah e pi tapigpig rok riy ya nge dabi gafgownagrad e re “layon” nem nge pag rogon. Mang e gal kanawo’ nem? Bin som’on e, ke yog Jehovah u m’on riy ni bay e girdi’ ni “pire’ ni pire’” ni yad e tin riyul’ e Kristiano ni yad ra magey u tomuren fare “gafgow ni ba ga’.” (Revelation 7:9, 14) Maku, yiiy rok Got e dabi aw nib m’ay fan. Ere, thingari nang Satan ndabiyog ni nge gel ko girdi’ rok Got ni yad gubin taab yay.

⁵ Bin l’agruw e kanawo’ e ba tamilang ko n’en ni yog reb e profet rok Got nib yul’yul’ kakrom. I yog Azariah ni profet ngak Asa ni Pilung ni gaar: “I Somol e bay romed u n’umngin nap’an ni gimed bay rok.” (2 Kronicles 15:2, BT; mu beeg e 1 Korinth 10:13.) Ku boor e thin nu Bible ni be dag nda i yag rok Satan ni nge gel ngak e pi tapigpig rok Got ni ur pared ni yad ba chugur ngak. (Hebrews 11:4-40) Ku er rogon e ngiyal’ ney ni ku rayog rok reb e Kristiano ni nge togopuluw ngak Moonyan’ ni faanra i par nib chugur ngak Got. Bin riyul’ riy e be gaar e Thin rok Got: “[Mu togopluwgad] ngak fare moonyan’, me mil romed.”​—James 4:7.

‘GADAD BE CHAM NGA GELNGIN E KAN NIB KIREB’

6. Uw rogon ni ma cham Satan ngak e pi Kristiano ni tatabagayad?

⁶ Dabiyog ni nge gel Satan ngodad ni gad gubin taab yay, machane rayog ni nge gel ngak taa bagadad ni faanra dabi kol ayuw. Manang Satan ni faanra war e michan’ rodad ngak Jehovah, ma aram e rayog ni nge gel ngodad. Uw rogon ni ma gay Satan rogon ni nge rin’ e re n’ey? Ma cham ngodad nib gel, maku ma cham ngak be’ nge be’, maku ma bannagdad u boch e kanawo’ nib mith. Ere, ngad weliyed murung’agen e pi n’ey.

7. Mang fan nri be cham Satan ngak e pi tapigpig rok Jehovah?

⁷ Cham nib gel. I yog apostal John ni gaar: “Tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Pi thin ney e be fonownag urngin e tin riyul’ e Kristiano. Bochan ni Satan e ir e be gagiyegnag e girdi’ nu fayleng, ma aram fan nri be guy rogon ni nge cham ngak e piin ndawori mil farad nga tan pa’, ni aram e pi tapigpig rok Jehovah. (Mikah 4:1; John 15:19; Revelation 12:12, 17) Kari damumuw ni bochan e manang ndab ki n’uw nap’an ni nge par. Ere, aram fan nri be athamgil nga i cham ngorad nib gel. Cham ni be tay Satan e ngiyal’ ney e aram e bin tomur e cham nra tay, ma be athamgil ni nge kirebnag e tha’ u thildad Got.

8. Mang e be yip’ apostal Paul fan u nap’an ni yog ni gadad be “cham” ngak e pi kan nib kireb?

⁸ Cham ngak be’ nge be’. I yog apostal Paul ngak e pi Kristiano ni gaar: “Gadad be cham ngak . . . e kan nib kireb . . . u lan e lang.” (Efesus 6:12) Mang fan ni fanay Paul fare bugithin ni “cham”? Bochan ni baadag Paul ni nge tamilangnag ni gad gubin nra bagadad ma be cham nga gelngin e pi kan nib kireb. Demtrug ko gad be par u reb e nam ni boor e girdi’ riy nib mich u wan’rad ni bay e kan nib kireb fa danga’, ma susun ndab da paged talin nnap’an nda ognaged gadad ngak Jehovah ma aram e ngiyal’ nda tababgad ko re cham ney. Nap’an nra ognag be’ ir ngak Got, ma aram e dab ki tal ko re cham ney. Aram fan ni ke nang Paul nib t’uf ni nge pi’ e athamgil nga laniyan’ e pi Kristiano nu Efesus ni dalip yay, ya nge yag nra pared ni ‘kar fal’eged rogorad’!​—Efesus 6:11, 13, 14.

9. (a) Mang fan ni ma maruwel Satan nge pi engel rok nga boor mit e “ban”? (b) Mang fan ni ma guy Satan rogon ni nge alitnag lanin’dad, ma uw rogon ni ngad gelgad ngak? (Mu guy fare thin ni kenggin e “Mu Kol Ayuw ko Pi Ban rok Satan!”) (c) Mang e ban rok Satan ni ngad weliyed murung’agen?

⁹ Boch e ban nib mith. I yog Paul ngak e pi Kristiano ni ngar pared ni kar fal’eged rogorad ya nge yag nra togopuluwgad ko “pi ban” rok Satan. (Efesus 6:11) Pi kan nib kireb e gathi kemus ni taab mit e ban e yad ma maruwel ngay, ya boor mit ma bay fan. Bay boch e tapigpig rok Got ni ke yag ni ngar gelgad u ba mit e skeng, machane kar wargad u ba mit. Ere, ma par Moonyan’ nge pi engel rok ngaur fal’eged i yaliyed gadad ya nge yag nra nanged e meewar rodad. Ma nap’an ni yad ra pirieg ban’en ni gad ba meewar riy mi yad fanay ni ngar guyed rogon ni nge kirebnag e tha’ u thildad Got. Machane gad ba tow’ath, ya boor e pi ban rok Moonyan’ ni ke tamilangnag e Bible. (2 Korinth 2:11) U tabolngin e re ke babyor ney e kad weliyed boch ban’en riy ni ma fanay Satan ni nge bannagdad, ni bod rogon e chugum, nge girdi’ ni gad ma chag ngorad, nge ngongol ni darngal. Machane, chiney e ngkud weliy reb ko pi ban rok Satan ney, ni aram e pig.

PIG E REB E NGONGOL NDARIY E YUL’YUL’ RIY

10. (a) Mang e pig? (b) Uw rogon e pig u wan’ Jehovah, ma uw rogon u wan’um?

¹⁰ Ra un be’ ko pig ma aram e be non ko pi kan nib kireb. Bey, nge falayin e fal’egyan’ fa adag, nge pong thagith e aram boch e pig. Ireray boch e ngongol nib “sonogor” u mit Jehovah. (Deuteronomy 18:10-12, BT; Revelation 21:8) Maku bochan ni thingar da “fanenikayed e tin nib kireb,” ma aram fan ndab da uned ko pi ngongol ni bay rogon ko pi kan nib kireb. (Roma 12:9) Ya faan gad ra un ko ngongol ni aray rogon, ma aram e darud yul’yul’gad ngak e Chitamangidad nu tharmiy, ni aram Jehovah!

11. Mang fan nra yan i aw ni ke gel Satan ni faanra waliydad ngad uned ko pig? Mu susunnag.

¹¹ Manang Satan nib fanenikan Jehovah e pig. Ere, aram fan nri be guy rogon ni ngad uned ngay. Urngin yay nrayog rok ni nge bannag reb e Kristiano ni nge un ko pig ma aram bayay ni ke gel Satan. Mang fan? Am lemnag e re n’ey: Faanra yag ni ngan bannag reb e salthaw ni nge chel nge togopuluw ko ba’ rok e salthaw ma rra felfelan’ e en nib ga’ ko toogor rok fapi salthaw. Maku rayog ni ngki gay rogon ni nge nang faen nib ga’ ko salthaw ya nge tamra’ fa damumuw. Ere, ku er rogon ni faanra un reb e Kristiano nga ngongolen e pig ma aram e ke chel ke togopuluw ngak Jehovah ma ke pag ir nga pa’ Satan. Am lemnag gelngin e felfelan’ nra tay Satan! Bay bagadad ni baadag ni nge guy Moonyan’ ni ke gel, fa? Ri dariy, ya gathi gadad e piin ni gad ma chel ngad bannaged e fager rodad.

MA FANAY E DEER YA NGE MARUWAR U WAN’DAD BOCH BAN’EN

12. Mang e ma fanay Satan ni nge waliydad ni ngad uned ko pig?

¹² Faan gad ra fanenikay e pig, ma aram e dabiyog ni nge fanay Satan ni nge bannagdad. Ere, manang nthingari guy rogon ni nge thil e lem rodad. Ni uw rogon? Ma bannag e piin Kristiano u boch e kanawo’ ya nga rogned e ‘kireb ko manigil mi yad yog e manigil ko kireb.’ (Isaiah 5:20) Rogon ni ma rin’ Satan e re n’ey e ma fanay ban’en ni ke yoor yay ni ke fanay, ni aram e deer ni nge maruwarnag lanin’dad u boch ban’en.

13. Uw rogon ni ke fanay Satan e deer ni nge maruwarnag laniyan’ boch e girdi’?

¹³ Mu lemnag rogon ni i fanay Satan e re ban ney kakrom. I fith ngak Efa u lan fare milay’ nu Eden ni gaar: “Rriyul’ ni yog Got ngomew ni dab mu koyew wom’engin urngin e gek’iy ni ba’ ko gi woldug ney?” Maku nap’an ni mada’ e pi engel u tharmiy u nap’an Job, me fith Satan ni gaar: “Gur ra i par Job ni ba’ madgum u wan’ ni faanra der yib e fel’ riy ngak?” Mu tabolngin e machib ni i tay Jesus u fayleng me guy Satan rogon ni nge bannag ni gaar: “Faanra Fak Got gur, me ere mu non ko pi malang ney nge ngal’ ni flowa.” Am lemnag e n’en ni rin’ Satan. I moningnag Jehovah ni aram e fanay fapi thin ni ka fini yog Jehovah u nel’ e wik u m’on riy ni gaar: “Ereray Fakag nib t’uf rog ni kari felan’ug ngak.”​—Genesis 3:1; Job 1:9; Matthew 3:17; 4:3.

14. (a) Uw rogon ni ma fanay Satan boch e ban ya nge maruwar u wan’uy feni kireb e pig? (b) Mang e ngad weliyed e chiney?

¹⁴ Ngiyal’ ney e ku ma fanay Moonyan’ e ban ni aray rogon ya nge maruwar u wan’dad feni gel e kireb ko pig. Ba gel e kireban’ riy ya boor e Kristiano ni ke yag ni nge bannagrad Satan ko re n’ey. Boch i yad e ke tabab ni nge maruwar u wan’rad ko rriyul’ ni bay boch e pig nib kireb fa danga’. (2 Korinth 11:3) Uw rogon ni ngad ayuweged e girdi’ ni aray rogon nge thil e lem rorad? Ma uw rogon ni nge dab da awgad ko re ban rok Satan ney? Ra ngad nanged e fulweg riy, ma ngad guyed l’agruw e kanawo’ ni ma fanay Satan e pig riy, ni aram e pi n’en ni yima chuweg e chalban ngay nge boch e tafalay nge falay ni yima fanay.

MA BANNAGDAD U DAKEN E PI N’EN NI GAD BAADAG NGE TIN NIB T’UF RODAD

15. (a) Uw rogon e pig u wan’ boch e girdi’ u yu yang u Ngabchey? (b) Uw rogon ni ke af e re lem ney ngak boch e Kristiano?

¹⁵ U yu yang u Ngabchey e ba ga’ ni gathi ri kab ga’ fan u wan’ e girdi’ riy e pig ni bod e motokan, nge bey, nge ku boch e ngongolen e moonyan’. Pi n’ey e yima pag yaan u TV, nge boch ban’en ni yima fafel ngay ko computer, maku bay u boch e babyor. Ngiyal’ ney e ku bay boch e kachido nge babyor ni murung’agen e pig ni ke garer. Ba tamilang ni be yag rok e pi kan nib kireb ni ngar k’aringed e girdi’ ni ngar lemnaged ndariy e riya’ ko pig. Ere gur, bay boch e Kristiano ni ke af e re lem ney ngorad? Arrogon. Ni uw rogon? Baaray reb e kanawo’. Tomuren ni ke yaliy reb e Kristiano bang e kachido ni bay yaan e pig riy me gaar, “Kug yaliy e re kachido nem, machane dawor gu un ko pig.” Mang fan nde fel’ e re lem ney?

16. Mang fan nde fel’ ni ngaud chuweged e chalban rodad nga boch ban’en ni bay rogon ko pig?

¹⁶ Yugu aram rogon nib thil e bin baaray ni ngan un ko pig nge bin ni ngaun yaliy yaan u kachido, ma gathi be yip’ fan ndariy e riya’ riy ni faanra un yaliy yaan e pig. Mang fan? Am lemnag e re n’ey: Be yog e Bible ni Satan nge pi engel rok e dabiyog ni ngar guyed e n’en ni bay u gum’irchaen e girdi’.a Machane, kan weliy faram ni pi kan nib kireb ney e yad ma fal’eg i yaliy e ngongol rodad ni kub muun ngay e pi n’en ni gad ma chuweg e chalban rodad ngay, ya nge yag nra nanged e n’en ni gad be lemnag nge meewar rodad mi yad maruwel ngay ngar kirebnaged e tha’ u thildad Got. Faanra m’ug ko ngongol rok reb e Kristiano ni baadag e kachido ara babyor ni bay riy murung’agen e sothuw, nge motokan, nge girdi’ ni ke ying e moonyan’ ngak, ara ku boch ban’en ni bay rogon ko pig, ma aram e be dag ko pi kan nib kireb ni ireram e meewar rok. Ere, n’en nra buch e ra gel boch e cham ni nge tay e pi kan nib kireb ngak fare Kristiano nge taw ko ngiyal’ ni kar gelgad ngak. Bay boch e Kristiano ni kar uned nga ngongolen e pig ni bochan e pi n’en ni ur chuweged e chalban rorad ngay ni bay rogon ko pig.​—Mu beeg e Galatia 6:7.

17. Mang reb e kanawo’ ni ku ma bannag Satan e girdi’ riy?

¹⁷ Gathi kemus ni yigoo pi n’en ni gad ma chuweg e chalban rodad ngay e rayog ni nge bannagdad Satan riy, ya kub muun ngay e tafalay nge boch e falay ni yima fanay. Ni uw rogon? Faanra yib ba mit e m’ar ngak reb e Kristiano nib mo’maw’ ni ngan pirieg e falay riy ma rayog ni nge par nib kireban’. (Mark 5:25, 26) Rayog ni nge fanay Satan nge pi engel rok e re n’ey ni ngar bannaged facha’. Rayog ni nge waliy e pi kan nib kireb reb e Kristiano ni nge un ko tafalay ara fanay e falay ni bay rogon ko “pig.” (Isaiah 1:13, NW) Faanra rin’ be’ ban’en ni aray rogon ma rayog ni nge kireb e tha’ u thilrow Got. Ni uw rogon?

18. Ba miti mang tafalay ara falay e nge siyeg e Kristiano, ma mang fan?

¹⁸ I ginang Jehovah piyu Israel kakrom nra uned ko “pig” ni gaar: “Gimed ra pug pa’med nga lang ngam meybilgad ngog ma dab gu sap ngomed. Demtrug gelngin e meybil ni gimed ra tay ma dab gu telig ngomed.” (Isaiah 1:15) Arrogon, gad baadag ni ngad paloggad ko pi n’en nra magawonnag e meybil rodad nge ayuw ni ma yib rok Jehovah nib ga’ ni ngiyal’ ni kad m’argad. (Psalm 41:3) Ere, faanra ke nang reb e Kristiano ni bay ba mit e tafalay ara falay ni bay rogon ko pig ma susun e nge siyeg.b (Matthew 6:13) Faanra rin’ ni aram rogon, ma aram e ra ayuweg Jehovah.​—Mu guy fare thin ni kenggin e, “Riyul’ ni Bay Rogon ko Pig, Fa?”

NAP’AN NI YIBE WELIY BOCH BAN’EN NI MURUNG’AGEN E KAN

19. (a) Mang e ma guy Moonyan’ rogon ni nge lemnag e girdi’ u murung’agen gelngin? (b) Mang boch ban’en ndab i un e Kristiano i weliy?

¹⁹ U yu yang u Ngabchey e gathi ri kab ga’ fan u wan’ e girdi’ riy gelngin Satan, machane yugu boch e nam e ba thil. Ba ga’ ni ma bannag Moonyan’ e girdi’ ko pi nam nem ni ngar lemnaged ni ir e rib gel gelngin. Ere, bay boch e girdi’ ni gubin ngiyal’ ni yad ma par u fithik’ e marus. Boor murung’agen e kan nib kireb ni yima weliy ma boor e girdi’ ni baadag ni ma motoyil ngay. Ere, ba fel’ nra ud uned i weliy e pi n’ey, fa? Danga’, ya baaray l’agruw i fan.

20. Uw rogon nrayog ni nge wereg be’ boch e thin u murung’agen e ban rok Satan nde nang?

²⁰ Som’on e faanra i weliy be’ boch ban’en u murung’agen e kan, ma aram e be tay tanggin Satan. Ni uw rogon? Be yog e Bible nib gel gelngin Satan, machane ku be yog ni ma fanay boch e “pow” ni goo bogi ban nge urngin mit e “ban nib kireb.” (2 Thessalonika 2:9, 10) Bochan ni Satan e ir e en th’abi salap ko ban, ma manang rogon ni nge suruy laniyan’ e piin ni yad ma un ko pig, maku manang rogon ni nge bannagrad nge mich u wan’rad boch ban’en nde riyul’. Pi girdi’ ney e bayi n’en mar lemnaged ni kar guyed e kan ara kar rung’aged laman mar weliyed ngak boch e girdi’. Me munmun mar weliyed nge thum’ nga wuru’. Faanra un reb e Kristiano i weliy e pi n’ey ma aram rogon nri baadag Moonyan’ ni ir e “Chitamangin urngin e malulifith.”​—John 8:44; 2 Timothy 2:16.

21. Mang e n’en nib ga’ fan ni ngaud weliyed?

²¹ Bin migid, e mus ni faanra gomanga riyul’ ni ke guy be’ e kan ma de fel’ ni nga i par ma be weliy. Mang fan? Ya be gaar e Bible: “Ma gad par ni kad l’eged owchedad ngak Jesus, yi ir e be tor e michan’ rodad ngak.” (Hebrews 12:2) Arrogon, susun ni yigoo Jesus e ir e ngaud weliyed murung’agen, ma gathi Satan. Nap’an ni immoy Jesus u fayleng ma da i par ni yugu be weliy ngak pi gachalpen murung’agen e pi kan nib kireb ni yugu aram rogon ni boor ban’en nrayog ni nge weliy u murung’agen gelngin Satan. Ya i par ni yigoo fare thin nib fel’ ni murung’agen Gil’ilungun Got e i weliy. Ere, susun e ngad folwokgad rok Jesus nge pi apostal rok, ngaud weliyed murung’agen e “pi n’en nib sorok Got ni ke ngongliy!”​—Acts 2:11; Luke 8:1; Roma 1:11, 12.

22. Uw rogon ni ngad gelnaged e felfelan’ ni yibe tay u “tharmiy”?

²² Riyul’ ni boor mit e ban ni ma maruwel Satan ngay ni nge kirebnag e tha’ u thildad Jehovah, nib muun ngay e pig. Machane, faan gad ra fanenikay e tin nib kireb ma gad chichiiy pa’dad ko tin nib fel’, ma aram e dabiyog ni nge bannagdad Moonyan’ ngad uned nga ngongolen e pig. (Mu beeg e Efesus 4:27.) Am lemnag gelngin e felfelan’ ni yira tay u “tharmiy” ni faan gad ra ulul ngad “togopluwgad ko pi ban rok Moonyan’.”​—Luke 15:7; Efesus 6:11.