Mu Tiyan’um​—Ya Baadag Satan ni Nge Longuyem!

“Mu tedan’med mi gimed ayuwegmed! Yi moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy.”​—1 PET. 5:8.

UW ROGON NI KE DAG SATAN NI IR REB E KAN NI . . .

ba gel gelngin?

rib kireb?

ba cheg ko sabanban?

1. Mu weliy rogon ni pig reb e engel rok Got nge mang Satan.

IMMOY e re engel nem nib fel’ e tha’ u thilrow Jehovah. Machane, yan i taw nga ba ngiyal’ me adag ni nge liyor e girdi’ ngak. De guy rogon ni nge chuweg e biney e ar’ar nib kireb ni ke sum u laniyan’, ya n’en ni rin’ e pag ni nge gel me munmun me k’aring ni nge denen. (Jas. 1:14, 15) Gad manang nre engel nem e aram Satan, ya “de par ko tin riyul’.” I togopuluw ngak Jehovah, ma aram me mang “chitamangin urngin e malulifith.”​—John 8:44, NW.

2, 3. Bochan ni ka nog “Satan,” nge “Moonyan’,” nge “porchoyog,” nge “dragon” ngak e bin th’abi ga’ e toogor rok Jehovah, ma mang e be dag u rarogon e re toogor ney?

² Ka nap’an ni togopuluw Satan, me yan i par ni ir e bin th’abi ga’ e toogor rok Jehovah nge girdi’. Pi liw ni kan pi’ ngak e be dag gelngin e kireb rok. Fare ngachal ni Satan e be yip’ fan e “Tatogopuluw.” Re n’ey e be dag nder ma tay e re engel nib kireb ney fan mat’awun e gagiyeg rok Got, ya bin riyul’ riy e dabun rogon e gagiyeg ni be tay Got maku be togopuluw ngay. N’en nri baadag Satan e nge guy ni ke kireb e gagiyeg rok Jehovah.

³ Faan gad ra yaliy e thin ni bay ko Revelation 12:9, ma be yog ni Satan e ir Moonyan’ ni be yip’ fan “Be’ ni Ma T’ar e Thin Nga Daken Be’.” Re n’ey e be dag ni ke darifannag Satan Jehovah ni bochan e ke yog ni be ban. Fapi thin ni be gaar, “fare porchoyog ni ke kakrom” e be puguran ngodad e n’en ni rin’ Satan u lan fare milay’ nu Eden ni aram e fanay e porchoyog ni nge bannag Efa. Ma fapi thin ni be gaar, “fare dragon nri ba ga’” e be tamilangnag rarogon Satan ni ir reb e engel nrib damumuw ma rib kireb, ma baadag ni nge taleg ndabi lebug e n’en nib m’agan’ Jehovah ngay, miki thang e pi tapigpig Rok.

4. Mang e gad ra weliy ko re article ney?

⁴ Ere, ba tamilang ni Satan e ir e en nri be guy rogon ni nge dab kud yul’yul’gad. Aram fan ni be fonownagdad e Bible ni gaar: “Mu tedan’med mi gimed ayuwegmed! Yi moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy.” (1 Pet. 5:8) Ere, re article ney e ra weliy dalip ban’en u rarogon Satan, ma re n’ey e be tamilangnag feni ga’ fan ni ngad ayuweged gadad rok ni ir e bin th’abi ga’ e toogor rok Jehovah nge pi tapigpig Rok.

BA GEL GELNGIN SATAN

5, 6. (a) Mu weliy boch ban’en ni ke buch ni be dag nib “gel” gelngin e pi engel. (b) Mang e be yip’ fan fare thin ni faan be yog ni “bay e yam’ u pa’” Satan?

⁵ Ba “gel” gelngin e pi engel. (Ps. 103:20) Kab ga’ e llowan’ rorad ko girdi’ ma kab gel gelngirad ngodad. Machane, tin nib fel’ e engel e yad ma fanay gelngirad ni ngar rin’ed e tin nib fel’. Bod ni bay bayay ni li’ reb e engel rok Jehovah 185,000 e salthaw rok piyu Assyria. N’en ni rin’ e re engel nem e dabiyog rok taabe’, ma ri kub mo’maw’ ni nge rin’ ba ulung i salthaw. (2 Ki. 19:35) Ku immoy bayay ni fanay reb e engel gelngin nge salap rok ni nge pag e pi apostal rok Jesus u kalbus. Yugu aram rogon ni immoy e pi matanag ni ur matanagiyed e re kalbus nem, machane dar guyed e re engel nem ni luf e lok ko mab, me pow’iy fapi apostal nga wuru’ fare kalbus, ngemu’ miki sul nge loknag fapi mab!​—Acts 5:18-23.

⁶ Ere, pi engel rok Got ni yad ba yul’yul’ e yad ma fanay gelngirad ni ngar rin’ed boch ban’en nib fel’, machane Satan e ma fanay gelngin ni nge rin’ boch ban’en nib kireb. Ma rriyul’ nrib gel gelngin Satan, ma rayog ni nge suruy e girdi’ ko kireb! Be yog e Bible ni ir e “be gagiyegnag e girdi’ nu fayleng.” (John 12:31) Ku “bay e yam’ u pa’” Satan. (Heb. 2:14) Re n’ey e gathi be yip’ fan ni ma li’ e girdi’ ngar m’ad. Ere, mang e be yip’ fan? Bin som’on e, re fayleng ney e ke sug ko lem rok Satan ni aram e fanenikan nge lem nib kireb ni ma k’aring e cham. Maku reb e bochan ni mich e ban rok Satan u wan’ Efa, maku de fol Adam rok Got, ma aram fan ni ke af e denen nge yam’ ngak urngin e girdi’. (Rom. 5:12) Ere, aram fan ni “bay e yam’ u pa’” Moonyan’. Maku aram fan ni yog Jesus ni ir “be’ ni ma thang e fan rok e girdi’.” (John 8:44) Ere, riyul’ ni Satan e ir reb e toogor rodad nrib gel gelngin!

7. Uw rogon ni ma dag e pi kan nib kireb ni kub gel gelngirad?

⁷ Nap’an ni gad ra togopuluw ngak Satan, maku aram e gad be togopuluw ngak e piin ni yad be un ngak yad be togopuluw nga mat’awun Got ko gagiyeg. Re n’ey e kub muun boch e engel nib kireb ngay ni kur chelgad kar togopuluwgad ngak Got, ara ku boch e kan nib kireb. (Rev. 12:3, 4) Boor yay ni ke gafgownag e pi kan nib kireb ney e girdi’. Ma re n’ey e be dag ni ku yad ba gel ko girdi’. (Matt. 8:28-32; Mark 5:1-5) Ere, dab da paged talin nrib gel gelngin e pi kan nib kireb ney nge faen ni ir “pilungen e moonyan’.” (Matt. 9:34) Faan gomanga der ayuwegdad Jehovah, ma dabiyog ni ngad togopuluwgad ngak Satan.

SATAN E IR BE’ NRIB KIREB

8. (a) Mang e be nameg Satan? (Mu guy e sasing ni bay u tabolngin e re article ney.) (b) Faan ga ra yaliy rarogon e re fayleng ney, ma uw rogon ni be m’ug riy rarogon Satan ni ir be’ nrib kireb?

⁸ I taarebrogonnag apostal Peter Satan nga “ba layon ni be tolul.” I weliy ba ken e babyor ni fare bugithin ni Greek ni kan pilyeg ni “tolul” e be dag “rarogon ba gamanman ni ke yib e bilig ngak ni be tolul.” Re n’ey e be tamilangnag gelngin feni kireb Satan nder ma runguy be’! Yugu aram rogon ni ir e kari milfan e re fayleng ney ngak ni be gagiyegnag, machane ka der fel’ u wan’. Ya ka be yan ni bod rogon ba layon ni kari yim’ ko bilig ni be gay be’ ni nge longuy. (1 John 5:19) Piin ni be nameg ni ngari gafgownagrad e aram e piin ni kan dugliyrad ni ka yad bay u fayleng, nge piin ni yad ba muun ngorad ni aram “yugu boch e saf.” (John 10:16; Rev. 12:17) Ke dugliy Satan u wan’ ni ngari gafgownag e pi tapigpig rok Jehovah. Ma gafgow ni i tay ngak pi gachalpen Jesus ni ka nap’an e bin som’on e chibog keb i mada’ ko chiney e aram e n’en ni be dag nriyul’ ni ir be’ nrib kireb.

9, 10. (a) Uw rogon ni i guy Satan rogon ni nge magawonnag e n’en nib m’agan’ Got ngay u daken fare nam nu Israel? (Mu weliy boch e kanawo’ ni i rin’ e re n’ey riy.) (b) Mang fan ni i guy Satan rogon ni nge gafgownag fare nam nu Israel? (c) Nap’an nra ngongliy reb e tapigpig rok Jehovah reb e denen nib ubchiya’ e ngiyal’ ney, ma ga be lemnag ni uw rogon u wan’ Moonyan’?

⁹ Ku reb e kanawo’ ni ma m’ug riy gelngin feni kireb Satan e aram e ma guy rogon ni nge taleg ndabi lebug e n’en nib m’agan’ Got ngay. Ba layon ni kari yim’ ko bilig e dakir runguy be’. Ra li’ reb e gamanman ara be’ nge yim’ ma dabi kireban’ ngak ara kalngan’ ni ke rin’ fare n’em. Ere, ku arrogon Satan nder ma kireban’ ko piin ni ma cham ngorad. Urngin yay ni i aw piyu Israel ko wup ko ngongol ndarngal nge chogow, ma mang e i lemnag Satan? Nap’an ni ga ra beeg murung’agen e n’en ni buch rok Zimri ni bochan e ngongol ndarngal ni rin’ nge n’en ni buch rok Gehazi ni bochan e chogownag boch ban’en ni gathi fen, ma gur, rayog ni ngam lemnag gelngin e felfelan’ ni tay Satan u nap’an ni buch e pi n’em?​—Num. 25:6-8, 14, 15; 2 Ki. 5:20-27.

¹⁰ Bay fan ni i guy Satan rogon ni ngari gafgownag fare nam nu Israel kakrom. Dab mu pagtalin ni aram e gin ni yib fare Messiah riy, ni aram e en nra thang Satan me micheg ni Jehovah e ir e en ni bay mat’awun ni nge gagiyeg. (Gen. 3:15) Dabun Satan ni nge par piyu Israel ni yad ba fel’ u wan’ Got, ere aram fan ni i athamgil u rogon nrayog rok ni nge waliyrad ngaur denengad. Dab mu lemnag ni kireban’ Satan ngak David u nap’an nra parew be’ ni gathi mabgol rok, ara kireban’ ngak Moses u nap’an nda kun pag ni nge pow’iy piyu Israel nga lan fare Nam ni Kan Micheg. Ya dariy e maruwar riy nnap’an nra guy Satan reb e tapigpig rok Jehovah ni ke rin’ reb e denen nib ubchiya’ ma rib gel e felfelan’ ni ma tay. Bin riyul’ riy e, dabisiy ni aram boch ban’en ni i fanay Satan ni nga i moningnag Jehovah ngay.​—Prov. 27:11.

11. Mang fan ni guy Satan rogon ni nge denen Sarah?

¹¹ Ri kub gel e fanenikan ni i tay Satan ko fare tabinaw ni yib fare Messiah riy. Am lemnag e n’en ni buch nga tomuren ni yog Got ngak Abraham nra gagiyegnag nge yib e piin ‘owchen ni pire’ ni pire’.’ (Gen. 12:1-3) Ere, nap’an ni immoy Abraham nge Sarah u Egypt, ma aram me fek Farao Sarah nga tafen ni bochan e baadag ni nge mang ppin rok. Machane, me ayuweg Jehovah Sarah nde buch ban’en rok. (Mu beeg e Genesis 12:14-20.) De n’uw nap’an u m’on nni gargeleg Isak, miki buch ban’en ni aray rogon u Gerar. (Gen. 20:1-7) Ere gur, Satan e ir e i k’aring e pi n’ey ni nge buch? Dab mu pagtalin ni digey Sarah e fel’ rogon rok u Ur nga i par u lan e tent i yan. Ere gur, ga be lemnag ni i athapeg Satan ni nge waliy Sarah ni nge adag e fel’ rogon rok Farao nge Abimelek? Gur, be lemnag Satan nra chel Sarah nge digey e pumoon rok nge Jehovah, me leay bagayow e gal pilung nem? Der yog e Bible, machane faan gomanga rin’ Sarah ban’en nib kireb me mul fare tow’ath u pa’ ni aram e ir bang ko fare tabinaw ni yib fare Messiah riy, ma rib gel e felfelan’ nra tay Moonyan’. Faan gomanga kireb e mabgol rok Sarah, miki kireb thin nge tha’ u thilrow Jehovah ma dabi kireban’ Satan. Ere, rriyul’ ni Satan e ir be’ nrib kireb!

12, 13. (a) Uw rogon ni gagiyel gelngin feni kireb Satan u tomuren ni kan gargeleg Jesus? (b) Ga be lemnag ma uw rogon u wan’ Satan e pi bitir nib t’uf Jehovah rorad ma yad be athamgil ni ngar pigpiggad Ngak e ngiyal’ ney?

¹² Boor e chibog nga tomuren ni immoy Abraham ma aram min gargeleg Jesus. Dab mu lemnag nnap’an ni guy Satan e chi tir nem ma ri baadag usun. Danga’, ya manang Satan ni chi tir nem e ir e ra mang fare Messiah ni kan micheg. Arrogon, ir e en ni yib ni owchen Abraham, ma ir e ra “kirebnag e maruwel rok e re moonyan’ nem.” (1 John 3:8) Gur, i lemnag Satan ni faanra li’ e chi tir nem ma aram e ke rin’ ban’en nrib gel e kireb riy? Danga’. Dariy fan ban’en u wan’ Satan. Ere, aram fan ni athamgiliy u rogon nrayog rok ni nge li’ Jesus u nap’an ni kab madway. Ni uw rogon?

¹³ Ri damumuw Herod ni Pilung u nap’an ni yog fapi cha’ ni yad manang murung’agen e t’uf ni kan gargeleg fare tir “ni ir e nge mang pilung rok piyu Israel,” ma aram me dugliy u wan’ ni nge li’ nge yim’. (Matt. 2:1-3, 13) Ere, yog ni ngan li’ urngin e bitir ni pagel ni l’agruw e duw yangaren nga but’ u lan yu Bethlehem nge pi binaw ni bay u tooben. (Mu beeg e Matthew 2:13-18.) Yugu aram rogon ma de yag ni ngan li’ Jesus ngem’. Machane, mang e gad be fil u murung’agen Satan ko re n’ey? Ba tamilang ndariy fan e yafas ko girdi’ u wan’ Moonyan’. Maku der ma runguy e piin bitir. Riyul’ ni be yan ni “bod ba layon ni be tolul.” Ere, dab mu pagtalin nrib gel e kireb rok!

BA CHEG SATAN KO SABANBAN

14, 15. Uw rogon ni ke tay Satan laniyan’ e girdi’ u “fithik’ e lumor”?

¹⁴ Kemus ni rogon me k’aring Satan be’ ni nge togopuluw ngak Jehovah ni fare Got ni ma t’ufegey e aram e nge bannag faanem. (1 John 4:8) Ma fanay Satan e sasalap ni nge n’igin e girdi’ ni nge dab ra nanged ni “kar gafgowgad ndabisiy ni nge yog Got ngorad.” (Matt. 5:3) Ere, “ke ta’ lanin’rad u fithik’ e lumor” ya nge dab “ra guyed ramaen fare tamilang ni be mat nga dakenrad, ni fare tamilang ni be yib ko Thin Nib Fel’ ni yib rok Got ni murung’agen e flaab rok Kristus, ni Kristus ni ir e ri taareb rogorow Got.”​—2 Kor. 4:4.

¹⁵ Reb e kanawo’ ni be bannag Satan e girdi’ riy nib fel’ rogon e u daken e pi yurba’ i teliw ni googsur. Dariy e maruwar riy nrib gel e felfelan’ ni ma tay Satan u nap’an nra guy e girdi’ ni yad be meybil ko girdi’ rorad ni kar m’ad kakrom, ara yad be meybil ko yal’, nge gek’iy nge ku boch ban’en, ara yad be meybil ko gamanman. Ba gel e felfelan’ ni ma tay ni bochan e manang ni dabun Jehovah “yugu reb e kan ni nge tagenging” ngak! (Ex. 20:5) Ma rib gel e kireban’ riy ni bochan e piin ni yad ma lemnag nib m’agan’ Got ko liyor ni yad ma tay e kar paged yad be gagiyegnagrad boch e machib ni googsur nge boch e yalen ko teliw rorad nib m’ay fan. Pi girdi’ ney e taareb rogorad ngak e piin ni non Jehovah ngorad ni gaar: “Mang ni kam n’iged e salpiy ko pi n’en ni gathi ggan? Mang ni kam pied puluwmed ke m’ay ma dawor mfosgad? Mu telmed ngog mi gimed rin’ e tin ni nggog, me yog ngomed e tin th’abi fel’ e ggan.”​—Isa. 55:2.

16, 17. (a) Mang fan ni gaar Jesus ngak Peter: “Satan, mu chuw rog!”? (b) Uw rogon nrayog ni nge bannagdad Satan ya nge dab kud tedan’dad ko tirok Got ban’en?

¹⁶ Ku rayog ni nge bannag Satan e pi tapigpig rok Jehovah ni yad be pigpig ngak u fithik’ e pasig. Am lemnag e n’en ni buch u nap’an ni yog Jesus ngak pi gachalpen ni ke chugur e ngiyal’ ni nge yim’ riy. I fek apostal Peter Jesus nga orel me gaar ngak: “Somol, dab kum lem nge pag rogon; ya thingari dabi yib e pi n’ir ngom.” Dariy e maruwar riy ni be lemnag Peter ni nge ayuweg Jesus. Machane, me fulweg Jesus ngak ni gaar: “Satan, mu chuw rog!” (Matt. 16:22, 23, NW) Gur, mang fan ni yog Jesus “Satan” ngak Peter? Ya manang e n’en ni bayi buch. Ke taw nga nap’an ni nge yim’ ni nge mang biyul ni maligach me micheg ni Moonyan’ e ba malulifith l’igin. Ere, ngiyal’ nem ni kari par gubin ban’en nga tayoyowol e gathi aram e ngiyal’ ni nge “pag” Jesus ir. Ya baadag Satan ni nge dab ki tiyan’ Jesus.

¹⁷ Ere, chiney ni gad be chugur i yan nga tungun e re m’ag ney e ku gad be par u ba ngiyal’ ni ke mo’maw’ e par riy. Baadag Satan ni nge dab kud tedan’dad, ara ngad ‘paged’ gadad ni aram e ngad nameged e fel’ rogon ko re fayleng ney. Dab mu pag e re n’ey ni nge buch rom! Ya ngam ‘fal’eg rogom ngam par.’ (Matt. 24:42) Dariy ba ngiyal’ ni nge mich u wan’um e pi ban rok Satan, ma ga lemnag ndab ka a yib e tomur fa reb e dabi yib.

18, 19. (a) Uw rogon nrayog ni nge guy Satan rogon ni nge bannagdad ngad lemnaged ndad t’ufgad rok Jehovah? (b) Uw rogon ni ma ayuwegdad Jehovah ni ngad pared ni gad be tedan’dad?

¹⁸ Ku bay reb e kanawo’ ni ma guy Satan rogon ni nge bannagdad riy. Ma k’aringdad ni ngad lemnaged ndad t’ufgad rok Got maku dabi n’ag fan e kireb rodad. Ireray boch e ban ni ke sum rok Satan. Bin riyul’ riy e, mini’ e de t’uf rok Jehovah ara dariy rogon ni nge t’ufeg Jehovah? Aram Satan. Mini’ e dabi n’ag Got fan e kireb rok? Ku bayay, aram Satan. Machane, be micheg e Bible ngodad ni gaar: “Yi Got e gathi ba laniyan’. Gathi bayi pag talin e maruwel ni kam ngongliyed, ara rogon nib t’uf romed ni kam daged ni bochan e ayuw ni kam pied ma ki gimed be pi’ ngak e piin ni gimed ni girdien Kristus.” (Heb. 6:10) Ma felfelan’ Jehovah ko athamgil ni gad ma tay ni ngad rin’ed e tin nib m’agan’ ngay, ma pigpig ni gad be tay ngak e dabi yan i aw nib m’ay fan. (Mu beeg e 1 Korinth 15:58.) Dab da paged Satan ni nge bannagdad.

¹⁹ Ere, kad filed nib gel gelngin Satan, ma ir be’ nrib kireb, mab cheg ko sabanban. Ere, uw rogon ni ngad gelgad ko re toogor ney? Ra ayuwegdad Jehovah. Maku be ayuwegdad e Thin rok ni ngad nanged e pi ban rok Satan, ma gad nang e ‘tin ni be lemnag ngodad.’ (2 Kor. 2:11) Faanra tamilang u wan’dad e pi ban rok Satan, ma aram e ra mom rogon ngodad ni ngad pared ni gad be tedan’dad. Machane, de gaman ni kemus ni ngad nanged e pi ban rok. Ya be gaar e Bible: “Mi gimed togopluw ngak fare moonyan’, me mil romed.” (Jas. 4:7) Ere, bin migid e article e gad ra weliy riy dalip e kanawo’ nrayog ni ngad chamgad riy ngak Satan ngad gelgad.